तिलु शर्मा पौडेल/मध्यान्ह
दोहा, कतार : साविक विजेता फ्रान्स कतारमा जारी फिफा विश्वकप फुटबलको क्वाटरफाइनलमा प्रवेश गरेको छ । राउन्ड अफ १६ अन्तर्गत आइतबार राति भएको खेलमा पोल्याण्डलाई ३-१ गोल अन्तरले हराउँदै फ्रान्सले अन्तिम आठमा स्थान पक्का गरेको हो ।
अल थुमामा स्टेडियममा भएको खेलको ४४ औं मिनेटमा ओलिभर जेरुडले एमबाप्पेको पासमा सहजै एक गोल गरे । पोल्यान्ड विरुद्धको गोलसँगै जेरुडले फ्रान्सका लागि सर्वाधिक गोल गर्ने खेलाडीको कीर्तिमान बनाएका छन् । जेरुडको यो फ्रान्सका लागि ५२ औं गोल हो । जेरुडले थिएरी हेनरीको नाममा रहेको ५१ गोलको कीर्तिमान तोडेका हुन् ।
खेलको ७४ औं मिनेटमा एमबाप्पेले गोल गर्दै फ्रान्सलाई २-० को अग्रता दिलाए । उनले ओसुमाने डेम्बेलेको पासमा गोल गरेका हुन् । खेलको इन्जुरी समयमा एमबाप्पेले थुरामको पासमा व्यक्तिगत दोस्रो गोल गर्दै फ्रान्सलाई ३-० को अग्रता दिलाए । २३ वर्षीय एमबाप्पेको यो ९ औं विश्वकप गोल हो ।
एमबाप्पेले २४ वर्षमुनी विश्वकपमा सर्वाधिक गोल गर्ने खेलाडीको कीर्तिमान बनाएका छन् । उनले ब्राजिलियन लिजेण्ड पेलेको नाममा रहेको ७ गोलको कीर्तिमान भंग गरेका हुन् । एमबाप्पेले दुई विश्वकपमा ९ गोल गरेका हुन् । त्यसपछि इन्जुरी समयमै पोल्याण्डका लेवान्डोस्कीले पेनाल्टीमा गोल गरे पनि फ्रान्स ३-१ ले विजयी भयो । फ्रान्सका डेयोटले पेनाल्टी क्षेत्रमा ह्यान्डबल गरेपछि पोल्यान्डले पेनाल्टीको अवसर पाएको हो ।
त्यसैगरी सोमबार बिहान भएको खेलमा इंग्ल्याण्ड सेनेगललाई ३-० गोल अन्तरले हराउँदै अन्तिम आठमा पुगेको छ । अल बयात स्टेडियममा भएको खेलमा इंग्ल्याण्डलाई जित दिलाउन जोर्डन हेन्डरसन, ह्यारी केन र बुकायो साकाले एक एक गोल गरे ।
खेलको ३८औं मिनेटमा हेन्डरसनले र पहिलो हाफको इन्जुरी समयमा केनले गोल गर्दै इंग्ल्याण्डलाई २-० को अग्रता दिलाए । त्यसपछि खेलको ५७ औं मिनेटमा साकाले गोल गर्दै इंग्ल्यान्डलाई ३-० को जित दिलाए ।
अब इंग्ल्याण्डले अन्तिम आठमा फ्रान्सको सामना गर्नेछ । पोल्याण्ड र सेनेगल प्रतियोगिताबाट बाहिरिएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies