दोहा, कतार : कर्णाली प्रदेश समन्वय परिषद् कतारको छैटौं वार्षिकोत्सव तथा तेस्रो अधिवेशन शुक्रबार दुई चरणमा सम्पन्न भएको छ । उद्घाटन र बन्द सत्र गरी ग्राण्ड मलमा रहेको वेलफेयर रेस्टुरेन्टको सभा हलमा सम्पन्न अधिवेशनको बन्द सत्रबाट मोतीलाल बुढा मगरको अध्यक्षतामा नयाँ कार्यसमिति सर्वसम्मतरूपमा चयन भएको छ ।

कार्यसमितिको वरिष्ठ उपाध्यक्षमा पूर्णबहादुर राना, उपाध्यक्षहरू क्रमशः टंक विश्वकर्मा, तिलक सिंह ठकुरी, शेरबहादुर रोकाय, पवि कुमारी थापा, महासचिव सुरेश केसी, सचिवद्वय हरिस रावल, प्रकाश हमाल, कोषाध्यक्ष यज्ञबहादुर रावत र सहकोषाध्यक्ष रुपसिंह सिञ्जाली रहेका छन् । त्यस्तै सदस्यहरूमा तुलबहादुर बिक, निमा रोकाय, खुम बहादुर पुन, देउवीर पुन मगर, पूर्णबहादुर रोकाय, लोकेन्द्र खत्री, मिना डाँगी, परेक सुनार, ओम प्रकाश बाह्रघरी र दिनेश तिरुवा रहेका छन् । नयाँ कार्यसमितिलाई निर्वाचन समितिका संयोजक छविलाल बुढाथोकीले पद तथा गोपनीयताको शपथ ग्रहण गराएका थिए ।

अधिवेशनको उद्घाटन सत्र परिषद्का का.वा. अध्यक्ष मोतीलाल बुढा मगरको सभाध्यक्षता तथा गैरआवासीय नेपाली संघ (एनआरएनए एनसीसी) कतारका अध्यक्ष रमेश भट्टको प्रमुख आतिथ्यतामा भएको थियो । 

कार्यक्रममा बोल्दै प्रमुख अतिथि भट्टले कर्णालीमा विगतमा देखिएको फुट र अहिले देखिएको एकताले समाजमा सकारात्मक सन्देश दिएको बताए । उनले कतारमा स्वागत मन्तव्य राखेपछि आउने अतिथिहरूलाई आसन ग्रहण नगराइ सचिवालयको माइन्युटमा नाम लेखेर सचिवालयमै अतिथिको ब्याच उपलब्ध गराइ समयको बचत गर्ने परम्पराको विकास गर्न अपरिहार्य रहेको बताए ।

उनले कार्यक्रममा ढिला आउने, सेड्युल तलमाथि पारेर आफ्नो मन्तव्य राखेर हिँडिहाल्ने प्रवृत्तिको अन्त्य गर्नुपर्ने आवश्यकता औंल्याए । उनले नेपाली दूतावासलाई लक्षित गर्दै एनसीसी र कतारमा स्थापित संस्थाहरूलाई आवश्यकता पर्दा प्रयोग गरे पनि उनीहरूलाई आवश्यक पर्दा दूतावासले सहयोग नगरेको दाबी गरे । भट्टले एनसीसीले श्रमिकहरूको हितका लागि काम गरिरहेको भए पनि दूतावासले पीडित श्रमिकहरूका लागि सेल्टरको आवश्यकता नभएको जस्ता अभिव्यक्ति दिएकोमा दुःख व्यक्त गरे I

कतारमा स्थापित विभिन्न संघसंस्थाका प्रमुख तथा प्रतिनिधिहरूको उपस्थितिसहित शुभकामना मन्तव्य रहेको थियो । अधिवेशनमा कतारमा रहेका करिब १ दर्जन कलाकारले सांगीतिक प्रस्तुति दिएका थिए । पूर्णबहादुर रानाले स्वागत मन्तव्य राखेको कार्यक्रमलाई महासचिव सुरेश केसी र रानाले मिलेर सहजीकरण गरेका थिए ।

कार्यक्रममा बोल्दै कर्णालीका अभिभावक शनि कुमार ओलीले कार्यक्रममा सरिक हुने विशेष गरी वैचारिक संस्थाका संस्था प्रमुख तथा प्रतिनिधिहरूले सामाजिक संस्थामा मन्तव्यमार्फत राजनीतिक बहस गर्ने थलो बनाउन नहुने बताए । राजनीतिक बहस गर्ने वैचारिक संस्थाकै कार्यक्रम स्थल हुने या नयाँ बहस गर्ने स्थानको विकास गर्नुपर्ने बताए । उनले कर्णाली प्रदेश भाषा, संस्कार, संस्कृति, पर्यटनमा धेरै अघि रहे पनि राज्यको विभेदका कारण पछाडि परेको बताए । 

अधिवेशनमा सांगीतिक प्रस्तुति दिने कलाकार, केही पत्रकारसहित प्रमुख अतिथिलाई सम्मान गरिएको थियो । महासचिव सुरेश केसीले सहजीकरण गरेको उद्घाटन सत्रको समापन गर्दै सभाध्यक्ष बुढा मगरले विगतमा २ चिरामा रहेको प्रदेशलाई एक बनाउन पहल गर्ने सबै सामाजिक व्यक्तित्व तथा अधिवेशनलाई सफल पार्न सहयोग गर्ने सबैलाई धन्यवाद ज्ञापन गरेका थिए ।

कतारमा आइपुग्यो मयुर नाच

कतारमा पहिलो पटक मयुर नाच आइपुगेको छ । परिषद् कतारले आफ्नो  छैटौं वार्षिकोत्सव तथा तेस्रो अधिवेशनमा मयुर नाच भित्र्याएको हो । नेपालबाट मयुरको प्वाँख ल्याउन केही कानुनी प्रक्रिया पूरा गर्न समय लागेको आयोजकले बताएको छ । कार्यक्रममा कलाकारहरूले आकर्षक मयुर नाच पेस गरेका थिए ।

जब मादल बजाइन्छ तब डुंग्रीले साथ दिन्छ । त्यसमा हार्मोनियमले मिठास भरिदिन्छ । बाँसुरीको धुन मिसाइन्छ । मादलले लय समात्छ अगुवाले सिटी फुक्छ, अनि कलाकारहरू नाच्न थाल्छन् मयुर नाच । मयुरको प्वाँखबाट गरुवा बनाइन्छ । जुन कलाकारले कम्मरमा भिरेका हुन्छन् । उनीहरू परम्परागत पोसाकमा सजिएका हुन्छन् । बाजागाजा, पहिरन र मयुर नाच रुकुम पश्चिमको लोक संस्कार र संस्कृतिको नाच हो । १२ देखि ३२ जनासम्म गोलो घेरा हालेर मयुर नाच एकै पटक नाचिन्छ । मयुर नाचका फरक-फरक प्रकार छन् । लट्ठी हान्ने, संगीतमा नाच्ने, वनगारी नाच, पैसेरी नाच र सिँगारु नाच हुन्छन् । यी नाचहरू भिन्न ताल र सुरमा नाचिन्छ । पैसेरी नाच मौलिक संस्कृतिभित्रको नाच हो ।