यतिबेला सिंगो मुलुकको ध्यान सर्वोच्च अदालत तर्फ केन्द्रीत छ । दुई वर्षे कार्यकाल बाँकी रहँदै असंवैधानिक कदम चाल्दै काम चलाउ सरकारका प्रधानमन्त्री केपी ओलीले प्रतिनिधिसभा विघटन गरेका छन् । उक्त असंवैधानिक कदमबारे परेको मुद्दा सर्वोच्चमा विचाराधीन छ । संसद् विघटनको महिना दिन पुग्न लाग्दा बल्ल सर्वोच्चको कुन इजलासमा बहस गर्ने भन्ने टुंगो लाग्दैछ । पुस १३ बाट शुरु भएको प्रक्रिया अगाडि बढाएको सर्वोच्चको संवैधानिक इजलासमा आज सुनुवाइ हुँदैछ । रिट निवेदकहरुहरुले यति गम्भीर विषयलाई संवैधानिक नभएर बृहत इजलासमा लैजान माग गरेका थिए । तर, प्रतिवादी पक्षका वकिलहरुले संविधानको प्रश्न संवैधानिक इजलासले नै टुंगो लगाउनुपर्ने, यदि बृहत इजलासमा लगिएमा त्यो संविधानकै भावना बिपरीत हुने अडान लिए । अन्ततः प्रधानन्यायाधीश चोलेन्द्र शमशेर राणा सहितको पाँच न्यायाधीश रहेको इजलासले संवैधानिक इजलासमै यो मुद्दाको सुनुवाइ गर्ने आदेश दिएको छ ।
आज संवैधानिक इजलास संसद् विघटनलाई सदर गर्ने वा बदर भन्ने बहस हुँदैछ । संभवतः केही समय यो इजलास चल्नेछ । बहस पछि सर्वोच्चले निर्णय लिनेछ । तर, स्वतन्त्र न्यायालय प्रभावित बनाउनेगरी विभिन्न गतिविधि भइरहेका छन् । काम चलाउ सरकारका प्रधानमन्त्री ओलीले नै सर्वोच्च अदालतले कुनै हालतमा संसद् विघटन उल्टाउन नमिल्ने अडान लिदै आएका छन् । संविधानले नै संसद् विघटन सदर गर्न नमिल्ने सार्वजनिक अभिव्यक्ति दिदै आएका छन् । विचाराधीन मुद्दामा मुख्य झगडियाले नै यस्तो अभिव्यक्ति दिनु अनुचित हो । तर, ओलीले अदालतलाई प्रभाव पार्नेगरी बोलिरहेका छन् ।
कतिसम्म भने कसैले सर्वोच्चले संविधानको पालना गरोस् भन्यो भने पनि ओली तिनै व्यक्तिप्रति खनिने गरेका छन् । सर्वोच्चकै चार पूर्वन्यायाधीश आफ्नो राय सार्वजनिक बक्तव्य मार्फत् व्यक्त गरे । मुलुकमा संकट देखिदा पूर्वप्रधानन्यायाधीशले यसरी बोल्नु बहसको विषय मानियो । तर, प्रम ओलीको जस्तो चेतावनी युक्त अभिव्यक्ति आयो, यसले अरुमा पनि भय सिर्जना गर्न खोजिएको रुपमा लिइएको छ । रिट निवेदकहरुले आफ्नो मागका बारेमा जोड दिनु, तर्क गर्नु र प्रमाण पु¥याउनु स्वभाविक हो । तर, सरकार प्रमुखले सर्वोच्चमा आफू विरुद्ध परेको मुद्दामा यसरी बोल्नुले मुलुकको संविधानमाथि कुनै प्रकारको अधिनायकवादी शैली हाबी हुन खोजेको सन्देश समेत जानेछ । यसर्थ, यसतर्फ ध्यान पुर्याउनु उचित हुनेछ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies