कोभिड–१९ संकट व्यवस्थापन केन्द्र (सीसीएमसी) को सिफारिस र मन्त्रिपषिदको निर्णयबमोजिम स्थानीय प्रशासनले आवश्यकताको आधारमा कोरोना संक्रमण रोकथामबारे निर्णय लिएको छ । राजधानी उपत्यकामा पनि प्रतिबन्धात्मक व्यवस्था लागू गरिएको छ । गएको ७ माघदेखि राजधानी उपत्यकाका काठमाडौं, ललितपुर र भक्तपुरमा प्रतिबन्धात्मक व्यवस्था लागू भएको छ । तर राजधानी उपत्यकामै संक्रमण भने उच्च देखिएको छ । मंगलबार मात्रै काठमाडौंमा ४,८७५ जनामा संक्रमण पुष्टि भएको छ । ललितपुरमा ७८२ र भक्तपुरमा ५१५ जनामा संक्रमण पुष्टि भएको छ । मंगलबार थपिएको सहित काठमाडौंमा संक्रमित संख्या ४१,६३३ जना पुगेको छ । ललितपुरमा ९,६६८ र भक्तपुरमा ५,५८१ सक्रिय संक्रमितको उपचार भइरहेको छ ।
देशभर पनि सक्रिय संक्रमितको संख्या लगातार बढिरहेको छ । बुधबार एकैदिन १२,००८ जनामा संक्रमण पुष्टि भएको छ । २५,९०९ जनामा परीक्षण गर्दा झण्डै ५० प्रतिशतमा संक्रमण पुष्टि भएको छ । तर निको हुने संख्या भने उल्लेख्य गतिमा बढ्न सकेको छैन । बुधबार ३,०४० जना निको भए । तर मृतक संख्या भने बढेको छ । बुधबार थप ८ जनाको संक्रमणबाट मृत्यु भएको छ । यो तथ्याङ्कले कोरोना भाइरसको नयाँ भेरियन्ट ओमिक्रोनको संक्रमण तीव्र बनेको प्रष्ट हुन्छ । तर रोकथामका निम्ति आवश्यक सतर्कता अपनाएको देखिदैन । राजधानी उपत्यकामा भीडजन्य गतिविधिमा रोक लगाउने निर्णय भएको छ । तर भीडजन्य गतिविधिप्रति निगरानी भएको देखिदैन ।
राजधानी उपत्यकामा ७ माघदेखि सार्वजनिक सवारीमा जोरबिजोर प्रणाली लागू गरिएको छ । निजी तथा सार्वजनिक यातायातमा लागू गरिएको यो प्रणालीले सडकको जाम घटाएको छ । तर सवारी साधनभित्र आवश्यक सतर्कता अपनाएको देखिन्न । बरु सवारी साधनको संख्या न्यून भएकाले सामाजिक दुरी कायम हुन सकेको छैन । सवारी साधनमा मात्रै नभएर सामाजिक गतिविधिमा पनि आवश्यक सतर्कता अपनाइएको छैन । देशभर सक्रिय संक्रमित ८८ हजार पुग्दा काठमाडौं जिल्लामा मात्रै ४१ हजार संक्रमित देखिनुले पनि आवश्यक सतर्कता नअपनाइएको नै पुष्टि हुन्छ । त्यसैले सरकारले शैक्षिक संस्थाबन्द गर्ने, आर्थिक गतिविधिमा संकुचन आउनेगरी निर्णय लिने मात्रै नभएर आवश्यक निगरानी गर्न समेत आवश्यक देखिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies