मुलुक कोरोना महामारीबाट प्रताडित छ । कोरोना संक्रमणबाट हालसम्म नेपालमा आठ हजार २३८ जनाको मृत्यु भइसकेको छ । दोस्रो लहरको महामारीबाट मात्रै पाँच हजार हाराहारीमा मानिसको मृत्यु भएको छ । दुई महिनाको अवधिमा पाँच हजार हाराहारीमा मानिसको ज्यान जानु राष्ट्रिय शोकको विषय हो । अहिले राज्यको सम्पूर्ण ध्यान महामारी रोकथाममा जानुपर्ने हो । तर सरकारको ध्यान भने अन्यत्रै छ । दोस्रो चरणको महामारी शुरू भएपछि नै प्रधानमन्त्री केपी शर्मा ओलीले प्रतिनिधिसभा विघटन गरेका छन् । सत्तारुढ नेकपा एमालेको कलह उत्कर्षमा पुगेकै कारण प्रधानमन्त्री ओलीले दोस्रो पटक संसद् भंग गर्ने निर्णय लिएका हुन् । यो मुद्दा अहिले सर्वोच्च अदालतमा विचाराधीन छ ।
गएको ५ पुसमा पनि प्रधानमन्त्री केपी शर्मा ओलीले असंवैधानिक कदम चाल्दै संसद् भंग गरेका थिए । फेरि पनि तिनै नियति दोहोर्याएका छन् । राजनीतिक वृत्तको ध्यान यतिबेला भंग भएको संसद् पुनस्र्थापना हुन्छ वा हुन्न भन्नेमा केन्द्रीत छ । प्रतिनिधिसभा मात्रै नभएर राजनीतिक संकट प्रदेशसभा र राष्ट्रियसभामा पनि देखिएको छ । बागमती र लुम्बिनी प्रदेशमा राष्ट्रियसभाको उपनिर्वाचन सकिएको छ । कर्णाली र सुदूरपश्चिम प्रदेशको सरकार जोगिएको घटना नसेलाउँदै बिहीबार सर्वोच्च अदालतले मुलुकको ध्यान तान्नेगरी तीन आदेश दिएको छ । कर्णालीमा फ्लोर क्रस गर्ने एमालेका चार सांसदको पुनर्बहाली, नागरिक अध्यादेश कार्यान्वयन नगर्न र नेकपा एमालेको दशौं महाधिवेशन आयोजक कमिटीलाई चिन्न सकिदैन ।
यो आदेश अर्थपूर्ण मात्रै छैन, राष्ट्रिय राजनीतिको पूरा ध्यान तान्ने प्रकृतिको छ । किनभने एमालेको विवाद नवौं महाधिवेशन कि दशौं महाधिवेशन मान्ने भन्नेमा केन्द्रीत छ । पार्टीको विवाद चर्किदा फ्लोर क्रस गर्ने र कारबाही गर्ने शृङ्खला चलेको छ भने प्रधानमन्त्री ओलीले आफ्नो सत्ता जोगाउन नागरिक सम्बन्धी अध्यादेश ल्याएका थिए । अर्थात् फेरि पनि मुलुक अर्को राजनीतिक बहस तर्फ उन्मुख देखिन्छ । यी तीन वटै आदेशले फेरि अर्को राजनीतिक कोर्स तय हुनेछ । अझ संसद् भंग गर्ने अदालतको फैसला आउनै बाँकी छ । अन्तरिम आदेश नदिइएको संसद् भंग सम्बन्धी रिटको ९ असारदेखि लगातार सुनुवाइ हुँदैछ । अर्थात् एकपछि अर्को कदम ओलीले चाल्ने र त्यसले मुलुकमा संकट थप्दै गरेका बेला अदालतको आदेशले तरंगित बनाएको छ । सांराशमा भने मुलुकको ध्यान महामारी नियन्त्रणमा जाने भन्दा पनि राजनैतिक र संवैधानिक संकटको चिन्तातिर तानिएको छ । जुन सामान्यतयाः अपेक्षा समेत गर्न सकिदैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies