ललितपुर मेयर कपः कोशीविरुद्धको खेलमा एपीएफ सात विकेटले विजयी

काठमाडौं : सशस्त्र प्रहरी बलको एपीएफ क्लबले यहाँ जारी ललितपुर मेयर कप महिला टी–ट्वान्टी राष्ट्रिय क्रिकेट प्रतियोगितामा कोशी प्रदेशलाई पराजित गरेको छ । एपीएफले कोशीलाई सात विकेटले पराजित गरेको हो । 

कीर्तिपुरस्थित त्रिभुवन विश्वविद्यालयको क्रिकेट मैदानमा टस जितेर पहिला ब्याटिङ गर्दै कोशीले निर्धारित २० ओभरको खेलमा पाँच विकेट गुमाएर ८७ रन बनायो । एपीएफले ८८ रनको विजयी लक्ष्य १८ दशमलव एक ओभरमा तीन विकेट गुमाएर पूरा गर्‍यो ।

एपीएफका लागि ममता चौधरीले अविजित २१, कप्तान सीता राना मगरले १९, इन्दु बर्माले १८ तथा ज्योती पाण्डे र रोमा थापाले ११/११ रन बनाइन् । बलिङतर्फ कोशीका लागि एलिशा खादिया, रुबिना क्षेत्री र निशा साहले एक एक विकेट लिइन् । 

यसअघि ब्याटिङ गर्दै कोशीका लागि काजल श्रेष्ठले २९, कप्तान रुबिना क्षेत्रीले २४ र अप्सरी बेगमले २२ रन बनाइन् । बलिङतर्फ एपीएफका लागि सीता राना मगरले तीन तथा इन्दु बर्माले एक विकेट लिइन् । जितसँगै एपीएफ क्लब अङ्क तालिकाको शीर्ष स्थानमा पुगेको छ । 

ब्याडमिन्टनमा चासो राख्दै गाउँका युवा

प्रचण्ड खत्री/रुकुम पश्चिम 

रुकुम पश्चिम : रुकुम पश्चिमका गाउँका युवाहरु ब्याडमिन्टन खेलप्रति आकर्षित हुँदै गएका छन् ।

यसअघि रुकुम पश्चिममा सदरमुकाममा रहेका सरकारी कार्यलयका कर्मचारीले मात्र खेल्दै आएको ब्याडमिन्टन खेल अहिले भने गाउँका युवाहरुले पनि खेल्न शुरु गरेको ब्याडमिन्टन खेलाडी एवं स्वास्थ्यकर्मी विवेक बुढाथोकीले बताए । बुढाथोकीले आफू स्वास्थकर्मी भएदेखि ब्याडमिन्टन खेल्ने गरेको बताए । 

आठबिसकोटका नगरपालिका वडा नं. ३ का स्थानीय युवा रमेश बुढाले आफू साथीहरुसँग बिहानै ब्याट, कक  र नेट बोकेर ब्याडमिन्टन खेल्न जाने गरेको बुढाले बताए । आफू र साथीहरुले दैनिक २ घण्टा ब्याडमिन्टन खेल्ने गरेको बताउँदै उनले खेल क्षेत्रमा विकास गर्ने उद्देश्य रहेको बताए । उनले ब्याडमिन्टन खेल्दा स्वास्थ्य पनि राम्रो हुने बताए ।

बाफिकोट वडा नं. १० का वडा अध्यक्ष हरि चन्द धेरैजसो गाउँ र गाउँका समस्या सुन्न गाउँमा व्यस्त हुन्छन् । तर व्यस्तताका बाबजुद पनि आफू सधैं गाउँका युवाहरुसँग मिलेर ब्याडमिटन खेल्ने गरेको उनी बताउँछन् । 

