काठमाडौं : केटिएम नेपालले ‘केटिएम ट्रयाक टेस्ट एक्सपिरियन्स’ कार्यक्रम समापन गरेको छ । कार्तिक ०९ र १० गते भक्तपुरको एडभान्स राइडिङ एकेडेमीमा आयोजित यो २ दिने कार्यक्रमले २५० भन्दा बढी मोटरसाइकल प्रेमीहरुलाई केटिएमका विभिन्न मोडेलहरुको रोमाञ्चक अनुभव र ‘हट ल्याप च्यालेन्ज’ मा सहभागी भएको कम्पनीले जनाएको छ ।
कार्यक्रमको पहिलो दिन सहभागीहरुले विशेष रुपले तयार गरिएको ट्रयाकमा केटिएम २०० ड्युक, २५० ड्युक, २०० आरसी, र ३९० ड्युक मोडेलहरु टेस्ट राइड गर्ने अवसर पाएका थिए । साथै अनुभवी राइडरहरुले प्रशिक्षण सत्रहरु सञ्चालन गरेका थिए जसले सहभागीहरुलाई सवारी सीप र सुरक्षा सम्बन्धी महत्त्वपूर्ण सुझावहरु प्रदान गर्दै थप रोमाञ्चक र जानकारी मूलक बनाएको कम्पनीले दाबी गरेको छ ।
दोस्रो दिन ‘हट ल्याप च्यालेन्ज’ आयोजना गरिएको थियो जहाँ प्रतिस्पर्धीहरु प्रो रेसरहरु, अमेच्योरहरु, र महिला गरी ३ समूहमा विभाजित गरिएका थिए । सहभागीहरुले छ–छ ल्यापको टाइम ट्रायलमा प्रतिस्पर्धा गरेका थिए । जसमा हरेक समूहमा सबैभन्दा छिटो समय निकाल्ने प्रतिस्पर्धीहरुलाई सम्मानित गरिएको थियो ।
