नवलपरासीमा  १ लाख बढीको अवैध मालसामान नियन्त्रणमा

सहबान अन्सारी/मध्यान्ह

नवलपरासी : नवलपरासीको  सीमा क्षेत्रबाट १ लाख १ हजार ३ सय ८० रुपैयॉ मूल्य बराबरको अवैध मालसामान प्रहरीले नियन्त्रणमा लिएको छ । बुधबार  सरावल गाउँपालिका वडा नं. ६  बडसारेमा नेपालबाट भारततर्फ अवैधरुपमा लैजादै  गरेको करिब १५ हजार मुल्य बराबरको  ४ बोरा मटर ( केराउ) साथै  भारबाट अबैधरुपमा ल्याउदै गरेको करिब ८६ हजार ३ सय ८० मुल्य बराबरको विभिन्न  साडी २० थान, लेडिज कुर्ताको थान कपडा १९ मिटर, जेन्स भित्री कपडा तथा ३८ पोका धनियाको बिउ सीमा प्रहरी चौकी महेशपुरले   नियन्त्रणमा लिएको हो । 

उक्त मटर र कपडा मानिसहरुले मोटरसाईकलमा  राखी लैजादै गर्दा तथा ल्याउदै गर्दा प्रहरी टोलीलाई देखेपछि उनीहरु उक्त सामानहरु फाली भगेका थिए । नियन्त्रणमा लिइएको सबै सामान आवश्यक कारवाहीको लागि महेशपुर भन्सार कार्यालय पठाइएको  जिल्ला प्रहरी कार्यालय नवलपरासीले जनाएको छ ।

कोरोना नियन्त्रण गर्न खोटाङमा 'तपाईको मास्क खै' अभियान

सन्तोश पौडेल/मध्यान्ह 

खोटाङ : दश स्थानीय तह रहेको खोटाङमा 'तपाईंको मास्क खै' अभियान शुरु गरिएको छ । कोभिड–१९ को जोखिम न्यूनीकरण गर्न  तथा जनचेतना मूलक सन्देश फैलाउदै जिल्ला प्रशासन कार्यालय, जिल्ला प्रहरी कार्यालय, दिक्तेल रुपाकोट मझुवागढी नगरपालिका, उद्योग बाणिज्य संघ र नेपाल रेडक्रस सोसाइटीको संयुक्त आयोजनामा 'तपाईंको मास्क खै' अभियान शुरु गरिएको हो  ।  

सरकारले लागु गरेको बन्दाबन्दी हटेपनि कोरोना भाइरस सङ्क्रमणको जोखिम कायम रहेकाले नागरिकलाई अनिवार्य मास्क लगाउन आग्रह गर्दै 'तपाईंको मास्क खै' अभियान शुरु गरिएको नगरप्रमुख दीपनारायण रिजालले बताए । “खोटाङमा कोरोना सङ्क्रमण मुक्त भएसँगै सर्वसाधारण मास्क नलगाइ हिड्न थालेका छन्”, उनले भने, “बन्दाबन्दी हटेसँगै कोरोना भाइरसको सङ्क्रमण बढ्ने सम्भावना रहेकाले सर्वसाधरणलाई अनिवार्य मास्क लगाउनु पर्छ भन्ने उद्देश्यका साथ संयुक्त अभियान थालेका हौँ ।”  

अभियानको पहिलो बुधबार दिकतेल बजारमा मास्क नलगाइ हिँडेका संर्वसाधरणलाई निःशुल्क मास्कसमेत वितरण गरिएको थियो । अभियान सफल पार्न जनपथ र सशस्त्र प्रहरी टोली परिचालन गरिएको छ । अहिले खोटाङ कोरोना सङ्क्रमण मुक्त भएपनि पुनः संक्रमण देखिन सक्ने भएकाले घरबाहिर हिडडुल गर्दा अनिवार्य मास्क लगाउनु पर्ने, मास्क नलगाइ हिँडडुल गरेको साथै सामाजिक तथा भौतिक दूरी कायम नगरिएको भेटिएमा सङ्क्रमक रोग ऐन २०२० अन्तरगत कारबाही गरिने प्रमुख जिल्ला अधिकारी शालिकगा्रम शर्मा पौडेलले बताए ।

