शिव विक/मध्यान्ह
काठमाडौं : यही वैशाख १५ गते इलाम–२ मा उपनिर्वाचन हुँदैछ । उम्मेदवारहरुले गत चैत २८ देखि शुरु गरेको चुनावी प्रचारको अवधिक बुधबार सकिँदैछ । निर्वाचन आयोगले बिहीबार र शुक्रबार प्रचारप्रसारमा रोक लगाउनेछ । शनिवार बिहान ७ देखि साँझ ५ बजेसम्मलाई मतदानको समय तोकिएको छ ।
चुनावी प्रचारको अन्तिम समयमा राजनीतिक दलहरु इलाम केन्द्रित भएका छन् । नेकपा एमालेका उम्मेदवार सुहाङ नेम्वाङलाई माओवादी केन्द्र र विप्लव नेतृत्वको नेकपाको समर्थन छ । अन्य दलबीच गठबन्धन छैन ।
सत्ता गठबन्धनमा रहेका दल एमाले, रास्वपा र एकीकृत समाजवादीका छुट्टाछुट्टै उम्मेदवार छन् । कांग्रेसका डम्बरबहादुर खड्का उम्मेदवार छन् । गत चुनावमा खड्का एमालेका तत्कालीन सुवास नेम्वाङसँग ११४ मतले पराजित भएका थिए ।
रास्वपाका तर्फबाट मिलनकुमार लिम्बू उम्मेदवार छन् । स्वतन्त्र उम्मेदवार डकेन्द्रसिंह लिम्बूलाई पहिचानवादी शक्तिले समर्थन गरेका छन् । स्वतन्त्र उम्मेदवारी दिएर चुनावी मैदानमा होमिएका थेगिमलाई पहिचान पक्षधर र साना पार्टीहरुको समर्थन बढ्दो छ । डा.बाबुराम भट्टराई नेतृत्वको नेपाल समाजवादी पार्टी (नेसपा), उपेन्द्र यादव नेतृत्जको जनता समाजवादी पार्टी (जसपा), प्रभु साह नतृत्वको आम जनता पार्टी (आजपा), धरामका मेयर हर्क साङ्पाङदेखि हाम्रो नेपाली पार्टी र लौरो अभियानको साथ डकेन्द्रले पाएका छन् ।
मंगलबार पत्रकार सम्मेलन गरेर हाम्रो नेपाली पार्टीले इलाम–२ मा थेगिमलाई समर्थन गर्ने घोषणा गरेको हो ।
लौरो अभियानले पनि पत्रकार सम्मेलन गरेर इलाम–२ का लौरो अभियानका शुभचिन्तक र समर्थकलाई ‘मुढा’ चुनाव चिन्हमा मतदान गर्न अपिल गरेको छ । मुढा स्वतन्त्र उम्मेदवार डकेन्द्रसिंह लिम्बूको चुनाव चिन्ह हो ।
निर्वाचन आयोगका अनुसार इलाम– २ मा एक लाख १५ हजार आठ सय ८९ मतदाता छन् । गत चुनावमा स्वर्गीय सुवास नेम्वाङ ३० हजार २० मत ल्याएर विजयी भएका थिए । त्यसबेला नेम्वाङका प्रतिस्पर्धी कांग्रेसका डम्बरबहादुर खड्काले २९ हजार नौ सय ६ मत पाएका थिए ।
सीमा नाका बन्द
उपचुनावलाई मध्यनजर गरेर नेपाल सरकारले बुधबार राति १२ बजेदेखि ७२ घण्टाका लागि नेपाल भारत सीमा क्षेत्र सिल गर्ने भएको छ । जिल्ला प्रशासन कार्यालय इलामका अनुसार विगतको अभ्यास झैं सुरक्षा संवेदनशीलतालाई ध्यानमा राखेर निर्वाचन सुरक्षा योजना अन्तर्गत सीमा नाका सिल गरिन लागिएको हो ।
भारतको पश्चिम बंगाल राज्यस्थित दार्जिलिङ जिल्लामा वैशाख १४ गते लोकसभा चुनाव हुँदैछ । त्यसलाई लक्षित गर्दै भारतको दार्जिलिङसँग जोडिएको इलामको सीमा नाका पनि बन्द गरिएको छ ।
मंगलबार साँझ ६ः १५ बजेदेखि शुक्रबार राति १२ बजेसम्मका लागि भारतीय पक्षले बोर्डर सिल गरेको हो । जस अनुसार इलामको सन्दकपुर, कालपोखरी, टंलु, तुम्लिङ, मेघ्मा, मानेभञ्ज्याङ, पशुपतिनगर, छब्बिस र समालबुङका नाकाहरु सिल भएको छ ।
काठमाडौं : नेकपा एकीकृत समाजवादीले यही वैशाख २६ गते स्थायी कमिटीको बैठक आह्वान गरेको छ ।
महाधिवेशनको तयारी, पार्टी संगठन तथा जनवर्गीय संगठनका कार्य प्रगतिबारे छलफल गर्न बैठक आह्वान गरिएको पार्टीका केन्द्रीय सदस्य मोहन गौतमले जानकारी दिए । बैठकमा प्रदेश, क्षेत्र र भूगोलको सन्तुलन मिलाएर महाधिवेशन प्रतिनिधि छनोट कार्यविधिबारे छलफल गरिनेछ ।
स्थायी कमिटी बैठकले पारित गर्ने राजनीतिक, सांगठनिक, विधानसम्बन्धी प्रतिवेदन तथा एजेण्डालाई केन्द्रीय कमिटी बैठकमा पेस गरिनेछ । महाधिवेशन व्यवस्थापनका लागि गठित सबै कमिटीका तयारी, नवीकरण गरिएका संगठित सदस्यका साथै नयाँ सदस्यता अनुमोदनलगायत विषयमा छलफल केन्द्रित हुने बैठकमा संगठन विस्तार तथा पार्टी आधारभूत तहसम्म स्थापित गर्न आवश्यक कार्ययोजनाबारे छलफल हुने नेता गौतमले जानकारी दिए ।
आगामी असार १६ देखि २० गतेसम्म काठमाडौंमा राष्ट्रिय महाधिवेशन गर्न लागेको उक्त पार्टीले यही वैशाख १५ गतेभित्र सम्बन्धित सदस्यको शुल्कसहितको नवीकरण कागजात, नामावली विवरण केन्द्रमा पठाउन सबै कमिटी, विभाग, फाँटलाई निर्देशन दिएको छ ।
दिवाकर अधिकारी/मध्यान्ह
काठमाडौं : सत्ता सहकार्यमा रहेका नेकपा एमाले र नेकपा माओवादी केन्द्रले तत्काल पार्टी एकता नहुने प्रष्ट पारेका छन् । सोमबार एउटै मञ्चबाट नेताद्वय केपी शर्मा ओली र प्रचण्डले एउटै शैलीमा हतारिएर पार्टी एकता नगर्ने उद्घोष गरे ।
पछिल्लो समय निरन्तर वाम ध्रुविकरण र एकताको आवश्यकतामा जोड दिँदै आएका प्रधानमन्त्री एवं माओवादी केन्द्रका अध्यक्ष प्रचण्डले नै हौसिएर हतारमा कम्युनिस्ट एकता गर्ने पक्षमा आफू नभएको बताए ।
‘हौसिएर हतारमा कम्युनिस्ट एकताको पक्षमा छैनौँ । नेकपा बनाउँदा त्यतिबेला हामी अलि हतारिएर हौसिएछौँ जस्तो भएको छ । अहिले फेरि सहकार्य भएको छ । विगतको तितो यथार्थबाट पाठ सिकेर अगाडि बढ्न आवश्यक छ’ सोमबार नेकपा स्थापनाको ७५औं वर्ष पुगेको उपलक्ष्यमा एमालेले ललितपुरमा आयोजना गरेको हिरक जयन्ती समारोहलाई सम्बोधन गर्दै प्रधानमन्त्री प्रचण्डले भने ।
यसअघि एमाले र माओवादी मिलेर नेकपा बनेको थियो । तर उक्त एकता लामो समय टिक्न सकेन । सर्वोच्च अदालतको आदेशबाट फेरि एमाले र माओवादी ब्युतिएका थिए । एमाले फुटेर एकीकृत समाजवादी बनेको छ । विगतमा एउटै पार्टीमा यी तीन वटै दल हाल सरकारमा छन् । कतिपयले उनीहरुको सत्ता सहकार्यलाई वाम एकता वा वाम ध्रुबीकरणको प्रयासको रुपमा लिइरहेका बेला शीर्ष नेतृत्वले तत्काल एकताको सम्भावना नरहेको बताएका हुन् ।
एउटै मञ्चबाट एमाले अध्यक्ष ओलीले नेकपा पार्टी विभाजन अत्यन्त हानिकारक भएको बताए । अब नेपालका कम्युनिस्टहरूबीच तत्काल एकता नहुने, बरु सहकार्यको माध्यमबाट निकट हुँदै जाँदामात्र भविष्यमा एक हुन सक्ने उनले बताए ।
उनले भने, ‘अहिले हामी सहकार्यको माध्यमबाट निकट हुँदै जान्छौँ र क्रमशः एकताको बाटोमा पुग्न सक्छौँ । तर अहिले नै देशभरिका मिलौँ भन्यो भने किन फुटेका थियौ के भएर फुटेका थियौ ? यस्ता प्रश्न उठ्न सक्छन् ।’
माओवादी केन्द्र, एकीकृत समाजवादी भने हाल समाजवादी मोर्चामा छन् । यो मोर्चामा जनता समाजवादी र नेत्रविक्रम चन्द विप्लव नेतृत्वको पार्टी छ । उक्त मोर्चाको संयोजकमा हाल विप्लव छन् । विप्लवले समाजवादी मोर्चामा समाहित हुन नेकपा एमालेलाई यसअघि पत्र नै लेखेका थिए । एमालेले त्यसलाई अस्वीकार गर्दै आएको छ ।
पार्टी बैठकमा राजनीतिक प्रतिवेदन प्रस्तुत गर्दै एमाले अध्यक्ष ओलीले आफूहरु तत्काल वाम ध्रुविकरण वा एकता भनेर अगाडि बढ्ने नीतिमा नरहेको प्रष्ट पारेका थिए । सोमबार ओलीकै शैलीमा माओवादी अध्यक्ष प्रचण्डले समेत हतारिएर कम्युनिस्ट नगर्ने बताएका हुन् । नेताहरु प्रचण्ड र ओलीले एकै शैलीमा एकता तत्काल नहुने बताउनुको पछाडि लामो राजनीतिक सहकार्यको सम्भावना हुन सक्ने संकेत गरेको बताउँछन् ।
वाम एकता वा धु्रबीकरण भनिए रास्वपा लगायत साना दल असन्तुष्ट हुन सक्छन् । यसकारण प्रचण्ड र ओलीले तत्काल सत्ता सहकार्य गर्ने भविष्यमा एमाले र माओवादीलाई एकतासम्म लैजाने उचित बाटो पहिल्याउने रणनीति अख्तियार गरेको एमाले र माओवादीका नेताहरुकको बुझाइ छ ।
काठमाडौं : नेकपा एमालेका अध्यक्ष केपी शर्मा ओलीले तत्काल कम्युनिष्टहरुबीच एकता हुने सम्भावना नरहेको बताएका छन् ।
नेपाल कम्युनिष्ट पार्टी (नेकपा)को हीरक महोत्सवका अवसरमा गोदावरीमा आयोजित समारोहमा सम्बोधन गर्दै उनले कम्युनिष्टहरुबीच एकता हुने सम्भावना तत्काल नरहेकाले अहिले सहकार्यलाई अगाडि बढाउँदा उपयुक्त हुने बताए । सहकार्यको माध्यमबाट निकट हुँदै जाँदामात्र भविष्यमा एक हुने सम्भावना रहेको उनको भनाइ थियो ।
अध्यक्ष ओलीले नेपालमा कम्युनिष्ट पार्टी स्थापना भएपछि लाभै लाभ भएको दाबी गरे । उनले अहिलेका गौरवका दिनहरू बलिदानबाट आएको उल्लेख गर्दै आफूहरूविरुद्ध दमन भए पनि संघर्ष गरिरहेको बताए ।
काठमाडौं : प्रधानमन्त्री पुष्पकमल दाहाल 'प्रचण्ड'ले आफू अहिले हौसिएर हतारमा कम्युनिष्ट एकता गर्ने पक्षमा नभएको बताएका छन् ।
नेपाल कम्युनिष्ट पार्टी (नेकपा)को हीरक महोत्सवका अवसरमा गोदावरीमा आयोजित समारोहमा सम्बोधन गर्दै उनले आफूहरू पहिलेजस्तो अहिले हौसिएर कम्युनिष्ट एकताको पक्षमा नरहेको बताएका हुन् । प्रधानमन्त्री प्रचण्डले विगतको तितो यथार्थबाट पाठ सिकेर अगाडि बढ्न आवश्यक रहेको उल्लेख गरे ।
उनले भने, 'पहिलाको जस्तो हौसिएर कम्युनिष्ट एकताको पक्षमा छैनौँ । हामीले त्यो बेलामा समय भन्दा अगाडि दौडिएछ भन्ने हेक्का राख्नुपर्छ । अहिले सहकार्य थालेका छौँ । राम्रो सहकार्य गरौँ यसबाट देश र जनतालाई राम्रो सेवा हुँदै गयो भयो राजनीतिक दलहरुबीच एकताको आधार तय हुन्छ ।’
प्रधानमन्त्री प्रचण्डले कम्युनिष्टहरु एकताबद्ध भए देशको निर्णायक शक्ति बन्ने बताए । कम्युनिष्ट पार्टीबीच एकता र सहकार्य हुँदा विगतमा दुई तिहाइ मत ल्याएको स्मरण गर्दै उनले सम्पूर्ण कम्युनिष्ट शक्तिहरू एक ठाउँमा आउन आवश्यक रहेको उल्लेख गरे ।
प्रतिक्रान्तिबाट लोकतान्त्रिक गणतन्त्रलाई जोगाउन चुनौती रहेको भन्दै उनले प्राप्त उपलब्धिका लागि सम्पूर्ण गणतन्त्रवादीहरू एक ठाउँमा आउन आवश्यक रहेको बताए ।
काठमाडौं : नेपाली कांग्रेसका सभापति शेरबहादुर देउवाले मदन भण्डारीको हत्यारा अहिलेसम्म किन पत्ता लागेन भन्दै प्रश्न गरेका छन् । नेपाल कम्युनिष्ट पार्टी (नेकपा)को हीरक महोत्सवका अवसरमा गोदावरीमा भइरहेको समारोहमा सम्बोधन गर्दै उनले सो प्रश्न गरेका हुन् ।
सभापति देउवाले मदन भण्डारीको हत्यारा पत्ता लगाउन एमाले अध्यक्ष केपी शर्मा ओलीलाई आग्रह पनि गरे । एमालेका नेताहरु पटक-पटक प्रधानमन्त्री भएको र मदन भण्डारीकी पत्नी विद्यादेवी भण्डारी राष्ट्रपति नै भएको भन्दै देउवाले मदनको हत्यामा संलग्न पत्ता लगाउन एमालेले नै चासो नदिएको जिकिर गरे ।
देउवाले संवाद, सहमति र सहकार्यबाट लोकतान्त्रिक गणतन्त्रको संरक्षण गर्नुपर्ने बताए । उनले वर्तमान लोकतान्त्रिक गणतन्त्रात्मक प्रणालीलाई सुनिश्चित गर्न सबैको सहकार्य जरुरी भएकोमा जोड दिए ।
“नेकपा स्थापना भएको ७५ वर्ष पूरा भएको छ, त्यसमा म बधाई दिन चाहन्छु”, सभापति देउवाले भने, “नागरिकको मौलिक हक अधिकारको संरक्षण, देशमा दिगो शान्ति, सुशासनका लागि न्यूनतम सहमति र सहकार्य जरुरी छ ।”
काठमाडौं : प्रधानमन्त्री पुष्पकमल दाहाल प्रचण्डले कम्युनिष्टहरुको एकताका लागि प्रयास जारी राख्नुपर्ने बताएका छन् ।
सोमबार नरबहादुर कर्मचार्यको तेस्रो वार्षिक केन्द्रीय सभालाई सम्बोधन गर्दै उनले कम्युनिष्टहरूलाई एकतावद्ध गर्नु नै देशको, गणतन्त्रको, राजनीतिक संघर्षको निम्ति आवश्यकता रहेको मनन गरेर ०७४ सालमा वाम एकता गरेको स्मरण गरे ।
वाम एकतालाई आम जनताबाट अनुमोदन भएको भन्दै सही कामको निम्ति प्रयास जारी राख्ने उनको भनाइ थियो ।
राष्ट्रिय स्वाधिनताको विषय, त्यसको सुदृढीकरण, लोकतन्त्रको सुदृढीकरण र जनताका दैनिक समस्या समाधानका निम्ति समाजवादको विकल्प नभएको भन्दै उनले त्यसका लागि सबै कम्युनिष्ट पार्टीहरु एक हुनुपर्ने धारणा राखे ।
लेखनाथ सिकारु/मध्यान्ह
काठमाडौं : नेकपा एकीकृत समाजवादीका अध्यक्ष माधवकुमार नेपालले अहिलेको गठबन्धन जुनसुकै बेला टुट्न सक्ने संकेत गरेका छन् । नरबहादुर कर्माचार्य स्मृति प्रतिष्ठानले एमाले पार्टी कार्यालय च्यासलमा आयोजना गरेको कार्यक्रममा बोल्दै अध्यक्ष नेपालले सत्ता गठबन्धन सहज ढंगले अघि नबढेको भन्दै कतिन्जेल टिक्छ भन्न नसकिने बताएका हुन् ।
नयाँ गठबन्धनमा आफूहले सहज नमानिरहेको उनको भनाइ थियो। ‘गठबन्धनमा हामीले सहज मानेका छैनौं । त्यसैले कतिन्जेल टिक्छ भन्न सकिँदैन । हामी कसैका गाली गलौज सुन्न राजनीतिमा आएका होइनौं । कसैका दास बन्दैनौं,’ उनले भने, ‘परिस्थिति जटिल छ । छोटो समय भित्र गठबन्धन ओल्टेकोल्टे गरेको छ । यो गठबन्धन पनि कति दिन टिक्छ भन्ने टुंगो छैन । त्यसको सबै जवाफ त हाम्रो सम्माननीय प्रधानमन्त्रीज्यूले दिनुहुनेछ । मैले दिन सक्दिनँ । तर पनि अलिअलि भन्न सक्छु । परिस्थिति सहज छैन । हामी सहज मानिरहेका छैनौं । सहज अवस्थामा आफूलाई अनुभूत गरिरहेका छैनौं ।’
उनले आफूहरू कसैको धाक धम्की गालीगलौज सहनका लागि नजन्मेको भन्दै दास बन्ने नियतले राजनीतिमा नलागेकाले अपमान नगर्न नेताहरूलाई चेतावनी समेत दिए । ‘कसैका धाक, धम्की, कसैका गालीगलौज सुन्नका लागि हामी राजनीतिमा आएका होइनौं, समाजमा जन्मिएका होइनौं, राजनीतिमा लागेका होइनौं,' नेता नेपालले भने ।
काठमाडौं - नेपालमा २००६ वैशाख १० गते १९४९ अप्रिल २२ का दिन पुष्पलाल श्रेष्ठको नेतृत्वमा स्थापना भएको नेपाल कम्युनिष्ट पार्टी नेकपाको स्थापनाको आज ७५ वर्ष पूरा भएको छ । स्थापनाकालमा नेकपामा श्रेष्ठ संस्थापक महासचिव थिए । नेकपाका संस्थापकहरूमा पुष्पलाल, निरञ्जनगोविन्द वैद्य, नरबहादुर कर्माचार्य, नारायणविलास जोशी र मोतिदेवी श्रेष्ठ थिए ।
यसैबीच स्थापना दिवसको अवसरमा नेकपा एमालेले आज ललितपुरको गोदावरीमा विशेष समारोह आयोजना गर्दैछ । प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवालगायत सहभागी हुने कार्यक्रम छ । सोही कार्यक्रममा एमालेले पूर्वराष्ट्रपति विद्यादेवी भण्डारीलाई ‘गणतन्त्र गौरव’बाट सम्मान गरिदैछ ।
काठमाडौंबाट मुकुन्द लामिछाने, दाङबाट सपना बोहरा/मध्यान्ह
प्रधानमन्त्री पुष्पकमल दाहाल प्रचण्डलाई साना दलहरु मिलाउनै सकस परेको छ । सुदूरपश्चिममा एकीकृत समाजवादीलाई मनाउन सकस परिरहेका बेला जनता समाजवादी पार्टी (जसपा)ले लुम्बनी प्रदेश सरकार छाडेको छ । लुम्बिनी प्रदेश समितिको बैठकबाट निर्णय गरेर जसपा आइतबार प्रदेश सरकारबाट बाहिरिएको हो ।
