सुशीला रेग्मी/मध्यान्ह
रामपुर (पाल्पा) : तरकारी खेतीबाटै प्रसिद्धी कमाएका पाल्पा रामपुर नगरपालिका वडा नं ४ बस्ने दिलबहादुर थापा र लालबहादुर थापालाई यतिबेला तरकारी बिक्रि गर्न भ्याइनभ्याइ छ । करिब दश रोपनी जग्गामा लगाइएको काक्रा, गोलभेँडा, करेला लगायतका तरकारीको अहिले उत्पादन भइरहेको छ ।
थापा दाजुभाइले विगत तीन वर्ष अगाडि वैदेशिक रोजगारबाट गाउँ फर्केर हाम्रो आधुनिक कृषि फार्म दर्ता गरी तरकारी खेती शुरु गरेका छन् । हाल दैनिक एक क्विइन्टलसम्म काक्रा बजारमा खपत भएको छ भने अन्य तरकारी कम्तीमा ३० किलोसम्म बारीबाटै दैनिक बिक्रि भइरहेको छ ।
रामपुर नगरपालिकाका उपप्रमुखसहितको टोलीले युवाले गरेको व्यवसायलाई थप हौसला बढाउन अनुगमन गरेको छ । नगरपालिकाका उपप्रमुख विष्णुदेवी घिमिरे आचार्य, प्रमुख प्रशासकिय अधिकृत हरिराम नागिला, कृषि शाखा प्रमुख रामहरी पाण्डेय, प्राविधिक प्रज्वल केसी, पत्रकार लगायतको टोलीले कृषि फार्मको अनुगमन गरेको हो ।
फार्म सञ्चालक दिलबहादुर थापाले आफुले गरेको व्यवसायको बारेमा अनुगमन टोलीलाई जानकारी गराउँदै बजारमा तरकारीको माग धेरै भएको तर माग अनुसार पुर्याउन नसकिएको बताए ।
‘अहिले बाहिरबाट पनि तरकारी आउन कम रहेको अवस्थामा व्यापारी, ग्राहकबाट तरकारीको माग धेरै आएको छ, उत्पादन हामी संग कम हुँदा माग अनुसार पुर्याउनै सकिएको छैन, कतिपय त बारीमा हेरेर चित्त बुझाएर मात्र पनि फर्कनुहुन्छ’ थापाले भने ।
रामपुरमै नमुनाका रुपमा वैदेशिक रोजगारबाट फर्केर युवाले शुरु गरेको व्यवसाय अत्यन्तै राम्रो रहेको बताउँदै कृषि गर्न चाहने युवालाई नगरपालिकाले अनुदान कार्यक्रम सहयोग गरिरहेको नगर उपप्रमुख विष्णुदेवी घिमिरे आचार्यले बताइन् ।
नगरपालिकाका प्रमुख प्रशासकिय अधिकृत हरिराम नागिलाले कृषि उत्पादनमा युवाहरुले गरेको मेहनतको कदर गर्दै कृषि उत्पादनलाई जोड दिन सकियो भने आर्थिक क्षेत्रमा बलियो हुने बताए ।
कृषि शाखा प्रमुख रामहरी पाण्डेयले पछिल्लो समय रामपुर नगरपालिका भित्र कृषि व्यवसायमा कृषकको आकर्षण बढेको बताउँदै युवालाई स्वरोजगार, कोभिड विशेष कार्यक्रम, कृषि यान्त्रिकरण अनुदान लगायतका विभिन्न कार्यक्रम रामपुरमा संचालन भइरहेको बताए ।
तीन वर्ष अघि पत्थरीलो जग्गालाई सदुपयोग गर्दै वैदेशिक रोजगारबाट गाउँ फर्केका दुई युवाद्धारा तरकारी खेती शुरु गरिएको हो । तरकारी व्यवसाय फस्टाउँदै गएपछि अहिले सयपत्री फूल खेती पनि शुरु गरिएको छ । जग्गा र पानीको अभावमा सोचे अनुसार व्यवसाय विस्तार गर्न नसकिएको अर्का सञ्चालक लालबहादुर थापा बताउँछन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies