भेनेजुएलाकी वुवान्दर र जापानकी एरिकालाई ‘हेरिटेज प्याजेन्टस् २०२३’ को उपाधि

काठमाडौं : अन्तर्राष्ट्रिय सौन्दर्य प्रतियोगिता ‘हेरिटेज प्याजेन्टस् २०२३’को उपाधि भेनेजुएला र जापानले जितेको छ । प्रतियोगितामा मिसतर्फको उपाधि जापानकी एरिका हाराले प्राप्त गर्दा मिसेसतर्फ भेनेजुएलाकी वुवान्दर जिर्लेथ क्यासानोभाले जितेकी छन् । हाराले मिस ट्यालेन्ट र मिस मल्टिमिडियाको अवार्ड समेत प्राप्त गर्दा क्यासानोभाले मिसेस् पर्सनालिटीको अवार्ड हात पार्न सफल भइन् ।

थाइल्याण्डको राजधानी बैंककस्थित ईएससी पार्क होटलको अडिटोरियममा आयोजित प्रतियोगीतामा मिसेस्तर्फ स्वीडेनकी म्याडेलिन वालग्रेन भिकेरी फस्ट रनर्स अप, न्युजिल्याण्डकी एली स्मीथ लाइन्स सेकेन्ड रनर्स अप, मंगोलियाकी ड्यासबाल्जिड मंखजुल थर्ड रनर्स अप तथा केन्याकी सिन्थिया किमाथि फोर्थ रनर्स अप भए ।

त्यसैगरी मिसतर्फ नाइजेरियाकी ट्रेसी सोलोमोन फस्ट रनर्स अप, मेक्सिकोकी भ्यानेली उलेट सेकेन्ड रनर्स अप, केन्याकी प्रुडेन्स टेन्डवा थर्ड रनर्स अप तथा रसियाकी बेला टोट्रोभा फोर्थ रनर्स अप छनोट भएका थिए । 

ईप्लानेट पिटिई लिमिटेड सिंगापुरको आयोजनामा प्रतियोगीता आयोजना भएको थियो । ईप्लानेटका अध्यक्ष नेपालका सन्तोष सापकोटा हुन् । प्रतियोगिताको संयोजनमा सुसान कोह थिइन् ।

प्रतियोगिताको कोरियोग्राफर नेपाली फेसन कोरियोग्राफर रोजिन शाक्य र मलेसियाका स्टेज कोरियोग्राफर वेस्ली श रहेका थिए । कार्यक्रमको सञ्चालन पनि रोजिन आफैंले गरेका थिए । प्रतियोगिताको अफिसियल फोटोग्राफरका रुपमा बेन्जी योङ थिए भने कार्यक्रमलाई सफलतापूर्वक सम्पन्न गर्नका लागि दुर्गा बिशुराल, आशिष कँडेल र पूर्व मिसेस हेरिटेज फोन्तिप श्रीवारान्योको संयोजन थियो भने टिनिडी गल्फ होटल बैंककको कार्यक्रम अफिसियल होटलका रुपमा रहेको थियो । 

प्रतियोगिता मिस मिसेस्का अतिरिक्त हेरिटेज प्लस, हेरिटेज पटिट, हेरिटेज जेम्स गरी विभिन्न विधाहरुको पनि यसैवर्ष देखि शुरुवात गरिएको थियो । सो प्रतियोगितात्मक कार्यक्रममा आर्टिस्टिक निर्देशक विमल सुवेदी, मिसेस् मलेसिया युनिभर्स २०१४ की विजेता एस्थर चिन, मिसेस् हेरिटेज इन्टरनेशनल २०२२ की विजेता फोन्टिप सुवर्णयु, वल्र्ड ब्युटी प्याजेन्ट अर्गनाइजेसनका संस्थापक अध्यक्ष सानी अबि नादिर तथा मिस हेरिटेज इन्टरनेशनल २०२२ की विजेता एना किरिलिनाले निर्णायकको भूमिका निर्वाह गरेका थिए । कार्यक्रममा थाइल्याण्डका कहलिएका नृत्य कलाकारहरुले जोडदार प्रस्तुति रहेको थियो ।

सज्जन बोहोराको ‘बन चरी’ सार्वजनिक (भिडियोसहित)

तिलु शर्मा पौडेल/मध्यान्ह

दोहा, कतार : म्याग्दी जिल्लामा जन्म भइ अमेरिकालाई कर्मथलो बनाउँदै आएका युवा पुस्ताका मोडल, सर्जक तथा गायक सज्जन बोहोराले नयाँ सांगीतिक कोसेली बजारमा ल्याएका छन् । म्याग्देली गायिका कुमारी चेपाङसँग मिलेर बोहोराले ‘बन चरी’ बोलको लोक तथा दोहोरी गीत बजारमा ल्याएका हुन् ।

लामो समयपछि गाउँमा फर्केका प्रेमीले आफ्नो प्रेमिका नभेटेपछिको छटपटीलाई गीतले बोलेको छ भने भिडियोलाई त्यही कथामा बुनिएको छ । बोहोरा स्वयंका शब्द संगीत रहेको गीतमा स्वर चेपाङ र बोहोराको नै रहेको छ । चेतन गोतामेले संगीत संयोजन गरेको गीतको भिडियोको निर्देशन मौसम हिमालीले गरेका हुन् भने म्युजिक भिडियोमा बोहोरासँग जुनु एसडीले कम्मर मर्काएकी छिन् ।

बोहोराको आफ्नै अफिसियल युट्युब च्यानलबाट बजारमा आएको भिडियोलाई नवराज उप्रेतीले खिचेका हुन् भने मनोज कार्कीले सम्पादन गरेका हुन् । अन्य सिर्जना जस्तै यो सिर्जनालाई पनि दर्शकले रुचाउनेमा बोहोरा आशावादी देखिएका छन् ।

‘म्युजिक भिडियोमा युवा वर्गको क्रेज बढेको छ’

उत्कृष्ट शब्द, संगीत र गीतको मात्र म्युजिक भिडियो निर्माण, निर्देशन गर्दै आइरहेका केशवराज भट्ट अहिलेका व्यस्त निर्देशक हुन् । यहाँ दैनिक दर्जनौं नयाँ म्युजिक भिडियो बन्ने गर्छ । एकपछि अर्को भिडियो सार्वजनिक गर्दै आइरहेका निर्देशक भट्टले हालै दश दिनमा सात वटा गीतको भिडियो निर्देशन गर्न भ्याएका छन् । ४२ हजार मिटर उचाई रहेको रसुवा जिल्लाको दुर्गम स्थान क्याञ्जिङरिसम्म पुगेर उनले ‘माया दिउँला तिमीलाई’, ‘मेरो जीवन’, ‘तिमी मेरो प्रित हौ’, ‘यस्तो टाढा हुनु छैन’ आदि गरी सात वटा गीतको भिडियो छायाँकन भ्याएका हुन् । पछिल्लो समय भिडियो निर्देशनको क्षेत्रमा व्यस्त बनिरहेका केशवराज भट्टले अहिलेसम्म पाँच दर्जनको हाराहारीमा भिडियो निर्देशन गरिसकेका छन् । झण्डै एक दशकदेखि म्युजिक भिडियो निर्देशनलाई निरन्तरता दिँदै आएका भट्ट विभिन्न पुरस्कार र अवार्डबाट सम्मानित भएका छन् । प्रस्तुत छ कुशल निर्देशक केशवराज भट्टले मध्यान्ह दैनिकका लागि सानु श्रेष्ठसँग गरेको कुराकानीको सम्पादित अंश :

पछिल्लो समय केमा व्यस्त हुनुहुन्छ ?

अहिले म्युजिक भिडियोकै काम गरिरहेको छु । हप्तामा केही नभए पनि दुई वटा म्युजिक भिडियो निर्देशन गरिरहेको छु । दशैं अगाडि झण्डै ४२ हजार मिटर उचाई रहेको रसुवाको क्याञ्जिङसम्म पुगेर एकै साथ सात वटा गीतको भिडियो छायाँकन गरें । सात वटा भिडियो गर्न दश दिन समय लागेको थियो । मेरो जीवन, तिमी मेरो प्रित हौ, यस्तो माया दिउँला तिमीलाई, टाढा हुनु छैन आदि गीतको भिडियो छायाँकन भएको थियो । त्यसको पोष्टप्रोडक्शन र नयाँ भिडियो निर्माणको गृहकार्यमा व्यस्त छु । 

म्युजिक भिडियोप्रति आकर्षण बढ्नुको कारण ?

युट्युबदेखि टिकटकसम्म र डिजिटल प्लेटफर्ममा कमर्सियल हिसाबले भिडियोको बजार राम्रो हुनुले म्युजिक भिडियोमा युवा वर्गको क्रेज बढेको हो । गीत संगीतको मार्केटिङले पनि बजार लिइरहेको छ । गीतसंगीतको माग जति बढेको छ, त्यही हिसाबले म्युजिक भिडियो निर्माणको दर पनि एकदमै बढिरहेको छ । गीतसंगीत र म्युजिक भिडियो यो गतिमा निर्माण हुनुमा यसमा बढ्दै गएको आकर्षण र नयाँपन पनि कारण हुनसक्छ ।

यो पेशामा कमाइको हिसाबले सन्तुष्ट हुनुहुन्छ ?

म्युजिक भिडियो निर्देशन गर्ने भनेरमात्र हुँदैन । त्यसमा क्वालिटी दिन सक्नुपर्छ । आफ्नो काममा इमान्दारिता, लगनशिलताका साथ मेहनत गर्ने र नयाँ नयाँ क्रियसन गर्ने थोरै म्युजिक भिडियो निर्देशकको भिडमा म पनि पर्ने गरेको छु । म यस मानेमा आफूलाई भाग्यमानी ठान्छु । मैले निर्देशन गरेको प्रायः सबै म्युजिक भिडियो व्यावसायिकरुपले सफल भएका छन् । म्युजिक भिडियो निर्देशन गरेर आफ्नो परिवारको रेखदेख गरिरहेको छु भने सन्तुष्ट नहुने त कुरै भएन ।

अभिनय गर्न सजिलो कि निर्देशन गर्न ?

काम कुनै पनि सजिलो हुँदैन । तपाईंले गर्नु भएको काम मलाई सजिलो लाग्छ, मैले गरेको तपाइलाईं । दुबै पाटो एक–अर्कामा फरक भए पनि गाह्रो छ । अभिनय अरुको निर्देशन बमोजिम गर्ने हो । आफैंले निर्देशन गर्न झन् गाह्रो छ । निर्देशन गर्नका लागि धेरै कुरा सोच्नुपर्छ । कन्टेन्टदेखि प्रिजेन्टेसनसम्मको कुरा हुन्छ ।

कोरोना पछि चलेका फिल्मी कलाकारहरु पनि म्युजिक भिडियोमा देखिए, काम गर्न र गराउन कुनलाई सजिलो ?

फिल्मी कलाकार र मोडल दुबैले आ–आफ्नो क्षमता अनुसार काम देखाउने हो । कामको हिसाबले त्यस्तो फरक पर्दैन । बरु नयाँ मोडललाई लिएर काम गर्दा चाहिँ अलि बढी मेहनत गर्नुपर्छ । चलेको मोडललाई लिनु र चलेको कलाकारलाई लिनु उस्तै हो ।

यो क्षेत्रमा आउँदा के कुरामा ध्यान दिन आवश्यक छ ?

कुनै पनि क्षेत्रमा आउँदा बुझेर हात हाल्दा राम्रो । यो क्षेत्रमा व्यावसायिकरूपमा आउनेलाई फाइदा छ । भिडियो कसरी बनाउने, कस्तो बनाउने, मार्केटिङ कसरी गर्ने भन्ने विषयमा पहिले नै अध्यायन गर्नु आवश्यक छ । 

मार्केटिङको कुरा उठिहाल्यो यसमा तपाईंको धारणा के छ ?

प्रतिस्पर्धाको जमना छ, भिडियो बनाउनु भन्दा बढी त्यसको प्रमोसनमा दुःख छ । युट्युबले गर्दा टिभी च्यानलहरुमा प्रसारण गर्न इन्कार गर्ने प्रवृत्ति छ । अर्कातिर डलर तिरेर सामाजिक सञ्जालमा बेतुकको दर्शक बढाउनेहरुको तँछाडमछाडको स्थितिका कारणले गर्दा वास्तविक प्रतिभा पछि पर्ने गरेको छ । स्वच्छ प्रतिस्पर्धा हुनुपर्छ, क्षणिक चर्चाको लागि हुने प्रतिस्पर्धाले दीर्घकालीनरुपमा फाइदा पुर्‍याउँदैन ।
 

‘गैरआवासीय नेपाली तारा सिजन ४’को पहिलो अडिसन सम्पन्न, ४१ जना दोस्रो चरणमा प्रवेश 

तिलु शर्मा पौडेल/मध्यान्ह

दोहा, कतार : गैरआवासीय नेपाली संघ (एनसीसी) कतार र तमु (गुरुङ) समाज कतारको संयुक्त आयोजनामा आयोजित ‘गैरआवासीय नेपाली तारा सिजन ४’को पहिलो अडिसन सम्पन्न भएको छ । राष्ट्रिय आविष्कार केन्द्रको सहयोगार्थ आयोजित कार्यक्रमको डिजिटल अडिसनबाट छनोट भएका गायन विधाका ४७ जना र नृत्य विधाका २१ जना मध्येबाट शुक्रबार कूल ४९ जनाले प्रतिस्पर्धामा सहभागिता जनाएका थिए । पहिलो अडिसनमार्फत दोस्रो चरणमा गायन विधाबाट २७ जना र नृत्य विधाबाट १४ जना प्रवेश गरेका छन् । 

गायन विधाबाट दोस्रो चरण प्रवेश गर्ने कलाकारहरूमा अनमोल श्रेष्ठ, अनमोल श्रेष्ठ, उत्तम राई,अक्षय लिम्बु, अनमोल ढकाल, भीम कार्की, अशोक गुरुङ, विनीता राई, बुद्धसिंह लामा, गौतम सामी लिम्बु, हरिचन्द्र नेपाली, ईशान रेग्मी, जोन विक, किरण विक, क्षितिज तामाङ,मान सिंह परियार, रश्मि विक, सरला तामाङ, सुजन गुरुङ, सुरज केसी, रुष्तम तामाङ, प्रविन प्रधान बद्री देवकोटा, मालती लामा, दीपक घले र एन्जल कुलुङ रहेका छन् । त्यस्तै नृत्य विधाबाट झरना राई, सौजन चोहार, अमित राई, दिया सिंह, रितु श्रेष्ठ, जीवन राई, निरु श्रेष्ठ, शर्मिला घर्ती, सविना राई, जुनु माया कुमाल, सरोज लामा, सुनिता शेर्पा, रेखा मगर र ललिता लामा रहेका छन् । दोस्रो चरणमा प्रवेश गरेका कलाकारहरूले आगामी डिसेम्बर १५ तारिकभित्र आफ्नो गीतको म्युजिक ट्रयाक आयोजकलाई बुझाउन समेत आग्रह गरेको छ । दोस्रो चरणमा प्रवेश गरेका कलाकारलाई आयोजकले प्रमाण पत्र समेत प्रदान गरेका थिए ।  

पानसमा बत्ती बालेर उद्घाटन गरिएको कार्यक्रम दुई चरणमा सम्पन्न गरिएको थियो । औपचारिक कार्यक्रमलाई एनसीसी कतारका अध्यक्ष रमेश भट्टले सभापतित्व गरेका थिए भने नेपाली दूतावास कतारका प्रथम सचिव कृष्ण क्षेत्रीले प्रमुख अतिथिको आसन ग्रहण गरेका थिए । कार्यक्रममा बोल्दै प्रमुख अतिथि क्षेत्रीले नेपाली जहाँ पुगेपनि नेपालको मौलिकताले चिनाउने गरेको बताए । उनले मौलिकतामा नेपाली गीतसंगीत अग्र पङ्क्तिमा आउने बताए । 

कार्यक्रममा बारेमा प्रकाश पार्दै तमु समाजकी अध्यक्ष टौमाया गुरुङले तमु समाजले विगतमा एक्लै आयोजना गर्ने गरेको प्रतियोगिता पहिलो पटक एनसिसिसंग सहकार्य गरेको बताउँदै प्रतिस्पर्धाबाट नेपाली सॉगीतिक आकाशमा नयाँ तारा थपिने विश्वास व्यक्त गरिन् । अतिथि जजका रूपमा रहेका एनआरएनए आइसीसीका उपमहासचिव प्रविन गुरुङले कतार कलाकारको उर्वर भूमि रहेको र यो भूमिबाट जन्मिएका कलाकार विश्वमा चम्कने विश्वास व्यक्त गरे । 

पहिलो सत्रलाई एनसीसी कतारका महासचिव रविन मगरले सहजीकरण गरेका थिए । सांस्कृतिक चरणलाई एनसीसी कतारका सचिव रोशन अर्याल र तमु समाजका महासचिव रिजन गुरुङले सहजिकरण गरेको कार्यक्रमको समापन गर्दै सभापति भट्टले प्रतिस्पर्धामा सहभागी सबैप्रति शुभकामना व्यक्त गरे । उनले नेपालबाट लाखौं खर्च गरेर कलाकार कतार ल्याउनु भन्दा कतारमा श्रम गर्दै बचेको समयमा कलाकारिता गर्ने कलाकारलाई प्लेटफार्म प्रदान गर्नु एनसिसीको मुख्य उद्देश्य रहेको बताए । प्रतिस्पर्धाको गायन विधातर्फ वीरेन्द्र श्रेष्ठ, गुन्जन तामाङ र नृत्य विधातर्फ भबिन तामाङ, भीम प्रसाद गुरुङ र जनक लाफा मगरले निर्णायकको जिम्मेवारी सम्हालेका थिए । 

कार्यक्रममा दुवै विधाका प्रतिष्पर्धीहरुलाई आफ्ना प्रस्तुति राख्नका लागी ३ मिनेटको समय दिइएको थियो । ३ मिनेटभित्र केही प्रतिस्पर्धीले आलाप लिँदालिँदै केहीले मुखडा गाउँदा गाउँदै  केही प्रतिस्पर्धीले अन्तरा र केहीले टुक्का गॉउदा गाउँदै समय सकियो । पर्यवेक्षकका रूपमा रहेका करीमबक्स मियाँले प्रतिस्पर्धीलाई दिइएको समय सीमामा गड बढ भएको महसुस गरेको बताएपछि सुधारिएको थियो । यो समस्या गायनमा मात्र नभएर नृत्यमा समेत देखिएको थियो । साउन्ड सिस्टममा गडबडी देखिँदा गायन र नृत्य दुवै विधामा प्रस्तुति दिने क्रममा कलाकार अलमल परेका थिए भने केही कलाकारले उत्कृष्ट प्रस्तुति दिँदा केही कलाकारको साउन्ड ट्र्याकमै समस्या देखिएको थियो । जुन आगामी चरणमा सुधार गर्नुपर्ने देखिएको छ ।

‘गैरआवासीय नेपाली तारा सिजन ४’को डिजिटल अडिसनको नतिजा सार्वजनिक, शुक्रबार औपचारिक उद्घाटन

तिलु शर्मा पौडेल/मध्यान्ह

दोहा, कतार : गैरआवासिय नेपाली संघ कतार र तमु (गुरुङ) समाज कतारको संयुक्त आयोजनामा हुन लागेको ‘गैरआवासीय नेपाली तारा सिजन ४’को डिजिटल अडिसनको नतिजा सार्वजनिक गरिएको छ । सार्वजनिक गरिएको नतिजाअनुसार गायन विधाबाट ४७ जना र नृत्य विधाबाट २१ जनाले शुक्रबार औपचारिकरुपमा उद्घाटन हुने कार्यक्रममा पहिलो अडिसन दिने भएका छन् ।

गायन र नृत्य गरी दुई विधाबाट अलग–अलग विजेता छानिने प्रतियोगिताको पहिलो अडिसनमा ४०/४० जना लैजाने लक्ष्य भए पनि नृत्य विधामा कम प्रतिस्पर्धीले सहभागिता जनाएका कारण गायन विधाका थप ७ जनालाई अगाडि लगिएको हो । प्रतिस्पर्धीहरुलाई आफ्नो कतारी आइडी, फोटोसहित सहभागिता शुल्क लिएर शुक्रबार बिहान ११ बजे सनैयामा अवस्थित फूलबारी रेस्टुरेन्टमा उपस्थित हुनका लागि आयोजकले आग्रह गरेका छन् । प्रतिस्पर्धाको गायन विधाका लागि वीरेन्द्र श्रेष्ठ, गुञ्जन तामाङ र मंगल बिक निर्णायकका रूपमा रहेका छन् भने नृत्य विधामा भबिन तामाङ, भीम प्रसाद गुरुङ र जनक लाफा मगर निर्णायकको रूपमा रहेका छन् ।

कार्यक्रममा अतिथि निर्णायकका रूपमा गैरआवासीय नेपाली संघका उपमहासचिव प्रविन गुरुङ रहने भएका छन् । ‘नेपाली कला संस्कृतिको सम्मान गरौं, प्रवासमा रहेको प्रतिभाको खोजी गरौं’ भन्ने मूल नाराको साथ कतारमा हुन लागेको गैरआवासीय नेपाली तारा सिजन ४ राष्ट्रिय आविष्कार केन्द्रको सहयोगार्थ आयोजना गर्न लागिएको हो । फिनालेका लागि निर्णायकहरू सम्बन्धित विधाका नेपालबाट ल्याइने र राष्ट्रिय आविष्कार केन्द्रका अध्यक्ष महावीर पुनलाई कतार ल्याइने भएको छ ।

