अर्घाखाँची : लुम्बिनी प्रदेश अन्तर्गत पाल्पाको प्रमुख पर्यटकीय स्थलको रुपमा रहेको ऐतिहासिक पाल्पा दरबार संग्राहलयलाई चौबिसै घण्टा उज्यालो बनाइएको छ ।
यस दरबार संरक्षणको नेतृत्व गर्नेहरुले लामो समयदेखि यहाँ उज्यालो कहिले हुन्छ ?, संग्राहलयमा उज्यालको व्यवस्था किन भएन ?, सरकार कहाँ छ ?, जिम्मेवारी कसको हो ?’ भन्ने गुनासो सुन्दै आएका थिए ।
संग्राहलयमा नेतृत्व गर्ने नेतृत्वकर्ता जवाफ दिन सक्ने अवस्थामा थिएनन् । अब भने उनीहरुले जवाफ दिन सक्ने भएका छन् ।
लुम्बिनी प्रदेशमा धार्मिक पर्यटकीय स्थल सुपादेउराली पछिको महत्वपूर्ण संग्रालय जहाँ दैनिक तीन सय भन्दा बढी पर्यटक आउने गर्दछन् । यो संग्राहलय विद्युत नभएको कारण अँध्यारो हुने गथ्र्यो । यसअघि वैकल्पिक उज्यालोको कुनै पनि व्यवस्था थिएन । लुम्बिनी प्रदेश सरकार मातहतको संग्राहलयमा देखिएको यो समस्या समाधान गरिदिन संग्राहलयले अनुरोध गरिरहँदा पनि समस्या समाधान गर्न सरकारले ध्यान पुर्याउन नसक्दा समस्या उत्तिकै थियोे । प्रदेशको उद्योग, पर्यटन तथा यातायात मन्त्रालयमा नयाँ मन्त्री भित्रिएपछि दरबार संग्राहलय अब चौविसै घण्टा उज्यालो बनेको छ ।
लुम्बिनी सरकारका पर्यटन मन्त्री प्रचण्ड विक्रम न्यौपानेले दरबार संग्राहलयमा तत्काल वैकल्पिक उज्यालोको व्यवस्था गर्न निर्देशन दिएलगत्तै त्यहाँ अहिले इन्भर्टर जडान भएको छ । ‘दरबार संग्राहलयमा वैकल्पिक उर्जाको कुनै पनि व्यवस्था थिएन, विद्युत नभएको समयमा संग्राहलय अँध्यारो रहने अवस्था थियो,’ संग्राहलयका कार्यकारी निर्देशक श्याम कुमार पौडेलले भने,‘संग्राहलय अँध्यारो हुँदा अनुगमनका लागि आउने पर्यटकहरुबाट लामो समयदेखि गुनासो सुन्दै आएका थियौं, वर्तमान पर्यटन मन्त्रीज्यू समक्ष हामीले समस्याका बारेमा जानकारी गरायौं, र तत्कालै उहाँबाट हाम्रो समस्या सम्बोधन भएको छ ।’ इन्भर्टर जडान भएपछि अहिले संग्राहलयमा अँध्यारोको समस्या दिर्घकालीन रुपमा टरेको छ ।
केही समय अघि मन्त्री न्यौपाने दरबार संग्राहलयको अनुगमनमा पुगेका थिए । त्यस क्रममा संग्राहलयमा वैकल्पिक उर्जाको व्यवस्था नभएका कारण समस्या रहेको गुनासो संग्राहलयले मन्त्री न्यौपाने समक्ष राखेको थियो । मन्त्री न्यौपानेले लुम्बिनी प्रदेशकै उत्कृष्ट पर्यटकीय थलो मध्येको दरबार संग्राहलयमा तत्काल वैकल्पिक उर्जाको व्यवस्था गर्न मन्त्रालय मातहतको पर्यटक परिषदलाई निर्देशन दिएका थिए । परिषदले तत्कालै इन्भर्टर खरिदका लागि संग्राहलयलाई बजेटको व्यवस्थापन गरिदिएको थियो ।
लगत्तै मन्त्रालय अन्तर्गतको पर्यटन परिषदले संग्राहलयमा वैकल्पिक उर्जाको व्यवस्थापनका लागि १० लाख रुपैयाँ बजेट विनियोजन गरिदिएको थियो ।
‘पाल्पा दरबारको अनगुमनका क्रममा एक महिना अघि म त्यहाँ पुगेको बेला संग्राहलय जस्तो ठाउँमा विद्युत गएको समयमा अँध्यारो हुने समस्या रहेछ,’ मन्त्री न्यौपानेले भने, ‘मैले तत्कालै इन्भर्टरको व्यवस्थापन गर्न निर्देशन दिएँ र अहिले दरबार संग्राहलयमा यो समस्या टरेको छ ।’ वैकल्पिक उर्जाको व्यवस्थापन भएपछि मन्त्री न्यौपाने केही दिनअघि मात्रै पुनः अनुगमनका लागि दरबार संग्राहलय पुगेका थिए । त्यस क्रममा संग्राहलय प्रशासनले संग्राहलयभित्र अँध्यारोको समस्या टरेको जानकारी गराएको थियो ।
‘पर्यटकहरुको कसरी बढी भन्दा बढी भित्र्याउने, प्रदेशको आर्थिक समृद्धि गर्ने भन्ने मुख्य लक्ष्य सरकारको छ,’ मन्त्री न्यौपानले भने ‘तर पर्यटकहरुलाई आकर्षित गर्ने यस्ता महत्वपूर्ण पर्यटकीय थलोहरुमा समस्या छन्, यि सबै समस्या समाधान गरेर पर्यटकहरुलाई कसरी आकर्षित गर्न सकिन्छ भन्ने योजनाका साथ हामी लागेका छौं ।’ उनले अन्य पर्यटकीय स्थलहरुमा समेत देखिएका साना तथा ठूला समस्या समाधानका लागि सकृय रुपमा लागेको समेत बताए ।
_yKNe1zQ056.jpg)
