दिउँसै टर्च बालेर स्वास्थ्यमन्त्रीको खोजी

पिन्टु यादव/मध्यान्ह 

सप्तरी : रामराजाप्रसाद सिंह स्वास्थ्य विज्ञान प्रतिष्ठानको अलपत्र निर्माण कार्य अविलम्ब शुरु गर्नुपर्ने  मागसहित आन्दोलनमा उत्रिएका सप्तरी युथ नेपालले चौथो दिन बुधबार दिउँसै टर्च बालेर स्वास्थ्य मन्त्रीको खोजी गरेको छ । उक्त प्रतिष्ठान निर्माण कार्य अलपत्र परेपछि गत असोज २६ गतेदेखि स्थानीयहरु रिले अनशनमा बसिरहेको भएपनि सरकारको ध्यानाकर्षण नहुँदा युवाहरूले टर्च बालेर स्वास्थ्य तथा जनसंख्यामन्त्री  मोहनबहादुर बस्नेतको खोजी गरेका हुन् ।  

सप्तरी युथ नेपालले मंसिर १० गतेदेखि प्रतिष्ठान निर्माण कार्य सुचारु गर्न थालेको दबावमूलक  संघर्षलाई निरन्तरता दिँदै बुधबार मोबाइलको फ्लास लाइट बाल्दै ¥यालीलाई दशनचौकमा लगेर  कोणसभामा परिणत गरेको छ ।

उनीहरुको निर्धारित संघर्षका कार्यक्रम बमोजिम आइतबार प्रमुख जिल्ला अधिकारीमार्फत प्रधानमन्त्रीलाई अविलम्ब प्रतिष्ठान निर्माणकार्य शुरु गर्न ध्यानाकर्षण गराइएको थियो ।

सोही अनुसार दोस्रो दिन सोमबार राजविराजमा र्‍याली प्रदर्शन गरिएको थियो । त्यस्तै मंगलबार राजविराजमा सिट्ठी जुलुस प्रदर्शन गरेका थिए । यस्तै बुधबार टर्च बालेर स्वास्थ्यमन्त्रीको खोजी गरिएको हो । 

तत्कालीन नेकपा(एमाले)अध्यक्ष केपी शर्मा ओली नेतृत्वको सरकारले ‘एक प्रदेश–एक स्वास्थ्य विज्ञान प्रतिष्ठान’निर्माण गर्ने नीति अन्तर्गत निर्माण शुरु गरिएको रामराजाप्रसाद सिंह स्वास्थ्य विज्ञान प्रतिष्ठानको कार्य पटक–पटक अन्यौलमा पर्ने गरेको छ । पूर्वाधार विकासका लागि तयार पारिएको जग्गामा विवाद भएपछि निर्माण कार्य अन्यौलमा परेको थियो । २०७५ पुस २३ गतेको मन्त्रिपरिषदको बैठकले सप्तरीमा प्रतिष्ठान निर्माण गर्ने निर्णयको १० महिनापछि जग्गा विवाद अन्त्य भएको थियो । जग्गा विवाद अन्त्यपछि राजविराज नगरपालिका–१० विरौलस्थित ६२ बिघा  जग्गा प्रतिष्ठानको स्वामित्वमा आएको थियो । अहिलेको सरकारले प्रतिष्ठान निर्माणका लागि आवश्यक बजेट नदिँदा फेरि निर्माण कार्य अलपत्र परेको स्थानीयहरु बताउँछन् ।

जग्गाको विवाद टुंगो लागेपछि यसै स्थानमा तत्कालीन प्रधानमन्त्री ओलीले २०७८ असार २२ गते भर्चुअल माध्यमले प्रतिष्ठानको शिलान्यास गरेका थिए । शिलान्यास पश्चात् डिपिआरको काम सम्पन्न भएर तारबारले उक्त जग्गा घेरिएको थियो । उक्त प्रतिष्ठानको लागि आर्थिक वर्ष २०७५/०७६ देखि हालसम्म १६ करोड १० लाख रुपैयाँ बजेट विनियोजन भएको छ । जसमध्ये ३ करोड १६ लाख ४७ हजार खर्च भएको छ भने १२ करोड ८३ लाख ५२ हजार रुपैयाँ खर्च हुन नसकेर फिर्ता भएको छ । कुल ११ अर्ब ८८ करोड रूपैयाँको लागतमा निर्माण हुने प्रतिष्ठानको काम ५ वर्षभित्र सम्पन्न गर्ने भनिएको थियो । तर हालसम्म उक्त प्रतिष्ठानको काम तीव्र्र गतिमा अगाडि नबढाउँदा उक्त जग्गा गौचरनमा परिणत भएको छ ।

श्रीमतीको हत्या गरी फरार श्रीमान पक्राउ

राजेन्द्र महतो/मध्यान्ह

सिरहा : सिरहामा श्रीमतीको हत्या गरी फरार श्रीमान पक्राउ परेका छन् । पक्राउ पर्नेमा  सिरहा नगरपालिका वडा नं. १५ सुखचैनाका ४० वर्षीय देवेन्द्र यादव रहेका छन् । 

गत मंसिर ७ गते सिरहा नगरपालिका वडा नं. १५ सुखचैनामा श्रीमती ३० वर्षीया संजिता कुमारी यादवलाई हत्या गरी फरार रहेका यादवलाई माडर/खिरौना बोर्डर आसपासबाट पक्राउ गरिएको हो । उनलाई प्रहरी चौकी खिरौना, ई.प्र.का. माडर र जिल्ला प्रहरी कार्यालय सिरहाबाट खटिएको संयुक्त प्रहरी टोलीले पक्राउ गरेको जिल्ला प्रहरी कार्यालय सिरहाले जनाएको  छ ।

यहि मंसिर ७ गते श्रीमान यादवले श्रीमती संजिता कुमारीलाई मरणासन्न हुने गरी कुटपिट गरी उपचारको लागि भारतको जयनगरतर्फ लगेको भनि सूचना प्राप्त हुन साथ प्रहरी खटिएको थियो । 

अनुसन्धानका क्रममा संजितालाई देवेन्द्रले आफ्नै घरमा इँट्टा तथा बाँसको भाटाले कुटपिट गरी हत्या गरेको र शवलाई भारततर्फ लिएर गएको खुल्न आएको थियो ।

घटना पश्चात फरार रहेका यादवलाई पक्राउ गरी सोधपुछ गर्दा उनले श्रीमतीको शवलाई सिमा क्षेत्रबाट ३०÷३५ किलोमिटरभित्र भारतको मधुबनीको सलरा (खजोलि थाना) मा फालेको बताएका थिए । 

भारतीय प्रहरीसँग समन्वय गरी खोजतलास गर्ने क्रममा मृतक संजिताको मंसिर १० गते सोही ठाउँमा प्रहरीले शव फेला पारेको थियो । 

घटना सम्बन्धमा थप अनुसन्धान तथा भारतीय प्रहरीसँग समन्वय गरी सम्पर्ण कानूनी प्रक्रिया पूरा गरी  श्रीमान यादवलाई झिकाइएको प्रहरीले जनाएको छ । यादवलाई जिल्ला अदालतबाट म्याद थप गरी अनुसन्धान कार्य अगाडि बढाएको जिल्ला प्रहरी कार्यालय सिरहाका डीएसपी तथा  सूचना अधिकारी रबिन्द्रराज पाण्डेले जानकारी दिए । 

व्यवसायी अधिकारीको निधन

काठमाडौं : वैदेशिक रोजगार व्यवसायी रविन्द्र अधिकारीको निधन भएको छ । बसुन्धारास्थित राप्ती प्लेसमेन्ट सर्भिसेज प्रा.लि.का सञ्चालक अधिकारीको मंगलबार बिहान करिब २ बजे सिनामंगलस्थित काठमाडौं मेडिकल कलेज अस्पतालमा निधन भएको हो ।

स्वर्गीय अधिकारी विगत १० महिनादेखि कलेजो रोगबाट पीडित थिए । ४० वर्षीय अधिकारीको उपचारका क्रममा अस्पतालमा निधन भएको हो । उनको बुधबार चितवनस्थित देवघाटमा अन्तिम संस्कार गरिएको छ । स्वर्गीय अधिकारीका आमा, श्रीमती र एक छोरा छन् ।

हुम्लामा खच्चडबाट ढुवानी गरेर कुखुरा पालन

ओबराज शाही/मध्यान्ह 

हुम्ला : दुर्गम, राष्ट्रिय सडक मार्ग नजोडिएको एक मात्र हिमाली जिल्ला हुम्लामा खच्चडबाट ढुवानी गरेर कुखुरा पालन गर्न थालिएको छ । कुखुरा पालनको सिजन हेरेर जिल्ला बाहिर सुर्खेत र नेपालगन्जबाट जिउँदा कुखुरा गाडि हुँदै खच्चडमा बोकाएर हुम्लामा ल्याइने गरिन्छ । 

हुम्लाको खार्पुनाथ गाउँपालिका वडा ४ नल्ना निवासी चन्द्र बहादुर शाहीले तीन वर्षदेखि जिल्ला बाहिरबाट कुखुराका चल्ला ल्याएर व्यावसायिकरुपमा लागेका छन् । 

उनले जिल्ला बाहिरबाट जिउँदा कुखुराका चल्ला हुम्ला ल्याउँदा धेरै दुःख हुने बताए । भदौ महिनाको अन्तिमतिर कुखुरा ल्याउने गरिएको उनले बताए । भदौमा ल्याइएका कुखुराका चल्ला पुस महिनासम्म बिक्री हुने भएकाले वर्षको एक पटक मात्र चल्ला ल्याउने गरिएको छ । हुम्लामा अरु जातका कुखुरा हुँदैनन् । त्यसैले रातो जातका कुखुराका चल्ला ल्याउने गरिन्छ ।  

सुर्खेतमा चल्ला ल्याउँदा एक किलो भएपछि मात्र ल्याइन्छ । साना चल्ला ल्याउँदा बाँच्दैनन् । एक किलोको चल्ला ल्याउँदा ६ सयदेखि एक हजार रुपैयाँसम्म पर्ने गर्दछ । लटमा  ४ सय ८० कुखुराका चल्ला ल्याएको भएपनि करिब ९५ चल्ला गाडीमा ल्याउँदा मरेको कृषक शाहीले बताए ।  

सुर्खेतबाट तीन दिनमा हुम्लाको सर्केगाड गाउँपालिकाको सलिसलामा पुगिन्छ । केही चल्ला भोकले त केही च्यापिएर मर्ने कृषक शाहीले बताए ।

हुम्लामा कुखुरा पालन गर्न अण्डाबाट चल्ला निकाल्ने ह्याचरी मेसिन लाखौं मूल्य हालेर ल्याउँदा तापक्रम नमिल्दा चल्ला निकाल्न नसकिएको शाहीले बताए ।

उनले भने, ‘हवाई मार्गबाट कुखुराका चल्ला ल्याउन खोज्दा बोक्न मानदैनन् । त्यसैले पैदल मार्ग भएर ल्याउनु परेको छ ।’ हुम्लामा राष्ट्रिय सडक मार्ग नजोडेसम्म व्यवसाय गर्न समस्या हुने उनको भोगाइ छ ।

छोराको जन्मदिनको अवसरमा पौडेलद्वारा प्रेस चौतारीको भवन निर्माणका लागि सहयोग

चितवन : छोराको जन्मदिनको अवसर पारेर विज्ञापन चितवन एड्भरटाइजिङ प्रा.लि.का सञ्चालक खुमप्रसाद पौडेल किरणले प्रेस चौतारी चितवनको भवन निर्माणका लागि आर्थिक सहयोग गरेका छन् ।

पौडेलले छोरा अभिषेक पौडेलको जन्मदिनको अवसरमा भवन निर्माणका लागि प्रेस चौतारी चितवनका अध्यक्ष सुवास पण्डितलाई दश हजार रुपैयाँ आर्थिक सहयोग हस्तान्तरण गरेका हुन् । भरतपुर–११ बसेनीमा निर्माण हुँदै गरेको भवनका लागि सहयोग गर्न पाउँदा आफूलाई खुसी लागेको पौडेलले बताए ।

चितवनमा रहेर विभिन्न राष्ट्रिय तथा स्थानीय सञ्चारमाध्यममा विज्ञापनसम्बन्धी कार्य गर्दै आएका पौडेलले जिल्लामा पत्रकार सम्बद्ध संघसंगठनको भवन बन्दा त्यसले संस्थागत विकासमा टेवा पुग्ने बताए ।

प्रेस चौतारी चितवनका अध्यक्ष सुवास पण्डितले भवन निर्माणका लागि विभिन्न पक्षबाट सहयोग मिल्ने क्रम जारी नै रहेकोले भवनले पूर्णता पाउने विश्वास लिएको बताए । समाजसेवी केशव कार्कीले प्रदान गरेको ९ धुर जग्गामा चौतारी चितवनको भवनका काम धमाधम भइरहेको छ ।

भवनको दोस्रो तला ढलान गरिएको छ भने पहिलो तलाको काम फिनिसिङ गर्ने काम शुरु भएको छ ।

गोरु चराउन गएकी किशोरीको भिरबाट लडेर मृत्यु

ओबराज शाही/मध्यान्ह 

हुम्ला : हुम्ला सिमकोटकी एक किशोरीको भिरबाट लडेर मृत्यु भएकोछ  । गोरु चराउन गएकी सिमकोट गाउँपालिका वडा ८ खोल्सी गाउँकी १७ वर्षीया सुस्मिता शाहीको दुधा भिरबाट लडेर मृत्यु भएको हो ।

उनको शव भिर तल खोल्सामा भेटिएको सामुदायिक स्वास्थ्य इकाईका इन्चार्ज धिरेन शाहीले बताए । शाहीका अनुसार भिरमा गोरु गएपछि त्यसलाई फर्काउन जाने क्रममा बुधबार भिरबाट लडेकी थिइन् । 

शाही सिमकोट ७ को कर्णाली माध्यमिक विद्यालयमा कक्षा ११ मा पढ्दै थिइन् । करिब २ सय मिटर तल खसेकी किशोरीको घटनास्थलमै मृत्यु भएको परिवारले जनाएको छ । मृतक शाहीको बुधबारनै दाहसंस्कार गरिएको  छ । 

नेपालमा पहिलोपटक समलिंगी विवाह दर्ता

काठमाडौं : नेपालमा पहिलोपटक समलिंगी विवाह दर्ता भएको छ । लमजुङको दोर्दी गाँउपालिकाले एक समलिंगी जोडीको विवाह दर्ता गरेको छ ।

सर्वोच्च अदालतको आदेश एवम् राष्ट्रिय पञ्जीकरण विभागको निर्देशन अनुसार, दोर्दी गाँउपालिका–२ को वडा कार्यालयले विवाह दर्ता गरेको हो ।

लमजुङका रामबहादुर (माया) गुरूङ र नवलपरासीका सुरेन्द्र पाण्डेको विवाह दर्ता भएको हो । दोर्दी गाँउपालिका–२ को वडा कार्यालयमा उनीहरूले विवाहका लागि निवेदन दिएका थिए ।

समलिंगी अधिकारको वकालत गर्दै आएका अधिकारकर्मी सुनिलबाबु पन्तले समलिंगी विवाह नेपालकै पहिलो भएको दाबी गरे ।

कुटपिटबाट एकको मृत्यु, सात जना प्रहरी नियन्त्रणमा

सुदूरपश्चिम : कैलालीको लम्कीचुहा नगरपालिका–९ घोराघाट गाउँमा भएको विवाह समारोहमा अपरिचित व्यक्तिको कुटपिटबाट घाइते भएका २६ वर्षीय मोहन अधिकारीको आज मृत्यु भएको छ ।

घोराघाट बस्ने डिल्ली कोइरालाको बिवाहमा सहभागी भएका घोडाघोडी नगरपालिका–२ का अधिकारी गएराति अपरिचित व्यक्तिको कुटपिटबाट गम्भीर घाइते भएको जिल्ला प्रहरी कार्यालयका प्रवक्ता कुलदीप चन्दले बताए । 

उपचारका लागि टीकापुर अस्पताल पुर्‍याइएका अधिकारीलाई चिकित्सकले मृत घोषणा गरेका थिए । यसअघि घटनालगत्तै बेहोस अवस्थाका अधिकारीलाई उपचारका लागि लम्की चुहाको लालरत्न अस्पताल र त्यसपछि कोहलपुरको मेडिकल कलेज पुर्‍याइएको थियो ।

कुटपिटको घटनामा संलग्न भएको आशंकामा प्रहरीले लम्कीचुहाका विवेक भुल, विशाल भुल, सन्तोष परियार, गणेश भुल, पिन्टु चौधरी, दिलबहादुर चौधरी र पुरन सार्कीसहित सातजनालाई नियन्त्रणमा लिएको छ । 

फेवाताल संरक्षणका लागि सर्वोच्चको फैसला कार्यान्वयन गर्न मुख्यमन्त्रीको संयोजकत्वमा समिति

पोखरा : फेवातालको मापदण्डका सन्दर्भमा सर्वोच्च अदालतबाट २०८० साल असार ४ गते भएको फैसलाको कार्यान्वयन गर्न गण्डकी प्रदेशका मुख्यमन्त्री सुरेन्द्रराज पाण्डेको संयोजकत्वमा सहजीकरण समिति गठन गरिएको छ ।

मुख्यमन्त्री तथा मन्त्रिपरिषद्को कार्यालयमा मुख्यमन्त्री पाण्डेको अध्यक्षतामा आज भएको प्रदेश सुरक्षा समितिको बैठकले ११ सदस्यीय समिति गठन गरेको हो ।  

समितिमा पोखरा महानगरपालिकाका प्रमुख, गण्डकी प्रदेशका प्रमुख सचिव, नेपाली सेनाका पश्चिम पृतनापति, गण्डकी प्रदेशका मुख्य न्यायाधिवक्ता, कास्कीका प्रमुख जिल्ला अधिकारी, गण्डकी प्रदेश प्रहरी कार्यालयका प्रहरी नायब महानिरीक्षक, सशस्त्र प्रहरी बल नेपाल नं ४ मुक्तिनाथ वाहिनीका सशस्त्र प्रहरी नायब महानिरीक्षक, राष्ट्रिय अनुसन्धान विभाग गण्डकी प्रदेश कार्यालयका अनुसन्धान निर्देशक, पोखरा महानगरपालिकाका प्रमुख प्रशासकीय अधिकृत र ताल संरक्षण विकास समितिका कार्यकारी निर्देशक सदस्य रहेका छन् ।

समितिको सदस्यसचिवमा पोखरा महानगरपालिकाका प्रमुख प्रशासकीय अधिकृत श्यामकृष्ण थापा रहेका छन् । समितिले अन्य कार्यविधि तथा कार्ययोजना तय गर्दै जाने निर्णय गरिएको छ । 

विज्ञापन बोर्डविरुद्धको रिटमा विपक्षी झिकाउने आदेश

काठमाडौ :  सर्वोच्च अदालतले विज्ञापन बोर्डको खारेजीको सम्बन्धमा छलफल गर्न प्रधानमन्त्री तथा मन्त्रिपरिषदको कार्यालय, सञ्चार तथा सूचना प्रविधि मन्त्रालय, सार्वजनिक खरिद अनुगमनको कार्यालय, विज्ञापन बोर्ड तथा बोर्डका अध्यक्षलगायतलाई बोलाउने आदेश गरेको छ ।

अधिवक्ता सविन पोख्रेलद्वारा बोर्ड खारेजीको माग गर्दै दायर रिटमा सोमबार न्यायाधीश डा. कुमार चुडालको एकल इजलासले सुनुवाइ गर्दै उक्त आदेश दिएको हो । सर्वोच्चमा दायर भएको रिटमा अन्तरिम आदेश दिने वा नदिने भन्ने छलफलको लागि मंसिर १८ गते पेशी तोकिएको छ ।

अधिवक्ता सविन पोख्रेलद्वारा दायर गरिएको रिटमा विज्ञापन बजारको नियमन गर्नुपर्नेमा रकम भुक्तानी गर्ने थलो भन्सार बनाएको कारणले विज्ञापन बोर्ड खारेजी गर्नुपर्ने माग गरिएको छ । त्यसैगरी रिटमा विज्ञापन (नियमन गर्ने) पहिलो संशोधन नियमावली २०८० विज्ञापन ऐन २०७५, विद्युतीय खरिद प्रणाली सञ्चालन निर्देशिका २०८० र सार्वजनिक खरिद ऐनसँग बाझिएको जिकिर छ । सोमबार अन्तरिम आदेशको समेत माग गर्दै भएको बहसमा रिट निवेदकले त्यसमा जोड दिएका थिए ।

रिट निवेदकका तर्फबाट निनेदक अधिवक्ता सविन पोख्रेलसहित अधिवक्ता सुभनराज आचार्य, अधिवक्ता विनोद कार्की, अधिवक्ता पुरुषोत्तम लोहनी, त्रिलोक बहादुर चन्दसमेतले बहस गरेका थिए ।

सरकारले विज्ञापन बोर्डमार्फत व्यवसायीलाई काम गरी खाने वातावरणमा अंकुश लगाउन खोजेको भन्दै शुक्रबार रिट दायर गरिएको थियो । रिटमा प्रधानमन्त्री तथा मन्त्रिपरिषदको कार्यालय, सञ्चार तथा सूचना प्रविधि मन्त्रालय, सार्वजनिक खरिद अनुगमनको कार्यालय, विज्ञापन बोर्ड तथा बोर्डका अध्यक्षलाई विपक्षी बनाइएको छ ।