दोस्रो, तेस्रो र ग्राण्ड फिनालेका लागि स्थान र समयका बारेमा एक हप्ता अगाडि सूचनामार्फत जानकारी गराइने भएको छ । गायन विधाका विजेताले १ लाख ८१ हजार र नृत्य विधाका विजेताले १ लाख ५० हजार रुपैयाँ नगद पुरस्कारसहित ट्रफी प्राप्त गर्नेछन् भने उपविजेताले ७५ हजार रुपैयाँ प्राप्त गर्नेछन् । कार्यक्रमबाट भएको मुनाफाको ६५ प्रतिशत रकम राष्ट्रिय आविष्कार केन्द्रलाई सहयोग गरिने आयोजकले जानकारी दिएको छ । यसभन्दा अगाडि सन् २०१०÷११ र १५ मा सफलतापूर्वक प्रतियोगिता सम्पन्न भइसकेको अवस्थामा सिजन ४ पनि भव्यरूपमा सम्पन्न हुने विश्वास आयोजकको रहेको छ । मध्यान्ह राष्ट्रिय दैनिक उक्त प्रतियोगिताको सञ्चार सहयोगीका रूपमा रहेको छ ।

गायन विधामार्फत पहिलो अडिसनमा पुगेका कलाकारहरुमा अनमोल श्रेष्ठ, उत्तम राई, नन्द बहादुर विक, अक्षय लिम्बू, अनमोल ढकाल, भीम कार्की, अशोक गुरुङ, विनीता राई, बुद्धसिंह लामा, चित्र थापा, एकराज लिम्बू, गौतम सामी लिम्बू, हरिचन्द्र नेपाली, ईशान रेग्मी, जोन विक, किरण विक, क्षितिज तामाङ, लक्ष्मी दास, लक्ष्मी कार्की, लोकेन्द्र दूतराज, मान सिंह परियार, मिलन राई, असलमान राई, रमेश विक, खगेन्द्र तामाङ, राजकुमार मगर, राम विश्वकर्मा (रामबाबु), राम सानु, रश्मि विक, समीर साङदेम्वा लिम्बू, सरला तामाङ, सुजन गुरुङ, सुजन केसी, सुनिल लिम्बु, सुरेश राजवंशी, सुनिल थापा, रुष्तम तामाङ, राजन पाण्डे, सम्झना राई, विजय राजपाटी, सानो बाबु तामाङ, सञ्जय विक, प्रविन रामदाम, रोशन बाबु, बद्री देवकोटा, मालती लामा र दीपक घले रहेका छन् ।

यस्तै नृत्य विधामार्फत पहिलो अडिसनमा पुगेका कलाकारहरुमा सौजन चहार, जुनु माया कुमाल, झरना राई, सविना राई, सरस्वती परियार, दिया सिंह, जीवन राई, सुनिता शेर्पा, आस कुमारी चौधरी, रेखा मगर, ललिता लामा, अमित राई, शिला गुरुङ, रितु चौधरी, निरु श्रेष्ठ, रितु वाइबा लामा, शान्ति वली, जिया हमाल, अनुजा चौधरी, शर्मिला घर्ती र सरोज तामाङ रहेका छन् ।

'गैरआवासीय नेपाली तारा सिजन ४'मा अतिथि निर्णायकका रुपमा प्रविन गुरुङ रहने

तिलु शर्मा पौडेल/मध्यान्ह

दोहा, कतार : गैरआवासिय नेपाली संघ कतार र तमु (गुरुङ) समाज कतारको संयुक्त आयोजनामा हुन लागेको 'गैरआवासीय नेपाली तारा सिजन ४'का लागि अतिथि निर्णायकहरूको टुंगो लाग्न थालेको छ। शुक्रबार हुने पहिलो अडिसनमा अतिथि निर्णायकका रुपमा गैरआवासीय नेपाली संघका उपमहासचिव प्रविन गुरुङलाई जिम्मेवारी दिइएको छ ।

संघको संस्कृति र सम्पदा विभागका संयोजकमा मनोनीत भयसँगै गुरुङ निर्णायकका रूपमा चयन भएका हुन् । गुरुङलाई कलाप्रेमी सामाजिक व्यक्तिका रूपमा चिनिन्छ । उनले यसअघि नै विभिन्न प्रतिस्पर्धाहरुमा निर्णायकको जिम्मेवारी निर्वाह गरिसकेका छन् । कतारमा सफल सांगीतिक कार्यक्रम आयोजकका रूपमा परिचित उनले नेपाल आइडलको ग्रान्ड फिनाले, भोइस अफ नेपालको ग्रान्ड फिनाले सम्पन्न गरिसकेका छन् । उनले बुगीउगी, एनआरएनए ग्लोबल सिंगिङ आइडल, एनआरएनए दि सिंगर कार्यक्रमको आयोजक तथा कार्यक्रम संयोजकका रूपमा जिम्मेवारी पूरा गरिसकेका छन् ।

