सप्तरीमा दैनिक ७ घण्टासम्म विद्युत अवरुद्ध

पिन्टु यादव/मध्यान्ह 

सप्तरी : सप्तरीमा अघोषित रुपमा लोडसेडिङ हुने गरेको छ । नेपाल विद्युत प्राधिकरण कञ्चनपुर वितरण केन्द्रको मनपरिका कारण हजारौं सेवाग्राहीहरु मर्कामा परेका छन् । 

विभिन्न समस्या देखाउँदै दैनिक ५ देखि ७ घण्टासम्म विद्युत अवरोध हुने गरेको छ । जसका कारण यस क्षेत्रका ग्राहकहरुले अघोषित लोडसेडिङको आशंका गरेका छन् । 

पछिल्लो केही दिनयता यस क्षेत्रमा छिनछिनमा विद्युत आउने जाने हुने गरेको ग्राहकहरुले गुनासो गरेका छन् । सामान्य मौसमको खराबी आउँदा समेत दिनभरि बिजुली काटिने समस्याले यस क्षेत्रका ग्राहकहरु आजित भएका छन् । उनीहरुले प्राधिकरणले अघोषित लोडसेडिङ गर्न थालेको बताएका छन् । 

बेलाबेलामा प्रसारण लाइनको मर्मत सम्भार नहुँदा यसक्षेत्रमा पोल खस्ने, फोल्ड हुने, ट्रान्सर्फमर बिग्रने समस्या बढ्दै गएको छ । प्राधिकरणमा कार्यरत कर्मचारीहरुको चरम लापरबाहीले यस्तो समस्या आइरहेको ग्राहकहरुको गुनासो छ । बिजुली तारमा रुख, बाँसको सानाठूला लहराले फोल्ड हुने समस्या आउने गरेको भएतापनि समयमै लहरा हटाउन नसक्दा समस्या बढ्दै गएको छ ।

घण्टौंसम्म बिजुली अवरोध हुने परिपाटीले प्रशासनिक चुस्ततामा ह्रास आएको उपभोक्ताहरुको भनाइ छ । बाँस र रुखका सानाठूला लहरा हटाउन कन्जुस्याइँ गरिने कर्मचारीहरुको रवैयाले समेत सामान्य हावाहुरीमा बिजुली अवरोध हुने गरेको छ । 

यसले यस क्षेत्रका हजारौं ग्राहक आजित भएका छन् । यस्ता समस्याहरु समाधान गर्न केन्द्रले गम्भीरतापूर्वक ठोस योजना बनाउनुपर्ने उपभोक्ताको अपेक्षा छ । 

ग्राहकमा यी समस्याले उत्पन्न भएको कठिनाइलाई ध्यानमा राखेर समाधान नगरे उनीहरुले वितरण केन्द्रविरुद्ध प्रदर्शन गर्ने चेतावनी समेत दिएका छन् । 

यता वितरण केन्द्रका डिभिजन इन्जिनियर अरुण कुमार साहले ग्राहकमा पर्न गएको असुविधाको सम्बन्धमा केन्द्र संवेदनशील रहेको बताएका छन् । नेपाल विद्युत प्राधिकरणले कुनै किसिमको अघोषित लोडसेडिङ लगाइएको मिथ्या मात्रै भएको उनले बताए । 

ग्राहकको सेवामा केन्द्र हरबखत तम्तयार रहेको उनले दाबी गरे।चाडपर्व नजिकिदै गएको बेला केन्द्रले सुचना निकालेर सेक्सन–सेक्सनको बिजुली काटेर सानाठूला रुख र बाँसको लहरा बिजुली तारबाट हटाउने गरिएकोले यी समस्याबाट ग्राहकमा असुविधा उत्पन्न पक्कै आउने गरेको बताए ।

नेपाल विद्युत प्राधिकरण कञ्चनपुर वितरण केन्द्रबाट ३३ हजार एक सय ५२ जना ग्राहकलाई सेवा दिइरहेको डिभिजनल इन्जिनियर साहले बताए । यसक्षेत्रमा ५१ किलोमिटर ३३ केभी लाइन प्रसारण रहेको छ । त्यस्तै,एक सय १६ दशमलव पाँच किलोमिटर ११ केभीको प्रसारण लाइन रहेको छ । जसमा तीन वटा सब–स्टेसन रहेको छ ।

भगवतपुरमा फ्युज सेवा 

नेपाल विद्युत प्राधिकरण कन्चनपुर वितरण केन्द्रले केही दिनमा ग्राहक वर्गको सेवालाई ध्यानमा राखेर महादेवा गाउँपालिका वडा नम्बर ५ भगवतपुरस्थित फ्युज सेवा स्थापना गर्न लागिएको डिभिजनल इन्जिनियर अरुण कुमार साहले बताएका छन् । 

यस वितरण केन्द्रमा हजारौं उपभोक्तालाई सहज सेवा दिने उदेश्यले फ्युज सेवा स्थापना गर्न लागिएको जानकारी दिएको छ । जसबाट महादेवा गाउँपालिकाका ६ वटै वडा अन्तर्गतका गाउँहरु–मझोरा, ढिकुली, महादेवा, भगवतपुर, कजौली, पकरी, डाढा, बथनाहा, बलिया, मनियार प्रसाही र लक्ष्मीनियाँमास्थित ट्रान्सर्फमरमा आउने समस्या, फोल्डको समस्या, तार  र पोल खस्ने समस्यालाई अविलम्ब समाधान गरिने छ । त्यसैगरी तिरहुत गाउँपालिकामा पर्ने डिमन, गोइठी, लोहजारा, बुधेवा लगायतका गाउँहरु समेतमा भगवतपुरबाट सेवा उपलब्ध हुने बताइएको छ ।

छिमेकीको पानीले चल्छ यशोधराको परसोहिया स्वास्थ्य चौकी

शहबाज खान/मध्यान्ह

कपिलवस्तु : कपिलवस्तुको यशोधरा गाउँपालिका वडा नम्बर ४ मा रहेको परसोहिया स्वास्थ्य चौकीमा खानेपानीको व्यवस्था नहुँदा समस्या भएको छ । खानेपानी नभएपछि सेवाग्राही र स्वास्थ्यकर्मीलाई निकै सास्ती खेप्नु परेको छ । स्वास्थ्य चौकीमा एक वर्ष भन्दा बढी समयदेखि बिरामी, स्वास्थ्यकर्मीलाई, पिउने पानी, शौचालयको प्रयोग र सरसफाई गर्न समस्या भएको छ । 

स्वास्थ्यकर्मीले बिरामीको उपचार, ड्रेसिङ, औषधी खुवाउँदा गर्भवती महिला, बाल–बच्चा, बिरामीलाई पानीको व्यवस्थापन नहुँदा समस्या भएको गुनासो गरेका छन् । उनीहरुले शौंचालयको प्रयोगमा निकै कठिनाई भएको बताएको भन्दै चिन्ता व्यक्त गरेका छन् । स्वास्थ्य संस्था जस्तो अतिआवश्यक ठाउँमा खानेपानी व्यवस्थापन सम्बन्धित निकायले ध्यान नदिएको स्वास्थ्यकर्मी र सेवाग्राहीको भनाइ छ । 

यस्तै स्वास्थ्य चौकीमा पानीको समस्या मात्रै नभएर सरसफाईमा चरम लापरवाही देखिएको छ । स्वास्थ्य चौकीबाट निस्केको ’फोहर मलाई’ फाल्ने वा नष्ट गर्ने उचित व्यवस्थापन समेत छैन । स्वच्छ, सफा तथा पूर्ण व्यवस्थापन हुनुपर्ने तर व्यवस्थापन पक्ष कमजोरी देखिएको स्थानीयको आरोप छ । स्वास्थ्यकर्मीका अनुसार स्वास्थ्य चौकीमा आ–आफ्नो घरबाट पानी बोकेर ल्याउनुपर्ने बाध्यता छ । घरबाट ल्याएको पानी सकिएपछि चौकी छेउका सरफराजको नल्काको पानी प्रयोग गरिने अवस्था रहेको स्वास्थ्यकर्मी बताउँछन् ।

बिरामीलाई औषधी खान नल्काको पानी पिउने योग्य छ कि छैन भन्ने पानीको गुणस्तर जाँच नहुँदा थप समस्या निम्त्याउने सक्ने उनीहरुको भनाइ छ । स्वास्थ्यकर्मीले पटक–पटक स्वास्थ्य चौकी प्रमुख माधव अर्यालसँग खानेपानी व्यवस्थापनका लागि अनुरोध गरेपनि चासो नदिएको बताएका छन् । उनीहरूले सकेजति आफै सरसफाइ गरिने गरेको बताउँछन् । 