ब्याडमिन्टन खेल राष्ट्रिय खेलको रुपमा चिन्निन्छ । स्थानीय तहले यस खेललाई जगेर्ना गर्न जरुरी रहेको गाउँका युवाहरु बताउँछन् । स्थानिय तहले युवाहरुलाई ब्याडमिन्टन खेल्न प्रोत्साहन गरे खेल क्षेत्रमा खेलाडी उत्पादन हुने युवाहरु बताउँछन् ।

बैतडीमा यु–१६ क्रिकेट छनोट प्रतियोगिता हुँदै

बैतडीः बैतडीमा १६ वर्षमुनिको क्रिकेट छनोट प्रतियोगिता आजदेखि शुरु हुँदैछ । यहाँका पालिकाबाट छनोट भएर आएका खेलाडीबाट टोली बनाएर प्रतिस्पर्धा गराउन लागिएको हो । 

बैतडी जिल्ला क्रिकेट सङ्घका सचिव सिद्धराज बोगटीका अनुसार छनोट प्रतियोगितामा सहभागी गराउन सबै पालिकालाई जिल्ला क्रिकेट सङ्घले पत्राचार गरेको छ । सहभागी हुने खेलाडीले अनिवार्यरुपमा उमेर खुल्ने कागजपत्र पेश गर्नुपर्नेछ । 

छनोट प्रतियोगिता देहिमाडौँस्थित निङ्ग्लाशैनी खेल मैदानमा सञ्चालन हुनेछ । प्रतियोगितामा उत्कृष्ट खेल प्रदर्शन गरेका आधारमा जिल्ला टोली छनोट गर्ने प्रशिक्षक दीपेन्द्रबहादुर बोहराले बताए । छनोट भएको टोलीले प्रदेशस्तरीय छनोट प्रतियोगिता खेल्नेछ ।  

नेपाल क्रिकेट सङ्घ (क्यान)ले मलेशियामा हुने १६ वर्षमुनीको क्रिकेट प्रतियोगितालाई मध्यनजर गर्दै जिल्ला छनोट यही चैत १५ भित्र गरिसक्न निर्देशन दिएको थियो । 

सुजलद्वारा अन्तर्राष्ट्रय फुटबलबाट सन्यास घोषणा

काठमाडौं : नेपाली राष्ट्रिय फुटबल टिमका मिडफिल्डर सुजल श्रेष्ठले अन्तर्राष्ट्रिय फुटबलबाट सन्यासको घोषणा गरेका छन् । सुजलले बिहीबार सामाजिक सञ्जालबाट अन्तराष्ट्रिय फुटबलबाट सन्यास घोषणा गरेका हुन् ।

अस्ट्रेलिया जानुअघि सुजलले अन्तर्राष्ट्रिय फुटबलबाट सन्यास घोषणा गरेका हुन् । सुरक्षित भविष्यका लागि सुजल बिहीबार राति अस्ट्रेलिया प्रस्थान गर्दै छन् । मछिन्द्र फुटबल क्लबबाट नेपालको घरेलु फुटबल खेलिरहेका नेपाली टिमका रक्षक रजिन धिमालसँगै उनी अस्ट्रेलिया उड्न लागेका हुन् ।

'मेरा सम्पूर्ण सुभचिन्तक, समर्थक र नेपाली फुटबल प्रेमीहरु माझ मेरो न्यानो नमन ११ वर्ष, ५१ खेल आफ्नो देशको झण्डा छातीमा बोकेर मैदानमा उत्रने अवसर पाउँदा निकै गर्विलो महसुस गरेको छु । केही खुसीका पल त केही दुःखका, कतै उपाधि त कतै निराश क्षण लगायत यी सबै तिता मिठा सम्झनाहरु मनमा समेटी आज म राष्ट्रिय टोलीबाट आफ्नो सन्यास घोषणा गर्दछु । यति लामो समयसम्म राष्ट्रिय टोलीको जर्सी लगाउन पाउनु मेरो लागि ठूलो सम्मान थियो । मैले यो गर्व र जोशका साथ निर्वाह गरें । हाल राष्ट्रिय टोलीमा रहेका र अन्य भाइहरु धेरै क्षमतावान छन् । र, म विस्वस्त छु कि भाइहरुले देशको झण्डा झुक्न दिने छैन । अब पालो नयाँ पुस्ताको हो,' सुजलले लेखेका छन् ।

सुजलले सन्यासका लागि यो उपयुक्त समय भएको बताएका छन् । 'सबै प्रशंसक र समर्थकहरूलाई धन्यवाद जसले मलाई ताली र जयजयकारले साथ तथा हौसला दिए । साथै मलाई विश्वास गर्दै नियमित राष्ट्रिय टोलीमा स्थान दिँदै यहाँसम्म पुर्‍याउन मद्दत गर्नुहुने सम्पूर्ण प्रशिक्षकहरुलाई पनि हृदयदेखि नै धन्यवाद व्यक्त गर्न चाहन्छु । मलाई लाग्छ अन्तर्राष्ट्रिय फुटबलबाट सन्यास लिने यो मेरो लागि उपयुक्त समय हो । जय नेपाली फुटबल ।'

सुजलले सन् २०११ मा भुटानविरुद्धको मैत्रीपूर्ण खेलबाट राष्ट्रिय टिममा डेब्यू गरेका थिए । नेपालले २०१६ मा मलेसियामा आयोजना भएको एएफसी सोलिडारिटी कपको उपाधि जित्दा सुजल टिममा थिए । नेपालमा आयोजना भएको १३ औं सागमा सुजलको कप्तानीमा नेपालले स्वर्ण पदक जितेको थियो ।

सुजल ए डिभिजन लिगमा लगातार ४ पटक च्याम्पियन बन्ने ३ खेलाडी मध्ये एक हुन् । सुजलले मनाङ मर्स्याङ्दी क्लबबाट दुई पटक र मछिन्द्रबाट दुई पटक लिग उपाधि जितेका थिए । 

एसियन कप छनोटमा नेपाल समूह ‘बी’ मा

काठमाडौंः उज्वेकिस्तानमा आयोजना हुने एएफसी यू–२० महिला एसियन कप छनोट–२०२४ फुटबल प्रतियोगिताअन्तर्गत दोस्रो चरणको छनोटमा नेपाल समूह ‘बी’ मा परेको छ ।

एसियाली फुटबल महासङ्घ (एएफसी)ले विहीबार सार्वजनिक गरेको समूह विभाजनअनुसार नेपाल समूह ‘बी’ मा परेको हो । नेपालको समूहमा चीन, म्यानमार र चाइनिज ताइपे रहेका छन् । 

समूह ’ए’ मा  अष्ट्रेलिया, भियतनाम, इरान र लेबनान रहेका छन् । यसअघि प्यालेस्टाइनमा भएको पहिलो चरणको छनोटबाट नेपाल दोस्रो चरणमा पुगेको हो । त्यतिबेला नेपाल आफ्नो समूहको  विजेता बन्दै दोस्रो चरणमा पुगेको हो । नेपालले पहिलो खेलमा प्यालेस्टाइन र दोस्रो खेलमा नर्दन मारियाना आइल्यान्डलाई पराजित गरेको थियो ।

 
दोस्रो चरणको छनोट आगामी जुन ३ देखि ११ तारिखसम्म हुनेछ । जसबाट उत्कृष्ट चार टोलीले उज्वेकिस्तानमा हुने यू–२० महिला एसियन कप खेल्नेछन् । उज्वेकिस्तानमा हुने यू–२० महिला एसियन कप २०२४ को मार्चमा हुनेछ । यू–२० महिला एसियन कपमा विभिन्न १६ टोलीले प्रतिस्पर्धा गर्नेछन् ।

एसीसी प्रिमियर कप : नेपाल र ओमान एकै समूहमा, पहिलो खेल मलेसियासँग

काठमाडौं : नेपालमा आगामी वैशाख ५ देखि १८ गते (अप्रिल १८ देखि मे २) सम्म आयोजना हुने एसीसी प्रिमियर कपको खेल तालिका सार्वजनिक भएको छ । प्रिमियर कपमा एसियाका टेष्ट खेल्नेबाहेकका १० एसोसिएट टोलीले प्रतिस्पर्धा गर्नेछन् । जहाँ १० टोलीलाई दुई समूहमा विभाजन गरिएको छ ।

बिहीबार एसियाली क्रिकेट काउन्सिल (एसीसी) ले सार्वजनिक गरेको ड्र अनुसार नेपाल समूह ए मा परेको छ । समूह ए मा नेपालसँगै ओमान, कतार, मलेसिया र साउदी अरेबिया रहेका छन् । यस्तै समूह बी मा यूएई, हङकङ, कुवेत, सिंगापुर र बहराइन रहेका छन् ।
 

प्रतियोगिताका खेलहरु कीर्तिपुरस्थित टियु मैदान र मुलपानीमा रहेको क्रिकेट मैदानमा सञ्चालन हुनेछ । उद्घाटन खेलमा नेपालले टियु मैदानमा वैशाख ५ गते अर्थात अप्रिल १८ मा मलेसियासँग खेल्ने छ । नेपालले दोस्रो खेल वैशाख ८ गते अर्थात अप्रिल २१ मा ओमानसँग टियुमा खेल्नेछ ।

नेपालले वैशाख ११ गते अर्थात अप्रिल २४ मा साउदी अरेबियासँग मुलपानीमा खेल्नेछ । नेपालले वैशाख १४ गते अर्थात अप्रिल २७ मा कतारसँग टियुमा खेल्नेछ ।

सेमिफाइनल खेल वैशाख १६ गते अर्थात अप्रिल २९ मा हुनेछ । फाइनल खेल वैशाख १८ गते अर्थात मे १ मा टियुमा हुनेछ । यदि फाइनलमा पानी परेको खण्डमा एक दिन रिजरर्भ डे राखिएको छ । तेस्रो स्थानका लागि वैशाख १७ गते अर्थात अप्रिल ३० मा खेल हुनेछ ।

हरेक समूहमा शीर्ष स्थानमा रहने दुई टोली सेमिफइनल खेल्ने छन् । सेमिफाइनलका विजेता राष्ट्रले फाइनल खेल्ने छ। फाइनलको विजेता टोली एसिया कपका लागि छनोट हुनेछ । एसिया कप आगामी सेप्टेम्बरमा आयोजना हुनेछ । यस्तै शीर्ष तीनमा रहने टोली एसिया इमर्जिङ कपका लागि छनोट हुनेछन् ।

खेल तालिका :

सातौँ संकरणको विराट गोल्डकप आजदेखि

विराटनगरः सातौँ संस्करणको विराट गोल्डकप विहीबारदेखि विराटनगरको शहीद रङ्गशालामा शुरु हुनेभएको छ । प्रतियोगिता चैत १७ गतेसम्म सञ्चालन हुनेछ । आज हुने गोल्डकपको उद्घाटन खेलमा आयोजक घरेलुु टिम विराटनगर सिटी क्लब तथा नेपाल पुलिस क्लब भिड्दैछन् । 

प्रतियोगितामा नेपाल, भारत र भूटानका गरी गरी आठ वटा टोलीले सहभागिता जनाउने विराटनगर महानगरपालिकाका प्रमुख तथा गोल्डकपका संयोजक नागेश कोइरालाले जानकारी दिए । 

गोल्डकपको विजेता टिमले रु. २० लाख १५ हजार तथा उपविजेता टोलीले रु. १० लाख २५ हजारसहित पदक र प्रमाणपत्र प्राप्त गर्नेछन् । प्रतियोगितामा तीन विभागीय टोली एपीएफ, त्रिभुवन आर्मी र नेपाल प्रहरी तथा सङ्कटा, जाउलाखेल र घरेलु टिम विराटनगर सिटी एफसीको सहभागिता रहने प्रतियोगिताका सहसंयोजक सुवाशिष कोइरालाले जानकारी दिए ।

