काठमाडौं : नेपाल वैदेशिक रोजगार व्यवसायी संघका तत्कालीन अध्यक्ष स्वर्गीय विष्णुप्रसाद गैरेको शुक्रबार धार्मिक विधि अनुसार पशुपति आर्यघाटमा अन्तिम संस्कार गरिएको छ । गैरेको बिहीबार साँझ निधन भएको भए पनि सेनाले शुक्रबार अपराह्नमात्र पशुपति आर्यघाटमा शव पुर्याएको थियो । स्व. गैरेको पार्थिव शरीरमा छोरा सन्दीप गैरेले दागबत्ती दिए ।
यसैबीच नेपाली कांग्रेसका सभापति शेरबहादुर देउवाले नेपाल वैदेशिक रोजगार व्यवसायी संघका तत्कालीन अध्यक्ष एवं लोकतान्त्रिक वैदेशिक रोजगार व्यवसायी एसोसिएसनका पूर्वाध्यक्ष गैरेको असमायिक निधनप्रति दुःख व्यक्त गरेका छन् ।
पार्टीका महाधिवेशन प्रतिनिधि एवं नेपाल उद्योग वाणिज्य महासंघ कार्यकारिणी समितिका सदस्यसमेत रहेका गैरेको बिहीबार ५६ वर्षको उमेरमा काठमाडौं मेडिकल कलेज, सिनामंगलमा कोभिड–१९ को उपचारका क्रममा निधन भएको थियो ।
पूर्वप्रधानमन्त्री देउवाले शुक्रबार शोक वक्तव्यमार्फत स्व. गैरेले नेपालको लोकतान्त्रिक आन्दोलन र वैदेशिक रोजगारका क्षेत्रमा पुर्याएको योगदानको स्मरण गर्दै श्रद्धाञ्जली र शोकसन्तप्त परिवारजनमा समवेदना प्रकट गरेका छन् ।
कपिलवस्तु जिल्लाको शिवराज नगरपालिका वडा नं ११ सडवाका स्थायी वासिन्दा गैरेले पार्टी संगठन निर्माण र नेपालको लोकतान्त्रिक आन्दोलनमा सक्रिय भूमिका निर्वाह गरेको भन्दै गैरेको निधनबाट पार्टीले होनाहार व्यक्तित्वलाई गुमाएको शोक सभापति देउवाद्वारा जारी वक्तव्यमा उल्लेख छ ।
संघले अध्यक्ष गैरेको निधनमा शुक्रबारदेखि तीन दिन कार्यालय बन्द गरी शोकवरण गर्ने निर्णय गरेको थियो । संघको सो निर्णय अनुसार शुक्रबार संघको कार्यालय बन्द रह्यो । त्यस्तै संघको आह्वानमा शुक्रवार व्यवसायीहरुले आफ्ना कार्यालय बन्द गरी शोकवरण गरेका छन् । व्यवसायी गैरेको असामयिक निधनप्रति दुःख व्यक्त गर्दै विभिन्न व्यक्ति तथा संघसस्थाहरुले शोक वक्तव्य सार्वजनिक गर्ने क्रम जारी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies