संविधानमै नभएको अधिकार प्रयोग गरी प्रधानमन्त्री केपी शर्मा ओलीले विघटन गरेको प्रतिनिधिसभा पुनस्र्थापना पछि मुलुक सामान्य कालमा जाने आम अपेक्षा थियो । तर, निर्वाचन आयोगको अनिर्णयले संकट समाधान हुन सकिरहेको थिएन । संविधान जोगिएकाले ठूलो संवैधानिक संकट भने टरेको थियो । तर, सर्वोच्च अदालतको आइतबारको फैसलाले भने मुलुक थप राजनीतिक संकटतर्फ उन्मुख देखिएको छ । सर्वोच्च अदालतले एमाले र माओवादी केन्द्रको एकता प्रक्रिया नै स्वीकार गरेन । नेपाल कम्युनिष्ट पार्टी (नेकपा) को नाम विवादबारे परेको उजुरीमा अदालतले भने एक स्टेप अगाडि बढेर फैसला गरेको छ । नेकपा नाम ऋषिराम कट्टेलले नै पाउने फैसला सँगै सर्वोच्च अदालतले एमाले र माओवादी केन्द्र बीच भएको एकता पनि भंग गरिदिएको छ । अर्थात्, नेकपाको विवाद फेरि २०७५ जेठ २ गतेको अवस्थामा पुगेको छ ।
ओली संयुक्त सरकारको प्रधानमन्त्री बनेका छन् । दल एकताको मान्यता नपाए पछि अहिलेको सरकार स्वतः संयुक्त सरकार बनेको छ । तर, माओवादी केन्द्रको अध्यक्षका हैसियतले पुष्पकमल दाहाल प्रचण्डले विश्वासको मत फिर्ता लिएमा ओलीको पद धरापमा पर्नेछ । हुन त यसअघि पनि ओलीको पद धरापमै थियो । प्रचण्ड र माधव नेपाल समूहले अविश्वासको प्रस्ताव अगाडि बढाउने तयारीमा थियो । विपक्षी दलहरु नेपाली काँग्रेस र जनता समाजवादी पार्टी (जसपा) पनि ओली सरकारलाई निरन्तरता दिने पक्षमा थिएनन् । तर, अदालतको आदेशले भने राजनीतिक कोर्स नै बदलिएको छ । अब ओली एमालेका अध्यक्ष एवम् संसदीय दलका नेतामा रुपान्तरित भएको छ ।
तर, वास्तविकता भने एमाले र माओवादी केन्द्र बनेर अगाडि बढ्ने स्थिति छैन । किनकि, दुई पार्टी मिलेर बनेको नेकपा समेत विभाजित भइसकेको छ । त्यसमा एमाले दुई चिरा परेको छ । एकातिर ओली र अर्कातिर माधव नेपाल छन् । यस्तो अवस्थामा फेरि एकैठाउँ उभिने आधार कमजोर देखिन्छ । यो संकट संघमा मात्रै नभएर प्रदेश र स्थानीय सरकारमा समेत पर्ने प्रष्ट छ । अतः मुलुक फेरि पनि नयाँ राजनीतिक संकटतर्फ उन्मुख भएको छ । राजनैतिक अस्थिरता बीच नेताहरु बीचको तिक्तता चर्केर जाने संकेत पनि प्रष्ट देखिन्छ । यस्तो राजनैतिक संकट सामुन्ने नेताहरुले चाल्ने कदम र अपनाउने सचेततामै आगामी मार्गचित्र निर्भर हुने देखिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies