काठमाडौं- सुदूरपश्चिम प्रदेशमा वैकल्पिक सरकार बनाउने प्रयास असफल भएको छ । नेपाली कांग्रेस र रेशम पक्षीय नागरिक उन्मुक्ति पार्टीले गरेको वैकल्पिक गठबन्धन निर्माणको प्रयास असफल हुने भएको हो । नेपाली कांग्रेस, नेकपा एकीकृत समाजवादी र रेशम पक्षीय नागरिक उन्मुक्ति पार्टीका सांसदहरूको समर्थनमा सुदूरपश्चिममा वैकल्पिक गठबन्धन अगाडि बढेको थियो । केन्द्रीय सत्ता गठबन्धनमा रहेको नेकपा एकीकृत समाजवादीले पनि प्रदेशमा कांग्रेससहितका दलहरूसँग सहकार्यको प्रयास गरेको थियो ।
कांग्रेस, नेकपा एकीकृत समाजवादी र रेशम पक्षीय नागरिक उन्मुक्ति पार्टीका सांसद लिएर नाउपाका लक्ष्मण किशोर चौधरीले मुख्यमन्त्रीमा दाबी गरेका थिए भने, एमाले माओवादी र रन्जिता पक्षका सांसदहरूको समर्थनमा नाउपाका कैलाश चौधरीले मुख्यमन्त्रीमा दाबी पेश गरेका थिए । यी दुबै दाबी मङ्गलवार प्रदेश प्रमुखले खारेज गरेर नयाँ दाबी आह्वान गरेका छन् । पहिलो चरणमा दुबै दाबी खारेज भएपछि अब दोस्रो चरणको लागि वैकल्पिक गठबन्धनबाट दाबी नहुने सम्भावना रहेको बताइएको छ ।
दिवाकर अधिकारी/मध्यान्ह
काठमाडौं : सरकारले अध्यादेशबाट एक दर्जन बढी कानुन संशोधन गर्न लागेको छ । यही वैशाख १६ र १७ मा हुने लगानी सम्मेलनाई देखाएर सरकारले अध्यादेशबाट एक दर्जन बढी कानुन संशोधन गर्न लागेको छ । उद्योग र व्यवसायमा लगानीको वातावरण सुधार गर्नलाई बाधक बनेका कानुनी व्यवस्था फेर्न लागिएको सरकारको दाबी छ ।
प्रधानमन्त्री पुष्पकमल दाहाल प्रचण्डका अनुसार केही दिनमै यसबारे औपचारिक निर्णय हुनेछ । मंगलबार नेपाल उद्योग परिसंघको २१औं वार्षिक साधारणसभालाई सम्बोधन गर्दै प्रधानमन्त्री प्रचण्डले अध्यादेशबाट एक दर्जन बढी कानुन संशोधन गर्न लागिएको जानकारी दिएका हुन् ।
सरकारले यही वैशाख २ गतेदेखि संघीय संसदको हिउँदे अधिवेशन अन्त्य गरेको थियो । बजेट अधिवेशन यही वैशाखको अन्तिम साता बोलाउने तयारी छ । त्यस अगाडि नै अध्यादेश ल्याउने सरकारको तयारी छ ।
बजेट अधिवेशनमा समेत कानुन निर्माणको काम गरिने प्रधानमन्त्रीले बताएका छन् । सरकारले संघीयता कार्यान्वयनका लागि ११७ वटा कानुन बनाउने भनी विषय पहिचान गरेको छ ।
प्रधानमन्त्री पुष्पकमल दाहाल प्रचण्डका अनुसार पहिचान भएका विषयको विधेयकको मस्यौदा कानुन न्याय तथा संसदीय मामिला मन्त्रालयले अध्ययन गरिसकेको छ । अध्ययन पश्चात सम्बन्धित मन्त्रालयहरूलाई सम्बन्धित विषयको कानुनको मस्यौदालाई अन्तिम रूप दिएर प्रक्रियामा अगाडि बढाउन भनिएको छ ।
