कपिलवस्तु : कपिलवस्तुको शुद्धोधन गाउँपालिका–१ अनराटमा सरकारी अनुदानका लागि पठाइएको मल निजी घरमा लुकाइ राखिएको अवस्थामा सशस्त्र प्रहरीले बरामद गरेको छ ।
सशस्त्र प्रहरी उपरीक्षक (एसपी) नेत्र केसीका अनुसार विशेष सूचनाको आधारमा फुलचन्द्र यादवको घरमा छापामारी गर्दा १ सय २४ बोरा डीएपी मल फेला परेको हो । उक्त मल अनुदानका लागि वितरण गर्न पठाइएको भएपनि घरभित्र लुकाइएको अवस्थामा भेटिएको प्रहरीले जनाएको छ ।
बरामद मललाई आवश्यक कानूनी कारबाहीका लागि राजस्व अनुसन्धान कार्यालय बुटवल पठाइएको सशस्त्र प्रहरीले जनाएको छ । घटनाबारे थप अनुसन्धान भइरहेको सशस्त्र प्रहरीका एसपी केसीले जानकारी दिए ।
.jpg)