आठौँ राष्ट्रिय खेलकुद प्रतियोगितामा तेक्वान्दो खेलको प्रतिनिधित्व गर्दै उनले एनआरएनएको झण्डा फहराउँदै विभिन्न पदक जित्ने कार्यमा सफल संयोजक भएर काम गरेका छन् । गुरुङले नेपालको महाभूकम्प, हावाहुरी, बाढी पहिरो, कोभिड–१९ लगायत दैवी विपत्तिको समयमा स्वयं उपस्थित भएर गैरआवासीय नेपाली संघको नेतृत्व गर्दै अस्थायी तथा स्थायी बासस्थान, खाद्यान्न, स्वास्थ्य सामग्रीसहित विभिन्न राहत सामग्री वितरणलगायतका दर्जनौं सामाजिक कार्य गर्दै आइरहेका छन् ।

'नेपाली कला संस्कृतिको सम्मान गरौं, प्रवासमा रहेको प्रतिभाको खोजी गरौं' भन्ने मूल नाराको साथ कतारमा गायन र नृत्य विधामा हुन लागेको गैरआवासीय नेपाली तारा सिजन ४ राष्ट्रिय आविष्कार केन्द्रको सहयोगार्थ आयोजना गर्न लागिएको हो । दोस्रो चरण २२ डिसेम्बर, तेस्रो चरण १२ जनवरी २०२४ र ग्राण्ड फिनाले २ फेब्रुअरी २०२४ मा सम्पन्न गर्ने कार्यतालिका रहेको छ ।

कवि सयपत्री थुलुङको ‘गाउँ फर्किरहेको परदेशी’ लोकार्पण

काठमाडौं : कवि सयपत्री थुलुङको कविता कृति ‘गाउँ फर्किरहेको परदेशी’को काठमाडौंमा लोकार्पण सम्पन्न भएको छ । सम्भव समूहको आयोजनामा मण्डला थिएटरमा साहित्यकार कवि सयपत्री थुलुङको कविता कृति लोकार्पण गरिएको हो ।

संखुवासभाकी कवि थुलुङ विगत डेड दशकदेखि साहित्य सिर्जनामा क्रियाशील छिन् । २०७० सालमा ‘शान्तिको फूल’ गजलसंग्रह प्रकाशन गरेकी थुलुङले एक दशकपछि दोस्रो कृतिका रूपमा कवितासंग्रह पाठकसामु ल्याएकी हुन् ।

कार्यक्रमका वक्ताहरू वरिष्ठ कवि श्रवण मुकारुङ, कवि ज्योति जंगल र कवि उत्तम तुम्सा लिम्बू रहेका थिए । कवितासंग्रहका बारेमा बोल्दै कवि उत्तम तुम्साले भने, ‘कविता लेखनको आ–आफ्नै पक्ष हुन्छ । गाउँ फर्किरहेको परदेशी अनुभूतिको गर्भबाट निस्किएको एउटा सफा संग्रह हो ।’

त्यस्तै पुस्तकका बारेमा बोल्दै कवि ज्योति जङ्गलले प्रेमको मसिले लेखिएको यो संग्रह आशा र आत्मबलको बाटो देखाइरहेको राम्रो पुस्तक बनेको बताइन् । देश, प्रेम र राज्यसत्तामाथि शान्ति सौहार्दताको वातावरण बनाइराख्नुपर्ने कृतिमा जिकिर गरिएको उनले औंल्याइन् ।

वरिष्ठ कवि श्रवण मुकारुङले कुनै सिपालु संगीतकारले चाह्यो भने सबै कवितामा संगीत भर्न सकिने कुरा राख्दै कवि थुलुङलाई अब कविताको यात्रामा बलियो गरी निस्किएको नाक्छोङ्को दोस्रो स्टेपमा पुगिसकेको बताए ।

कार्यक्रममा कवि मिथोच र रंगकर्मी नुसा लिङ्देनले संग्रह भित्रका एक–एक वटा कविता वाचन गरेका थिए भने कवि स्वयंले एउटा कविता वाचन गर्दै आफूलाई प्रत्यक्ष तथा अप्रत्यक्षरुपमा सहयोग गर्ने सबैलाई धन्यवाद दिँदै कार्यक्रम समापन गरेकी थिइन् ।

सांस्कृतिक कार्यक्रम महोत्सवमा दर्शक तान्ने माध्यम

प्रदिप ज्ञवाली/मध्यान्ह

सैनामैना : रुपन्देहीको सैनामैनामा बुधबारदेखि शुरु भएको छैटौं राष्ट्रिय सैनामैना कृषि, पर्यटन, प्रविधि तथा औद्योगिक व्यापार महोत्सवको सांस्कृतिक कार्यक्रमतर्फ दर्शकहरुको आकर्षण उल्लेख्य मात्रामा बढ्दै गएको छ । महोत्सवमा कलाकारहरुको प्रस्तुति हेर्न दर्शकहरु झुम्मिने गरेका छन् भने त्यसले महोत्सवमा सांस्कृतिक आकर्षणसमेत थपेको छ । 

महोत्सवको क्रममा आयोजित मम्मी डान्स प्रतियोगिता, सैनामैना डान्सिङ आइडल, भजन प्रतियोगिता, र्‍याप प्रतियोगिता, नगरविद्यालय स्तरीय लोकनृत्य प्रतियोगिता, जिल्लास्तरीय दोहोरी गीत प्रतियोगिता, स्थानीय कलाकारको प्रस्तुति र स्थानीय कला संस्कृतिको प्रस्तुतिले महोत्सवमा पृथक आकर्षण थपेको छ । 

