काठमाडौं : सैनिक जनसम्पर्क तथा सूचना निर्देशक एवम् नेपाली सेनाको प्रवक्ताको जिम्मेवारी सहायक रथी गौरवकुमार केसीले सम्हालेका छन् ।
यसअघिका प्रवक्ता एवम् सहायक रथी कृष्णप्रसाद भण्डारीले सैनिक जनसम्पर्क तथा सूचना निर्देशनालयमा सोमबार आयोजित कार्यक्रममा सहायक रथी केसीलाई औपचारिकरुपमा प्रवक्ताको कार्यभार हस्तान्तरण गरेका हुन् ।
त्यसअवसरमा सहायक रथी भण्डारीले प्रवक्ताको जिम्मेवारीमा रहने क्रममा आमसञ्चार जगतका सबै सञ्चारगृह, प्रकाशक, सम्पादक र विशेषगरी रक्षासग सम्बन्धित विटमा कार्यरत पत्रकारबाट भएको सद्भाव, सुभेच्छा र सहयोगका लागि आभार व्यक्त गरे ।
प्रवक्ताको जिम्मेवारी पाएका केसीले नेपाली सेना र आमसञ्चार जगतबीचको सम्बन्ध र सहयोग आगामी दिनमा थप प्रगाढ र सुमधुर रहने विश्वास व्यक्त गरे । प्रवक्ता केसी यसअघि पोखरास्थित ३ नम्बर बाहिनी अड्डा प्रमुख थिए भने सहायक रथी भण्डारीको सैनिक अभिलेखालयमा सरुवा भएको छ ।
सरु भुसाल/मध्यान्ह
गुल्मी : गर्मीयाम शुरु भएसँगै डढेलोको प्रकोप देशका विभिन्न भागहरुमा देखा परेको छ । डढेलो नियन्त्रण गर्ने क्रममा गुल्मीको एक जंगलमा लडेर एक जनाको मृत्यु भएको छ भने एक जना घाइते भएका छन् ।
गुल्मीको मुसिकोट नगरपालिका वडा नम्बर १ तल्लो पौदीस्थित सर्वोदय माध्यमिक विद्यालय नजिक रहेको सल्लाघारीमा लागेको आगो निभाउने क्रममा स्थानीय ५८ वर्षीय महले घर्तीको मृत्यु भएको प्रहरीले जनाएको छ ।
सोमबार बिहानबाट लागेको आगो निभाउन गएका घर्ती आफूतर्फ आगोको ठूलो मुस्लो आएपछि भाग्दा लडेर गम्भीर घाइते भएका थिए । सल्लाघारी जंगलबाट झण्डै २०० मिटर तल खसेका घर्तीलाई तत्काल उद्धार गरी जिल्ला अस्पताल तम्घास पुर्याइएकोमा चिकित्सकले उनलाई मृत घोषणा गरेको जिल्ला प्रहरी कार्यालय गुल्मीका प्रहरी नायब उपरीक्षक शंकर पोखरेलले मध्यान्हलाई जानकारी दिए ।
घर्तीसँगै सल्लाघारीबाट लडेका स्थानीय ५२ वर्षीय रेशम थापा घाइते भएका छन् । थापाको तम्घास अस्पतालमा उपचार भइरहेको प्रहरी नायब उपरीक्षक पोखरेलले बताए ।
गण्डकी : पदयात्रा पर्यटनका लागि विश्वप्रसिद्ध अन्नपूर्ण क्षेत्रमा चालु आर्थिक वर्षको नौ महिनामा एक लाख ४४ हजार छ सय ७५ विदेशी पर्यटक भित्रिएका छन् ।
अन्नपूर्ण संरक्षण क्षेत्र आयोजना (एक्याप)का अनुसार गत साउनदेखि चैतसम्मको अवधिमा दक्षिण एसियाली मुलुकका ५९ हजार नौ सय ३९ र अन्य मुलुकका ८४ हजार सात सय ३६ पर्यटकले अन्नपूर्ण क्षेत्रको भ्रमण गरेका हुन् ।
गत चैतमा मात्र दक्षिण एसियाली मुलुकका १६ हजार नौ सय ६९ र अन्य मुलुकका १८ हजार दुई ९६ गरी कूल ३५ हजार दुई सय ६५ विदेशी पर्यटक अन्नपूर्ण क्षेत्र घुम्न आएको आयोजना प्रमुख डा रविन कडरियाले जानकारी दिए । गत असोजमा २८ हजार सात सय पाँच पर्यटकले अन्नपूर्ण क्षेत्रको भ्रमण गरेका थिए ।
यो वैशाख महिनामा पर्यटक संख्या थप बढ्ने प्रमुख डा कडरियाको अनुमान छ । गत आवको वैशाखमा ३१ हजार नौ सय ५१ विदेशी पर्यटक अन्नपूर्ण क्षेत्र आएका थिए । असोज–कात्तिक र चैत–वैशाखको याम पदयात्रा पर्यटनका लागि सबैभन्दा उत्तम मानिन्छ ।
‘एक्याप’ले अन्नपूर्ण चक्रीय पदमार्गमा घुमफिर गर्ने विदेशी पर्यटकको तथ्यांक राख्ने गरेको छ । सडक मार्ग भएर मनाङ, मुस्ताङलगायतका ठाउँ प्रवेश गर्ने आन्तरिक पर्यटकको संख्या यकिन छैन । ‘एक्याप’का अनुसार सन् २०२३ मा एक सय ७३ देशका एक लाख ९१ हजार पाँच सय ५८ पर्यटकले अन्नपूर्ण क्षेत्रको भ्रमण गरेका थिए । उक्त संख्या हालसम्मकै उच्च हो । त्यसअघि सन् २०१९ मा एक लाख ८१ हजार पर्यटकले अन्नपूर्ण क्षेत्र घुमेका थिए । अन्नपूर्ण चक्रीय पदमार्गमा अन्नपूर्ण आधार शिविर, मार्दी हिमाल, घान्द्रुक, मनाङको तिलिचो ताल, थोरङ्ला भञ्ज्याङ, उपल्लो मुस्ताङ, मुक्तिनाथ क्षेत्र, म्याग्दीको घोडेपानीलगायतका गन्तव्य छन् ।
सात हजार छ सय वर्ग किलोमिटरमा फैलिएको अन्नपूर्ण संरक्षण क्षेत्रमा कास्की, लमजुङ, मनाङ, म्याग्दी र मुस्ताङका १६ स्थानीय तहका ८९ वडा समेटिएका छन् । अन्नपूर्ण क्षेत्र प्राकृतिक सौन्दर्य, जैविक विविधता, हिमाली जनजीवन, सभ्यता, संस्कृतिका कारण पर्यटकको रोजाइमा पर्ने गर्छ ।
हिमशृंखलासहितका आकर्षक गन्तव्यस्थल, पर्यटनमैत्री पूर्वाधार, हावापानी, स्थानीयवासीको आतिथ्यता र सेवासुविधाका हिसाबले अन्नपूर्ण चक्रीय पदमार्ग घुमफिरका लागि विश्वकै उत्कृष्ट गन्तव्य मानिन्छ । कास्की, लमजुङ, मनाङ, म्याग्दीलगायतका मार्गबाट अन्नपूर्ण क्षेत्रको छोटो, मध्यम र लामो दूरीको पदयात्रा गर्न सकिने ‘एक्याप’ले जनाएको छ ।
सुर्य प्रसाद भुसाल/मध्यान्ह
अर्घाखाँची : लुम्बिनी प्रदेशका मुख्यमन्त्री जोग बहादुर महराले शैक्षिक क्षेत्रको विकास सोचेजस्तो हुन नसकेको बताएका छन् । मुख्यमन्त्री महराले अबको जमाना विद्यार्थीहरुलाई किताबका कुरा घोकाउने नभइ आधुनिक प्रविधिमार्फत अध्यापन गराउने रहेको बताए । उनले त्यस्तो वातावरण बनाउनका लागि सरकारले नयाँ योजना अगाडि सार्ने बताए ।
अर्घाखाँचीको मालारानी गाउँपालिका वडा नम्बर ५ मा रहेको शान्ति माध्यमिक विद्यालयको हिरक महोत्सवको उद्घाटन गर्दै मुख्यमन्त्री महराले नेपाली श्रमिकहरुको श्रमले देशभित्र मूल्य नपाउँदा धेरै जनशक्ति विदेशिएको बताउँदै अब विदेशी विधार्थी नेपालमा पढ्न आउने वातावरण सिर्जना गर्नुपर्नेमा जोड दिए । महराले आफ्नो नेतृत्वमा बनेको वर्तमान सरकारले कुराभन्दा काम गरेर देखाउने बताए । उनले गाउँबाट शहर र विदेश पुगेको जनशक्ति गाउँमा फर्काउने वातावरण सरकाले बनाउने दाबी गरे ।
सोचेअनुसारको विकास नहुनुको मुख्य जड कामभन्दा कुरा बढी गर्ने प्रवृत्ति रहेको भन्दै महराले भने, ‘अहिलेको सरकारले कामबाटै लुम्बिनी प्रदेशका जनताको विश्वासलाई पूरा गरेर देखाउने छ ।' लुम्बिनी प्रदेश सरकारले केही दिनमै पूर्णता पाउने बताउँदै मुख्यमन्त्री महराले बिना विभागीय मन्त्रीहरुलाई जिम्मेवारी तोक्ने तयारी भइरहेकोको बताए ।
कार्यक्रममा पूर्वमन्त्री सुशीला श्रीपालीले अर्घाखाँचीको विकासमा आफूले धेरै नयाँ योजनाहरु संघीय सरकारमार्फत जिल्लामा भित्र्याएको दाबी गरिन् । कार्यक्रममा संघीय सांसद बिजुला रायमाझीले सबै जिल्लावासी एकजुट भएर जिल्लाको विकासमा हातेमालो गर्नुपर्ने बताइन् । हिरक महोत्सवमा लुम्बिनी प्रदेश सरकारका मन्त्री चेतनारायण आचार्यले लुम्बिनी प्रदेशको विकास निर्माणमा सरकारको स्रोतसाधनले भ्याएसम्मका काम गरिने बताए ।
कार्यक्रममा सन्धिखर्क नगरपालिकाका प्रमुख कृष्णप्रसाद श्रेष्ठ, मालारानी गाउँपालिकाका अध्यक्ष दल बहादुर भट्टराई, प्रमुख जिल्ला अधिकारी सुर्य बहादुर खत्रीलगायत कार्यलय प्रमुखहरु, जनप्रतिनिधिहरु, विभिन्न राजनीतिक दलका नेताहरु, पत्रकार महासंघ अर्घाखाँचीका अध्यक्ष अशोक खनाललगायतको उपस्थिति रहेको थियो । विद्यालय व्यवस्थापन समितिका अध्यक्ष चन्द्र बहादुर खड्काको अध्यक्षतामा भएको कार्यक्रममा विद्यालयका प्रअ मान बहादुर पाण्डेले प्रगति प्रतिवेदन प्रस्तुत गरेका थिए ।
दिलमाया शाही/मध्यान्ह
जुम्ला : जुम्लाको सिंजा गाउँपालिकाले दुई वर्षे प्रगति प्रतिवेदन सार्वजनिक गरेको छ । गाउँपालिका अध्यक्ष पूर्णप्रसाद धिताल र उपाध्यक्ष सितली रोकायाले पत्रकार सम्मेलन आयोजना गरेर आफ्नो करिब दुई वर्षे कार्यकालको प्रगति सार्वजनिक गरेका हुन् ।
सिँजा गाउँपालिकाले खसभाषामा नीति तथा बजेट बाचनको खस पात्रो निर्माण तथा प्रयोग गरेको छ । अध्यक्ष धितालका अनुसार गाउँपालिकास्तरीय हाटबजार सञ्चालन खस सभ्यता संरक्षणका कार्यक्रमहरु गरिएको छ । अध्यक्ष धितालले खस संस्कृतिसँग जोडिएको मष्टो परम्पराको प्रवर्द्धन गर्न यस वर्ष बृहत् केदारनाथ मेला सम्पन्न गरिएको बताए ।
प्रगति प्रतिवेदनमा पहिलो पटक सदरमुकाम बाहिर नराकोट इलाका प्रशासनबाटै राष्ट्रिय परिचय पत्र वितरण गरिएको अध्यक्ष धितालले जानकारी दिए । गाउँपालिकाले आफ्नै प्रशासकीय भवन सञ्चालनमा ल्याएको तथा दोस्रो तला निर्माण भइरहेको पनि उनले जानकारी दिए ।
सुशासनको पाटोमा प्रगति सार्वजनिक तथा सार्वजनिक सुनुवाइ कार्यक्रमसमेत शुरुवात गरिएको उनले बताए । यसैगरी गाउँपालिकाको विकासका लागि विज्ञ समुह गठन गरी प्रस्ताव पेश गरिएको उनले बताए । अध्यक्ष धितालले आफ्नो प्रगति प्रतिवेदनमा सिंजा गाउँपालिकामा राष्ट्रिय वाणिज्य बैंक स्थापना गरिएको पनि उल्लेख गरेका छन् ।
त्यस्तै ज्येष्ठ नागरिकहरुको स्वास्थ्यका लागि घरदैलो स्वास्थ्य कार्यक्रम सञ्चालन गरिएको, जिल्लाको स्वास्थ्य नतिजाअनुसार सिंजा गाउँपालिका स्वास्थ्य शाखा उत्कृष्ट शाखाको रुपमा जनस्वास्थ्य सेवा कार्यालयले घोषणा गरको, गाउँपालिकाले शिक्षा क्षेत्रमा विद्यालय सुधारका लागि विभिन्न प्रकारका क्रियाकलापहरु गरिरहेको प्रगति प्रतिवेदनमा उल्लेख छ ।
त्यस्तै सिंजा क्षेत्रकै ३ वटा स्थानीय तह हिमा, कनकासुन्दरी र सिंजाका नागरिकलाई केन्द्रमा राखेर हाल इलाका प्रशासन कार्यालयले नागरिकता बितरण गरिरहेको अवस्थामा मालपोत र नापी कार्यालयको समेत पहल भइरहेको अध्यक्ष धितालले बताए । अध्यक्ष धितालले सिंजामा नापी र मालपोत कार्यालय राख्न विभिन्न १९ वटा चरण पार गरेर प्रधानमन्त्री तथा मन्त्रिपरिषदमा प्रस्ताव पेश भएको जानकारी दिए । त्यस्तै सिंजा गाउँपालिकाको वडा नम्बर ६ मा बहुप्राविधिक शिक्षालय स्थापना गर्न नागरिकबाट जग्गा प्राप्त भइ प्रक्रिया अगाडि बढिरहेको उनले बताए ।
सिंजा गाउँपालिकाको सदरमुकाम जोड्ने गौरवको सडक छकालेपानीदेखी झिम्री कुनासम्मको सडक अगाडि बढाइएको र दुर्गम क्षेत्र वडा नम्बर ६ सम्म ८ मिटरको बाटो विस्तार गरिएको प्रगति विवरणमा उल्लेख गरिएको छ । गाउँपालिकाले आफ्नै खस संस्कृतिको संरक्षण्का लागि हरेक वर्ष असार ३० मा काफल दिवस, चैत १२ गते धान दिवस, वैशाख १ गते तागा दिवस, साउन १ गते खस दिवस र भदौ १० गते स्याउ दिवस मनाउने पात्रो सार्वजनिक गरेको छ ।
त्यस्तै गाउँपालिका उपाध्यक्ष रोकायाले महिला स्वास्थ्य स्वयंसेविका प्रोत्साहन तथा सम्मान कार्यक्रम, शाखामार्फत महिला बालबालिका र लक्षित वर्गका कार्यक्रम सञ्चालन गरिएको जानकारी दिइन् । उनले २०७९ सालको बाढी पहिरोले क्षति पुगेका घरधुरीको राहतका लागि पहल भइरहेको जानकारी दिइन् ।
कार्यक्रमम विभिन्न राजनैतिक दलहरुले सुझावसमेत राखेका थिए । नेकपा माओवादी केन्द्रले जुम्लामा आफूले नेतृत्व गरिरहेका पालिका र वडाका प्रगति सार्वजनिक गर्न निर्देशन दिएपछि गाउँपालिकाले प्रगति सार्वजनिक गरेको हो ।
काठमाडौं : राष्ट्रिय सभाका अध्यक्ष नारायणप्रसाद दाहालले नयाँ संविधान निर्माण भइसकेपछि आवश्यक कानून निर्माणमा संघीय सांसदहरु गम्भीर हुनुपर्ने बताएका छन् । संसदीय अभ्यास, प्रक्रियाको जानकारी एवं प्रभावकारी भूमिकाको लागि आज आयोजित राष्ट्रिय सभाका नवनिर्वाचित सदस्यहरुसँगको अन्तरक्रियामा उनले समयमै कानून निर्माण नगर्दा अन्योल र निराशाको अवस्था आउन दिन नहुने बताए ।
अध्यक्ष दाहालले आवश्यक ऐन कानून निर्माण गरेर संविधान कार्यान्वयनको कार्यभार पूरा गर्न सबै प्रतिबद्ध र इमान्दार हुनुपर्नेमा जोड दिए । “अहिले कानून निर्माणको आवश्यकता र यसको जुन गतिमा काम भइरहेको छ, यसले ठूलो अन्तरविरोध पैदा भएको छ”, अध्यक्ष दाहालले भने, “नयाँ संविधान निर्माण भइसकेपछि जुन गतिमा कानून निर्माण हुनुपर्ने हो त्यसरी हुन सकिरहेको छैन, यसतर्फ कानून निर्माणको जिम्मेवारी लिएका सांसदहरु गम्भीर हुनु जरुरी छ ।”
नवनिर्वाचित राष्ट्रियसभा सदस्यलाई लक्षित गरेर आयोजना गरिएको कार्यक्रमले संसदीय अभ्यास र प्रक्रिया बुझ्न महत्वपूर्ण हुने भन्दै उनले सिक्ने काम कहिल्यै नसकिने भएकाले यस्ता कार्यक्रम सबैका लागि नियमित सञ्चालन गर्न आवश्यक रहेको बताए ।
कानून निर्माणका विभिन्न चरणबारे सिक्न, विधेयकमा छलफल, संशोधन र कानूनी कार्यमा पोख्त हुन बेला बेलामा यस्ता अन्तरक्रिया, गोष्ठी र छलफल हुनु जरुरी रहेको अध्यक्ष दाहालको भनाइ थियो ।
दमौली : राष्ट्रपति रामचन्द्र पौडेलले तनहुँको व्यास नगरपालिका–११ तनहुँसुरमा अवस्थित ऐतिहासिक खड्गकालिका मन्दिरको आज उद्घाटन गरेका छन् । सप्ताहव्यापी विश्वसम्पदा दिवसका अवसरमा आज यहाँ आयोजित कार्यक्रममा राष्ट्रपति पौडेलले उक्त मन्दिरको उद्घाटन गरेका हुन् ।
पुरातत्व विभागको आर्थिक सहयोगमा विसं २०७८ चैतदेखि पुनर्निर्माण शुरु भएको ऐतिहासिक महत्वको मन्दिर उद्घाटनका लागि पौडेल आजै गृह जिल्ला आइपुगेका थिए । कार्यक्रममा संविधानसभा सदस्य रामचन्द्र पोख्रेल, गण्डकी प्रदेशसभा सदस्य अशोककुमार श्रेष्ठ, व्यास नगरपालिकाका प्रमुख वैकुण्ठ न्यौपानेलगायत सहभागी थिए ।
सन् १६७५ तिरका पाल्पाका शक्तिशाली राजा मुकुन्दसेनले शासन गरेको तनहुँसुरमा जीर्ण अवस्थामा रहेको खड्गकालिका मन्दिर रु ५० लाखको लागतमा पुनर्निर्माण शुरु गरिएको थियो ।
तनहुँसुरमा रहेको दरबारको विसं २०७६ मा पुरातत्व विभागले उत्खनन् गरेको थियो । सोही दरबारको नजिकै रहेको खड्गदेवी मन्दिरको पुनर्निर्माण गरिएको हो । जीर्ण अवस्थामा रहेको मन्दिर पुरानै शैलीमा पुनर्निर्माण गरिएको वडाध्यक्ष दलबहादुर दुराले जानकारी दिए । उनका अनुसार उक्त मन्दिरमा तत्कालीन सेन वंशीय राजाले पूजाआजा गर्ने गरेको किंवदन्ती छ ।