जसपाले आफ्नो मन्त्रीलाई पनि फिर्ता बोलाएको थियो । पार्टीको निर्णयअनुसार सरकारमा सहभागी मन्त्री भण्डारीलाल अहिरले राजीनामा दिए । सरकारबाट बाहिरिए पनि समर्थन भने जसपाले कायमै राखेको छ ।
‘गठबन्धन बनाउँदा जसपासँग गरिएको सहमतिबमोजिम दुई जना सांसदलाई मन्त्री बनाउनुपर्ने हो,’ जसपाका लुम्बिनी प्रदेश अध्यक्ष अशोक यादवले भने, ‘त्यही विषयमा हामी असन्तुष्ट भयौं ।’
सरकार गठनका क्रममा सरकारलाई समर्थन गरेका दलबीच भएको सझौताअनुसार जसपालाई शहरी विकास तथा पर्यटन र कृषि तथा भूमि व्यवस्था मन्त्रालय दिने लिखित सझौता भएपनि कार्यान्वयन नभएको बाताउँदै उनले सरकारबाट बाहिरिएको बताए । लुम्बिनी प्रदेश सभामा जनता समाजवादीका तीन जना सांसद छन् ।
नेताहरु लुम्बिनीमा जसपाको निर्णय ‘अर्थपूर्ण’ रहेको बताउँछन् । यस्तो आशंका गर्नेहरु केन्द्रीय सत्ता गठबन्धनमा रहेका दलहरुको बीचमा सम्बन्धलाई देखाउँछन् ।
सूदुरपश्चिम प्रदेश सरकार गठनलाई लिएर एकीकृत समाजवादीले असन्तुष्टि जनाएको थियो । कांग्रेस नेतृत्वमा नयाँ गठबन्धन बनाएर अगाडि बढ्न एकीकृत समाजवादी तयार भएपछि प्रधानमन्त्री प्रचण्डले एकीकृत समाजवादीलाई नै सरकारको नेतृत्व दिने गरी संकट टारेका थिए । तर, उक्त संकट पूर्णत टरिसकेको छैन ।
सुदूरपश्चिम प्रदेशका मुख्यमन्त्रीको नियुक्तिलाई लिएर सर्वोच्च अदालतमा मुद्दा परेको छ भने एमाले सुदूरपश्चिम प्रदेश सरकारमा सहभागी भएको छैन । एमालेले एकीकृत समाजवादीका दीर्घ सोडारीलाई मुख्यमन्त्री बनाउन चाहेको थिएन । सोडारीलाई नबनाए कांग्रेसको समर्थन लिएर अगाडि बढ्ने एकीकृत समाजवादीको चेतावनीपछि एमाले लचक भएको थियो । यही कारण एमाले सोडारी नेतृत्वको सरकारमा सहभागी भएको छैन ।
यही बेला केन्द्रीय सत्ता गठबन्धनमा रहेको अर्को दल जसपाले लुम्बिनी प्रदेश सरकार छाडेको हो । केन्द्रीय गठबन्धनमा रहेको एकीकृत समाजवादीले जुनसुकै बेला संघीय सरकार छाड्न सक्ने चेतावनी दिइरहेका बेला गठबन्धनकै अर्को दल जसपा सरकारबाट बाहिरिनुलाई नेताहरु अर्थपूर्ण ठान्छन् ।
केन्द्रीय गठबन्धनबाट एकीकृत समाजवादी र जसपा बाहिरिएको खण्डमा पुष्पकमल दहाल नेतृत्वको सरकार अल्पमतमा पर्छ । ३० फागुनमा विश्वासको मत लिँदा प्रचण्डले १५७ मत पाएका थिए । उनलाई विश्वासको मत दिएको जनमत पार्टी आन्तरिक विवादमा छ । प्रतिनिधि सभामा जसपाको ११ र एकीकृत समाजवादीको १० सिट छ ।
जनमत पार्टीको विवादले पनि प्रधानमन्त्री प्रचण्डलाई असर पर्न सक्छ । बागमती प्रदेश र मधेश प्रदेशमा नयाँ सत्ता गठबन्धनको सरकार टिकाउन पनि साना दलको विश्वास लिइरहनुपर्ने देखिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies