जुम्ला : जुम्लामा दलित सेवा संघले आयोजना गरेको जिल्लास्तरीय दलित पुरुष फुटबल प्रतियोगिताको उपाधि तिला गाउँपालिका–३ देउती कैलाश युवा क्लब कुडारीले जितेको छ । प्रतियोगिताको फाइनल खेलमा तातोपानी गाउँपालिका–६ हियाखोलाको समाज चेतना युवा क्लबलाई पराजित गर्दै देउती कैलाश युवा क्बलले उपाधि जितेको हो ।
देउती कैलाशले समाज चेतनालाई पेनाल्टी सुटआउटमा ३–२ गोलअन्तरले पराजित गर्दै उपाधि हात पारेको दलित सेवा संघ जुम्लाका अध्यक्ष भीम सार्कीले बताए । खेलको निर्धारित समयमा दुवै टोलीबीच एक–एक गोलको बराबरी भएपछि खेल पेनाल्टी सुटआउटमा गएको थियो ।
‘जात न सोध आचरण सोध’ भन्ने मूल नारा तथा ‘स्वास्थ्यका लागि खेलकुद, राष्ट्रका लागि खेलकुद र दलित एकताका लागि खेलकुद’ भन्ने साहयक नारासहित कात्तिक १९ गते प्रतियोगिता शुरु भएको थियो ।
विजयी क्लबलाई ट्रफी, मेडल, प्रमाणपत्रसहित ६६ हजार ६ सय ७० रुपैयाँ र दोस्रो हुने अर्थात उपविजेता युवा क्लबलाई ३३ हजार ३ सय ३५ रुपैयाँ पुरुस्कार प्रदान गरिएको दलित सेवा संघ जुम्लाका सचिव रामबहादुर नेपालीले बताए । सेनाको टुडिखेल मैदानमा ६ दिनसम्म सञ्चालन भएको फुटबल प्रतियोगितामा जिल्लाभरबाट १७ वटा टिम सहभागी भएका थिए ।
स्थानीय सिंजा गाउँपालिका जुम्लाका अध्यक्ष पूर्णप्रसाद धितालले दलित सेवा संघले आयोजना गरेको खेलकुद प्रतियोगिताप्रति आफू सधैं सकारात्मक भएर लाग्ने बताए । उनले खेलकुदका लागि आवश्यक भौतिक संरचना निर्माण गर्दै गएको र अझ गर्दै जाने प्रतिबद्धता व्यक्त गरे । जिल्ला फुटबल संघका अध्यक्ष भरत बहादुर बुढ्थापाले दलित समुदायका खेलाडीहरुलाई क्लब दर्ता गरी एन्फामा आउन अनुरोध गरे ।
राष्ट्रिय प्रजातन्त्र पार्टी (राप्रपा)का केन्द्रीय नेता मनसुर सुनारले आठ वटा स्थानीय तहले सहयोग गरेको कार्यक्रममा नगरपालिकाका जनप्रतिनिध नआएको भन्दै दुःख व्यक्त गरे । उनले दलित युवा खेलाडीलाई आगामी दिनमा राष्ट्रियस्तरका खेलाडीको रुपमा चिनिन शुभकामना दिए ।
तिला–३ का वडाध्यक्ष ललित बहादुर शाहीले स्वस्थकर अनुशासित खेलले व्यक्ति आफू मात्र स्वस्थ नभइ असल सोचको विकास, जीवन र समाज पनि परिवर्तन हुने बताए । उनले आयोजक दलित सेवा संघलाई प्रतियोगिता आयोजना गरेकोप्रति अभार व्यक्त गरे । उनले भने, ‘खेलमा हार जित हुन्छ यो खेलको नियम हो । उपविजेता खेलाडीलाई भ्रातृत्व, मैत्रीपूर्ण सम्बन्ध स्थापित गरी असल सन्देश प्रवाह गर्न अनुरोध छ ।’
