काठमाडौँ : भारतले आफ्ना विदेश मन्त्री डा. एस जयशंकरलाई नेपाल भ्रमणका लागि निमन्त्रणा प्राप्त भएको जनाएको छ । भारतीय विदेश मन्त्रालयले भ्रमणको मिति भने दुई देशबीचको आपसी समझदारीमा निर्धारण गरिने स्पष्ट पारेको छ ।

मंगलबार आयोजित साप्ताहिक मिडिया ब्रिफिङमा भारतीय विदेश मन्त्रालयका प्रवक्ता रणधीर जैसवालले मौरिससमा भएको भेटवार्ताका क्रममा नेपालका परराष्ट्र मन्त्री शिशिर खनालले भारतीय विदेश मन्त्री जयशंकरलाई नेपाल भ्रमणको निम्ता दिएको जानकारी दिएका हुन् ।

प्रवक्ता जैसवालका अनुसार उक्त भेटमा दुई पक्षबीच द्विपक्षीय सम्बन्धका विविध विषयमा कुराकानी भएको थियो । उनले भ्रमणको मिति हालसम्म तय नभएको उल्लेख गर्दै आवश्यक समझदारीपछि त्यसबारे निर्णय हुने बताए ।

ब्रिफिङका क्रममा भारतीय विदेश सचिवको प्रस्तावित नेपाल भ्रमणबारे उठाइएको प्रश्नमा प्रवक्ता जैसवालले नेपाल–भारत सम्बन्ध बहुआयामिक र ऐतिहासिक रहेको प्रतिक्रिया दिएका थिए । उनले नेपालमा हालै सम्पन्न निर्वाचन र नयाँ सरकार गठनपछि दुवै देशका प्रधानमन्त्रीबीच संवादसमेत भएको जानकारी दिए ।

उनले नेपाल र भारतबीचको सम्बन्ध केवल कूटनीतिक मात्र नभई पारिवारिक प्रकृतिको समेत रहेको उल्लेख गर्दै आगामी दिनमा सम्बन्धलाई अझ सुदृढ बनाइने धारणा राखे ।