झण्डै एक हजार बढी गीतमा संगीत दिइसकेका र दर्जन बढी बहुचर्चित गीतहरुमा संगीत भरेका संगीतकार दिपक शर्माको सांगीतिक क्षेत्रमा आफ्नै उचाई बनिसकेको छ । अहिलेका व्यस्त संगीतकार मध्येका उनले वि.स. २०६१ सालबाट औपचारिकरुपमा सांगीतिक यात्रा शुरु गरेका हुन् । श्रुती संगीत विद्यालयबाट संगीत गुरु नरहरी प्रेमिसँग संगीत शिक्षा शुरु गरेका उनले त्यसपछि राम सिटौला, गुरुदेव कामदलगायतका गुरुहरुबाट पनि धेरै कुराहरु सिक्ने मौका पाए । अम्बर गुरुङका सुपुत्र किशोर गुरुङ, राजकुमार मालाकर गुरुबाट उनले वेष्टर्न म्युजिक सम्बन्धी धेरै ज्ञान हासिल गरेका उनी कहिले पनि संगीत सिकेर नसकिने अथाह भण्डार हो भन्छन् । दर्जनौं अवार्ड र सम्मानबाट सम्मानित संगीतकार दिपक शर्मासँग उनको सांगीतिक यात्राका बारेमा मध्यान्ह दैनिकका लागि सुमन कुमार श्रेष्ठले गरेको संक्षिप्त कुराकानीको सम्पादित अंश :
शुरुशुरुका दिनमा के कसरी संघर्ष गर्नुभयो ? संगीतको शुरुवात कसरी भयो ?
म यही क्षेत्रमै लाग्छु भनेर काठमाडौंमा प्रवेश गरेको हुँ । शुरुशुरुका दिनहरुमा संगीत सिकेरै केही गरुँ भनेर संगीत सिकें । त्यसपछि विस्तारै आफ्नो सिर्जनाहरु सुनाउँदै जाने क्रममा धेरै जनासँग ठोक्किएँ । केहीले मैले गरेका गीत संगीतहरु ठिकै भएको सुनाए, केहीले सचौंला भन्ने कुरासम्मका आश्वासन पनि दिए । त्यसपछि मैले लोक, लोकदोहोरी, लोक पप, आधुनिक, आधुनिक पप, मिक्स, पिल्मी लगायतका थुप्रै थरिका गीतहरुमा आफ्नो संगीत भर्दै गएँ । मैले पहिलो पटक ‘ढल्के पिपल’ भन्ने लोक दोहोरी एल्बम निकालेको थिएँ, साथी भाइइहरुसँग मिलेर बजारमा ल्याएको थिएँ । फाट्टफुट्ट गीत गर्दै जाने क्रममा तेजाब भन्ने पहिलो फिल्म २०६३ तिर गरें, त्यस्तै तहल्का डटकममा संगीतकारको रुपमा काम गरें । लगभग त्यही साल तिर श्रुती संगीत विद्यालयमै कर्मचारीको रुपमा कार्यरत पनि भएँ । बीचबीचमा आधुनिक गीतहरु लगायतमा पनि काम गरें । आफ्नो जीवन यापन सहज गर्न, आफ्नो समस्याहरु टार्न पनि अरु पार्टटाइमा काम पनि गरें । काम गर्दै जाने क्रममा २०६७–२०६८ तिर मैले ‘सम्झी राख है’ फिल्ममा काम गर्ने अर्काे अवसर पाएँ । यसअघि गरेका सबै कामहरु सुपर डब्बा हुन् । तर यस फिल्ममा मेरो संगीतमा बनेको ‘आँधी खोला उर्लेर’ भन्ने गीतबाट भने चाहिँ दुई वटा अवार्ड जित्न सफल भएँ । र, त्यो नै मेरो जीवनको पहिलो अवार्ड पनि हो । मलाई आफ्नो बनाएर, जिन्दगीको सवाल, रुँदै हिँड्छौं लगायत आधुनिक गीतहरुबाट पनि राम्रै सफलता हासिल गरे । छुट्टिएर तिमीसँग भन्ने प्रमोद खरेलले गाएको आधुनिक गीतले राम्रो चर्चा हासिल ग¥यो । त्यही समयमा माया बस्यो भन्ने गीतबाट गायक र मैले लोक पप अवार्ड पनि पाएका थियौं । दयाराम दाहालको दबाब भन्ने चलचित्रमा पनि काम गर्ने अवसर पाएँ । सोही क्रममा २०६७–२०६८ तिर छविराज ओझाको ब्यानरमा सुन्तली हावाल्दारमा संगीतकारको रुपमा काम गर्ने अवसर पाएँ । डोला डोला हातमा, चि मुसी चि, गीतको बोलबाट राम्रो ब्यानरमा काम गर्ने अवसर पाएपछि अरुले पनि सोध्थे, विश्वास गर्नेसम्म वातावरण बन्यो । डोला डोला हातमा भन्ने गीत एकदम राम्रो भयो र चर्चाको शिखर चुम्न सफल पनि भयो । यही क्रममा कयौँ गीतहरु बजारमा ल्याइसकेपछि त्यसमध्येका केही गीतहरुले भने केही चर्चा कमाउन सफल भए ।
एउटा संगीतकारलाई ब्यानरको महत्व कत्तिको हुन्छ ?
राम्रो ब्यानरको अति महत्व हुन्छ । शुरु शुरुका दिनमा हार्माेनियम बोकेर डाइरेक्टर, प्रड्युसरको घरघर र स्टुडियोमा गएर गीत सुनाएको छु । त्यहाँ हाम्रो फिल्मसँग गीत नै म्याच भएन, ठिकै छ सम्झिउला नि, त्यसपछि उहाँहरुको ठीक छ नि पछि कुरा गरौंला नि भन्ने प्रतिउत्तर आउँथ्यो । कृष्ण काफ्ले र म भएर ‘छक्का पञ्जा’को लागि गीत बनाउने अवसर पाएँ । दिपकराज गिरी, दिपा श्री निरौला एकदिन मेरो अफिस आउनुभयो । मैले धेरै समय अघिदेखि उहाँहरुलाई मेरो अफिस आउनुहोस् भनेर आग्रह गरेको थिएँ । संयोगवश त्यो दिन उहाँहरु अचानक अउँदा निकै खुशी थिएँ । गीतहरु सुन्नुहोस् भन्दा मैले लगभग त्यो बेला १२, १३ वटा गीतहरु सुनाएँ, त्यसपछि अरु केही छ भनेर सुनाउँदा ‘देखन चम्पा’ भन्ने गीत सुनाएँ । जसलाई उहाँहरुले एकदमै मन पराउनु भयो । तर हामीले त्यो गीत कुनै फिल्मको कथासँग मिल्छ भन्ने सोचेकै थिएनौं । न त कुनै फिल्मको लागि भनेर सोचेका थियौं । तर संयोगवश त्यो फिल्मको कथावस्तुसँग मिल्यो । गीत सफल भयो र सँगै मलाई पनि व्यस्त बनायो । त्यसैले ब्यानरले ठुलो प्रभाव पर्छ ।
तपाईंको पहिलो सुपरहिट गीत चाहिँ कुन हो नि ?
छविराज ओझाकै ब्यानरमा बनेको मंगलम् चलचित्रको पर्ख पर्ख मायालु भन्ने गीत नै पहिलो फिल्मी सुपरहिट गीत हो । छक्का पञ्जाको देखन चम्पा पनि सुपरहिट गीत नै हो । तर पर्ख पर्ख मायालुले अझ धेरै राम्रा प्रतिक्रिया पायो । पिरिम नलाउने भन्ने गीत भने युट्युब ट्रेन्डिङमा आयो । दर्शक श्रोताले पनि अत्याधिक रुचाउनु भयो त्यो गीतलाई ।
यही क्षेत्रमा लाग्छु भन्ने कसरी भयो ?
म सानैदेखि साहित्य कलामा रुची राख्थें । सानोमा स्कुलमा ४, ५ कक्षा पढ्दा साहित्यिक कल्बमा थिएँ । त्यहाँ हाम्रो सानो तिनो कम्पिटिसन हुन्थ्यो, त्यसमा आफैंले कविता लेख्ने गीत लेख्ने प्रतियोगिता हुन्थ्यो । आफ्नै शब्दमा गीतहरु बनाउँथे र पहिलो पनि हुन्थें । यस्तो गर्दा गर्दै मैले संगीतमा लाग्नु पर्छ भन्दै आफ्नो एसएलसी परीक्षा सकेर काठमाडौं प्रवेश गरें र औपचारिक संगीत शिक्षा सिकें । अहिले त्यही बेलादेखिको यात्रा निरन्तर गरिरिरहेको छु ।
तपाईंको प्रेरणाको श्रोत को हुनुहुन्छ ?
मेरो प्रेरणाको श्रोत भनेको मैले गरेको संघर्ष हो । संघर्षका क्रममा जे भोगें, जसलाई भेटें, जसले मलाई आज यो ठाउँसम्म पुग्न सहयोग गर्नुभयो जो जति पनि हुनुहुन्छ मेरो घरपरिवार, साथीभाइ, आफन्त, मेरो गुरु, निर्देशक, यस क्षेत्रका सम्पूर्ण आदणीय र मलाई माया गर्ने व्यक्तित्व, दर्शक श्रोता, तपाईंहरु जस्तै सञ्चारकर्मी सबै मेरा लागि प्रेरणाका श्रोत हुनुहुन्छ ।
तपाईंको पहिलो हिट भएको फिल्मी गीत कुन हो ?
अहिलेसम्म मैले हजारभन्दा बढी गीतहरुमा संगीत दिइसकें । मैले शुरुशुरुमा संगीत दिएको फिल्ममध्येमा हिट गीत भन्दा पनि दर्शक श्रोताको मन मस्तिस्कमा बस्न सफल गीत भनेको चाहिँ फिल्मको गीत हो ।
अहिलेको र आज भन्दा २० वर्ष अगाडिको समयको संगीतमा के फरक पाउनुभयो ?
गीत संगीत सुन्ने श्रोता बढाएका छौं । काम धेरै हुन्थ्यो तर त्यो बेला जुन गीतमा एउटा बहाव हुन्थ्यो हाम्रो मानस पटलमा झ्यापै बस्ने गीत बन्थ्यो । तर अहिलेका गीत संगीतहरु त्यस्तो छैन । पहिला थोरै गीत बन्थे तर राम्रो गीत बन्थे, अहिले धेरै बन्छन् तर आउने जानेमात्र हुन्छ । स्वर सम्राट नारायण गोपालज्यूले जिन्दगीमा तीन सय वटा गीत गाउनुभएको छैन होला तर अहिले एक वर्षमै तीनसय वटा गीत गाउँछन् । तर पहिलाको कलाकारको मिहिनेत लगनशिलता भने अहिलेको पिँढिमा कमै छ ।
संगीतमा आउने अबका पिँढिलाई के भन्न चाहनुहुन्छ ?
गीत संगीतमा आउनु भन्दा अगाडि सोच्नुहोस् । तपाईंले यो क्षेत्रमा आउनको लागि आफैंमा के के छ त्यो हेर्नुहोस्, कमाउँछु भन्ने उद्देश्यले होइन, इमान्दारितापूर्वक आउनुहोस् अनि भविष्यमा कमाउने त छदैँछ नि । नआउनुस् नै पनि म भन्दिनँ, तर यो क्षेत्रमा आउनका लागि धेरै कुरा सोचेर मात्र आउनुहोस्, यो क्षेत्रले त्यस्तै व्यक्तिलाई अझै पनि कुरिरहेको छ ।
अन्तिममा के भन्न चाहनुहुन्छ ?
अन्त्यमा मलाई माया गर्ने सम्पूर्णलाई मेरो काम र मलाई यस्तै माया आशिर्वाद र साथ प्रदान गरिदिनुहोला, सम्पूर्णमा आभार व्यक्त गर्न चाहन्छु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies