जनकपुरधाम : धनुषाको मिथिला नगरपालिका–९ बडहरीस्थित पूर्व-पश्चिम लोक मार्गमा उपमेयर सवार गाडी र एम्बुलेन्स एक आपसमा ठोक्किँदा ८ जना घाइते भएका छन् ।

आज बिहान अन्दाजी ६:२० बजे बडहरीबाट विराटनगरतर्फ बिरामी लिएर जाँदै गरेको ना.२ च २३२ नम्बरको एम्बुलेन्स र ढल्केवरबाट बर्दिबासतर्फ जाँदै गरेको धनुषाधाम नगरपालिकाकी उपमेयर विद्या भुजेल सवार प्रदेश २-०२-००१ झ ००८२ नम्बरको सरकारी गाडी एक आपसमा ठोक्किएर दुर्घटना भएको हो ।

दुर्घटनामा एम्बुलेन्स चालकसहित त्यसमा सवार ५ जना र उपमेयर सवार गाडीका ३ जना गरी कुल ८ जना घाइते भएका छन् । घाइते सबैलाई उपचारका लागि धनुषाकै रमदैयास्थित जानकी मेडिकल कलेज पठाइएको छ । घाइतेमध्ये एक जनाको अवस्था मध्यम र अन्य सबैको अवस्था सामान्य रहेको प्रहरीले जनाएको छ ।

यी हुन घाइतेहरू
१. जिल्ला धनुषा, मिथिला नगरपालिका–१ बस्ने अन्दाजी ४९ वर्षीय दिपेन्द्र कुमार महतो (एम्बुलेन्स चालक) (सामान्य)
२. जिल्ला महोत्तरी, गौशाला नगरपालिका–५ बस्ने अन्दाजी ४५ वर्षीय वसन्त कुमार सिंह (सामान्य)
३. जिल्ला महोत्तरी, गौशाला नगरपालिका–५ बस्ने अन्दाजी ४० वर्षीया रेणु कुमारी महतो (मध्यम)
४. जिल्ला धनुषा, मिथिला नगरपालिका–९ बस्ने अन्दाजी ६० वर्षीया राजु देवी (पहिलेदेखि पक्षघात/प्यारालाइसिसकी बिरामी)(सामान्य)
५. जिल्ला धनुषा, मिथिला नगरपालिका–९ बस्ने अन्दाजी ६५ वर्षीय लक्ष्मी महतो (सामान्य)

सरकारी गाडीमा सवार घाइतेहरूको विवरण:

१. जिल्ला धनुषा, धनुषाधाम नगरपालिका–८ बस्ने अन्दाजी ५० वर्षीय बद्री भुजेल (सरकारी गाडी चालक) (सामान्य)
२. अन्दाजी ६५ वर्षीया विद्दा भुजेल, धनुषाधाम नगरपालिकाकी उपमेयर (सामान्य)
३. जिल्ला धनुषा, धनुषाधाम नगरपालिका–८ बस्ने अन्दाजी ७० वर्षीय भीमराज भुजेल (सामान्य)