यता स्वास्थ्य चौकी प्रमुख माधव अर्याल खानेपानी बिना स्वास्थ्य चौकी सञ्चालनमा कुनै समस्या नभएको बताउँछन् । उनले स्वास्थ्य चौकीमा नल्का रहेको दाबी समेत गरेका छन् । नल्का बिग्रेको बताउँदै स्वास्थ्य चौकीमा बजेट नभएको कारणले खानेपानीको व्यवस्थापनमा समस्या सिर्जना भएको अर्यालको भनाइ छ । बिरामीहरुले प्रयोग गरिरहेका नल्काको पानीको गुणस्तर १० वर्ष पहिला जाँच गराइएको र प्रयोगयोग्य रहेको उनले जिकिर गरे । 

यशोधरा गाउँपालिका स्वास्थ्य संयोजक विरेन्द्र कुमार मिश्रले स्वास्थ्य चौकीमा खानेपानी व्यवस्थापनमा समस्या भएको बताउँदै विविध कारणले समाधान हुन नसकेको बताए । उनले यसबारेमा थप जानकारी दिन चाहेनन् । यस्तै यशोधरा गाउँपालिका अध्यक्ष शिव दयाल तिवारीले स्वास्थ्य चौकीमा खानेपानी समस्याबारे कुनै जानकारी नभएको बताए । उनले खानेपानीको समस्या भए दशैँपछि व्यवस्थापन गराउने बताए । पानीको समस्याबारे बुझेर तत्काल उपलब्ध गराउने तर दशैपछि व्यवस्थापन गर्ने अध्यक्ष तिवारीको भनाइ छ ।

त्रियुगाका पूर्वमेयर चौधरीसहित ४ जनाविरुद्ध भ्रष्टाचार मुद्दा

काठमाडौं : अख्तियार दुरुपयोग अनुसन्धान आयोगले उदयपुरको त्रियुगा नगरपालिकाका पूर्वमेयर बलदेव चौधरीसहित ४ जनाविरुद्ध विशेष अदालतमा भ्रष्टाचार मुद्दा दायर गरेको छ । नदी तथा खोलाको ढुंगा, गिट्टी, बालुवा र माटो ठेक्कामा लगाउँदा ८१ लाख ३५ हजार रुपैयाँ राजस्व हिनामिना गरेको आरोपमा अख्तियारले त्रियुगा नगरपालिकाका पूर्वमेयर चौधरीसहित चार जनाविरुद्ध बुधबार विशेष अदालतमा मुद्दा दायर गरेको हो । 

अख्तियारले पूर्वमेयर चौधरी, तत्कालीन निमित्त प्रमुख प्रशासकीय अधिकृत किरणकुमार कार्की, तत्कालीन राजस्व शाखा प्रमुख गुरुप्रसाद ढकाल र ठेकेदार राजेश बछारलाई प्रतिवादी बनाएर मुद्दा दायर गरेको हो । पूर्वमेयर चौधरीले आर्थिक वर्ष २०७८/०७९ मा त्रियुगा नगरपालिकाभित्रका बरुवा खोला, त्रियुगा खोला र सुनकोशी नदीको नदीजन्य पदार्थ माटो बाहेकको प्रारम्भिक वातावरणीय परीक्षण प्रतिवेदन स्वीकृत गरेको, त्रियुगा नगरपालिकाको नगरस्तरीय राजस्व परामर्श समितिको निर्णयअनुसार सो आर्थिक वर्षका लागि नदीजन्य पदार्थको प्रस्तावित आय प्रक्षेपण गरेकोमा उनकै अध्यक्षतामा बसेको नगर कार्यपालिकाको बैठकको निर्णय अनुसार ढुङ्गा, ग्राभेल, बालुवा उत्खनन, संकलन, बिक्री कर उठाउने प्रयोजनका लागि न्यूनतम अंक कायम गर्ने निर्णय गरी ६२ लाख ९१ हजार २०४ रुपैयाँ २२ पैसा राजस्व चुहावट गरेको अख्तियारको दाबी छ ।

यस्तै ठेक्का नै नभएको माटो भरौटे र बलौटे गैरकानुनी ढंगले उत्खनन र बिक्री गर्न दिएको, प्रत्यक्ष–अप्रत्यक्ष सहयोग पुर्‍याएको कारण १८ लाख ४४ हजार १७७ रुपैयाँ ९४ पैसा राजस्व चुहावट भएको अख्तियारको जिकिर छ । सोही अनुसार अख्तियारले राजस्व चुहावट भएको कुल रकम ८१ लाख ३५ हजार ३८२ सय १६ पैसालाई बिगो कायम गरी दोब्बर जरिवानाको मागदाबी गरेको हो ।

त्यस्तै नगरपालिकाका तत्कालीन निमित्त प्रमुख प्रशासकीय अधिकृत कार्कीले आइइई प्रतिवेदन तथा नगरस्तरीय राजस्व परामर्श समितिको निर्णयसमेतलाई अनदेखा गरी नदीजन्य पदार्थको उत्खनन र बिक्री कार्यका लागि न्यूनततम ठेक्का कायम गर्न निर्णय तथा स्वीकृत गर्ने कार्यमा सहभागी भएको तथा ठेक्का नै नभएको माटो उत्खनन गर्न दिएर राजस्व चुहावट गर्न संलग्न भएको अख्तियारले जनाएको छ । उनीविरुद्ध पनि चुहावट भएको कुल राजस्वलाई नै बिगो कायम गरी मुद्दा दायर भएको छ । 

अख्तियारले नगरपालिकाका तत्कालीन राजस्व शाखा प्रमुख गुरुप्रसाद ढकाललाई पनि प्रतिवादी बनाएको छ । उनीविरुद्ध नदीजन्य सामग्रीको ठेक्कामा न्यूनतम रकम कायम गर्न मिलेमतो गरेको र ठेक्का नै नभएको माटो गैरकानुनी ढंगले उत्खनन र बिक्री गर्न दिएको आरोप अख्तियारको छ । उनीविरुद्ध भने चुहावट भएको राजस्व रकमको दोब्बर जरिवानासहित एक करोड ६२ लाख ७० हजार सात सय ६४ रुपैयाँ बिगो दाबी अख्तियारले गरेको छ । 

त्यस्तै अख्तियारले ठेकेदार कम्पनी र त्यसका प्रोप्राइटरलाई पनि प्रतिवादी बनाएको छ। तत्कालीन मेयर, निमित्त प्रमुख प्रशासकीय अधिकृत र राजस्व शाखा प्रमुखसँग मिलेमतो गरी सम्झौताको सर्तविपरीत बोलपत्र र सम्झौता नै नभएको, दरभाउ नै पेस नभएको नदीजन्य पदार्थ उत्खनन, बिक्रीसमेत गरेको र अवैध रूपमा माटो उत्खनन र बिक्री गरेर राजस्व चुहावटमा मतियारको कार्य गरेको आरोपमा अख्तियारले निश्चल ट्रेडर्स हेटौँडा र त्यसका प्रोप्राइटर तथा ठेकेदार राजेश बछारलाई प्रतिवादी बनाएको छ ।

केन्द्रीय अध्यक्षसँग एनसीसी कतारले गर्‍यो अन्तरक्रिया

तिलु शर्मा पौडेल/मध्यान्ह

दोहा, कतार : गैर आवासीय नेपाली संघ कतारले केन्द्रीय अध्यक्षलगायत विभिन्न पदाधिकारीहरुसँग अन्तरक्रिया कार्यक्रम सम्पन्न गरेको छ । कतारको छोटो भ्रमणमा आएका एनआरएनए आइसीसीका कार्यकारी अध्यक्ष डा. बद्री केसी र उपाध्यक्ष डिवी क्षेत्रीलगायतका व्यक्तित्वहरुसँग प्लाजा मलस्थित लालीगुराँस रेस्टुरेन्टमा मंगलबार साँझ अन्तरक्रिया कार्यक्रम सम्पन्न गरिएको हो ।

अन्तरक्रिया कार्यक्रममा बोल्दै आइसीसी अध्यक्ष तथा कार्यक्रमका प्रमुख अतिथि केसीले केन्द्रमा तीन वटा अध्यक्ष हुनु रहरको नतिजा नभएको बताए । उनले आफू कान्छो अध्यक्ष बनेको बताउँदै तोकिएकै समय र मितिमा अधिवेशन सम्पन्न गराउने प्रतिबद्धता व्यक्त गरे । उनले संस्थामै करिब दुई दशक खर्चिएको स्मरण गर्दै एनआरएनएभित्र एकताका लागी आफू व्यक्तिगत र पदीय हैसियतमा कहिल्यै बाधक नबनेको र एकताका लागि आफूले गर्नुपर्ने सबै त्याग गर्न तयार रहेको बताए ।

कार्यक्रममा संस्थापक सदस्य सागर नेपाल, आइसीसी उपाध्यक्ष केसी र राजेन्द्र कुमार शर्मा, सचिव प्रवीण गुरुङ, सह-कोषाध्यक्ष होमनाथ शर्मा, आइसीसी सदस्य सरिता पौडेल भण्डारीसहित एनसीसी कतारका भूतपूर्व अध्यक्षलगायतको उपस्थिति तथा मन्तव्य रहेको थियो l 

कार्यक्रममा बोल्ने वक्ताहरूले विभाजित बनेको एनआरएनएलाई एक ढिक्का बनाएर अगाडि लैजान र एकल नेतृत्व छान्न सुझाव दिएका थिए l सबैलाई मिलाएर लैजान र नेतृत्वकर्ताहरू पनि एक ढिक्का भइ अगाडि बढ्न सुझाव दिँदै विश्वभर सञ्जाल फैलाएको एनआरएनएमा विवाद देखिनु दु:खद् रहेको विचार व्यक्त गरेका थिए l

अन्तरक्रिया कार्यक्रममा सहभागीका लागि फ्लोर खुला गरिएपछि आइसीसीका अध्यक्षलगायतसँग सहभागीले विभिन्न प्रश्न राखेका थिए l सहभागीहरूले विभाजित एनआरएनए, सामाजिक सुरक्षा कोष, मलेसिया र मध्यपूर्वका श्रमिकका हकहितका विषयमा प्रश्न गरेका थिए l सहभागीहरूले केसीसमक्ष कतारबाट अध्यक्षका आकांक्षी बनेका शर्मालाई सघाउन समेत अनुरोध गरेका थिए l

फ्लोरबाट एनसीसि कतारका निवर्तमान प्रमुख सल्लाहकार उत्तम गुरुङले एनसीसी कतारभित्र भएको आर्थिक अनियमितता, छानबिन समिति र क्षेत्राधिकारका बारेमा सोधेको प्रश्नको जवाफ दिँदै केसीले एनसीसीले कुन कार्यकालको, कति महिना र कति वर्षको के-के विषयमा छानबिन गर्ने हो, त्यो सर्वाधिकार एनसीसीमै हुने र छानबिनका लागि लिखितरूपमा समितिलाई समय सीमा तोकिदिनुपर्ने बताए । उनले एनसीसीका विवादलगायत छानबिनका प्रक्रियाको सर्वाधिकार एनसीसीमै निहित रहने हुँदा आइसीसीले त्यसको समय सीमा तोक्ने या छानबिनमा असर पार्ने गरी कुनै पनि कार्य नगर्ने र गर्न नपाइने स्पष्ट पारे ।

गुरुङले सन् २०१९ देखि नै एनसीसीमा आर्थिक अनियमितता भएको आरोप लगाउँदै सन् २०१९ देखि २०२३ सम्मको सबै आयव्यय छानबिन गर्नुपर्ने माग राखेपछि गत जुलाई ३० मा सम्पन्न १०औं राष्ट्रिय महाधिवेशनबाट आइसीसीका सह-कोषाध्यक्ष होमनाथ शर्माको संयोजकत्वमा एक छानबिन समिति गठन भएको थियो ।  समितिलाई एनसीसी कतारले २०२१-२३ कार्यकालको आयव्यय छानबिन गरी रिपोर्ट बुझाउन निर्देशित गरेको थियो l 

प्रथम उपाध्यक्ष कृष्ण पन्थीले स्वागत मन्तव्य राखेको अन्तरक्रिया कार्यक्रमलाई सचिव सन्तोष क्षेत्रीले सहजीकरण गरेका थिए l कार्यक्रमको समापन गर्दै कार्यक्रमका  सभापति तथा एनसीसी कतारका अध्यक्ष रमेश भट्टले विगतमा डेलिगेटस कसरी पठाउने गरिएको थियो भन्ने अभिलेख आफूले नपाएको हुँदा आइसीसीको विद्धानले निर्देशित गरेबमोजिम आफूले डेलिगेट्स पठाएको बताए l झोलामा पैसा बोकेर पञ्जीकृत सदस्यता बनाउने प्रवृत्तिको अन्त्य गर्न चाहेको बताउँदै जसले सदस्यता लिन चाहन्छ उसले मात्र पैसा तिरेर सदस्यता लिन मिल्ने व्यवस्था गर्नेतर्फ आफू लाग्ने भट्टको भनाइ थियो l उनले एनसीसीका पञ्जीकृत सदस्य सबैले सिधै आइसीसीको निर्वाचनमा मत हाल्न पाउनुपर्ने व्यवस्था गर्नका लागि आगामी केन्द्रीय अधिवेशनमा आवाज उठाउने बताए l

अध्यक्षका प्रत्याशी आरके शर्माको उम्मेदवारी घोषणा सभा आज, सहजीकरणका लागि सन्दीप क्षेत्री कतार आइपुगे

तिलु शर्मा पौडेल/मध्यान्ह

दोहा, कतार : कतारलाई कर्मथलो बनाउँदै आएका गैर आवासीय नेपाली संघ (एनआरएनए) का वर्तमान कार्यसमितिका उपाध्यक्ष राजेन्द्र कुमार (आरके) शर्माले आज एक समारोहका बीच अध्यक्ष पदमा उम्मेदवारी घोषणा गर्ने भएका छन् । आगामी एक कार्यकाल (२०२३/२५) का लागि शर्माले कर्मभूमिबाट औपचारिकरूपमा आफ्नो उम्मेदवारी घोषणा गर्न लागेका हुन् ।

कतारको राजधानी दोहास्थित र्‍याडिसन ब्लु होटेलमा हुने घोषणा कार्यक्रमको सहजीकरण गर्न नेपालका चर्चित हास्य कलाकार सन्दीप क्षेत्री कतार आइपुगेका छन् l अध्यक्षका आकांक्षी शर्माले औपचारिक उम्मेदवार घोषणा सभामा आफ्ना २४ बुँदे वाचा पत्र सार्वजनिक गर्ने कार्यक्रम रहेको छ । “गैर आवासीय नेपालीको अभियान: स्वदेशमा लगानी, प्रवासमा सम्मान” भन्ने मूल नारा समेटेर शर्माले २४ महिने कार्यकालमा आफ्ना २४ कार्ययोजनाहरु समेटेर वाचा पत्र सार्वजनिक गर्न लागेका हुन् । कार्यक्रममा विभिन्न देशका एनआरएनए एनसीसीका अध्यक्ष, कतारमा रहेका विभिन्न संघ संस्थाका प्रतिनिधिहरू तथा मिडियाकर्मीलाई समेत निमन्त्रणा गरिएको सचिवालयले जनाएको छ l  

मध्यान्हसँग कुरा गर्दै शर्माले विश्वका सबै क्षेत्रमा बस्ने गैर आवासीय नेपालीहरूको सल्लाह र सुझावको आधारमा आफ्ना योजना तथा कार्यक्रमहरू ल्याउन लागेको बताए । शर्मा गैर आवासीय नेपाली अभियानमा सन् २००५ देखि सक्रिय छन् । उनले गैर आवासीय नेपाली संघ, राष्ट्रिय समन्वय परिषद् कतारको सल्लाहकारदेखि आइसीसी सदस्य, मध्यपूर्व संयोजक र आइसीसी सचिव भएर कार्यसम्पादन गरिसकेका छन्  l

उक्त कार्यक्रममा सहभागी हुन एनआरएन उपाध्यक्ष डिबि क्षेत्री, उपाध्यक्ष रोविन्द प्रसाद श्रेष्ठ, महिला उपाध्यक्ष यास्मीन बेगम, महासचिव गौरी राज जोशी, सचिव खगेन्द्र न्यौपाने, एनआरएनए सह कोषाध्यक्ष टंक गैरे, एनआरएनए अभियन्ता राजु सैयद, कल्याण श्रेष्ठ, मध्यपूर्व संयोजक मनोज गोर्खाली र राजेन्द्र अर्याल, एनसीसी यूएईका पूर्वअध्यक्ष रमेश श्रेष्ठ, एनसीसी यूएईका अध्यक्ष विकास साही, एनसीसी साउदीका अध्यक्ष रविना अर्याल, एनसीसी बहराइनका अध्यक्ष राजु श्रेष्ठ, एनसीसी ओमानका अध्यक्ष विकल झा, एनसीसी इराकका अध्यक्ष विनोद श्रेष्ठ, एनसीसी कुवेतका अध्यक्ष रण लामा, अन्तर्राष्ट्रिय चितवन समाजका अध्यक्ष समीर केसीलगायत एनआरएनए अभियन्ता कतार आइपुगेका छन् l  

कार्यक्रममा भौतिकरूपमा उपस्थित हुन नसक्नेहरूका लागि साँझ नेपाली समय ७:४५ बजे र कतारी समय ५ बजेबाट जुममार्फत जोडिन सकिने व्यवस्था मिलाइएको छ l

जुममा जोडिनका लागि : https://zoom.us/j/97104689068?pwd=QVRTaEN1Y0lHL3pOa2FCak5ycFJUZz09

अवैध काठसहित एक जना पक्राउ

बिन्द्र राई/मध्यान्ह

उदयपुर : उदयपुरमा अवैध काठसहित एक जना पक्राउ परेका छन् । त्रियुगा नगरपालिका -१२ स्थित हवाईफिल्डमा मंगलबार केकुन जंगलबाट चोरी गरी काठ ल्याउँदै गरेका एक जनालाई पक्राउ गरिएको जिल्ला प्रहरी कार्यालय उदयपुरले जनाएको छ ।

अन्दाजी ८ क्युफिट सखुवा चिरान काठ ४/५ जना मानिसको समूहले बोकेर ल्याउँदै गरेको र काठ सोही ठाउँमा छाडेर फरार रहेपनि सो घटनामा संलग्न एक जनालाई पक्राउ गरिएको प्रहरी नायव उपरीक्षक हरिनन्दन चौधरीले जानकारी दिए । पक्राउ पर्नेमा त्रियुगा नगरपालिका-३ बस्ने ३६ वर्षीय दुलीचन सदा रहेको उनले बताए । पक्राउ परेका सदालाई आवश्यक कारवाहीका डिभिजन वन कार्यालय उदयपुरमा बुझाइएको प्रहरीले जनाएको छ ।

२२ प्रहरीलाई सात दिनभित्र सम्पर्कमा आउन निर्देशन

काठमाडौं : नेपाल प्रहरीको प्रहरी प्रधान कार्यालयले कार्यालयको सम्पर्कमा नरहेका २२ जना प्रहरीलाई सात दिनभित्र सम्पर्कमा आउन निर्देशन दिएको छ ।

हेडक्वाटरले आज गैरहाजिर प्रहरीहरुको नामावलीसहित एक सार्वजनिक गर्दै सात दिनभित्र कार्यालयमा हाजिर हुन आउन निर्देशन दिएको केन्द्रीय प्रहरी प्रवक्ता तथा प्रहरी नायब महानिरीक्षक कुवेर कडायतले जानकारी दिए । उनले भने, “लामो समयदेखि आफूखुसी कार्यालयमा गैरहाजिर भएका र खोजतलास गर्दा पनि नभेटिएकाले आज सूचना प्रकाशित गरी गैरहाजिर हुनाका कारण खुलाई स्पष्टीकरण पेस गर्न एक हप्ताको म्याद दिई सम्पर्कमा आउन भनेका छौँ ।” 

प्रहरी प्रधान कार्यालयद्वारा आज प्रकाशित सूचनाअनुसार गैरहाजिर भएका प्रहरी कर्मचारीहरुमा प्रहरी सहायक हबल्दारहरु अमित श्रेष्ठ, समीर दाहाल, जनम राई र कमल श्रेष्ठ रहेका छन् । 

साथै प्रहरी जवानहरुमा निवास चौधरी, पूर्णबहादुर वली, हेमन्त कुमाल, प्रेम कुँवर, उमेश लामा, अमर डाँगी, दीपक राई, सुस्मत खड्का, केवोङलिङ आङदेम्बे, जीबहादुर पुन, राजकुमार महत, अनिल परियार, प्रकाश अधिकारी, आशामाया तामाङ, किशोर थारू, मोहनसिंह विक, सुरेन्द्रबहादुर शाही र सन्तोष सुनार छन् ।

चार देशका नवनियुक्त राजदूतले लिए शपथ

काठमाडौं : चार देशका नवनियुक्त राजदूतहरूले पद तथा गोपनीयताको शपथ लिएका छन् । 

बुधबार राष्ट्रपति कार्यालय शीतलनिवासमा आयोजित विशेष समारोहमा फ्रान्स, संयुक्त अरब इमिरेट्स, कुवेत र स्वीट्जरल्यान्डका लागि नवनियुक्त नेपाली राजदूतहरूले पद तथा गोपनीयताको शपथ लिएका हुन् ।

सरकारले फ्रान्सका लागि सुधिर भट्टराई, संयुक्त अरब इमिरेट्सका लागि तेजबहादुर क्षेत्री, कुवेतका लागि घनश्याम लम्साल र स्वीट्जरल्यान्डका लागि रामप्रसाद सुवेदीलाई नियुक्त गरेको थियो ।

शपथ ग्रहण कार्यक्रममा कानून, न्याय तथा संसदीय मामिला मन्त्री धनराज गुरूङलगायत उच्च अधिकारीहरूको उपस्थिति रहेको थियो ।

चिकित्सकहरु आज पनि सडकमा, दोषीलाई कारबाही नगरेसम्म आन्दोलन जारी रहने चेतावनी

काठमाडौं : चिकित्सकमाथि बारम्बार आक्रमण भएको भन्दै चिकित्सकहरु आज पनि आन्दोलनमा उत्रिएका छन् । चिकित्सकमाथि भएका आक्रमणको विरोध गर्दै चिकित्सकहरुले बुधबार माइतीघर मण्डलामा विरोध प्रदर्शन गरेका हुन् । चिकित्सकहरुले मंगलबार पनि माइतीघरमा विरोध प्रदर्शन गरेका थिए ।

स्वास्थ्यकर्मीहरूले स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन, २०७९ अविलम्व कार्यान्वयनको माग राखेका छन् ।

सरकारले सहमति गरेर मात्रै नपुग्ने भन्दै चिकित्सकहरुले दोषीलाई पक्राउ गरेर कारबाही गर्न माग गरेका छन् । उनीहरुले सरकारले दोषीलाई पक्राउ गरी कारबाही नगरेसम्म आफूहरुको आन्दोलन जारी रहने चेतावनी दिएका छन् ।

सङ्घीयता कार्यान्वयनमा सरकार प्रतिबद्ध छ : कार्यवाहक प्रधानमन्त्री खड्का

सुर्खेतः कार्यवाहक प्रधानमन्त्री एवम् रक्षामन्त्री पूर्णबहादुर खड्काले सङ्घीयता कार्यान्वयनमा सरकार दृढ रहेको बताएका छन् । 

बुधबार वीरेन्द्रनगरमा आयोजित पत्रकार सम्मेलनमा कानुन बनाउन ढिलाइ हुँदा नागरिकले सङ्घीयताको अनुभूती गर्न नपाएको भन्दै सङ्घीयता कार्यान्वयनका लागि सरकारले काम गरिरहेको बताए । उनले सङ्घीय शिक्षा ऐन संसदमा टेबुल भइसकेको उल्लेख गर्दै सम्बन्धित मन्त्रालयले निजामति र प्रहरीसम्बन्धी विधेयक संसदमा दर्ता गर्ने तयारी गरिरहेको बताए । 

कार्यवाहक प्रधानमन्त्री खड्काले सुशासन, विकास निर्माण र देशको समृद्धिका लागि सरकारले देखिने गरी काम गरिरहेको बताए । उनले केही दिनभित्रै सुशासनसम्बन्धी कार्यक्रम घोषणा गर्न लागिएको पनि जानकारी दिए । 

उनले प्रधानमन्त्री पुष्पकमल दाहाल ‘प्रचण्ड’ले सत्ता गठन्धन दलको सहमतिमै चीन भ्रमणका क्रममा बेल्ट एन्ड रोड इनिसिएटिभ (बीआरआई)मा कार्यान्वयनका लागि सहमति जनाएको बताए । ‘चीनसँग भएका सहमति र सम्झौता देश हितमा छन्’, उनले भने, ‘गठबन्धनकै सहमतिमै प्रधानमन्त्रीले सम्झौता गर्नुभएको हो ।’

उनले विकास–निर्माणका सन्दर्भमा देखिएका कानुनी अड्चन हटाउन केही नेपाल ऐन संशोधनको प्रक्रिया अघि बढेको बताए । ‘सडकलगायतका पूर्वाधार बनाउन बनको जग्गा उपभोगमा ठूलो समस्या देखिएको छ’, उनले भने, ‘त्यसलाई हटाउनका लागि केही नेपाल ऐन संशोधनलाई संशोधन गर्ने प्रक्रिया अघि बढाएका छौँ ।’

रक्षामन्त्री खड्काले सुर्खेत विमानस्थल विस्तारमा सबैको साथ र सहयोग हुन आवश्यक रहेको बताए । प्रभावित क्षेत्रका जनतालाई साथमा लिएर विमानस्थल विस्तार गर्नुपर्ने उनको भनाइ छ । 

‘अहिलेको विमानस्थल बढीमा चार सय मिटर विस्तार गर्न मिल्छ, भविष्यका लागि यो विमानस्थलले भार थेग्न सक्दैन’, उनले भने, ‘अहिलेलाई सुर्खेत विमानस्थल विस्तार गर्दै रामघाटमा भविष्यका लागि ठूलो विमानस्थल आवश्यक छ ।’