एजेन्सी : मोरक्कोमा भएको शक्तिशाली भूकम्पमा परी हालसम्म आठ सय २० जनाको मृत्यु भएको छ भने छ सय ७२ जना घाइते भएका छन् । गृह मन्त्रालयका अनुसार घाइतेमध्ये दुई सय पाँच जनाको अवस्था गम्भीर छ ।
भूकम्पमा ज्यान गुमाउने र घाइते हुने आधाभन्दा बढी अल–हौज र ताराउदान्ट प्रान्तका रहेका बताउँदै उक्त मन्त्रालयले मराकेस, अगादिर, कासाब्लाङ्का, और्जाजाटे, चिचौवा, अजिलाल र युसुफिया पनि अधिक प्रभावित भएका जनाएको छ । शुक्रबार राति ११ः११ बजे भएको ६.८ म्याग्निच्युडको भूकम्पबाट भयभीत मोरक्कोली मध्यरातमा घर छोडेर भागेका थिए । अहिले पनि अधिकांश घरबाहिर त्रिपाल टाँगेर बसिरहेका छन् ।
शक्तिशाली भूकम्पपछि साना–साना धेरै धक्का आज पनि महसुस गरिएको मोरक्कका सञ्चार माध्यमले बताएका छन् । शुक्रबारको भूकम्प देशमा अहिलेसम्मकै सबैभन्दा शक्तिशाली भएको उनीहरूले समाचारमा उल्लेख गरेका छन् । भयानक भूकम्प भएको ३३ वर्षीय अब्देलहक एल अमरानीले बताएका छन् । उनले बच्चाहरू रोइरहेको आवाज सुनेका तथा किंकर्तव्यविभूढ अभिभावकहरूलाई देखेको बताएका छन् । दश मिनेटसम्म बिजुली टेलिफोन सेवा बन्द भए पनि पछि सेवा सञ्चालन भएको उनले बताए ।
सरकारी अधिकारीहरूका अनुसार देशको एक तिहाइ भूभाग भूकम्पबाट प्रभावित भएकाले ज्यान गुमाउने र घाइते हुनेको सङ्ख्या अझै बढ्नसक्ने अनुमान गरिएको छ । भूकम्पले नराम्ररी प्रभावित पर्वतीय क्षेत्रमा रहेका दुर्गम गाउँसम्म निकै कठिनाइ भएको छ । पुराना भवन भएका ती गाउँमा अकल्पनीय विनाश भएको अनुमान गरिएको छ । ती स्थानमा उद्धारकर्ताहरू पुग्न केही दिन लाग्न सक्छ । मराकेस, कासाब्लाङ्कालगायत शहरी क्षेत्रका मानिसले सडकमा रात बिताएका छन् । क्षति एवं हताहतीको विस्तृत विवरण प्राप्त भएको छैन ।
यसैबीच, विश्वका विभिन्न मुलुकका नेताहरूले मोरक्को सरकारप्रति सहानुभूति प्रकट गर्दै सकेको सहयोग गर्ने प्रतिबद्धता व्यक्त गरेका छन् । जी २० शिखर सम्मेलनमा भागलिने सिलसिलामा भारतको राजधानी नयाँदिल्लीमा रहेका बेलायतका प्रधानमन्त्री ऋषि सुनकले मोरक्कोलाई आफ्नो देशले हरसंभव सहयोग गर्ने बताएका छन् ।
भारतका प्रधानमन्त्री नरेन्द्र मोदी तथा टर्कीका राष्ट्रपति रेसेप तैयप एर्दोगानले मोरक्कोलाई सहयोग गर्ने प्रस्ताव गरेका छन् भने फ्रान्सेली विदेशमन्त्री क्याथरिन कोलोनाले पनि मोरक्कोका भूकम्पपीडित जनता र त्यहाँको सरकारप्रति ऐक्यबद्धता प्रकट गरेका छन् ।
स्पेनका प्रधानमन्त्री पेड्रो सान्चेजले मोरक्कोमा भएको ‘भयंकर’ भूकम्पमा परी छ सयभन्दा बढीको ज्यान गएको खबरले आफू मर्माहत भएको बताउँदै शोक प्रकट गरेका छन् । उनले यथाशीघ्र स्पेनी उद्धार टोली मोरक्को पठाउने बताएका छन् । मोयुक्रेनका राष्ट्रपति भोलोडिमिर जेलेन्स्कीले पनि मोरक्कोलीप्रति ऐक्यबद्धता व्यक्त गर्दै मोरक्को नरेश मोहम्मद छैटौंलाई शोक सन्देश पठाएर समवेदना व्यक्त गरेका छन् ।
एजेन्सीः सन्दिग्ध विद्रोहीले थापेको विद्युतीय धरापमा परी फिलिपिन्समा पाँच जना सैनिकको मृत्यु भएको छ । योसँगै अन्य तीन जना घाइते भएका छन् ।
राजधानी मनिलाको दक्षिणपूर्वमा रहेको क्वेजोन प्रान्तमा शुक्रबार बिहान संदिग्ध न्यू पिपुल्स आर्मी (एनपीए) विद्रोहीले थापेको विद्युतीय धरापमा परी सरकारी सेनाका पाँच जवानको मृत्यु हुनका साथै अन्य तीन जना घाइते भएको फिलीपिनी सेनाको दक्षिणी लुजोन कमाण्डका प्रवक्ता डेनिस कानाले बताएका छन् ।
देशका ग्रामीण क्षेत्रमा आक्रमण गर्दै आएका विद्रोहीविरुद्ध कारवाही गर्न ट्यागकावायन सहरमा गइरहेका बेला उक्त दुर्घटना भएको जनाउँदै प्रवक्ता कानाले उक्त क्षेत्रमा विद्रोहीविरुद्धको कारवाहीलाई अझ सशक्त बनाउन थप सैन्यबल परिचालन गरिएको बताएका छन् ।
सन् १९६९ देखि एनपीए विद्रोहीहरू जनसाधारण, सशस्त्र बललगायत सुरक्षा निकायका सदस्यलाई आक्रमण गर्दै आएका छन् । सैन्य तथ्याङ्कअनुसार एनपीएमा दुई हजारको हाराहारीमा सदस्यहरू छन् । सन् ८० को दशकमा यो समूहसँग २० हजार सदस्य आबद्ध थिए । क्रान्तिकारी विद्रोहको माध्यमबाट सत्ता हासिल गर्न सकिन्छ भन्ने कम्युनिष्ट पार्टी एनपीएले ५४ वर्षदेखि सञ्चालन गरेको छापामार युद्धमा ४० हजारभन्दा बढीको मृत्युभएको छ ।
तिलु शर्मा पौडेल/मध्यान्ह
दोहा, कतार : कतार ट्राफिक महानिर्देशनालयले आगामी आइतबारबाट लागू हुने गरी केही ट्राफिक नियममा परिवर्तन गर्ने भएको छ l विभागले परिवर्तन गर्न लागेको नियम ड्राइभिङको समयमा मोबाइल फोनको प्रयोग र सिट बेल्टसम्बन्धी रहेको छ l
ट्राफिक विभागका अधिकारी माजित अल खुलेफीले गाडी चलाउँदा सिट बेल्ट र मोबाइल प्रयोग गरेमा स्वचालित राडार (क्यामेरा)ले पक्रने र जरिवाना पर्ने बताए l सवारी साधन चलाउँदा एयरफोन वा एयरपोडको प्रयोग गरेर फोनमा कुरा गर्न सकिने, मोबाइललाई गाडी/बाइकमा राखेर नक्सा हेरेर चलाउन सकिने बताउँदै उनले एक हातमा फोन समातेर अर्को हातले सवारी साधन चलाउन नपाइने स्पस्ट पारे l
उनले सिट बेल्टको प्रयोगलाई अनिवार्य रहेको बताएका छन् l सडक दुर्घटना न्यूनीकरणका लागि महानिर्देशनालयले समय सापेक्षरुपमा ट्राफिक नियममा परिवर्तन गर्दै आएको छ l