खड्गकालिकाको शेषका रुपमा तनहुँको व्यास–४ दमौलीमा पनि तनहुँ कालिका मन्दिर निर्माण गरिएको छ । तनहुँ जिल्लाको नाम तनहुँसुरबाट अप्रभंस भएर रहेको भन्ने किंवदन्ती छ । पाल्पाका राजा मणिमुकुन्द सेनले आफ्ना जेठा छोरा भृङ्गीसेनलाई सन् १६१० मा तनहुँमा राज्य सञ्चालन गर्न पठाएको र उनी पछिका आठ सेनवंशी राजाले दुई सय ३० वर्ष तनहुँसुरबाट राज्य सञ्चालन गरेको इतिहास रहेको छ ।
तनहुँसुर दरबारका अवशेष, राजपरिवारले प्रयोग गरेका किल्ला र गढीहरु, धारा, तोप तथा अन्य हातहतियार, बारुदीखाना, राजाले न्यायनिसाफ तथा कचहरी सञ्चालन गर्ने गद्दीचौतारा, साउने कुवा, कुँडापानी, बाइससिंढी चौतारी, ढुङ्गेसाँगु, फूलपाती ढुङ्गा, रानीपोखरी, धर्मशाला, रानीबगैँचा, भगवती पानी मन्दिर यहाँका पर्यटकीय सम्पदा हुन् ।
सुर्य प्रसाद भुसाल/मध्यान्ह
सन्धिखर्क : लुम्बिनी प्रदेशका मुख्यमन्त्री जाेखबहादुर महराले अर्घाखाँची जिल्ला प्रदेश राजधानीसँग जोडिएको जिल्ला भएकाले विकास निर्माणले फड्को मार्ने बताएका छन् । मुख्यमन्त्री महराले सन्धिखर्क गच्छे हुँदै प्रदेश राजधानी जोड्ने सडक निर्माण भइरहेकाले यो सडक सम्पन्न गर्नका लागि प्रदेश सरकारले कुनै कसुर बाँकी नराख्ने बताए । उनले विगतका सरकारले अघि बढाएका गाैरवका आयाेजनालाई वर्तमान सरकारले पूरा गर्नेसमेत प्रतिबद्धता जनाए ।
राजधानी निर्माणलगायत सडक पूर्वाधार, शिक्षा, स्वास्थ्य, कृषि, सिँचाइ, खानेपानीलगायतका क्षेत्रमा थालिएका प्रदेश गाैरवका आयाेजनालाई निरन्तरता दिइने महराको भनाइ छ । अर्घाखाँचीको शितगंगा नगरपालिका वडा नम्बर ३ ठाडामा साेमबार भएको स्वागत कार्यक्रमलाई सम्बाेधन गर्दै मुख्यमन्त्री महराले प्रदेशका १२ जिल्लाकाे राजधानीमा सहज पहुँचका लागि सडक सञ्जालले जाेड्ने गरी काम भइरहेकाले गच्छे-भालुवाङ सडक महत्वपूर्ण सडकको रुपमा अगाडि बढाएर अर्को वर्ष सम्पन्न गरिने बताए । ‘लुम्बिनी प्रदेश सरकारले अघि बढाएका राम्रा र गाैरवका आयाेजनालाई पूर्णता दिन हामीले ध्यान दिन्छौं,’ उनले भने, ‘याेजना शुरु गर्ने तर पूरा नगर्ने प्रवृत्ति राेक्न चाहन्छौं ।’
यस्तै मन्त्री चेतनारायण आचार्यले प्रदेश सरकारले कार्यसम्पादनलाई तीव्र पार्ने र जनतामा आशा जगाउने गरी काम गर्ने बताए । मन्त्री आचार्यले जनतामा छाएको निराशालाई आशामा परिणत गर्ने बताउँदै लुम्बिनीको विकासका लागि सबैले सहयोग गर्नुपर्ने बताए ।
कार्यक्रममा प्रतिनिधि सभाका सदस्य बिजुला रायमाझी, शितगंगा नगरपालिका वडा नम्बर ३ का अध्यक्ष चिन्तराज अधिकारी, शितगंगा नगरपषालिका वडा नं १२ का अध्यक्ष दुर्गा बिसी, नेकपा एमालेका नेता बसन्त कुमार श्रेष्ठ, ऋषि घिमिरेलगाएतका जनप्रतिनिधि, नेता तथा कार्यकर्ताहरुको उपस्थिति रहेको थियो ।
