देवेन्द्रराज पौडेल/मध्यान्ह
नेपालगन्ज : स्थानीय रंगीकर्मी तथा कलाकारहरुले नेपालगन्जमा रंगमञ्च (थियटर) को माग गर्दै यहाँ प्रदर्शन गरेका छन् ।
नेपाल साँस्कृतिक प्रतिष्ठान, राष्ट्रिय नाचघरको नाट्य विभागका प्रमुख चर्चित वरिष्ठ रंगकर्मी, चलचित्र नायक, निर्देशक वीरेन्द्र हमालको नेतृत्वमा रंगीकर्मी तथा कलाकारहरुले रंगमञ्चको माग गर्दै प्रदर्शन गरेका हुन् ।
वयस्क तथा बाल कलाकारहरुको टोलीले बुधवार नेपालगन्जको विपी चोक र नेपालगन्ज उपमहानगरपालिका परिसरमा रंगमञ्चको मागहरु लेखिएको मास्क लगाउँदै प्ले कार्ड बोकेर प्रदर्शन गरेका थिए । वरिष्ठ रंगकर्मी हमालको नेतृत्वमा नात्य निर्देशक सुन्दर गुरुङ, वरिष्ठ लोक गायक कमल वि.के. निर्मोही, अवधी रंगकर्मी वीरेन्द्र यादव, साताव्यापी अभिनय प्रशिक्षण कार्यशालामा सहभागी प्रशिक्षार्थी बालकलाकार सहितको टोलीले नेपालगन्ज उपमहानगरपलिकाका नगर प्रमुख डा. धवल शम्शेर राणासँग सुविधा सम्पन्न रंगमन्चको आवश्यकता बारे ध्यानाकर्षण गराएका थिए ।
नगर प्रमुख डा. राणाले तत्काल अत्याधुनिक रंगमन्च बनाउन सम्भव नभए पनि नेपालगन्जमा रामलिला मैदानमा रहेको भवन, बालमन्दिरको भवन र निर्माणाधीन नेपालगन्ज सिटी हललाई अस्थाई रुपमा प्रयोग गर्न सकिने बताउँदै कुनै एक उपयुक्त ठाउँ छनौट गर्न कलाकारलाई आग्रह गरे ।
सो अवसरमा वरिष्ठ रंगकर्मी हमालले बाँके जिल्लाको कला संस्कृतिको जगेर्ना गर्न र नवोदित कलाकारहरुको अभ्यास र उत्प्रेरणाको लागि पनि एउटा रंगमञ्च (थियटर) आवश्यक भएको बताउँदै जसको सम्भाव्यता अध्ययन गरेर चाँडै काम शुरु गर्ने बताए । त्यस्तै वरिष्ठ लोक गायक निर्मोहीले उपमहानगरपलिकाले जग्गा उपलब्ध गराएमा भवन निर्माणको लागि पहल गरिने बताए ।
यसैबीच भेरी साहित्य समाज केन्द्रीय समितिले गत महिना मात्र भाषा, साहित्य, नाट्यकला संस्कृतिको जगेर्नाको लागि सबैको साझा मञ्च आधुनिक सुविधा सम्पन्न कार्यक्रम गृह निर्माण गर्नका लागि जग्गाको खोजी गरी सहयोग जुटाउने अभियानको थालनी गर्ने निर्णय गरेको समितिका सल्लाहकार समेत रहेका परिष्ठ पत्रकार पूर्ण लाल चुकेले मध्यान्ह दैनिकलाई जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies