लहान : सिरहा जिल्लाको गोलबजार नगरपालिका-१२ बेतौनाका ३५ वर्षीय जितेन्द्र सदाय हाल प्रादेशिक अस्पताल लहानमा जीवन र मृत्युबीच संघर्ष गरिरहेका छन् । एक महिनाअघि बाख्राका लागि पात टिप्ने क्रममा रुखबाट खसेर मेरुदण्डको हड्डी भाँचिएका सदायको स्वास्थ्य अवस्था अहिले पनि गम्भीर छ । आर्थिक अभावका कारण थप उपचारका लागि उनलाई धरान वा काठमाडौं लैजान सकिएको छैन ।
सदायलाई दुर्घटनापछि तत्कालै लहानस्थित प्रादेशिक अस्पतालमा भर्ना गरियो । चिकित्सकहरूले उनलाई उच्चस्तरीय उपचार आवश्यक रहेको बताएका छन् । तर, आर्थिक कमजोर अवस्थाका कारण परिवारले उनलाई काठमाडौं वा धरानको अस्पतालमा लैजान सकिरहेका छैनन् ।
सदायको परिवार अत्यन्तै कमजोर आर्थिक अवस्थाबाट गुज्रिरहेको छ । तीन सन्तानकी आमा आशा सदायले परिवारका लागि दैनिक खर्च नै धान्न गाह्रो रहेको बताएकी छन् । उपचार खर्च अभावले थप पीडा झेलिरहेको परिवारले समाजसेवी र शुभेच्छुकहरूसँग सहयोगका लागि हारगुहार गरिरहेको छ ।
स्थानीय समाजसेवी भारती दास, कविता मेहता र अखिल नेपाल महिला संघकी जिल्ला सचिवालय सदस्य विभा यादवले व्यक्तिगत रूपमा आर्थिक सहयोग जुटाउँदै आएका छन् । त्यस्तै, वरिष्ठ हेल्थ असिस्टेन्ट ललित यादव र सरुन यादवले पनि सदायको उपचारमा विशेष ध्यान दिएका छन् ।
मधेश प्रदेश सभा सदस्य लालिता दास बिद्रोहीले अस्पतालमै पुगेर परिवारसँग भेट गरेकी छन् र आगामी एक हप्ताभित्र सदायलाई उचित उपचारका लागि धरान वा अन्य अस्पताल लैजाने प्रतिबद्धता जनाएकी छन् । लहान नगरपालिका-३ का वडाध्यक्ष राम दयाल महतोले पनि आर्थिक सहयोग जुटाउने पहल गर्ने वाचा गरेका छन् ।
सदाय नेपालको अपहेलित दलित समुदायका मुसहर जातिका हुन् । आर्थिक रूपमा कमजोर र सामाजिक रूपमा उपेक्षित समुदायका सदस्य भएकाले उनले समाजको अनुदार दृष्टिकोण र सरकारको असंवेदनशीलताबाट दोहोरो पीडा भोग्नुपरेको छ ।
यस्तै, मधेश प्रदेशका स्वास्थ्य मन्त्री शत्रुधन प्रसाद सिंह कोईरीको घर नजिकै बसोबास गर्दासमेत, स्वास्थ्य मन्त्रालयबाट कुनै पहल नभएकोमा स्थानीयहरूले असन्तोष व्यक्त गरेका छन् ।
जितेन्द्र सदायको उपचारका लागि तत्काल ठूलो आर्थिक सहयोग आवश्यक छ । परिवार, समाजसेवी, र चिकित्सकहरूले इच्छुक व्यक्तिहरूलाई सहयोगका लागि अस्पतालमा सम्पर्क गर्न वा सहयोगको समन्वय गर्न अपिल गरेका छन् ।
सदायको यस अवस्थाले नेपालको उपेक्षित समुदायको दयनीय अवस्था र स्वास्थ्य सेवामा रहेको असमानताको समस्या पुनः उजागर गरेको छ । समान अवसर र न्याय सुनिश्चित गर्न समाज र सरकार दुबै गम्भीर बन्नुपर्ने आवश्यकता छ ।
टिकटक स्टार निभा यादवको अस्पताल भ्रमण र आर्थिक सहयोगले पनि सदाय परिवारमा केही राहत पुर्याएको छ । अहिले भारती दास, कविता मेहता र विभा यादवको निरन्तर प्रयासकै कारण सदायले जीवन बचाइरहेका छन् ।
यो घटना नेपालमा स्वास्थ्य सेवाको पहुँच, गरिबी, र सामाजिक विभेदको मुद्दालाई फेरि बहसको केन्द्रमा ल्याउन महत्वपूर्ण बनिरहेको छ ।
