अर्घाखाँची : गत ३ दिनदेखि परेको अविरल वर्षाका कारण लुम्बिनी प्रदेशका विभिन्न जिल्ला जोड्ने महत्वपूर्ण सडक मार्गहरु अवरुद्ध भएका छन् । लुम्बिनी प्रदेशअन्तर्गतका धेरै जिल्लाका दर्जनौं ठाउँमा पहिरो जाँदा सडकमार्गहरु अवरुद्ध भएको लुम्बिनी प्रदेश आन्तरिक मामिला मन्त्रालयका सूचना अधिकारी गंगाधर पाण्डेले जानकारी दिए । पहिरोका कारण छोटो तथा लामो दुरीका सवारी साधनहरुको आवागमन प्रभावित भएको छ भने सडक सुचारु गराउन सुरक्षाकर्मी र स्वयंमसेवकहरु परिचालन भएको लुम्बिनी प्रदेश आन्तरिक मामिला तथा कानून मन्त्रालयले जनाएको छ ।
लुम्बिनी प्रदेशअन्तर्गत सन्धिखर्क गोरुसिङ्गे राजमार्गका विभिन्न ठाउँमा ठूला पहिरो गएका छन् भने सडक सुचारू गर्नका लागि प्रहरी परिचालन गरिएको अर्घाखाँची का प्रमुख जिल्ला अधिकारी बाबुराम अर्यालले जानकारी दिए । प्यूठान–भालुबाङ सडक खण्डको माण्डवी गाउँपालिका–१ गर्जेनीस्थित सिमलचौर, सरुमारानी गाउँपालिका–४ पाखुरी खोलामा पहिरो झरेको छ । नौवहीनी गाउँपालिका–७ कालिमाटीस्थित मैरामारे देखी बल्लेखोला जानेभित्रि सडकमा पहिरो झरेको छ ।
अर्घाखाँचीस्थित पाणेनी गाउँपालिका–२ सालझण्डी ढोरपाटन सडक, गोरुसिंगे–सन्धिखर्क सडकको दुई स्थानमा पहिरो झरेको छ । रोल्पाको शहीद मार्गको तीन स्थानमा पहिरो झरेको छ । पाल्पा जिल्लाको सिद्धार्थ राजमार्ग, दाङ सल्यान राप्ती राजमार्ग, घोराही लमही–सडक खण्डको सेवार खोलामा जलसतह बढेकाले आवागमनमा समस्या परेको छ । पहाडी जिल्ला अर्घाखाँचीका केही स्थानमा पहिरोका कारण बस्ती जोखिममा परेपछि सुरक्षित स्थानमा सारिएको छ । प्यूठानको गनाहा चकचके सडक खण्ड सडक डिभिजन कार्यलय प्यूठानको टोलीले सुचारु गरेको डिभिजन प्रमुख बिसुनदास लामाले बताए ।
सन्धिखर्क–११ धारामाथी बस्ने जुद्ध बहादुर नेपालीको घर अविरल वर्षाका कारण जोखिममा परेपछि परिवारका सदस्यलाई सुरक्षित स्थानमा सारिएको भूमिकास्थान नगरपालिकाका प्रमुख प्रसाशकीय अधिकृत जगदीशचन्द्र नेपालीले बताए । शितगंगा नगरपालिका–७ जुवाकोट बस्ने दिलबहादुर सार्कीको टिनले छाएको २ तले क्च्ची घर छेउमा जमिन भासिनुका साथै घरमा क्षति पुगेकाले सुरक्षित स्थानमा सारिएको शितगंगा नगरपालिकाका प्रमुख छबिलाल पौडेलले जानकारी दिए ।
लुम्बिनी प्रदेश सरकारले विपद् प्रतिकार्य योजनामा जुट्न सबै नागरिकलाई अपिल गरेको छ । मुख्यमन्त्री चेतनारायण आचार्यले अविरल वर्षाका कारण निम्तिनसक्ने विपद्को प्रतिकार्यमा जुट्न अपिल गरेको मुख्यमन्त्री कार्यलयले जनाएको छ । तीन वटै सुरक्षा निकाय, नागरिक स्वंयमसेवक तथा युवा वर्ग विपद् प्रतिकार्यमा खटिएको र सहयोग गर्न जनस्तरमा अपिल गरिएको मुख्यमन्त्रीको सचिवालयले उल्लेख गरेको छ । सबै जिल्लामा स्थानीय प्रशासनहरुले विपद्को सामाना गर्न, सबैलाई सुरक्षित रहन र अति आवश्यकबाहेक घरबाट बाहिर ननिस्कन मुख्यमन्त्री आचार्यले अनुरोध गरेका छन् ।
लुम्बिनी प्रदेशमा चालु आर्थिक वर्षको हाल सम्म बाढीका २८ वटा घटना भएका छन् । जसमा परेर ९ जनाको मृत्यु भएको छ भने ४ जना घाइते र ८ जना वेपत्ता छन् । पहिरोका २१ वटा घटना भएका छन् । जसमा परेर ८ जनाको मृत्यु भएको छ भने ६ जना घाइते भएका छन् ।