काठमाडौं : राष्ट्रिय प्रजातन्त्र पार्टी (राप्रपा)ले काठमाडौंमा गरेको आन्दोलनमा घाइते भएका बर्दियाका ठाकुरप्रसाद डाँगीको उपचारका क्रममा मृत्यु भएको छ ।
डाँगी राप्रपाले गत चैत २७ गते काठमाडौंमा गरेको प्रदर्शनमा सहभागी भएका थिए । प्रदर्शनमा सहभागी उनलाई प्रहरीले प्रहार गरेको अश्रुग्यास लागेको थियो ।
राप्रपाको मधुवन नगरपालिका अध्यक्ष समेत रहेका डाँगीको वीरेन्द्र सैनिक अस्पताल छाउनीमा उपचारको क्रममा आज बिहान चार बजे मृत्यु भएको राप्रपाका प्रवक्ता मोहन श्रेष्ठले जानकारी दिए ।
प्रहरीले हानेको अश्रुग्यास लागेपछि उनलाई श्वासप्रश्वासमा समस्या देखिएको थियो ।
काठमाडौं - प्रमुख निर्वाचन आयुक्त दिनेशकुमार थपलियाले निर्वाचनमा महिलाको अर्थपूर्ण सहभागिता वृद्धिका लागि विद्यमान कानुन र सामाजिक वातावरणमा सुधार आउनुपर्ने बताएका छन् । अन्तर्राष्ट्रिय महिला दिवसका सन्दर्भमा निर्वाचन आयोग र ‘युएन वुमन’द्वारा आज यहाँ आयोजित ‘निर्वाचन र महिलानेपालका प्रयास, उपलब्धि र आगामी कार्यदिशा’ विषयक अन्तक्र्रियाको उद्घाटन सत्रमा प्रमुख आयुक्त थपलियाले कानुनले बाध्यकारी मानेका पदमा मात्रै महिलाको उम्मेदवारी दिने र समग्रतामा राजनीतिमा महिलाको उत्साहजनक सहभागिता नगराउने स्थिति रहेकाप्रति चिन्ता व्यक्त गरे ।
नेपालको पछिल्लो निर्वाचनमा विजयी जनप्रतिनिधिको अवस्था सङ्ख्यात्मकरुपमा एसियाली मुलुकभन्दा माथि रहे पनि त्यसले मात्रै नेपालको संविधानको समानुपातिक समावेशीताको मर्मलाई आत्मसात् गर्न नसक्ने प्रमुख आयुक्त थपलियाको भनाइ थियो । हाल स्थानीय तहमा करिब ४२ प्रतिशत, प्रदेश तहमा ३६ प्रतिशत र सङ्घीय संसद्मा ३४ प्रतिशत महिला सहभागिता रहेको छ । निर्वाचन आयुक्त डा जानकीकुमारी तुलाधरले निर्वाचनबाट महिलाको अर्थपूर्ण सहभागिताका लागि महिला मतदाता बढाउनुपर्नेमा जोड दिँदै आयोगका तर्फबाट सहभागिता वृद्धिका लागि आवश्यक सहजीकरण भइरहेको जानकारी दिइन् ।
आयोगका सचिव रविलाल पन्थले नेपालको संविधानको धारा ३४ को ४ बमोजिम राज्यका सबै तहमा समानुपातिक समावेशी सिद्धान्तका आधारमा प्रतिनिधित्व हुनुपर्ने भएकाले निर्वाचन व्यवस्थालाई लैङ्गिकमैत्री बनाउन आयोगले काम गरिरहेको बताए । ‘युएन वुमन’ का देशीय प्रतिनिधि पत्रिसिया फर्नान्डेजले लोकतन्त्रको आधारभूत पूर्वयोग्यता नै राजनीतिमा महिलाको अर्थपूर्ण सहभागिता भएकाले यसको प्रवद्र्धन क्रियाशील हुनुपर्ने बताए । विज्ञद्वय गोपालकृष्ण शिवाकोटी र सरु जोशीको प्रस्तुतीकरण रहने उक्त कार्यक्रममा समूहगत छलफलबाट निर्वाचनमा महिला सहभागिता वृद्धि, कानुनी सुधार र स्रोत साधनका विषयमा सुझाव दिइने बताइएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies