काठमाडौं : नेकपा (एकीकृत समाजवादी)ले स्थायी कमिटी सदस्यमा १७ नेतालाई मनोनीत गरेको छ । समाजवादीले शुक्रबार स्थायी कमिटी सदस्यमा रामकुमारी झाँक्रीसहित १७ नेता मनोनीत गरेको हो ।
गत असारमा नेकपा (एस)को दसौं महाधिवेशनपछि भदौमा पदाधिकारीका लागि निर्वाचन भएको थियो ।
पदाधिकारी निर्वाचनमा झाँक्री पराजित भइन् । महिला उपाध्यक्षको उम्मेदवार बनेकी झाँक्रीलाई जयन्तीदेवी राईले पराजित गरेकी थिइन् । एमालेबाट विभाजनपछि बनेको नयाँ पार्टीमा झाँक्री सचिव थिइन् । झाँक्री पराजित भएपछि उक्त विषयले निकै चर्चा पाएको थियो ।
झाँक्री पराजित हुनुमा गुट र उपगुट नै कारण रहेको त्यतिबेलै नेताहरूले बताएका थिए । माधव नेपालको ‘एस म्यान’ नबन्दा झाँक्रीले निर्वाचन हार्नुपरेको चर्चा पनि पार्टीभित्र चलेको थियो ।
एमालेको भ्रातृ संगठन अनेरास्ववियुबाट विरासत बोकेर आएकी झाँक्रीले निर्वाचन हार्दा राजनीतिक वृत्तमा बहस भएको थियो ।
एमालेमा रडाको मच्चिँदा माधवकुमार नेपालको साथमा रहेका दोस्रो तहका नेताले विद्रोह गर्ने बेलामा उनको साथ छाडे । पार्टी विभाजनका लागि दस्तावेज तयार गरेर अन्तिम अवस्थामा पुगेका नेताहरू विभाजनको निर्णयबाट पछि हटेका थिए ।
तर, २ भदौ २०७८ मा निर्वाचन आयोग पुग्दा नेपाललाई साथ दिनेमा झाँक्री थिइन् । उनले नेपालको हात समातेर डोहो¥याएको फोटो ‘भाइरल’ नै बन्न पुगेको थियो ।
तर, पार्टीको पदाधिकारी छान्दा उनले उपयुक्त जिम्मेवारी पाइनन् । पार्टीमा सचिव बनिन् ।
उनले शहरी विकासमन्त्री बन्ने अवसर पनि पाइन् तर मन्त्रीबाट बाहिरिने क्रममा उनले आँसु नै झार्नुपर्ने अवस्था आयो, पार्टीभित्रको गुट–उपगुटका कारण । पार्टी नेतृत्वले उनलाई मन्त्री छाड्न दबाब दिएको थियो । उनले पद छाड्न नचाहेको आलोचनासमेत खेप्नुपरेको थियो । त्यसपछि उनी पार्टीभित्र निष्क्रिय जस्तै भएकी थिइन् । उनी २०७९ सालको संसदीय निर्वाचनमा पराजित पनि भइन् ।
त्यसपछि उनले पार्टी नबन्ने सार्वजनिक अभिव्यक्ति दिइन् । पार्टी नेतृत्वको सार्वजनिक रूपमा आलोचना पनि गरिन् । झाँक्रीले पार्टी छाड्न लागेको हल्लासमेत चल्यो ।
तर, १६–२० असारमा भएको पार्टीको महाधिवेशनमा भने उनी सक्रिय भएकी थिइन् । महाधिवेशनबाट नेपाल अध्यक्ष र महासचिवमा घनश्याम भुसाल सर्वसम्मत भए । सम्मानित नेतामा झलनाथ खनालले पनि निरन्तरता पाए ।
महाधिवेशन हलले ३ नेतालाई सर्वसम्मत गर्दै ९३ सदस्यीय कमिटी घोषणा गरेको थियो । केन्द्रीय कमिटीलाई पूर्णता दिन पार्टीलाई झन्डै १ महिना लागेको थियो । महाधिवेशनको २ महिनापछि पदाधिकारी चयनका निर्वाचन भयो । सर्वसहमतिको प्रयास असफल भएपछि १७ पदाधिकारी र पोलिटब्युरो सदस्यमा निर्वाचन भयो ।
पराजित थपेर स्थायी कमिटी
पदाधिकारी निर्वाचन भएको ५ महिनापछि पार्टीले महाधिवेशनमा विभिन्न पदमा पराजित नेताहरूलाई थपेर स्थायी कमिटी गठन गरेको छ । स्थायी कमिटीका लागि पार्टीले निर्वाचन नगरी स्वतः चयन गरेको हो । स्थायी कमिटी सदस्यमा १७ नेता मनोनीत भएका हुन् ।
स्थायी कमिटीको सदस्य संख्या ४१ पु¥याइएको छ । अध्यक्ष १, उपाध्यक्ष ७, महासचिव १, उपमहासचिव ४, सचिव ७, वरिष्ठ ३ र सम्मानित १ गरेर २४ सदस्यीय पदाधिकारी स्वतः स्थायी कमिटी सदस्य रहन्छन् । त्यसमा झाँक्री, डा. विजय पौडेल, जीवनराम श्रेष्ठसहित १७ नेतालाई थप गरिएको हो ।
बुधबार बसेको स्थायी कमिटी बैठकले सो निर्णय गरेको उपाध्यक्ष तथा प्रवक्ता जगन्नाथ खतिवडाले जानकारी दिए ।
‘पहिले पदाधिकारी हुनुहुन्थ्यो, उहाँहरूमध्ये कोही अस्ति चुनाव हार्नुभयो । कोही लड्नुभएन । उहाँहरूलाई स्थायी कमिटी सदस्य बनाइएको छ’, खतिवडाले भने । पदाधिकारीमा उनीहरूलाई चयन गरे पनि कार्यविभाजन भएको छैन ।
स्थायी कमिटीमा रामकुमारी झाँक्री, डा. विजय पौडेल, जीवनराम श्रेष्ठ, केशवलाल श्रेष्ठ, हरिप्रसाद पराजुली, नागेन्द्र चौधरी, रामचन्द्र झा, विरोध खतिवडा, कल्याणी खड्का, डा. वंशीधर मिश्र, बलराम बाँस्कोटा, शत्रुधन महतो, श्रीप्रसाद साह, विश्वनाथ प्याकुरेल, साध्यबहादुर भण्डारी, रामचन्द्र यादव र लक्ष्मण पौडेललाई मनोनीत गरिएको हो ।
स्थायी समितिमा चयन भएकामध्ये डा. पौडेल पनि उपाध्यक्षमा पराजित भएका थिए । विरोध खतिवडा पनि उपाध्यक्षमा हारेका थिए । मधेशी उपाध्यक्षमा रामचन्द्र झा हारेका थिए ।
तर, पोलिटब्युरो सदस्यका लागि भएको निर्वाचनमा झाँक्रीसहितका नेताहरू निर्वाचित भएका थिए ।
जिम्मेवारी बाँडफाँटमा चर्काे विवाद
महाधिवेशन सकिएको ५ महिना बितिसकेको छ । पदाधिकारी चयनमा लामो समय बिताएको एकीकृत समाजवादीले नेताहरूको जिम्मेवारी बाँडफाँट अझै गर्न सकेको छैन । उपाध्यक्षहरू धर्मनाथ शाह, प्रकाश ज्वाला, जगन्नाथ खतिवडा, गंगालाल तुलाधर र भानुभक्त जोशीदेखि उपमहासचिव गरिमा शाह, राजेन्द्र राई, मेटमणि चौधरी र रामकुमार भट्टराईले पनि जिम्मेवारी पाएका छैनन् ।
यस्तै, बलदेव चौधरी, गणेश विक, शेरबहादुर कुँवर, चन्द्रबहादुर शाही, सोमप्रसाद पाण्डे, सावित्रा भुसाल र श्रीनाथ बराललगायतका सचिवलाई पनि जिम्मेवारी दिइएको छैन । यी नेताबीच विभागको नेतृत्व लिन हानथाप चलिरहेको छ ।
त्यसमध्ये संगठन विभागमा महासचिव घनश्याम भुसाल, बरिष्ठ नेता बेदुराम भुसाल र बरिष्ठ उपाध्यक्ष राजेन्द्र पाण्डेले दाबी गरेका छन् ।
कार्यविभाजनमा सकस परेपछि समाधानका लागि अध्यक्ष नेपालले आफ्नै नेतृत्वमा ७ सदस्यीय कार्यदल बनाएका छन् ।
यसबीच सम्मानित नेता खनाललाई विदेश विभाग र प्रमेश हमाललाई स्कुल विभाग दिने सहमति जुटिसकेको छ ।
एकीकृत समाजवादीमा पदाधिकारी संख्या २१ र केन्द्रीय समिति सदस्य संख्या २९९ रहने व्यवस्था छ ।
प्रवक्ता खतिवडाका अनुसार स्थायी कमिटी बैठकमा पार्टीका केन्द्रीय सदस्यहरूको कार्यविभाजनको निर्णय आइतबार हुने छ । खतिवडाका अनुसार बैठकमा आगामी कार्ययोजना र सदस्यहरूको कार्यविभाजनबारे छलफल जारी छ । उनले भने, ‘आगामी कार्ययोजनाका सन्दर्भमा वक्ताहरूले, स्थायी कमिटीका सदस्यहरूले बोल्ने क्रम जारी छ ।’
बैठकमा पार्टीको संगठन, आगामी निर्वाचनमा प्रतिस्पर्धा गर्नका लागि तयारी, पार्टीलाई कसरी सुदृढ बनाउने र समग्र राष्ट्रको हितका लागि पार्टीलाई सशक्त बनाउने विषयमा गहिरो छलफल भएको बताइएको छ ।
बैठक आइतबारसम्म जारी रहने छ र कार्यविभाजनको निर्णय सोही दिन टुंग्याइने प्रवक्ता खतिवडाको भनाइ छ ।
स्थायी कमिटी बैठकमा सदस्यहरूले पार्टीका नीतिको प्रचार गर्ने, पार्टीको सुदृढीकरण गर्ने, आगामी निर्वाचनहरूमा शानदार विजय प्राप्त गर्ने र राजनीतिक तथा भूराजनीतिक चुनौतीहरूको सामना गर्नेलगायतका विषयमा धारणा राखेका खतिवडाले जानकारी दिए । अब अध्यक्ष, वरिष्ठ नेताहरू र महासचिवले धारणा राख्न बाँकी छ ।
