काठमाडौँ : नेपाली कांग्रेसका महामन्त्री प्रदीप पौडेलले पार्टीभित्रका विवादलाई अदालतमार्फत होइन, महाधिवेशन प्रक्रियामार्फत समाधान गर्न आग्रह गरेका छन् ।

निर्वाचन समीक्षा कार्यक्रमका क्रममा दाङमा बोल्दै उनले महाधिवेशनको तयारीमा केन्द्रित हुन पूर्वसंस्थापन पक्षधरलाई आह्वान गरेका छन् । उनले भनेका छन्, ‘यो समय मुद्दा मामिलाको हैन, महाधिवेशनको हो । 

महाधिवेशनको मिति घोषणा भएर प्रक्रिया नै अघि बढिसकेको अवस्थामा यसमा सहभागी भएर आफ्नो विषय राख्नुमै सबैको हित छ । म साथीहरूलाई अदालततिर मुद्दा मामिला हैन महाधिवेशनमै ध्यान केन्द्रित गर्न आग्रह गर्छु ।’

महाधिवेशनलाई पार्टीभित्रका असन्तुष्टि तथा मतभेद समाधान गर्ने प्रमुख माध्यमका रूपमा प्रस्तुत गर्दै उनले सबै पक्षलाई प्रक्रियामा सहभागी हुन आग्रह गरेका छन् । आन्तरिक बहस र असन्तोषलाई संस्थागत प्रक्रियाभित्रै सम्बोधन गर्नुपर्ने उनको भनाइ छ ।

महाधिवेशन प्रक्रिया अघि बढिसकेको सन्दर्भमा यसले पार्टी संगठनमा नयाँ ऊर्जा र दिशा दिने अपेक्षा गरिएको उनले बताएका छन् ।