यसपटकको विराट गोल्डकपमा विधागत खेलाडीलाई जनही रु. २५ हजार तथा प्लेयर अफ द म्याचलाई रु. ११ हजार पुरस्कार प्रदान गरिनेछ । प्रतियोगिता सम्पन्न गर्नका लागि दुई करोड ५० लाख खर्च लाग्ने अनुमान गरिएको छ । 

तत्कालीन राजा महेन्द्रका नामबाट २०१८ सालमा महेन्द्र गोल्डकपबाट शुरु गरिएको प्रतियोगिता पछिल्लो संस्करणकारुपमा २०५७ सालदेखि विराट गोल्डकपकारुपमा खेलाइँदै आएको हो । पञ्चायतकालमा २७ पटक र बहुदल आएपछि विराट गोल्डकपका नामबाट सातौँ प्रतियोगिता हुन लागेको हो ।

पूर्वमा नेपाली फुटबलको सानका रूपमा रहेको विराट गोल्डकप प्रतियोगितामा सहभागी हुन दर्शकका लागि टिकट खरिद खुला गरिएको आयोजकले बताएको छ । टिकेटिङका लागि पार्टनर खल्ती एपसँग सम्झौता भएको उल्लेख गरिएको छ । 

नेपालले लाओसलाई हरायो

कमाठमाडौं : प्रधानमन्त्री थ्री नेसन्स कप फुटबलमा नेपालले लाओसलाई हराएकाे छ । बुधबार त्रिपुरेश्वरस्थित दशरथ रंगशालामा भएकाे खेलमा नेपालले लाओसलाई २–० गाेलले हराएकाे हाे । 

नेपालका लागि अनन्त तामाङले खेलकाे ३० औँ र नवयुग श्रेष्ठले खेलकाे ५५ औँ मिनेटमा गाेल गरे । 

बुधबारदेखि शुरु भएकाे प्रतियाेगितामा नेपालले अर्को खेल चैत १४ गते भुटानसँग खेल्नेछ । सिङ्गल राउन्ड रोबिनको आधारमा हुने प्रतियोगिता शीर्ष दुई टोलीले उपाधिका लागि चैत १७ गते खेल्नेछन् ।

विजेताले ५ हजार अमेरिकी डलर, दोस्रोले ३ हजार डलर पाउने एन्फाले जनाएको छ । प्रतियोगिताको उत्कृष्ट खेलाडीले ५ सय अमेरिकी डलर र खेलको म्यान अफ दि म्याचले २ सय ५० डलर पाउने छन् ।

कर्णाली प्रदेश कराँते महासंघको अध्यक्षमा मल्ल, उपाध्यक्षमा खड्का

लोकेन्द्रराज शर्मा/मध्यान्ह

सुर्खेत : कर्णाली प्रदेश कराँते महासंघको अध्यक्षमा हेमन्त मल्ल ठकुरी निर्वाचित भएका छन् । बुधबार वीरेन्द्रनगरको सुर्खेतमा सम्पन्न महासंघको प्रथम अधिवेशनबाट ठकुरी अध्यक्षमा निर्वाचित भएका हुन् ।

यस्तै महासंघको उपाध्यक्षमा हेमा खड्का निर्वाचित भएकी छन् । खड्का महासंघको पूर्वस्थायी कमिटी सदस्य हुन् । अधिवेशनले केन्द्रीय प्रतिनिधिसँगै दुई सदस्यीय सल्लाहकार समितिसमेत गठन गरेको छ ।

निर्वाचित भएलगत्तै उपाध्यक्ष खड्काले खेलाडी उत्पादन आफ्नो प्राथमिकतामा रहेको बताइन् । कराँते खेललाई आगामी १०औं राष्ट्रिय खेलकुदमा पदकलक्षित बनाउन विभिन्न उपाय अपनाएर काम गर्ने बताइन् ।

उपाध्यक्ष खड्काले कराँते खेलबाट कर्णालीका हरेक ठाउँमा हुने लैङ्गिक हिंसाविरुद्ध सचेतना वृद्धि गर्ने लक्ष्य आफूले राखेको बताइन् । उनले प्रशस्त प्रतियोगिताका लागि सरकारसँग बजेट माग गर्ने तथा मार्सल आर्टलाई जीवनपद्दतिसँग जोडेर स्वस्थ समाज निर्माण गर्न लागिपर्ने प्रतिबद्धता जनाइन् ।

लुम्बिनीमा ‘पिस म्याराथन’ हुने

लुम्बिनीः भगवान गौतम बुद्ध जन्मस्थल लुम्बिनीमा पहिलो पटक प्रदेश सरकारको आयोजनामा खुल्ला लुम्बिनी ‘पिस म्याराथन’ हुने भएको छ । 

‘पिस म्याराथन’ विश्व ओलम्पिक दिवस अप्रिल ६ तारिखमा आयोजना गरिने छ । लुम्बिनी प्रदेश खेलकुद परिषद्ले नेपाल ओलम्पिक कमिटीसँग सहकार्यमा पिस म्याराथनको प्रस्ताव अगाडि बढाएको हो । यसको तयारीका लागि ओलम्पिक कमिटीका साथै लुम्बिनी विकास कोष, लुम्बिनी सांस्कृतिक नगरपालिकालगायतसँग छलफल भएको जनाइएको छ ।

लुम्बिनी प्रदेश सरकार प्रदेश खेलकुद परिषद्को बुटवलमा सम्पन्न बैठकले लुम्बिनी पिस म्याराथन, मुख्यमन्त्री रनिङ शिल्ड तथा विभिन्न खेलकुद प्रतियोगिताका विजेता खेलाडी एंव प्रशिक्षकलाई प्रोत्साहन र सम्मान कार्यक्रमका आवश्यक काम अगाडि बढाउने निर्णय गरेको परिषदका सदस्य सचिव जयप्रकाश भट्टराईले जानकारी दिए । 

परिषद् अध्यक्ष एवं सामाजिक विकासमन्त्री चन्द्रशेख गुप्ताको अध्यक्षतामा बसेको बैठकमा प्रदेशको खेलकुदको अवस्था र आगामी दिनमा आयोजना गरिने प्रतियोगिता तथा खेल गतिविधिका विषयमा गम्भीर छलफल भएको थियो । 

बैठकमा सदस्य सचिव भट्टराईले परिषद्ले हालसम्मको प्रगति जानकारी गराउँदै प्रदेशमा गरिने खेलकुदका गतिविधिलाई व्यवस्थित गर्ने र यसअघि भएका निर्णयलाई कार्यान्वयन गर्ने प्रस्तावकारुपमा राखेका थिए । 

बैठकले लुम्बिनीमा पहिलो पटक खुल्ला लुम्बिनी पिस म्याराथन आयोजना गर्ने प्रस्तावलाई अनुमोदन गर्दै आयोजना प्रक्रियाका लागि आवश्यक तयारी गर्न सदस्य सचिवलाई जिम्मेवारी दिने निर्णय गरेको छ । 

मन्त्री गुप्ताले खेलकुदको विकासका लागि दलगत आग्रह पूर्वाग्रह त्याग्दै खेल संस्थालाई काम गर्न आग्रह गरे । उनले युवालाई खेलप्रति आकर्षण बढाउने र उनीहरुलाई प्रोत्साहान गर्ने दायित्व राज्यका अङ्गहरुको भएको हुँदा एकै पटक ठूलो योजना बनाउनुभन्दा सानोबाट काम शुरु गर्न निर्देशन दिए । रासस