एजेन्सी : अघिल्लो राष्ट्रपतीय निर्वाचनमा षड्यन्त्र र ठगीको आरोप लागेका अमेरिकाका पूर्वराष्ट्रपति डोनाल्ड ट्रम्पले दक्षिणी राज्य जर्जियाको एक जेलमा फुल्टन काउन्टीस्थित जेलमा आत्मसमर्पण गरेका छन् । फुल्टन काउन्टी जेलमा ३० मिनेटभन्दा कम समय बिताएका उनी दुई लाख डलर धरौटी बुझाएर रिहा भएका छन् ।
जेलका अधिकारीले लागुऔषध कारोबार, तस्करी, मदिराले मातेर सवारी हाक्ने चालकलगायत अन्य फौजदारी अभियोग लागेकाहरूको औंठाछाप र टाउकोसहित अनुहारको तस्बिर लिने लज्जास्पद काम अमेरिकाको इतिहासमा पहिलोपटक पूर्वराष्ट्रपतिको फोटो लिएर भएको छ । यो लज्जास्पद क्षण अमेरिकाका लागि दुःखद भएको दक्षिणी क्यालिफोर्निया विश्वविद्यालय एनेनबर्ग स्कूल अफ कम्युनिकेसन्सका प्राध्यापक मार्टी कपलान बताउँछिन् । भविष्यमा इतिहासका पुस्तकहरूमा पूर्वराष्ट्रपति ट्रम्पको त्यो आपराधिक छवि स्थायी तस्बिर भएर रहने उनले टिप्पणी गरिन् ।
कानून कार्यान्वयन गर्ने फुल्टन काउन्टी कार्यालयले अपराधको आरोप लागेका एक सामान्य नागरिकका रुपमा सार्वजनिक गरेको पूर्वराष्ट्रपतिको तस्बिरमा उनी निक्कै रिसाको देखिन्छन् । हल्का खैरो पृष्ठभूमिमा खिचिएको तस्बिरमा उनले नीलो सूट, सेतो शर्ट र रातो टाई लगाएका छन् । उनको काँधको ठ्याक्कै माथि शेरिफको प्रतीक चिह्न पनि देखिन्छ । सतहत्तर वर्षीय पूर्वराष्ट्रपतिले आफू दोषी नरहेको दाबी गरेका छन् । यद्यपि उनीमाथि जर्जियामा जो बाइडेनले पाएको मतपरिणाम उल्ट्याउने प्रयास गरेको आरोप लगाइएको छ ।
उक्त कार्यालयले जारी गरेको तस्बिर आफ्नो सामाजिक सञ्जाल र चुनावी अभियान वेबसाइटमा पोस्ट गर्दै उनले आफूले केही गलत नगरेको र आफूमाथि निराधार आरोप लगाइएको उल्लेख गरेका छन् । राजनीतिबाट प्रेरित भएर आफ्नो आगामी निर्वाचन बिथोल्न आफूमाथि अभियोग लगाइएको उनले दाबी गरेका छन् ।
अर्बपति व्यापारी ट्रम्पलाई गत अप्रिलदेखि चार पटक आपराधिक रूपमा अभियोग लगाइएको छ तर उनी आगामी वर्ष हुने राष्ट्रपति निर्वाचनमा भाग लिने दृढ निश्चयका साथ अघि बढेका छन् । जर्जियामा उनीमाथि जालसाजी गरेको, सरकारी अधिकारीलाई झुटा बयान दिन अभिप्रेरित गरेकोलगायत चार वटा मुद्दा दायर गरिएको छ ।
यसअघि उनीमाथि वयस्क चलचित्रकी नायिका स्टोर्मी डेनियललाईसँगको यौन सम्बन्ध, त्यसलाई सार्वजनिक नगर्न निजलर्या भुक्तान गरिएको ठूलो रकम, आफ्नो निजी निवासमा गोप्य सरकारी कागजात राखेको र सरकारलाई फिर्ता गर्न अस्वीकार गरेको तथा संसद भवनमा समर्थक परिचालन गरेर तोडफोड र आक्रमण गराएको अभियोग लगाइएको छ ।
सन् २०२० को जनवरी छ तारिखमा अमेरिकी क्यापिटलमा भएको आक्रमणमा सात जनाको मृत्यु हुनका साथै संसद्, महानगर र स्थानीय सुरक्षा निकायका एक सय ५० जना सुरक्षाकर्मी घाइते भएका थिए । त्यहाँ ट्रम्पले परिचालन गरेको भीडले अन्धाधुन्ध आक्रमण गरेको आरोप छ ।
एजेन्सी : चन्द्रयान–३ को ‘ल्याण्डर मोड्युल’ चन्द्रमाको दक्षिणी ध्रुवमा सफलतापूर्वक अवतरण गरेको छ । चार वर्षअघि चन्द्रयान–२ को दुर्घटनाग्रस्त अवतरणको निराशाको अन्त्य गर्दै चन्द्रयान–३ लाई चन्द्रमाको दक्षिणध्रुबमा अवतरण गराएर ऐतिहासिक सफलता रच्न सफल भएको छ ।
यो ध्रुबमा पुग्ने भारत पहिलो देश बनेको छ । चन्द्रमाको सतहमा सफलतापूर्वक अवतरण गर्ने अमेरिका, चीन र रूसपछि भारत चौथो देश बनेको छ ।भारतीय अन्तरिक्ष एजेन्सी इसरोको बेङ्गलोरस्थित मुख्यालयका अधिकारीहरूले चन्द्रयान–३ मार्फत पठाइएको ल्याण्डर मोड्युल विक्रमले आफ्नो अवतरण स्थलतर्फ आफ्नो ठाडो अवतरण सुरु गरेपछि ताली बजाएर खुशी मनाएका थिए ।
“भारत चन्द्रमामा पुगेको छ !” जोहानेसबर्गमा आयोजित १५औं ब्रिक्स शिखर सम्मेलनमा भाग लिइरहेका भारतीय प्रधानमन्त्री नरेन्द्र मोदीले एक्स (ट्वीटर) मार्फत् उक्त जानकारी दिएका छन् । विक्रमको चन्द्रमाको कक्षबाट अवतरणको यात्रा १५० मिटर, त्यसपछि १३० मिटर, ५० मिटरमा रहेको थियो र चन्द्रमाको सतहमा पुग्नुअघि चन्द्रमानजिक आइपुग्दा यसको गति घट्दै गएको थियो । विक्रम ल्यान्डरले प्रज्ञान रोभरलाई लिएर चन्द्रमाको सतहमा अवतरण गरेको हो । यो भारतका लागि अन्तरिक्ष यात्राको ठूलो फड्को हो ।
भारतले पृथ्वीको एक मात्र प्राकृतिक उपग्रहको दक्षिणतर्फ अवतरण गर्ने पहिलो देशको रूपमा रेकर्ड बनाएको छ । भारत र विश्वभरका अरबौं मानिसहरूले बहुप्रतिक्षित कार्यक्रमलाई नजिकबाट नियालिरहेका छन् ।
स्कुल र विज्ञान केन्द्रहरू र सार्वजनिक संस्थानहरू सहित देशभर अवतरणलाई विशेष स्क्रिनिङहरू जडान गरी हरिएको थियो । इसरोले आफ्नो वेबसाइट, यसको युट्युब च्यानल, फेसबुक र सार्वजनिक प्रसारक डीडी नेशनल टिभीमा लाइभ कार्यहरू उपलब्ध गराएको थियो ।
चन्द्रमाको दक्षिणी ध्रुवमा चन्द्रयान–३ को अवतरण (सफ्ट ल्यान्डिङ)का लागि २३ अगस्ट २०२३ (बुधबार) भारतीय समय १८ः०४ बजेलाई निर्धारण गरेको थियो । इन्डियन स्पेस रिसर्च अर्गनाइजेसन (इसरो)ले गत असार २९ गते दक्षिण भारतको आन्ध्र प्रदेशस्थित सतिश धावन अन्तरिक्ष केन्द्रबाट प्रक्षेपण गरिएको थियो । ‘एलभीएम–३’ रकेटले अन्तरीक्षयानलाई अन्तरिक्षमा पुर्याएको थियो । भारतले अन्तरिक्षयानलाई चन्द्रमाको अर्बिट (कक्ष) मा सफलतापूर्वक पुर्याएको यो तेस्रो पटक हो । इसरोले यसअघि नै अगस्ट ५ मा ‘चन्द्रयान–३’ चन्द्रमाको कक्षमा पुग्ने बताएको थियो ।
एजेन्सी : रुसको ककेसस गणतन्त्र दागेस्तानमा रहेको एक पेट्रोल पम्पमा आगलागीसँगै विस्फोट हुँदा २७ जनाको मृत्यु भएको छ भने एक सयभ न्दा बढी घाइते भएका छन् ।
आपतकालीन प्रतिकार्य मन्त्रालयका अनुसार माखचकलामा रहेको पेट्रोल पम्मपमा सोमबार राति उक्त दुर्घटना भएको हो । अग्नि नियन्त्रण कार्यालयका साथै सुरक्षा निकायको सहयोगमा आगो पूर्णरुपमा निभाइएको छ ।
रूसी स्वास्थ्य मन्त्रालयले भने मखाचकलाका अस्पतालमा धेरै घाइते भर्ना भएका र मृतकको संख्या बढ्नसक्ने बताएको छ ।
दागेस्तानका प्रमुख सर्गेई मेलिकोभले पत्रकारहरूसँगको कुराकानीमा दुर्घटनाको अनुसन्धान भइरहेको जनाउँदै व्यक्तिगत लापरबाहीका कारण घटना भएको हो वा होइन भन्ने यकिन भइनसकेको बताएका छन् ।
दुर्घटनाको खवर प्राप्त हुनेबित्तिकै सुरक्षालगायत अन्य सम्बद्ध निकायका अधिकारी घटनास्थल पुगेर नजिकको बस्तीका मानिसलाई सुरक्षित स्थानमा सारिएको थियो ।
एजेन्सी : पाकिस्तानका पूर्वप्रधानमन्त्री तथा तेहरिक–ए–इन्साफका अध्यक्ष इमरान खानलाई ट्रयाल कोर्टले गैरकानूनी रूपमा सरकारी उपहार बेचेको अभियोगमा तीन वर्षको जेल सजाय सुनाएको छ ।
इस्लामावादस्थित एउटा अदालतले राज्यका उपहारहरू बिक्री गर्दा आफूलाई प्राप्त भएको आम्दानी घोषणा नगरेकोमा उनलाई दोषी पाएको हो ।
न्यायाधीशले उनलाई तत्काल पक्राउ गर्न आदेश दिएका थिए । खानका वकिल इन्तजार हुसैनले रोएटर्स समाचार संस्थालाई पूर्वप्रधानमन्त्रीलाई उनको लाहौरस्थित घरबाट नियन्त्रणमा लिइएको बताएका छन् ।
एजेन्सी : भारतको मणिपुरमा विगत साढे दुई महिनादेखि जारी मेइती र कुकी समुदायबीचको हिंसात्मक द्वन्द्वको बीचमा बुधबार मणिपुरमा दुई महिलामाथि यौन दुर्व्यवहारको डरलाग्दो भिडियो सार्वजनिक भएको छ । मणिपुरमा भीडले दुई जना महिलालाई निर्वस्त्र सडकमा घुमाएको घटना बाहिर आएको हो ।
उक्त भिडियोको पुष्टि गर्दै मणिपुर प्रहरीले ती महिलाहरू मे ४ मा मणिपुरको थौबल जिल्लामा यौन दुर्व्यवहारको सिकार भएको बताएको छ । मणिपुर प्रहरीले भनेको छ, ‘यो घटना मे ४ को हो । यसमा अपहरण, सामूहिक बलात्कार र हत्याको मुद्दा अज्ञात व्यक्तिविरुद्ध दर्ता गरिएको छ। यस विषयमा अनुसन्धान शुरु भएको छ । प्रहरीले दोषीलाई पक्राउ गर्न सक्दो प्रयास गरिरहेको छ ।
भिडियोमा भिडले महिलामाथि आपत्तिजनक व्यवहार गरेको देखिएको छ । महिलाहरूले रुँदै गुहार मागिरहेको देखिएको छ । आक्रमणकारीले महिलाहरूमाथि सामूहिक बलात्कार गरेको पनि बताइएको छ । एक युवकले आफ्नो दिदीलाई बचाउने प्रयास गर्दा उनको पनि हत्या गरेको बताइएको छ ।
भिडियोमा देखिएकी एक महिलाको उमेर करिब २० वर्ष र अर्की महिलाको उमेर ४० वर्ष रहेको बताइएको छ । भिडियोमा दुई जना महिलामात्रै देखिन्छन्, तर भीडले ५० वर्षीया महिलालाई पनि लुगा फुकाल्न बाध्य पारेको यी महिलाले आफ्नो उजुरीमा बताएका छन् ।
मणिपुरका मुख्यमन्त्री बिरेन सिंहले दोषीलाई फाँसी दिने प्रयास गर्ने बताएका छन् । यस घटनामा एक जनालाई पक्राउ गरिएको पनि मुख्यमन्त्री सिंहले जानकारी दिएका छन् ।
बिहीबार प्रधानमन्त्री नरेन्द्र मोदीले मणिपुरको घटनाले आफ्नो मन पीडाले भरिएको बताएका छन् । प्रधानमन्त्री मोदीले देशको अपमान भइरहेको र दोषीलाई उन्मुक्ति नदिने बताएका छन् । प्रधानमन्त्री मोदीले घटनाले १४० करोड भारतीयलाई लज्जास्पद बनाएको टिप्पणी गरेका छन् । मणिपुरमा जारी हिंसाबारे प्रधानमन्त्री मोदीले पहिलो पटक बोलेका हुन् । विपक्षीहरूले लामो समयदेखि प्रधानमन्त्री मोदीले मणिपुरमा नबोलेकोमा प्रश्न उठाउँदै आएका थिए ।
उक्त भिडियो सार्वजनिक भएसँगै यस विषयमा केन्द्रदेखि विपक्षी दलका प्रमुख नेतासम्मको कडा प्रतिक्रिया आएको छ । कांग्रेसलगायत अन्य विपक्षी दलहरूले यस विषयमा सत्तारुढ दल भाजपालाई घेरा हाल्ने प्रयास गरेका छन् ।
एजेन्सी : भारतले चन्द्रमाको सतहमा मानवरहित अन्तरिक्ष यान अवतरण गर्ने प्रयासलाई निरन्तरता दिँदै चन्द्रयान–३ प्रक्षेपण गरेको छ । दक्षिणी राज्य आन्ध्र प्रदेशको श्रीहरिकोटाबाट चन्द्रयान–३ (रकेट) अन्तरिक्ष यान लिएर उडेको हो ।
विश्वको सबैभन्दा धेरै जनसङ्ख्या भएको यो राष्ट्रसँग ‘कट–प्राइस एयरोस्पेस’ कार्यक्रम छ जुन विश्वव्यापी अन्तरिक्ष शक्तिहरूले अन्तरिक्षमा पुग्न पाएको सफलतापछि द्रूत गतिमा बन्द गरेका छन् । यसअघि रूस, संयुक्त राज्य अमेरिका र चीनले मात्र चन्द्रमाको सतहमा नियन्त्रित अवतरण गरेका थिए ।
चन्द्रमामा यान प्रक्षेपण गर्ने भारतको अन्तिम प्रयास ग्राउन्ड कन्ट्रोलले रकेट अवतरण गर्नुभन्दा केही क्षणअघि सम्पर्क गुमाएपछि चार वर्षअघि असफल भएको थियो । यदि भारतीय अन्तरिक्ष यानको बाँकी भाग योजना अनुसार अघि बढ्यो भने चन्द्रयान–३ अगस्ट २३ देखि २४ को बीचमा चन्द्रमाको सानो खोजी गरिएको दक्षिणी ध्रुवनजिकै सुरक्षित रूपमा अवतरण हुनेछ ।
यसैबीच फ्रान्स भ्रमणमा रहेका भारतीय प्रधानमन्त्री नरेन्द्र मोदीले ट्वीट गर्दै यो मिसनले ‘हाम्रो राष्ट्रको आशा र सपना’ बोकेको बताएका छन् । भारतीय अन्तरिक्ष अनुसन्धान संगठन (आइएसआरओ)द्वारा बनाइएको चन्द्रयान–३ अन्तरिक्ष यानमा विक्रम नामको ल्यान्डर र ज्ञानको लागि संस्कृत शब्द प्रज्ञान नामको रोभर समावेश गरिएको छ ।
अभियानले सफलता पाएमा चन्द्रमाको दक्षिणी सतहलाई छोएपछि रोभरले विक्रमलाई रोल गर्नेछ र नजिकैको क्षेत्र अन्वेषण गर्नेछ र यसको विश्लेषणको लागि पृथ्वीमा छविहरू फिर्ता पठाउनका संकलन गर्नेछ । रोभर एक चन्द्र दिन वा पृथ्वीको १४ दिनको अभियानका लागि काम गर्न सक्षम रहने भारतीय अन्तरिक्षविद्ले बताएका छन् ।
काठमाडौं : आफ्नो सिधै गृहमन्त्रीसंग संवन्ध र पहुँच भएको बताउने अध्यागमन विभागका महानिर्देशक झलकराम अधिकारीले सबै प्रक्रिया पूरा गरी वैदेशिक रोजगारका लागि जोर्डन जान लागेका कामदार फर्काउने अनुचित निर्णय गर्ने कर्मचारीको बचाउ गरेका छन् ।
सबै प्रक्रिया पूरा गरी आइतबार जोर्डनको प्रतिष्ठित बहुराष्ट्रिय कम्पनी मास क्रेडा अल सफीमा जान लागेका १५ जना नेपाली कामदारलाई त्रिभुवन अन्तर्राष्ट्रिय विमानस्थल अध्यागमन कार्यालयका कर्मचारीले बिना कारण फर्काएका थिए । फर्काइएकामा १४ जना महिला र एक जना पुरूष कामदार रहेका थिए ।
त्यस विषयमा बुझ्न नेपाल वैदेशिक रोजगार व्यवसायी संघका अध्यक्ष राजेन्द्र भण्डारी तथा कार्यसमिति सदस्य देउमान नेम्वाङको नेतृत्वमा एससीसी म्यानपावर कम्पनी प्रा.लि.का सञ्चालक अबुल शाहसहितको टोली सोमबार कालिकास्थानस्थित अध्यागमन कार्यालय गएको थियो ।
अध्यक्ष भण्डारीले वैदेशिक रोजगार विभागबाट सबै प्रक्रिया पूरा गरी पठाएका कामदारलाई अध्यागमन कर्मचारीले गलत नियत राखेर फर्काउँदा उनीहरूको टिकट रद्द भएको भन्दै उनीहरूलाई विभागले क्षतिपूर्ति दिनुपर्ने माग राखेका थिए । तर महानिर्देशक अधिकारीले अध्यागमन कर्मचारीले दैनिक दर्जनौं यात्रु फर्काउने गरेको र कसैलाई क्षतिपूर्ति दिने नगरिएको भन्दै जोर्डन जानेक्रममा फर्काइएका कामदारहरूलाई पनि कुनै क्षतिपूर्ति दिन नसकिने जवाफ दिए ।
प्रतिउत्तरमा अध्यक्ष भण्डारीले आइतबार जोर्डन जान लागेका र भिजिट भिसामा जानेहरूको अवस्था फरक रहेकाले गलत गर्ने अध्यागमन कर्मचारी जवाफदेही हुनुपर्ने भनाइ राखे । महानिर्देशक अधिकारीले अध्यक्ष भण्डारी, कार्यसमिति सदस्य नेम्वाङ तथा म्यानपावर सञ्चालक शाहले गरेको पटक–पटकको आग्रह सुन्न चाहेनन् । उनले भने, ‘गलत नै भएको भएपनि क्षतिपूर्ति दिने व्यवस्था छैन । तपाईंहरूसँग यस विषयमा थप छलफल गर्न मसँग समय छैन, छलफल पनि गर्दिनँ, तपाईंहरू न्याय र क्षतिपूर्ति चाहिने भए गृहमन्त्रीसमक्ष जानुस् ।’
अध्यागमन कार्यालयले बाटुली बि.क., अनिता विश्वकर्मा, मञ्जु कामी, रत्नकाली घर्तीमगर, तुलसा कुँवर, विना तामाङ, अमनी तिरुवा, अपर्णा सुनुवार, रेनुका विश्वकर्मा, मञ्जु कामी, सुनिता दोङ, सृष्टि कोइराला सार्की, सुस्मिताबि.क., लक्ष्मी श्रेष्ठ, सबिना राई र रोहितराज भट्टलाई फर्काएको थियो ।
अध्यागमनले फर्काएकी सुनिता दोङलाई अध्यागमन अनुमति नदिएको पत्रमा जोर्डन काम गर्न जान लागेका निजहरूको वर्किङ भिसा नदेखिएको र मिनिष्ट्री अफ इन्भेष्टमेन्टले भिसा जारी गर्ने निकायलाई भिसा रिन्यूका लागि अनुरोध गरिएको पत्रमात्र भएकाले प्रस्थान दिन नसकिएको उल्लेख छ ।
म्यानपावर सञ्चालक अबुल शाहले अन्तर्राष्ट्रिय उडान प्रचलनअनुसार अध्यागमन प्रक्रिया पूरा गरेपछि यात्रु फर्काउन नपाइनेमा अध्यागमन कर्मचारीले उक्त प्रचलनको समेत बेवास्ता गर्दै उनीहरूलाई फर्काएर राहदानी डिपार्ट गरिएको छाप लगाई कामदारमाथि ज्यादती गरिएकोमा जवाफ चाहिने माग गरे । तर महानिर्देशक अधिकारीले त्यस विषयमा केही जवाफ नदिई न्याय चाहिने भए नारायणकाजीकोमा जान पुनः रूखो जवाफ फर्काए । नारायणकाजी श्रेष्ठ उपप्रधान तथा गृहमन्त्री हुन् ।
सञ्चालक शाहले जोर्डनको उक्त गार्मेन्ट कम्पनीबाट एससीसी म्यानपावर कम्पनीले लिएका ७० जना कामदारको डिमाण्डमध्ये यसअघि ४० जना सहजरूपमा कामका लागि जोर्डनस्थित कम्पनी पुगेको हवाई टिकटको प्रतिलिपि महानिर्देशकसमक्ष पेश गरे । सरसर्ती हवाई टिकटको प्रतिलिपि हेरेका महानिर्देशक अधिकारीले ४० जना गएको विषयमा अध्यागमन कार्यालयमा कुनै रेकर्ड नरहेको भन्दै सेटिङमा गएको हुनसक्ने आशय व्यक्त गरे । तर कम्पनीका सञ्चालक शाहले महानिर्देशक अधिकारीको आशयको खण्डन गर्दै सबै प्रक्रिया पूरा गरी वैधानिक तरिकाले गएको जवाफ दिए । तर महानिर्देशक अधिकारी त्यसमा बोलेनन् ।
व्यवसायी शाहका अनुसार उनीहरू शून्य लागतको छनोट प्रक्रिया अन्तर्गत जोर्डनको रोजगारीमा छनोट भएका हुन् । उनीहरुको सेवा शुल्क, भिसा, टिकट, स्वास्थ्य परीक्षणलगायत खर्च रोजगारदाता कम्पनीले व्यहोरेको थियो । अन्तर्वार्तामा छनोट भएपछि उनीहरूलाई म्यानपावर कम्पनीले एक महिना राजधानीको एक होटलमा राखेर प्रस्थानदेखि रोजगारीसम्मका सबै तालिम दिएको थियो ।
संघका अध्यक्ष भण्डारीले अध्यागमनका महानिर्देशक अधिकारी र कर्मचारीको रवैयालाई लिएर सकेसम्म छिटो गृहमन्त्री श्रेष्ठको ध्यानाकर्षण गराइने जानकारी दिए । उनले भने, ‘न्याय खोज्न आउँदा गैरजिम्मेवारीपनको नमुना देखियो ।’ म्यानपावर सञ्चालक शाहले जोर्डन पठाउन नपाएका कामदारलाई राजधानीको एक होटलमा राखेर टिकटको प्रबन्ध गरिरहेको बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies