काठमाडौं : इजरायलमा दीर्घकालीन स्याहारसुसार केन्द्रमा काम गर्न निकट भविष्यमा ८ सय ३६ जना नेपाली जाने भएका छन् ।

इजरायलको जनसंख्या तथा अध्यागमन प्राधिकरणले बिहीबार नेपालका लागि इजरायलका राजदूत श्मुलिक एरिबास, वैदेशिक रोजगार विभागका प्रतिनिधि तथा सञ्चारमाध्यमका प्रतिनिधिको उपस्थितिमा पहिलो चरणमा इजरायल जाने कामदारलाई श्रव्यदृश्य माध्यमबाट चिट्ठा प्रणालीमार्फत छनोट गरेको हो ।

काठमाडौंस्थित इजरायली दूतावासले जारी गरेको प्रेस विज्ञप्तिअनुसार चिट्ठा प्रक्रियामा १ हजार १ सय १५ जना सहभागी भएकामध्ये ७ सय ८४ जना पुरुष र ३ सय ३१ जना महिला छनोट भएका छन् ।

त्यस अवसरमा राजदूत एरिबासले इजरायलको स्याहार सुसार क्षेत्रमा निकट भविष्यमा थप २ हजार १ सयभन्दा बढी रोजगारीका अवसर खुल्ने जानकारी दिए । उनले ‘घरमा आधारित स्याहार सेवा’ तथा ‘कृषि श्रमिक’सम्बन्धी द्विपक्षीय सहमति कार्यान्वयनको चरणमा पुगेको पनि बताए ।

द्विपक्षीय श्रम सम्झौताअन्तर्गत इजरायल जाने नेपाली कामदारले इजरायली कानुनबमोजिम स्थानीय कामदारसरह न्यूनतम पारिश्रमिक तथा सेवासुविधा प्राप्त गर्नेछन् ।

इजरायल र नेपालबीचको श्रम सहकार्यलाई थप सुदृढ बनाउने दिशामा यो छनोट प्रक्रिया अर्को महत्वपूर्ण उपलब्धि भएको जनाउँदै दुवै देशले भर्ती प्रक्रियामा पारदर्शिता, निष्पक्षता र समान अवसरप्रतिको प्रतिबद्धता दोहोर्‍याएका छन् ।