काठमाडौं : फिफा विश्वकप २०२६ अन्तिम चरणमा प्रवेश गरेको छ, जहाँ पहिलो सेमिफाइनलमा युरोपेली फुटबलका दुई महारथी टोलीहरू फ्रान्स र स्पेन आमनेसामने हुँदैछन् । टेक्सासको डलासस्थित डलास स्टेडियममा हुने यो खेललाई विश्वभरका फुटबल प्रेमीहरूले यस महिनाकै सबैभन्दा प्रतीक्षित भिडन्तको रूपमा हेरिरहेका छन् ।

युरोपका दुई उच्च वरीयता प्राप्त टोलीहरूबीचको यो प्रतिस्पर्धा केवल एउटा खेल मात्र नभई विश्व फुटबलकै सबैभन्दा चर्चित र तीव्र प्रतिद्वन्द्वितामध्ये एक हो ।

यस खेलको मुख्य आकर्षण फ्रान्सेली कप्तान किलियन एम्बाप्पे र स्पेनका उदीयमान स्टार लामिन यामलबीचको भिडन्त हुनेछ । यी दुई खेलाडीले स्पेनिस ला लिगाको ‘एल क्लासिको’मा रियल मड्रिड र बार्सिलोनाका लागि खेल्दा एक–अर्काको सामना गरिसकेका छन् । तर यस पटक मञ्च धेरै ठुलो छ र पुरस्कार पनि ऐतिहासिक छ– विश्वकपको फाइनलमा स्थान ।

एम्बाप्पे हाल ८ गोल र ३ असिस्टका साथ गोल्डेन बुटको दौडमा सबैभन्दा अगाडि छन् । अर्कोतर्फ, १७ वर्षीय यामलले आफ्नो पूर्ण लय समात्न बाँकी भए पनि उनले गत वर्षको नेसन्स लिगको सेमिफाइनलमा फ्रान्स विरुद्ध दुई गोल गर्दै आफ्नो टोलीलाई ५–४ को सनसनीपूर्ण जित दिलाएका थिए ।

अहिलेसम्म फ्रान्स र स्पेनबीच कुल ३८ पटक प्रतिस्पर्धा भएको छ । जसमा स्पेनको इतिहास केही बलियो देखिएको छ । स्पेनले १८ खेल जितेको छ भने फ्रान्सले १३ खेलमा जित हासिल गरेको छ । सातवटा खेल भने बराबरीमा टुंगिएका छन् ।

यद्यपि, विश्वकपको इतिहासमा यी दुई टोली एक पटक मात्र भिडेका छन् । सन् २००६ को विश्वकपमा भएको उक्त खेलमा फ्रान्सले स्पेनलाई ३–१ ले पराजित गरेको थियो, जसमा जिनेदिन जिदान र प्याट्रिक भिएरा जस्ता दिग्गज खेलाडीले गोल गरेका थिए ।

फ्रान्सको सबैभन्दा ठुलो शक्ति उसको आक्रामक पंक्ति हो । एम्बाप्पेसँगै ओस्मान डेम्बेले र माइकल ओलिसजस्ता खेलाडीहरूले विपक्षी रक्षापंक्तिलाई ध्वस्त पार्ने क्षमता राख्छन् । समूह चरणमा केही रक्षात्मक कमजोरी देखिए पनि नकआउट चरणका तीनवटै खेलमा फ्रान्सले कुनै गोल खाएको छैन ।

स्पेनको यो प्रतियोगितामा सबैभन्दा बलियो पक्ष उसको मजबुत रक्षापंक्ति हो । स्पेनले अहिलेसम्मका पाँच खेलमा मात्र एक गोल खाएको छ । यद्यपि, आक्रमणमा भने स्पेन केही सुस्त र सिर्जनशीलताको कमी देखिएको छ, जहाँ उनीहरूले अन्तिम समयमा गोल गरेर खेल जित्नुपरेको अवस्था छ ।

अप्टाको सुपर कम्प्युटरका अनुसार यो खेलमा फ्रान्सको जित्ने सम्भावना ४२.१ प्रतिशत रहेको छ भने स्पेनको ३१.८ प्रतिशत छ । खेल निर्धारित समयमा बराबरी भएमा अतिरिक्त समय खेलाइनेछ र त्यहाँ पनि नतिजा ननिस्किए पेनाल्टी सुटआउटबाट विजेताको फैसला हुनेछ । विजेता टोलीले विश्वकपको उपाधिका लागि फाइनलको यात्रा तय गर्नेछ ।