दोहा, कतार : वैदेशिक रोजगारीका लागि आकर्षक कर्मभूमि मानिएको मध्यपूर्वको देश कतारमा रोजगारी सँगै व्यवसाय गर्ने नेपालीहरुको संख्या बढ्दो क्रममा छ । विभिन्न व्यवसाय मध्ये कतारमा होटेल गर्ने नेपाली व्यवासायी पनि बढीरहेका छन् । होटेल व्यवसायमा पुराना तथा अनुभवी चितवनका श्याम पाण्डे र सुदूरपश्चिम कैलालीका भुवन रोकाय मिलेर नयाँ ‘नमस्ते एसिया रेस्टुरेन्ट’ सञ्चालनमा ल्याएका छन् ।
सल्वा रोडमा बिएमडव्लु सोरुमको पारीपट्टी रहेको अल नाईफ सुकभित्र उक्त रेस्टुरेन्टको बुधवार सॉझ उद्घाटन गरिएको छ । उक्त रेस्टुरेन्टका स्पोन्सर (संरक्षकत्व प्रदान गर्ने व्यक्ति कफिल) ले रिबन काटेर उद्घाटन गरेका थिए । नेपालीहरुको बाक्लो वस्ती रहेको सनैया क्षेत्रको नजिक रहेको उक्त रेष्टुरेन्टमा अनुकूल मिल्नेहरुलाई होटलसम्म पुगेर एक पटक नेपाली स्वाद चाख्न अनुरोध गर्दै कफिलले व्यावसायिक सफलताको शुभकामना व्यक्त गरे ।
नेपाली स्वादमा विभिन्न परिकारका खाना सुलभ मूल्यमा उपलब्ध रहेको सञ्चालक पाण्डेले मध्यान्हसँग बताए । उनले कतारका नेपाली रेष्टुरेन्टहरुमा आफ्नै लामो अनुभव रहेको हुँदा सुलभ मूल्यमा खाना खुवाउन नमस्ते एशिया रेस्टुरेन्ट तयार रहेको बताए । सफा र स्वच्छ खाना खुवाउने प्रतिबद्धता व्यक्त गर्दै अर्का सञ्चालक रोकायले ग्राहकको चाहना तथा सुझावलाई शिरोपर गर्दै परिमार्जित हुँदै जाने समेत बताएका छन् । कतारमा रहेका पत्रकार, व्यवसायी सहित दर्जनौँ व्यक्तिहरुको उपस्थितिको बीचमा होटेलको उद्घाटन गरिएको हो । होटलमा संघसंस्थाका बैठक तथा जन्मदिनलगायतका विभिन्न कार्यक्रमको आयोजना गर्नका लागि आकर्षक हलको समेत व्यवस्था रहेको छ ।
