काठमाडौं : चीनतर्फको छोचेन खोला र पुरेपू त्साङ्पो नदीको संगम क्षेत्रमा बनेको ठूलो ताल फुटेपछि उत्पन्न बाढी रसुवाको स्याफ्रुबेसीसम्म आइपुगेको छ ।
बाढी पूर्वानुमान महाशाखाका अनुसार शुक्रबार दिउँसो १२ बजेर ३१ मिनेटमा भोटेकोशी नदीमा आएको बाढी स्याफ्रुबेसी पुगेको हो । महाशाखाले नदीमा पानीको बहाव अझै बढ्दो क्रममा रहेको जनाएको छ ।
यससँगै त्रिशूली नदीको तटीय क्षेत्र—मुग्लिनसम्म—बसोबास गर्ने सर्वसाधारणलाई अर्को सूचना जारी नभएसम्म उच्च सतर्कता अपनाउँदै सुरक्षित स्थानमा बस्न आग्रह गरिएको छ ।
महाशाखाले जारी गरेको सूचनामा भोटेकोशी क्षेत्रमा बाढीको जोखिम अझै कायम रहेकाले सतर्क रहनुपर्ने उल्लेख छ ।
यसैबीच, राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि भोटेकोशी नदी क्षेत्रमा पुनः लेदोसहितको बाढी आउने जोखिम बढेको जनाएको छ ।
माथिल्लो क्षेत्रमा लेदोको मात्रा बढिरहेकाले थप बाढी आउन सक्ने सम्भावना कायमै रहेको प्राधिकरणले चेतावनी दिएको छ।
.jpg)
.jpg)
