सत्येन्द्र प्रताप सिंह/मध्यान्ह
रौतहट : रौतहटको वृन्दावन नगरपालिका वडा नम्बर १ विश्रामपुरस्थित पोखरीमा डुबेर एक बालिकाको मृत्यु भएको छ । नेपाल माध्यमिक विद्यालय विश्रामपुरको स्वामित्वमा रहेको पोखरीमा गहुँ काटेर नुहाउन गएकी स्थानीय हुलास बैठाकी १४ वर्षीया छोरी निरन्जन कुमारी बैठाको डुबेर मृत्यु भएको हो ।
६ फिट गहिरो पानी रहेको पोखरीमा गर्मी छल्नका लागि नुहाउन गएको बेला एक जना बालिका डुबेर बेपत्ता भएको सूचना प्राप्त हुना साथ सुरक्षा बेसक्याम्प सन्तपुरबाट सशास्त्र प्रहरी नायव निरीक्षक यम बहादुर वलीको नेतृत्बमा गएको ९ जनाको टोलीले खोज तलास गर्दा मृत अवस्थामा बालिकाको शव फेला पारेको सशास्त्र प्रहरी बल नेपाल ११ नम्बर गणका प्रमुख सशास्त्र प्रहरी उपरीक्षक विक्रम हुमागाईंले जानकारी दिए ।
घटनाको सम्बन्धमा थप छानबिन गर्न इलाका प्रहरी कार्यालय गरुडा तथा सुरक्षा बेसक्याम्प सन्तपुरबाट सप्रनानि सत्य नारायण माझीको नेतृत्वको टोली घटनास्थलमा पुगिसकेको उनले बताए ।
पुर्ण कुमार/मध्यान्ह
डोल्पा : डोल्पास्थित मष्टा भवानी सामुदायिक वनमा लागेको आगो निभाउने क्रममा गम्भीर घाइते भएका चार सैनिकलाई नेपालगञ्जस्थित भेरी अस्पताल लगिएको छ ।
डोल्पाको दुनैस्थित जिल्ला अस्पतालमा उपचार सम्भव नभएपछि प्रारम्भिक स्वास्थ्य उपचार गरेर सैनिक हेलिकप्टरमार्फत उनीहरूलाई सोमबार नेपालगञ्ज पठाइएको डोल्पाका प्रमुख जिल्ला अधिकारी तुलसीप्रसाद दाहालले बताए ।
उनका अनुसार देवीदक्त गण ‘क’का ३० वर्षीय प्यूठ विजय कोइराला र २३ वर्षीय सिपाही आशिष बुढालाई पहिलो र ३८ वर्षीय जम्दार केशव बहादुर मगर र २८ वर्षीय हेमन्त रावललाई दोस्रो चरणमा सैनिक हेलिकप्टरमार्फत उद्धार गरिएको हो ।
सदरमुकामस्थित देविदत्त गण भदालेले आइतबार दिउँसो ब्यारेकभित्र र वरिपरि रहेका फोहोर जलाउँदा एक्कासी चलेको हावाहुरीका कारण सामुदायिक वनमा आगो सल्किएको थियो । आगो सल्किएलगत्तै त्यसको नियन्त्रणका लागि नेपाली सेनाका दुई वटा गुल्म, सशस्त्र प्रहरी बल, नेपाल प्रहरी र स्थानीयको टोली खटिएको थियो ।
आइतबार आगोले जलेका काठका टुक्राले सोमबार पुन: आगो जागेको थियो । त्यसक्रममा विपरीत दिशाबाट हावा बेस्सरी चल्दा फेरि आगो लागेपछि खोल्सामा आगो निभाउन पुगेका जवानहरु जलेर गम्भीर घाइते भएको जिल्ला प्रहरी कार्यालय डोल्पाका प्रमुख डीएसपी हरिकृष्ण केसीले जानकरी दिए ।
पुर्ण सार्की/मध्यान्ह
डोल्पा : डोल्पामा आइतबार मध्याह्न लागेको आगो निभाउने क्रममा नेपाली सेनाका चार जवान गम्भीर घाइते भएका छन् । सदरमुकाम दुनैस्थित मष्टा भवानी सामुदायिक वनमा आइतबार लागेको आगो निभाउने क्रममा देविदत्त ब्यारेकका चार जवान गम्भीर घाइते भएको जिल्ला प्रहरी कार्यालय डोल्पाका डीएसपी हरिकृष्ण केसीले जानकारी दिए ।
घाइते हुनेहरुमा २३ वर्षीय आंशिक बुढा, ३८ वर्षीय जम्दार केशव बहादुर दर्गा मगर, ३० वर्षीय पियूठ विजय कोइराला र २८ वर्षीय जवान हेमन्त रावत रहेका छन् । घाइते भएकाहरुको जिल्ला अस्पताल डोल्पामा उपचार सम्भब नभएपछि हेलिकप्टरमार्फत पहिलो चरणमा बुढा र कोइरालालाई नेपालगञ्ज पठाइएको डीएसपी केसीले बताए । दोस्रो चरणमा अन्य दुई जनालाई पठाउने तयारी रहेकोसमेत उनले जानकारी दिए ।
आइतबार दिउँसो भदाले ब्यारेकमा सेनाले सरसफाइ गर्ने क्रममा फोहोर जलाउँदा अत्यधिक हावाहुरीका कारण मष्टा भवानी सामुदायिक वनमा आगो सल्किएको थियो ।
आबिद हुसेन/मध्यान्ह
वीरगञ्ज : वीरगञ्जको नेशनल मेडिकल कलेजमा प्रहरीले प्रयोगशाला (ल्याब)मा म्याद नाघेको केमिकल प्रयोग गरिरहेको सूचनाको आधारमा छापा मारेर दुई जनालाई पक्राउ गरेको छ ।
पक्राउ पर्नेमा मेडिकल कलेजका म्यानेजिङ डाइरेक्टर (एमडी) सहनवाज अन्सारी र ल्याब प्रमुख सञ्जय साह छन् । उनीहरुलाई जिल्ला प्रहरी कार्यालय पर्साको टोलीले सोमबार दिउँसो पक्राउ गरेको हो ।
मेडिकल कलेजले म्याद गुज्रिएका सामग्री प्रयोग गर्ने गरेको गुनासो आएपछि प्रहरीले अनुसन्धान गरेको थियो । पर्सा प्रहरीका प्रमुख एसपी कुमोध ढुंगेलका अनुसार ल्याबमा सन् २०२१ मै म्याद सकिएको केमिकलसहितका औषधि बरामद भएपछि कलेजका एमडी र ल्याब प्रमुखलाई नयिन्त्रणमा लिइएको हो । सो क्रममा म्याद गुज्रिएका सामग्री समेत बरामद गरिएको उनले बताए ।
उनले बरामद सबै केमिकलबारे अनुसन्धानका लागि बाँकी प्रक्रिया अगाडि बढाइएको छ । नेशनल मेडिकल कलेजमा वीरगञ्ज महानगरपालिका, औषधि व्यवस्था विभाग र प्रहरीसहितको टोलीले संयुक्तरुपमा छापा मारेको हो ।
मनोज साह/मध्यान्ह
रौतहट : रौतहटका प्रमुख जिल्ला अधिकारी हिरालाल रेग्मीले हरेक किसिमका अभियान थालनी गर्दा एक्लो हुने भएपनि सार्थकता भने पाउनुपर्ने बताएका छन् । हरेक व्यक्तिले आफ्नो जन्मदिनलाई सत्कर्म र पुण्यसँग जोडिनुपर्ने उनको धारणा छ । रौतहटको चन्द्रपुरमा सोमबार 'जन्मदिनलाई सत्कर्ममा जोडौं अभियान'अन्तर्गत वृक्षारोपण कार्यक्रममा बोल्दै उनले पृथ्वी र प्रकृतिसँग मानव सम्बन्ध जोडिएकाले प्रकृति नभएमा मानव अस्तित्व नरहने उल्लेख गर्दै यसबारेमा धेरै जानकार भएपनि व्यवहारमा लागू नभएको बताए ।
प्रकृति नै हाम्रो जीवन हो भन्ने चेतना मानवमा हराउँदै गएकोप्रति उनले चिन्ता व्यक्त गरे । प्रकृतिलाई माया र संरक्षण गर्नुपर्ने धारणमा हराउँदै गएकाले यसलाई जागृत गर्ने बेला भएको उनले बताए । प्रकृति भनेको रुख बिरुवाको संरक्षण, वृक्षारोपण, हरियाली सिर्जना, जीवजन्तुको संरक्षण र खोला तटबन्ध गर्नेलगायतका कार्यहरु रहेको उनले चर्चा गरे । अहिले गाँउ घरमा रहेका ठूला ठूला वर–पिपलका रुख अघिल्ला पुस्ताले रोपेको र अहिलेकाले छहारी र शितलता पाएको उनले बताए । अहिलेको पुस्ताले रोपेका बिरुवाको उपभोग पछिका पुस्ताले गर्ने उनको भनाइ थियो । हरेक दृष्टिकोणले बोटबिरुवा आवश्यक भएकाले जन्मदिन वृक्षारोपण गरेर मनाउन उनले सुझाव दिए । यसअघि पर्सामा रहँदा वीरगञ्जमा समेत हरित अभियान सञ्चालन गरिएको उनले स्मरण गरे ।
सो कार्यक्रममा डिभिजन वन कार्यालय रौतहटका प्रमुख शैलेन्द्र मिश्राले वन विनास गर्नेलाई संरक्षण वा वृक्षारोपणका लागि सुझाव दिने गरेको बताए । वन संरक्षण गर्नु सबैको दायित्व भएकाले आ–आफनो क्षेत्रबाट सहयोग गर्नुपर्ने उनको धारणा छ । वनको महत्व र फाइदा सबैले बुझ्नुपर्ने उनको भनाइ छ । डिभिजन वन कार्यालय चन्द्रनिगाहपुरले वन संरक्षणत्मक काम गर्दै आएको उनले बताए ।
कार्यक्रममा नेपाल पत्रकार महासंघका केन्द्रीय सचिव गोविन्द प्रसाद चौलागाईंले सामाजिक वा पुण्यको कार्य गरेर परम्परात शैलीमा जन्मदिन मनाउनुपर्ने बताए । जन्मोत्सवमा महँगो होटलमा भोज गर्नु गलत भएको उल्लेख गर्दै उनले वृक्षारोपण गरेर जन्मदिन मनाउन आग्रह गरे । नयाँ पुस्तालाई संस्कार सिकाउनका लागि पनि सत्कर्म आवश्यक रहेको उनले बताए ।
कार्यक्रममा नेपाल पत्रकार महासंघ रौतहट शाखाका सहसचिव दिपेश पौडेल, पूर्वकोषाध्यक्ष रमेश तिमल्सिना, पत्रकार अनमोल कार्की, सुब्बा कार्कीसहित स्थानीय खडग बहादुर कार्की, चेतनगरका समाजसेवी श्याम श्रेष्ठ सिन्धुरेघारी माविका प्रधानाध्यापक सत्रुधन प्रसाद साह, सन्तपुर, जुडिबेला माविका प्रधानाध्यापकको उपस्थिति रहेको थियो ।
सो अवसरमा चाँदी नदीको किनारमा रहेको जमिनमा विभिन्न प्रजातीका बिरुवाहरु रोपिएको थियो । तराई विकास तथा सञ्चार केन्द्र काठमाडौंको आयोजनामा भएको वृक्षारोपण अभियान निरन्तर चलिरहने जनाइएको छ । यो अभियान जुडिबेला, गैंडाटार, पौराइ, बागमती हुँदै चोचामैरासहित सबै क्षेत्रमा सञ्चालन गर्ने आयोजकको योजना रहेको छ ।
तिलु शर्मा पौडेल/मध्यान्ह
दोहा, कतार : नेपाल तामाङ घेदुङ, प्रवास कार्यसमिति कतारमा आबद्ध रही संस्थाका हरेक गतिविधिहरूमा साथ दिँदै आइरहेका ५ जनालाई बारिस्टा तालिम प्रदान गरिएको छ । सल्लाहकार सदस्य जोहेव लामाको सहकार्य, व्यवस्थापन तथा प्रायोजनमा घेदुङका आजीवन सदस्यहरू कमला दोङ तामाङ, असली माया योञ्जन (प्रिया) तामाङ, शर्मिला तामाङ, मिरा तामाङ र सङ्गीता बम्जन तामाङलाई तालिम दिइएको हो ।
बारिस्टा कफी तालिममा पाँच जना ५ अप्रिल २०२४ देखि सहभागी भएका छन् । प्रत्येक साताको शुक्रबार ३ घण्टाको समयावधि रहने तालिम निरन्तर ६ हप्तासम्म चल्नेछ । संस्थामा लागेर के पाइन्छ र भन्ने विचारलाई मेटाउँदै आफ्ना समुदायको संस्थामा लाग्न र सामाजिक कार्यमा पनि लाग्न प्रेरित सँगसँगै विभिन्न सीप तथा तालिम आर्जन गरेमा सीपको आधारमा रोजगारीहरूका अवसरहरू प्राप्तसँगै आर्थिक स्तर समेत अभिवृद्धि गर्न सकिने घेदुङ कतारका अध्यक्ष विकास स्याङ्तान लामाले बताए ।
आगामी दिनमा पनि संस्थासँग समन्वय गरी संस्थामा आवद्ध सदस्यहरूलाई नै लक्षित गरी विभिन्न विधाहरूमा तालिममा सहभागी गराउने सल्लाहकार सदस्य लामाले प्रतिबद्धता व्यक्त गरेको छन् ।
काठमाडौं : नेपाल नेत्रज्योति संघको अध्यक्षमा प्रा.डा चेतराज पन्त निर्वाचित भएका छन् । भरतपुरको चितवनमा सम्पन्न २८औं केन्द्रीय सभा तथा अधिवेशनले प्रा.डा. पन्तलाई दोस्रो कार्यकालका लागि अध्यक्षमा निर्विरोध निर्वाचित गरेको हो ।
नेपाल नेत्रज्योति संघ चितवन शाखाको आतिथ्यतामा चैत २३ र २४ गते चलेको अधिवेशनले प्रा.डा. पन्तको नेतृत्वमा आगामी ४ वर्षका लागि नयाँ कार्यसमिति चयन गरेको हो । संघको विधान बमोजिम २७ सदस्यीय कार्यसमितिमध्ये १ जना अध्यक्ष, १२ जना खुला सदस्य र २ जना महिला सदस्य गरी १५ सदस्य अधिवेशन मार्फत निर्विरोध निर्वाचित भएका हुन् ।
त्यस्तै सदस्यहरुमा कृष्ण कुमार गिरी, चिज कुमार मास्के, दिव्य प्रसाद पन्त, द्रोणप्रसाद गुरागाई, डा. नन्द श्रेष्ठ, नर वहादुर रोकाया, पद्म नारायण चौधरी, बिष्णुदत्त जोशी, श्यामकुमार पोखरेल, भरत बहादुर चन्द, भागवत राउत, वरिष्ठ अधिवक्ता हरि प्रसाद शर्मा, मन्जु कण्डेल र प्रा.डा. सविना श्रेष्ठ निर्विरोध निर्वाचित भएका छन् ।
निर्वाचित सदस्यहरुमध्येबाट नै पदाधिकारीहरुको कार्यविभाजन गर्ने व्यवस्थाबमोजिम अधिवेशन लगत्तै बसेको केन्द्रीय समिति बैठकले संघको वरिष्ठ उपाध्यक्षमा श्यामकुमार पोखरेल, महासचिवमा भरतबहादुर चन्द र कोषाध्यक्षमा चिजकुमार मास्केलाई जिम्मेवारी तोकेको छ ।
त्यस्तै संघका सात वटै प्रदेशका प्रदेश सभापतिहरु केन्द्रीय कार्यसमितिको पदेन उपाध्यक्ष रहने व्यवस्थाबमोजिम कोशी प्रदेश सभापति श्याम सुन्दर उदास, मधेश प्रदेश सभापति रविन्द्रलाल चौधरी, बागमती प्रदेश सभापति ऋषिराम पौडेल, गण्डकी प्रदेश सभापति प्रा.डा.दिलबहादुर क्षेत्री, लुम्बिनी प्रदेश सभापति सागरप्रताप राणा, कर्णाली प्रदेशका सभापति तिलकबहादुर मल्ल र सुदूरपश्चिम प्रदेश सभापति चक्रबहादुर सिंह केन्द्रिय कार्यसमितिको उपाध्यक्षमा चयन हुनु भएको छ भने बाँकी सदस्यहरु केन्द्रीय समितिले मनोनीत गर्नेछ ।
संघअन्तर्गत देशभरमा २८ आँखा अस्पताल, १५६ आँखा उपचार केन्द्र तथा ४३ जिल्ला शाखाहरु सञ्चालनमा छन् । स्थापनादेखि हालसम्म संघको सञ्जालमार्फत नेपाली नागरिक तथा अन्य विभिन्न देशका नागरिकहरु गरी कूल ४ करोड ३६ लाख २६ जना आँखाका बिरामीहरुलाई आँखा उपचार सेवा प्रवाह गरिसकेको छ भने ५१ लाख ३३ हजार ६५९ जनाको आँखाको शल्यक्रिया भइसकेको छ ।
त्यस्तै सभाले महासचिव र कोषाध्यक्षको प्रतिवेदन, गत आर्थिक वर्षको लेखापरिक्षण प्रतिवेदन पारित गर्नुको साथै चालु आर्थिक वर्षका लागि लेखा परिक्षक नियुक्तिको प्रस्ताव समेत पारित गरिएको छ ।
धादिङ : जनमत पार्टीका सांसदसमेत रहेका पूर्वखानेपानी मन्त्री अब्दुल खान सवार गाडी कृष्णभिरमा दुर्घटनामा परेको छ ।
संसद्को उद्योग तथा वाणिज्य र श्रम तथा उपभोक्ता हित समितिको सभापति समेत रहेका खानलगायत सवार कार बर्दिया जाने क्रममा धादिङको बेनीघाट रोराङ गाउँपालिका वडा नम्बर ७ स्थित कृष्णभिरमा दुर्घटनामा परेको हो ।
दुर्घटनामा सांसद खानसहित चार जना घाइते भएका छन् । सांसद खानको दाहिने हातमा चोट लागेको छ । साथै अली उलाह मुसलमान, अनमर खान र चालक आली मनसुरीलाई पनि चोट लागेको छ ।
घाइतेहरुको धादिङ जिल्ला राजमार्ग अस्पताल मलेखुमा प्राथमिक उपचार गरिएको र थप उपचारका लागि काठमाडौं लगिएको प्रहरीले जानकारी दिएको छ ।
लक्ष्मण यादव/मध्यान्ह
सर्लाही : सर्लाहीमा आगलागी हुँदा ६ वटा घर जलेर नष्ट भएको छ भने ५ वटा घरमा क्षति पुगेको छ । बसबरीया गाउँपालिकाको वडा नं. ३ भवानीपुर (मुसहरी टोल) मा आगलागी भएको हो । स्थानीय राम विश्वास माझीको घरबाट सल्किएको आगोले बस्तीका ६ घर जलेर नष्ट भएको छ भने ५ घरमा क्षति पुगेको छ ।
सोमबार बिहान साढे ११ बजे माझीसहित उनका सपरिवार घर बाहिर काममा निस्किएको बेला घरमा आगो लागेको थियो । आगलागीपछि उनको घरमा राखिएको ग्यास सिलिण्डर पड्किँदा क्षणभरमै उनको घरबाट छिमेकीको घरमा आगो सल्किएको र बस्तीमा पुगेको जिल्ला प्रहरी कार्यालय सर्लाहीका प्रहरी नायव उपरीक्षक (प्रवक्ता) दिपक श्रेष्ठले जानकारी दिए ।
उनका अनुसार माझीसहित स्थानीय विन्देश्वर माझी, दिनेश माझी, नरेश राय यादव, जोखु मुखिया र महेशी रायको घर पूर्णरुपमा जलेर नष्ट भएको छ भने अन्य ५ घरमा क्षति पुगेको छ ।
आगो नियन्त्रणमा लिन स्थानीय, नेपाल प्रहरी, सशस्त्र प्रहरी तथा हरिवन र मलंगवा नगरपालिकाको वारुणयन्त्र परिचालन गरिएको थियो । तर आगलागी भएको बस्तीको सडक साँघुरो भएका कारण दुई वटा वारूणयन्त्र एकैपटक प्रयोग हुन नसकेर आगो नियन्त्रणमा लिन समस्या भएको स्थानीय गौरीशंकर यादवले बताए ।
उनका अनुसार आगो नियन्त्रणमा लिन पहिले मलंगवाको दमकल प्रयोग गरिएको थियो । त्यसको पानी सकिएपछि पुनः हरिवन नगरपालिकाको दमकल प्रयोग गरी आगो नियन्त्रणमा लिइएको थियो । विद्युत सट भएर आगलागी भएको हुन सक्ने स्थानीयको अनुमान छ ।
दिलमाया शाही/मध्यान्ह
जुम्ला : जुम्ला जिल्लाका ९० हजार नागरिकले स्वास्थ्य बीमा गरेका छन् । स्वास्थ्य बीमा बोर्ड सम्पर्क कार्यालयका संयोजक प्रेमबहादुर भण्डारीले करिब जनसंख्याको ८० प्रतिशत अर्थात ११ हजार ४८ घरधुरी स्वास्थ्य बीमाको पहुँचमा आएको बताए ।
उनका अनुसार जिल्लाका ६० वटा वडामा दर्ता सहयोगी छन् । सहयोगीबाट बीमा दर्ता तथा नवीकरण गर्ने काम भइरहेको छ । संयोजक भण्डारीका अनुसार स्थानीय सरकार समेत आफ्ना नागरिकको स्वास्थ्य बीमा गराउने उद्देश्यले बीमा कार्यालयसँग सहकार्य गरेर अगाडि बढेको छ ।
चन्दननाथ नगरपालिकामा ३ हजार २ सय ७० घरधुरीका २० हजार ९ सय ४१ जना तथा पातारासी गाउँपालिकाका २ हजार ४ सय ६६ घरधुरीका १६ हजार ३ सय ५० जना, तातोपानी गाउँपालिकाका ११ हजार ९ सय ५९, हिमा गाउँपालिकाका १ हजार ५ सय २६ घरधुरीको ११ हजार ८ सय ५० नागरिकको स्वास्थ्य बीमा गरिएको छ ।
त्यस्तै तिला गाउँपालिकाका ८ सय २८ घरधुरीका ९ हजार ३ सय २ जनाले स्वास्थ्य बीमा गरेका छन् भने गुठीचौर गाउँपालिकाका ९ सय १० घरधुरीका ७ हजार ४ सय १० जना र कनकासुन्दरी गाउँपालिकाका ६ सय २७ घरधुरीका ६ हजार ७ सय ६३ जनाले स्वास्थ्य बीमा गरेका छन् । त्यस्तै सिँजा गाउँपालिकाका ४ सय १६ घरधुरीका ५ हजार ८ सय ३६ जना नागरिक स्वास्थ्य बीमामा आवद्ध भएका छन् ।
जुम्लाको आठौं स्वास्थ्य बीमा वार्षिकोत्सव कार्यक्रममा बोल्दै जिल्ला समन्वय समिति जुम्लाका प्रमुख गौरीनन्द आचार्यले स्वास्थ्य बीमाले बिरामीलाई सहज बनाएको बताए । उनले बीमाका केही समस्या नरहेको बताउँदै यसलाई विस्तार र सुधार गर्दै लैजान अनुरोध गरे । जुम्लामा २०७४ असार १ गते दर्ता प्रक्रिया शुरु भइ २०७४ भदौबाट स्वास्थय बीमा कार्यक्रम लागू भएको थियो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies