काठमाडौं : मलेसियाका रोजगारदाताहरुले विदेशी कामदारहरुलाई समयमै कोरोना भाइरस (कोभिड–१९) को खोप दिन सरकारसमक्ष आग्रह गरेका छन् । आप्रवासी कामदारहरुलाई खोप दिँदा मुलुकको अर्थतन्त्रलाई नै लाभ हुने भन्दै रोजगारदाताहरुले विदेशी कामदारहरुलाई खोप दिन ढिलाई गर्न नहुनेमा जोड दिएका हुन् ।
मलेसियाले दैनिक करिब १ लाख २६ हजार व्यक्तिलाई खोप लगाउने योजनासहित शनिबारदेखि राष्ट्रियरुपमा कोरोना भाइरस (कोभिड–१९) विरुद्धको खोप कार्यक्रम शुरु गरेको छ । मलेसियाले कोरोना भाइरसविरुद्धको खोप दिन आफ्ना देशका नागरिकलाई पहिलो प्राथमिकतामा राखेको छ भने विदेशी कामदार र कूटनीतिक क्षेत्रमा काम गर्ने सबैलाई निःशुल्क खोप दिने घोषणा यसअघि नै गरिसकेको छ ।
तर केही पक्षले पहिले मलेसियन नागरिकहरुलाई खोप दिनुपर्ने आवाज उठाएपछि रोजगारदाताहरुले विदेशी कामदारहरुलाई दिने खोपले अर्थतन्त्रलाई माथि उठाउन सहयोग पुग्ने भन्दै सरकारको ध्यानाकर्षण गराएका हुन् । रोजगारदाताहरुको संगठनले विदेशी कामदारहरु खोप नदिएसम्म मुलुकलाई कोरोनामुक्त बनाउन नसकिने समेत बताएका छन् ।
मलेसियाको सारवाकका सहायक मुख्यमन्त्रीले करदाताले तिरेको रकमबाट खरिद गरिएको खोप निःशुल्क रुपमा विदेशी श्रमिकलाई दिन नहुने धारणा राखेपछि रोजगारदाताहरुले त्यसविरुद्ध आफ्ना धारणा सार्वजनिक गरेका हुन् । मलेसियन रोजगारदाताहरुले विदेशी कामदार मलेसियको अर्थतन्त्रको महत्वपूर्ण पक्ष र समाजको अभिन्न भएकोले उनीहरुलाई बेवास्ता गर्न नमिल्ने बताउँदै आएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies