काठमाडौंः वारागुङ मुक्तिक्षेत्रको सेताम्मे हिउँले ढाकिएको मुक्तिनाथ क्षेत्रमा हिउँमा खेलिने स्की प्रतियोगिताको रौनक सुरु भएको छ । नेपाल स्की सङ्घको आयोजनामा पाँचौँ राष्ट्रिय स्की प्रतियोगिता सञ्चालन हुने भएको हो । स्की खेलको विकास, प्रवर्धन तथा हिमाली पर्यटन प्रवर्धन गर्ने उद्देश्यले नेपाल स्की सङ्घले सन् २०१६ देखि राष्ट्रिय स्तरको स्की प्रतियोगिता आयोजना गर्दै आएको छ ।

पहिलो संस्करण रसुवाको क्यान्जेन भ्यालीमा भएको थियो भने त्यसपछिका संस्करणहरू मुस्ताङको मुक्तिनाथ क्षेत्रमै सम्पन्न हुँदै आएका छन् । यसअघि सन् २०१९, २०२० र २०२२ मा मुक्तिनाथमा सफलतापूर्वक प्रतियोगिता भएका थिए । मौसमको अवस्था हेरेर अन्तिम तालिका तय गरिने बताइएको छ ।  यस पटकको प्रतियोगितामा १४ पुरुष र १० महिला खेलाडी सहभागी हुनेछन् । मुस्ताङबाट नेपाली सेनाका केही खेलाडी पनि सहभागी हुने आयोजकले जनाएका छन् ।

सिनियर प्रशिक्षक स्वराज श्रेष्ठ, सहायक प्रशिक्षकहरू दिनेश बोहरा, समिप लामिछाने, लक्ष्मी राई, आयुसी महर्जन तथा शारीरिक प्रशिक्षक विमान्थ अधिकारीले खेलाडीहरूलाई तालिम दिनेछन् । प्रतियोगितामा अल्पाइन स्कीअन्तर्गत स्लालोम र जायन्ट स्लालोम विधा समावेश गरिएको छ । विजेतालाई स्वर्ण, रजत तथा कास्य पदकसहित पुरस्कृत गरिनेछ ।

सन् २०२२ पछि आयोजना हुन नसकेको यो प्रतियोगिता यस वर्ष मुक्तिनाथ क्षेत्रमा चार पटक हिमपात भएपछि सम्भव भएको हो । नेपालमा कृत्रिम हिउँको अभावमा प्राकृतिक हिउँ परेको मौसममा मात्र स्की प्रतियोगिता सञ्चालन गर्न सकिने सङ्घले जनाएको छ । प्रशिक्षक श्रेष्ठले अहिलेको अभ्यासबाटै ओलम्पिक लगायतका स्की प्रतियोगितामा सहजता आउने बताए ।

त्यस्तै नेपाल स्की संघका सदस्य अर्जुन महर्जनले सडकहरु राम्रो भए स्कीको प्रशिक्षणमा प्रशिक्षार्थीहरु लैजान सहज हुने बताए । मुक्तिनाथ क्षेत्रमा स्की खेलको रौनक सुरु भएसँगै पर्यटक तथा स्थानीयवासीमा उत्साह छाएको छ । यसले बेमौसम पर्यटन प्रवर्धन गरी हिउँदयामको पर्यटन घाटा कम गर्न मद्दत पुग्ने अपेक्षा गरिएको छ । सरोकारवालाहरूले यस्ता शाहसिक खेललाई राज्यबाट उच्च प्राथमिकता दिनुपर्नेमा जोड दिएका छन् ।