काठमाडौँ : असन क्षेत्रको सांस्कृतिक र व्यापारिक मौलिकता संरक्षणका लागि हरेक शनिबार यस क्षेत्रमा सवारी साधनको प्रवेश रोक्ने निर्णय कार्यान्वयन हुने भएको छ। कार्यक्रम २०८३ वैशाख ५ गतेदेखि सुरु गरिने व्यवस्था तय गरिएको छ ।

पूर्वनिर्धारित योजना अनुसार कार्यक्रम चैत २८ गतेबाट सञ्चालन गर्ने तयारी थियो। तर काठमाडौँ महानगरपालिकाका कार्यवाहक प्रमुख सुनिता डंगोलको नेतृत्वमा भएको बैठकले तयारीमा थप समय आवश्यक ठानेर कार्यक्रम एक हप्ता ढिलो गरी वैशाख ५ गतेदेखि लागु गर्ने निर्णय गरेको हो। बैठकमा प्रमुख प्रशासकीय अधिकृत सरोज गुरागाईँ, वडा नं. २७ का वडाध्यक्ष योगेश खड्गी, प्रशासन विभागका प्रमुख महेश काफ्ले, सरोकारवाला कार्यालयका प्रतिनिधि, स्थानीय संघसंस्था, क्लब तथा समुदायका सदस्यहरू सहभागी थिए ।

कार्यक्रमको प्राथमिक उद्देश्य स्थानीय आवागमन सहज राख्दै सुरक्षा सुनिश्चित गर्नु र असन बजारको मौलिकता संरक्षण गर्नु रहेको प्रमुख वडाध्यक्ष खड्गीले बताए ।

सुरक्षा व्यवस्थापन र यातायात प्रबन्ध बलियो बनाउने जिम्मेवारी काठमाडौँ उपत्यका प्रहरी कार्यालय, उपत्यका ट्राफिक प्रहरी कार्यालय र महानगर प्रहरी बलका वरिष्ठ अधिकारीहरूले लिएका छन् ।

‘भेहिकल-फ्री असन’ कार्यक्रम अन्तर्गत वडा नं. २७ को कमलाक्षी चोकदेखि असन, भोटाहिटी चोकदेखि असन र महाबौद्धबाट असनसम्मको मार्ग हरेक शनिबार सवारी साधनको लागि बन्द हुनेछन् । यस क्षेत्रबाट गन्तव्य तर्फ जाने सवारी साधनलाई वैकल्पिक मार्ग उपलब्ध गराइने व्यवस्था गरिएको छ ।

कार्यक्रमको लक्ष्य असन क्षेत्रलाई सम्पदा मार्गको रूपमा विकास गर्नु, स्थानीय परम्परागत व्यापार प्रवर्धन गर्नु र सामाजिक तथा सांस्कृतिक गतिविधि सञ्चालन गर्नु रहेको छ । व्यवस्थापन र सुरक्षा निगरानीका जिम्मेवारी महानगर प्रहरी बललाई प्रदान गरिएको छ ।