“सरकारले लागू गरेको नियम उलङ्घन गरेको पाइएमा एक महिनासम्म कैद वा रु १०० जरिवाना वा दुबै सजाय गरिनेछ”, उनले भने, “ऐन अन्तरगत काममा खटिएका आधिकारिक व्यक्तिलाई काममा बाधा पुर्‍याउनेलाई छ महिनासम्म कैंद जरिवाना वा दुबै सजाय गरन्छ ।”  

दुई नगरपालिका र आठ गाउँपालिका रहेको जिल्लामा बुधबारदेखि शुरु गरिएको अभियानलाई आगामी दिनमा पनि सञ्चालन गरिने बताइएको छ । अभियानलाई गाउँगाउँसम्म पुर्‍याउन मातहतका प्रहरीलाई निर्देशन दिइएको प्रजिअ पौडेलले जानकारी दिएका छन् ।

पाष्टरले जिउँदो हुन्छ भनेपछि पाँच दिनसम्म घरमै शव

कैलाली : कैलालीको टीकापुर–१ गणेशपुर शिविरमा मरेको मानिस जिउँदो हुने विश्वासमा पाँच दिनसम्म शव घरमै राखिएको छ । स्थानीय दीपक चौधरीको घरभित्र शव गन्हाउन लागेपछि स्थानीयवासीले प्रहरीलाई खबर गर्दा लास रहेको रहस्य खुलेको हो । बस्ती सुरक्षा समितिका संयोजक बुद्धि दमाईले प्रहरीलाई खबर गरेपछि इलाका प्रहरी कार्यालय टीकापुरबाट प्रहरी घटनास्थल पुगेको थियो । शक्तिनगर शिविरका अगुवा मोतीराम डगौरा मुटुको बिरामी थिए ।

कोहलपुरमा उपचारपछि घर फर्केका मोतीरामको मृत्यु भएको थियो । मृत्युपछि पाँच दिनअघि थप उपचारका लागि पाष्टरको घर ल्याइएको मोतीरामका २१ वर्षका छोरा ईश्वर डगौराले जानकारी दिएका छन् । पाष्टर र धर्मप्रति विश्वासमा परेका ईश्वर सात दिनपछि बाबु उठ्ने विश्वासमा थिए । पाष्टर चौधरी पनि शवमा पसिना आएर गन्ध आएको र लास उठ्ने विश्वासमै थिए तर मङ्गलबार बिहान गन्धले खाना खान नसकी छिमेकीको घरमा गएको बताउँछन् । पाष्टर दीपकले टीकापुर नगरपालिका–४ का एक जनाको शरीरमा लागेको घाउ सञ्चो भएको विश्वासमा मोतीरामलाई प्रार्थना गरेर राखिएको बताए ।

मङ्गलबार दिउँसो मोतीरामको शरीर हेर्दा सडेर गन्हाइसकेको छ । प्रहरी पुगेपछि ५ बजेतिर शव उठाएर टीकापुर अस्पताल ल्याइएको इलाका प्रहरी कार्यालय टीकापुरका प्रमुख प्रहरी नायब उपरीक्षक मधुसुदन न्यौपानेले जानकारी दिए ।

नगरपालिकालाई १४ लाखको सामग्री हस्तान्तरण

सन्तोश पौडेल/मध्यान्ह 

खोटाङ : बाल सेवा समाज नेर्पा, खोटाङले क्वारेन्टिन व्यवस्थापन गर्नका लागि रुपाकोट मझुवागढि नगरपालिकालाई १४ लाखको सामग्री हस्तान्तरण गरेको छ । खोटाङको दिक्तेल रुपाकोट मझुवागढी नगरपालिकाको क्वारेन्टिन व्यवस्थापनका लागि खोटाङ जिल्लामै स्थापना भई क्रियाशिल रहेको स्थानीय ख्याती प्राप्त संस्थाको रुपमा परिचित संस्था बालसेवा समाज नेर्पा खोटाङले कोरोना भाइरस (कोभिड–१९) संक्रमणका कारण निम्तिएको महासंकटबाट सुरक्षित रहनका लागि एक कार्यक्रमका बीच १४ लाख बढीको सामग्री हस्तान्तरण गरेको हो ।

क्रिश्चियन एडको आर्थिक सहयोगमा उक्त संस्थाद्वारा सञ्चालित सशक्तिकरणका लागि महिला संलग्नता र जीविकोपार्जनका लागि उद्यमशिलता विइ फिल योजना परियोजना अन्तर्गत कोभिड–१९ महामारीबाट बच्न नागरिकहरुलाई सुरक्षित रहन तथा सहज होस् भन्ने उद्देश्यका साथ क्वारेन्टिन व्यवस्थापनार्थ संस्थाकी अध्यक्ष चन्द्रकला भुजेलमार्फत नगरपालिकाका नगरप्रमुख दिपनारायण रिजाललाई हस्तान्तरण गरिएको हो  ।

पहिलो चरणमा कोरोना भाइरसको विश्वव्यापी महामारीलाई न्यूनीकरण गर्नका लागि समाजले दिक्तेल रुपाकोट मझुवागढी नगरपलिका अनतर्गतका १५ वटै वडामा पुगी १५ सय ४१ घरधुरीलाई खाद्यान्नलगायत ३३ लाख ९८ हजार बराबरको राहत सामग्री वितरण कार्य सम्पन्न गरिएको परियोजनाका प्रवन्धक युवराज रिजालले जानकारी दिए ।

दोस्रो चरणमा पुनः क्वारेन्टिन केन्द्रित राहत सामग्रीको प्याकेज हस्तान्तरण गरिएको हो । दोस्रो चरणको राहत सामग्रीमा जिल्ला अस्पताल दिक्तेलमा रहेको आइसोलेशन कक्षलाई म्याट्रेस, सिरानी, वेड कभर, ब्लान्केट, झुल ५० सेट, व्यक्तिगत सरसफाइका सामग्री अन्तर्गत चप्पल, तुथपेष्ट, ब्रस, टावेल, के एन ९५ माक्स, सावुन, सेनिटाइजर सेट १०० जनालाई, पानी व्यवस्थापनका लागि स्ट्याण्ड सहितको ५ वटा ५०० लिटरको हिल टेक ट्याँकी,  खाद्यान्न सहयोग अन्तर्गत  ६६ बोरा चामल, २ सय  केजी दाल, ५० लिटर खानेतेल र केजी नून लगायतका सामग्री हस्तान्तरण गरिएको बालसेवा समाज नेर्पा खोटाङले जनाएको छ ।

सहयोग हस्तान्तरण कार्यक्रममा प्रमुख अतिथिकोरुपमा बोल्दै नगरप्रमुख रिजालले महासंकटको वेला गैससहरुको भूमिकाको सन्दर्भमा बाल सेवा समाज नेपाल र नेपाल रेडक्रस सोसाइटी जिल्ला शाखा खोटाङले महत्वपूर्ण जिम्मेवारी निर्वाह गरेकोप्रति मुक्तकण्डले प्रसंशा गर्न सकिने बताए ।

रुपन्देहीमा क्वारेन्टिनका सुरक्षा गार्डले आफैंलाई आगो लगाएर गरे आत्मदाह

रूपन्देही : रूपन्देहीको देवदह नगरपालिकाको क्वारेन्टिाका सुरक्षा गार्डले शरीरमा मट्टीतेल खन्याएर आत्मदाह गरेका छन् । देवदह ५ मितेरी टोलका २४ वर्षीय विपिन बस्यालले आज बिहान ३ वजेतिर शरीरमा मट्टीतेल खन्याएर आत्मदाह गरेका हुन् ।

जलेर गम्भीर घाइते भएका भएका उनलाई उपचारका लागि लुम्बिनी प्रादेशिक अस्पतालमा ल्याउने क्रममा मृत्यु भएको नगरप्रमुख हिराबहादुर खत्रीले जानकारी दिए । बस्याल शित्तलनगरको नेपाल मगर संघको भवनमा बनाइएको क्वारेन्टाइनमा सुरक्षा गार्डका रूपमा कार्यरत थिए ।

उनी काममा लागेको एकहप्ता भएको मेयरले जानकारी दिए । उनले आत्मदाह गर्नुको कारणबा अनुस्धान भइरहेको प्रहरीले जनाएको छ ।

चितवनमा होम क्वारेन्टिनमा रहेका एक पुरुषको मृत्यु

चितवन : चितवनको खैरहनी नगरपालिकाको होम क्वारेन्टिनमा रहेका एक पुरुषको मृत्यु भएको छ । जिल्ला स्वास्थ्य कार्यालय चितवनका अनुसार उनी खैरहनी नगरपालिका वडा नम्बर ६ स्थित केसी वोरा उद्योगमा कार्यररत मजदुर हुन् । उनी बारा कलैयाका हुन् ।

सामान्य मजदुरको काम गर्ने ती ४१ वर्षीय पुरुषको स्वाब संकलन गरी भरतपुर कोभिड–१९ प्रयोगशाला पठाउने तयारी गरिएको छ । चिकित्सकका अनुसार मृतकमा कोरोना भाईरस सम्बन्धी कुनै लक्षण देखिएको थिएन ।

सशस्त्र प्रहरीले नियन्त्रणमा लिएको सामान भन्सार बुझायो

सहबान अन्सारी/मध्यान्ह

नवलपरासी : नवलपरासीमा सशस्त्र प्रहरीले नियन्त्रणमा लिएको ६१ हजार मूल्य बराबरको सामान भन्सार बुझाएको छ । सोमवार सशस्त्र प्रहरी बोर्डर आउट पोष्ट गुठी परसौनीले लकडाउन समयमा बिभिन्न नाकाहरुबाट भारत तथा नेपालबाट अबैधरुपमा ओसार पसार गर्दै गरेको मटर (केराउ) मोटर पार्टस् र कस्मेटिक लगायतका सामान आवश्यक कार्वाहीको लागि महेशपुर भन्सार कार्यालयमा बुझाइएको हो ।

दशगजा क्षेत्रबाट बरामद गरिएका ती सामानहरु स्थानीय पत्रकारहरुको उपस्थितिमा महेशपुर भन्सार कार्यालयमा बुझाइएको सशस्त्र प्रहरी निरीक्षक सन्तोष खरेलले जानकारी दिए । लकडाउनको समयमा  सीमा तस्करी  तथा सीमा सुरक्षाको निगरानी पूर्णरुपले बढाइएको सशस्त्र प्रहरीले जनाएको छ ।

दिवङ्गत आफन्तको सम्झनामा गाईजात्रा मनाइँदै

काठमाडौं : भाद्र कृष्ण प्रतिपदादेखि अष्टमीसम्म आठ दिन मनाइने परम्परागत सांस्कृतिक पर्व ‘गाईजात्रा’ आज विभिन्न कार्यक्रमको आयोजना गरी देशभर आरम्भ गरिँँदैछ ।

आजका दिन एक वर्षभित्र दिवङ्गत भएका आफन्तको सम्झनामा गाई वा मानिसलाई गाईका रूपमा सिङ्गारी आ–आफ्ना क्षेत्रमा परिक्रमा गराउने र उनीहरूलाई श्रद्धालुद्वारा दूध, फलफूल, रोटी, चिउरा, दहीका साथै अन्न र द्रव्य दान गरिन्छ । यसरी नगरपरिक्रमा गर्नाले वर्षभरि मृत्यु भएका व्यक्तिहरू गाईको पुच्छर समाई वैतरणी पार हुन्छन् भन्ने धार्मिक विश्वास छ ।

राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन ‘जनतालाई आ–आफ्नो घरका मरेका व्यक्तिका नाममा गाईजात्रा निकाली सहर परिक्रमा गराउनू’ भनी आज्ञा दिएका आधारमा यो पर्व शुरु भएको ऐतिहासिक तथ्य छ । यसबाट पनि रानीको मन शान्त हुन नसकेकाले विभिन्न प्रकारका प्रहसन तथा व्यङ्ग्यात्मक कार्यक्रमसमेत गराउने आदेश दिएअनुरूप हास्यव्यङ्ग्यको प्रचलन चलेको हो भन्ने जन श्रुति पाइन्छ ।

प्रताप मल्लको पालादेखि प्रचलनमा आएको गाईजात्रा हनुमानढोकास्थित राजप्रासाद भएर जानुपर्ने प्रथा अहिलसम्म पनि जारी छ । देशका विभिन्न सहरमा गाईजात्रा मनाइने भए पनि उपत्यकामा यसको विशेष रौनक देखिने गरेकामा यस वर्ष कोरोना भाइरसको सङ्क्रमणबाट बच्न पनि भीडभाड कम गर्न सरकारले आह्वान गरेको छ । कोरोनाका कारण भौतिक दूरी कायम गरेर चाडपर्व मनाउनुपर्ने अवस्था छ ।

भाद्र कृष्ण अष्टमीका दिनसम्म मनाइने यस पर्वका क्रममा प्रहसन, सामाजिक विकृतिप्रति व्यङ्ग्यात्मक प्रदर्शन, नाचगान तथा मृत व्यक्तिको सम्झनामा रामायणको करुण रसका गीतहरू पनि गाइन्छ ।

रौतहट ईशनाथ नगरपालिका ५ का वडाध्यक्ष ठाकुरको निधन

रौतहट : रौतहटमा एक जना वडाअध्यक्षको निधन भएको छ । ईशनाथ नगरपालिका वडा नम्बर ५ जटहराका वडाअध्यक्ष ५५ वर्षीय देवेन्द्र ठाकुरको गए राति निधन भएको हो । रौतहटको पश्चीमी किनारामा रहेको इशनाथ नगरपालिका सबै भन्दा बढी कोरोना संक्रमित भेटिएको स्थानिय तह पनि हो ।

केही दिनदेखी स्वास्थ्य अवस्था खराब रहेका वडाअध्यक्ष ठाकुरलाई गए राति अस्पताल लैजाँदै गर्दा बाटोमै मृत्यु भएको जिल्ला जनस्वास्थय कार्यालयका प्रमुख महेश साहले बताए । गौर १ स्थीत घरमा रहेका वडाअध्यक्ष ठाकुरलाई दुई सातादेखी ज्वरो, रुघाखोकी लागेको थियो । गए राति उनलाई श्वास फेर्न समस्या भएपछि उपचारको लागि सदरमुकाम गौरमा रहेको एक निजी क्लीनीकमा लैजादै गर्दा बाटोमै ज्यान गएको जनस्वास्थ्य प्रमुख साहले बताए ।

मृतक वडाअध्यक्ष ठाकुरको आज अन्तीम सँस्कार गरिएको छ भने भोलि उनका परिवारजनहरुको स्वाब संकलन गर्ने तयारी रहेको साहले बताए । मृतक ठाकुरलाई कोरोना संक्रमणको आशंकामा तिनदिन पहिले आरडिटी गर्दा नतिजा नेगेटिभ आएको थियो ।

कर्णालीमा कोपिला भ्याली समाजद्वारा २ करोड  ७६ लाख सहयोग 

भिम प्रसाद शर्मा/मध्यान्ह

सुर्खेत : कोरोना संक्रमण  (कोभिड १९ ) को महामारी फैलिरहेको बेला संक्रमणको जोखिम रोकथाम नियन्त्रणको लागि कोपिला भ्याली समाजले  हालसम्म २ करोड ७६ लाख रुपैयॉ सहयोग गरेको छ ।  अहिले  कोरोना महामारीले विश्व अर्थतन्त्रमा चुनोति दिएको अवस्थामा कर्णालीका  दुर्गम नगरपालिका र गाउँपालिकाका  जनताका लागि यो सहयोग बरदान साबित  भएको छ । 

गत चैत्र ११ गते देखि नेपालमा शुरु भएको लकडाउन पश्चात समाजले आफ्ना सहयोगी हात फुकाएको थियो । उक्त समाजले साउन १८ गतेसम्म सम्ममा २ करोड ७४ लाख १६ हजार २ सय ९५ रुपैया १८ पैशा सहयोग गरेको छ ।  कोरोना संक्रमण फैलिए पछि  छिमेकी देश भारतबाट कर्णाली प्रदेश भित्रिएका ५५ हजार मानिसहरुलाई १ बोतल पानी र ‘ गुड डे’ विस्कुट वितरण गरेको थियो । त्यस्तै कर्णालीका गाउँपालिका र नगरपालिकाका गरी ६३ वटा स्थानीय तहका ६५८ क्वारेण्टाइनमा सहयोग गरेको रोपिला भ्साली समाज सुर्खेतका अध्यक्ष टोप बहादुर मल्लले जानकारी दिए । 

समाजले क्वारिन्टाइनका लागि आवश्यक पर्ने सामग्री लगायत महिलाहरु महीनावरी  हुदाँ चाहिने सेनेटरी प्याड र शिशुहरुका लागि डाइपर र स्यारलेक्शजस्ता आवश्यकीय समानहरु बितरण गर्नुका साथै कोरोनाको जोखिम स्थानमा स्वास्थ्यकर्मीसमेत पठाएर  सहयोग गरिएको अध्यक्ष मल्लले मध्यान्हलाई बताए ।