काठमाडौं : जब खेलको तेस्रो मिनेटमै इक्वेडरका भेट्रान स्ट्राइकर एनेर भ्यालेन्सिया कुरासाओको रक्षापंक्ति चिर्दै गोलकिपरसँग ‘वान–अन–वान’को स्थितिमा पुगे, रंगशालामा उपस्थित ६८ हजारभन्दा बढी दर्शकले नतिजाको अनुमान लगाइसकेका थिए । अघिल्लो खेलमा जर्मनीसँग ७–१ को लज्जास्पद हार व्यहोरेको कुरासाओका लागि यो अर्को एउटा खराब रातको सुरुवातजस्तै देखिएको थियो ।

तर, ३७ वर्षीय गोलकिपर एलोय रुमको मनसाय अर्कै थियो । उनले भ्यालेन्सियाको प्रहारलाई अविश्वासिलो ढंगले बचाउँदै खेलको लय मात्र बदलेनन्, विश्वकपको इतिहासमै आफ्नो नाम स्वर्ण अक्षरले लेख्न सफल भए । कान्सास सिटीको एरोहेड स्टेडियममा शनिबार राति भएको उक्त गोलरहित बराबरीसँगै विश्वकपमा पहिलोपटक सहभागी भएको सानो क्यारिबियन राष्ट्र कुरासाओले आफ्नो पहिलो ऐतिहासिक अंक जोडेको छ ।

कीर्तिमानी १५ बचाउ

कुरासाओको यो ऐतिहासिक सफलताका मुख्य नायक एलोय रुमले खेलभरि १५ वटा बचाउ गरे । सन् १९६६मा रेकर्ड राख्न थालिएदेखि यता, अतिरिक्त समय नभएको ९० मिनेटको विश्वकप खेलमा कुनै पनि गोलकिपरले गरेको यो सबैभन्दा धेरै बचाउ हो । उनले सन् २०१४मा बेल्जियमविरुद्ध अमेरिकाका टिम हावर्डले राखेको १५ बचाउको कीर्तिमानलाई बराबरी गरे, तर हावर्डले अतिरिक्त समयमा गोल खाएका थिए भने रुमले आफ्नो पोस्टलाई ‘क्लिन सिट’ राख्न सफल भए ।

इक्वेडरले खेलभरि २८ पटक प्रहार गरेको थियो, जसमध्ये १५ वटा प्रहार पोस्टको दिशामा थिए । तर, रुम कुनै अभेद्य पर्खालजस्तै उभिए । उनको यो प्रदर्शनपछि बिबिसीका खेल विशेषज्ञ मार्टिन केओनले ठट्टा गर्दै भने, ‘उनका बचाउहरू गन्नका लागि क्याल्कुलेटर नै चाहिन्छ जस्तो देखियो ।’

करिब डेढ लाख मात्र जनसंख्या भएको कुरासाओ विश्वकपमा छनोट हुने इतिहासकै सबैभन्दा सानो राष्ट्र हो । नेदरल्यान्ड्सको स्वशासित क्षेत्र रहेको यस टापु राष्ट्रको समर्थनका लागि डच राजा विलेम–अलेक्जेन्डर र रानी म्याक्सिमा समेत रंगशालामा उपस्थित थिए ।

अनुभवी डच प्रशिक्षक डिक एड्भोकाटको नेतृत्वमा रहेको यस टोलीका २६ मध्ये २५ खेलाडी नेदरल्यान्ड्समै जन्मिएका हुन् । रुम स्वयं पनि डच क्लब पिएसभी आइन्डहोभनका पूर्वखेलाडी हुन् र हाल अमेरिकी दोस्रो डिभिजनको क्लब मायमी एफसीबाट व्यावसायिक फुटबल खेल्छन् । खेलपछि प्रतिक्रिया दिँदै रुमले ठट्टा गरे, ‘यो प्रदर्शनपछि कुरासाओमा मेरो सालिक नै बन्नुपर्छ ।’

रुमका अनुसार उनको यो लोभलाग्दो ‘रिफ्लेक्स’को श्रेय फुटबलबाहेक ‘पाडेल’ (एक प्रकारको र्‍याकेट खेल)लाई पनि जान्छ । उनी नियमित रूपमा पाडेल खेल्छन्, जसले गर्दा मैदानमा छिटो प्रतिक्रिया दिन मद्दत पुग्ने उनको विश्वास छ । इक्वेडरका गोन्जालो प्लाटाको हेडर होस् वा भ्यालेन्सियाका दर्जनौं प्रहार, रुमले प्रत्येकपटक असम्भव मानिएका बचाउहरू गरे ।

इक्वेडर, जो फिफा वरीयतामा कुरासाओभन्दा ५० स्थानमाथि छ, खेलको अन्त्यतिर निकै हतास देखिएको थियो । खेल सकिएपछि कुरासाओका खेलाडीहरूले रुमलाई घेरेर खुसियाली मनाएका थिए, जुन दृश्य कुनै उपाधि जितेको भन्दा कम थिएन ।

यो बराबरीसँगै समूह ‘ई’मा जर्मनी नकआउट चरणमा पुगेको छ । अब कुरासाओले आफ्नो अन्तिम खेलमा आइभोरी कोस्टको सामना गर्नेछ । यदि उक्त खेलमा कुरासाओले अर्को अप्रत्याशित जित निकाल्न सकेमा उनीहरू विश्वकपको अन्तिम ३२मा पुगेर अर्को नयाँ इतिहास रच्ने सम्भावना जीवितै छ ।