महोत्सवका क्रममा शनिबार लोक गायक पशुपति शर्माले सैनामैनाका दर्शकहरुलाई मनोरञ्जन प्रदान गरेका थिए । पशुपति शर्माको प्रस्तुतिमा दर्शकहरु साँझ अबेरसम्म झुम्मिएका थिए । त्यसैगरी महोत्सवकै क्रममा आइतबार चर्चित गायक दुर्गेश थापाको प्रस्तुति रहने महोत्सवको सांस्कृतिक संयोजक कृष्ण पोखरेलले बताए । त्यसैगरी लोकगायक दिपक गरौजा र गायिका विष्णु श्रीपालीको समेत प्रस्तुति रहने छ । सोमबार चर्चिय गायक चन्द्र शर्मा र खेम सेञ्चुरी एवम् गायिका रीतु शाहीलगायतले प्रस्तुति दिने छन् । 

महोत्सवकै क्रममा आयोजित मम्मी डान्स प्रतियोगितामा बुटवल तामनगरकी मेनुका राई प्रथम हुँदै नगद १५ हजार रुपैयाँ पुरस्कार हात पारेकी छिन् । त्यसैगरी देवदह चरंगेकी एली बुढा मगर दोस्रो हुँदै १० हजार र सैनामैना सालझण्डीकी निलकुमारी रास्कोटी तृतीय हुँदै नगद ५ हजार रुपैयाँ पुरस्कार प्राप्त गरेको मम्मी डान्स प्रतियोगिताकी संयोजक सिता क्षेत्रीले जानकारी दिइन् ।

‘आर्थिक विकासको राष्ट्रिय आधारः कृषि, पर्यटन, उद्योग र व्यापार’ भन्ने नाराका साथ सैनामैना उद्योग वाणिज्य संघको आयोजनामा शुरु भएको महोत्सवले सैनामैनासँगै यस क्षेत्रको उद्योग व्यापार र लोक संस्कृति संरक्षण तथा प्रवर्द्धनमा टेवा पुग्ने आयोजकको विश्वास छ ।

सैनामैना नगर क्षेत्रमा लगानीको अवसर सिर्जना गर्न तथा कृषि, पर्यटन उद्योग व्यापारको प्रवर्द्धन, धार्मिक एवम् सांस्कृतिक क्षेत्रको संरक्षण र लोक संस्कृतिको जगेर्ना गर्न महोत्सवले सघाउ पुग्ने आयोजकले विश्वास लिएका छन् ।

महोत्सव मूल आयोजक समितिका संयोजक तथा सैनामैना उद्योग वाणिज्य संघका अध्यक्ष प्रेमबहादुर खड्काले महोत्सवको सांस्कृतिक कार्यक्रमले दर्शकहरुलाई छुट्टै मनोरञ्जन प्रदान गर्नुका साथै स्थानीय कला संस्कृतिको विकास गर्न सहयोग पुग्ने विश्वास व्यक्त गरे । 

त्यसैगरी आयोजक समितिका सदस्य सचिव तथा संघका महासचिव लोकनाथ अधिकारीले महोत्सवबाट उद्योग व्यापारको प्रवर्द्धन, धार्मिक एवम् सांस्कृतिक क्षेत्रको संरक्षण र लोक संस्कृतिको जगेर्ना गर्न सहयोग पुग्ने विश्वास व्यक्त गरे ।

महोत्सवका अवसरमा सैनामैनाभित्र रहेका पर्यटकीय स्थलहरुको प्रचार प्रसार, पर्यटकीय स्थलहरुको फोटो प्रदर्शनी, सैनामैनाको पर्यटकीय सम्भावनाबारे गोष्ठी तथा अन्तरक्रिया लगायतका कार्यक्रम आयोजना गरिने भएको छ । महोत्सव साढे ३ लाख दर्शकले अवलोकन गर्ने तथा ५ करोड बढीको कारोबार हुने अपेक्षा राखिएको आयोजकले जनाएको छ ।

‘नुवाकोट सांगीतिक साँझ–२०२३’ सम्पन्न

तिलु शर्मा पौडेल/मध्यान्ह

दोहा, कतार : नुवाकोट सेवा समाज कतारले बडादशैं, दीपावली, नेपाल संवत् एवम् छठ पर्वको अवसरमा आयोजना गरेको ‘नुवाकोट सांगीतिक साँझ–२०२३’ भव्यरूपमा सम्पन्न भएको छ । समाजको कोष अभिवृद्धि गर्ने उद्देश्यले आयोजित कार्यक्रममा आफ्नो सांगीतीक प्रस्तुति दिन नेपालबाट आमन्त्रित म्हेन्दोमाया कलाकार सौराम तामाङले म्हेन्दोमाया तथा सेलो भाकाका आधा दर्जन गीतहरू पस्किएका थिए ।

लोक तथा दोहोरी गायिका अमृता श्रीपाल ‘देउरालीलाई भेटी’ गीत गाउँदै स्टेज उक्लिएकी थिइन् । उनले फुलको थुङ्गा, घुम्तीघुम्ती रोड, डाँडा घरे साइँली, पञ्चेबाजालगायतका गीत गाएर दर्शकलाई भरपुर मनोरञ्जन प्रदान गरिन् । कार्यक्रमको अन्त्यतिर स्टेज चढेका काठे भाकाका राजा मानिने नुवाकोटे गायक सरोज लामिछानेले मुसौरी, कहाँ होला र सुन जस्तो पित्तल, धानको बाला लसरी पसरी, हे मेरो सानु, कोठा भाडा तिर्दिने मै होनि, बदाम खाको सुन्तला छोडाकोलगायतका गीतहरू गाए ।

कतारमा रहेका गायक सूर्य लामा, सानुबाबु तामाङ, रामजी थापा मगर, राजन थोकर तामाङ, बद्री प्रसाद देवकोटा, रोशनी हिम्डुङ तामाङ, गुना मगर निशु, पुकार थापा लगायतका कलाकारहरूले प्रस्तुति दिएका थिए । समाजका अध्यक्ष दीपेन्द्र घले लामाको सभापतित्व तथा एनआरएनए एनसीसी कतारका अध्यक्ष रमेश भट्टको प्रमुख आतिथ्यतामा कार्यक्रम सम्पन्न भएको हो । आफ्नो शुभकामना मन्तव्य राख्दै प्रमुख अतिथि भट्टले छोटो समयमा पनि सबै प्रक्रिया पूरा गर्दै तोकिएकै समयमा कार्यक्रम गर्न सफल भएकोमा समाजलाई धन्यवाद व्यक्त गरेका थिए । 

कार्यक्रमको समापन गर्दै सभापति लामाले कार्यक्रम सफल बनाउन उपस्थित सबैप्रति आभार व्यक्त गर्दै कार्यक्रमलाई बिट मारेका थिए । समाजका महासचिव विकास तामाङले सहजीकरण गरेको कार्यक्रममा वरिष्ठ उपाध्यक्ष हिरा तामाङले स्वागत मन्तव्य राखेका थिए । नेपालबाट आमन्त्रित कलाकारहरूलाई आयोजक र सिन्धुपाल्चोक सेवा समाजले मिलेर मायाको चिनो प्रदान गर्दै सम्मान गरेका थिए भने प्रमुख अतिथि भट्ट र गायिका गुना मगर निशुलाई आयोजकले सम्मान पत्रद्वारा सम्मान गरेको थियो ।

प्रदर्शक र निर्माताबीच सहमति, शेयर बराबर बाँडफाँड हुने

काठमाडौं : नेपाल चलचित्र निर्माता संघ र नेपाल चलचित्र संघबीच शेयर बाँडफाँडको विषयमा सहमति भएको छ । नेपाल चलचित्र निर्माता संघ र नेपाल चलचित्र संघले गठन गरेको वार्ता टोलीको बिहीबार बसेको बैठकमा दुवै संस्थाले ५०, ५० प्रतिशत शेयर बाँडफाँड गर्ने सहमति जुटेको हो ।

चलचित्र संघका अध्यक्ष वीरेन्द्रनारायण श्रेष्ठ र चलचित्र निर्माता संघका अध्यक्ष नवल खड्काले सहमति पत्रमा हस्ताक्षर गरेका छन् ।  सहमतिअनुसार फिल्म ‘दिमाग खराब’ रिलिज भएको मिति कात्तिक २४ गतेदेखि नै यो व्यवस्था लागू गर्न दुवै पक्ष सहमत भएका हुन् । अब नेपाली फिल्मले हलमा प्रदर्शन हुञ्जेल ५० प्रतिशत शेयर पाउनेछन् ।

यसअघि प्रदर्शनको पहिलो र दोस्रो हप्ता प्रदर्शक र निर्माताले ५०/५० प्रतिशत सेयर बाँडफाँड गर्थे । तर तेस्रो हप्तादेखि निर्माताले जम्मा ३५ प्रतिशत र प्रदर्शकले ६५ प्रतिशत सेयर पाउँथे ।

‘दिमाग खराब’का निर्माताले फिल्म हलमा चलुन्जेल ५० प्रतिशत सेयर नपाए प्रदर्शन नै स्थगित गर्ने चेतावनी दिएका थिए । यसपछि संघले फिल्मका निर्मातासँगै चलचित्र निर्माता संघसँग सेयर बाँडफाँडको विषयमा छलफल गर्न वार्ता टोली नै गठन गरेको थियो । तीन दिन लामो छलफलपछि नेपाली फिल्मलाई ५० प्रतिशत सेयर दिने विषयमा सहमति जुटेको हो ।

शेयर बाँडफाँडसँगै चलचित्र संघ र निर्माता संघबीच अन्य सहमति पनि भएको छ । सहमति अनुसार अबदेखि चलचित्र हलमा लाग्नुअघि नेपाली फिल्मको तीन मिनेटसम्मको ट्रेलर १५ दिनसम्म हलले सित्तैमा बजाइदिनेछ । यसअघि डेढ मिनेटको ट्रेलर मात्रै हलले बजाइदिने गरेको थियो । साथै हलहरुमा पोस्टर लगाउन निर्माताहरुले हल सञ्चालकलाई पैसा तिर्नुपर्ने अवस्था थियो । अबदेखि पोस्टर टाँस्न पनि पैसा तिर्नु नपर्ने भएको छ ।

निर्माता संघको तर्फबाट गठित टोलीमा पूर्व अध्यक्ष तथा सल्लाहकार अशोक शर्माको संयोजकत्वमा उदयकुमार इङ्नाम, दीपकराज गिरी, खगेन्द्रप्रसाद लामिछाने, रामबाबु गुरुङ, रवीन्द्रसिंह बानियाँ र कृषा चौलागाईं सदस्य रहेका थिए । चलचित्र संघको तर्फबाट गठित वार्ता टोलीमा पूर्व अध्यक्ष राजकुमार पोखरेलको संयोजकत्वमा नरेन्द्र महर्जन, गोपालकाजी कायस्थ, सुरेन्द्र थापा, प्रज्वल राणा लगायत सदस्य थिए ।