पहिचान गरिएका ११७ वटा विधेयकको मस्यौदामध्ये २१ वटा विधेयक पेश हुने क्रममा रहेको छ । प्रधानमन्त्रीका अनुसार यी २१ वटा विधेयक प्रधानमन्त्री तथा मन्त्रिपरिषद् कार्यालयको विधेयक समितिमा विचाराधीन छन् । थप ७ वटा विधेयक कानुन न्याय तथा संसदीय मामिला मन्त्रालयमा कानुनी रायको प्रक्रियामा रहेको छ ।
११७ मध्ये मन्त्रिपरिषद् कार्यालय र कानुन मन्त्रालयमा रहेका बाहेकका विधेयकका मस्यौदालाई सम्बन्धित मन्त्रालयले अन्तिम रूप दिने काम गरिरहेको छ । प्रधानमन्त्री प्रचण्डका अनुसार विधेयकहरू प्राथमिकताका आधारमा संघीय संसदमा दर्ता हुनेछन् ।
मनीषाअवस्थी/मध्यान्ह
काठमाडौं : तत्कालीन केपी शर्मा ओेली सरकारले २०७५ सालबैशाखपहिलो सातायातायात समितिखारेजीको निर्णय गर्यो । जुन निर्णयले यातायात ब्यवसायी र सरकाबीच लामो विवाद चल्यो । लामो समयदेखि सिण्डिकेट लाद्दै आएको यातायात ब्यवसायीहरूले सबै यातायात समिति कम्पनीमा लैजानुपर्ने भएपछि विवाद चकिर्यो । ब्यवसायी आन्दोलित नै भए । सरकार आफ्नो अडानबाट पछि नहटेपछि यातायात समितिहरू अन्ततः कम्पनीमा जाने भए ।
सर्वोच्च अदालतले फेरि यातायात समितिहरू ब्युताउने फैसला गरेको छ । यातायात व्यवसायमा ‘सिन्डिकेट’ (व्यवसायिक गुटबन्दी) गरेको भन्दै खारेज गरिएको समितिलाई सर्वोच्चले ब्यूँत्याएपछि ब्यवसायीहरू फेरी सल्बलाउन थालेका छन् ।
अदालतको आदेशले यातायात ब्यवसायीहरू खुशी भएका छन् भने अन्य सरोकारवालाले असन्तुष्टि छन् । व्यवसायी सरोज सिटौलाले सरकारले उतिबेला राम्रो नगरेको बताउदै भन्छन्, ‘ब्यवसायीहरूले उतिबेलै यो गलतभयो भनेकै थिए नि । बल्ल सर्वोच्चको निर्णय हाम्रो पक्षमा भयो ।’
नेपाल ट्रक यातायात व्यवसायी महासंघका महासचिव राजेन्द्र विक्रम बानियाँले पनि तत्कालीन सरकारले गल्ती गरेको बताउँदै भने, ‘अहिले अदालतले नै हाम्रो पक्षमा निर्णय गरेको छ । त्यतिबेलाको सरकारले गल्ती नै गरेको रहेछ भन्ने उहाँहरुलाई पनि भयो होला । अब समितिहरू नवीकरण गर्ने बाटो खुलेको र सर्वोच्चको निर्णय स्वागतयोग्य छ ।’
अब यातायात समितिहरुको चलअचल सम्पत्ति गरेर अर्बौ रूपैयाँ समितिहरूमा नै आउने बानियाँले बताए ।
सिन्डिकेटवाला समितिहरुलाई खारेजी र संस्थादर्ता ऐन २०३४ बमोजिम स्थापित यातायात क्षेत्रसँग सम्बन्धित संघ, संस्था र समितिहरुलाई खारेजी गर्ने र त्यस संस्थामा रहेका सबै चलअचल सम्पत्ति पनि नेपाल सरकारको मातहत ल्याउने निर्णय भएको थियो ।
सिण्डिकेटका नाममा यातायात व्यवसायीको मनोमानी नेपालमा वर्षौंदेखि चल्दै आएको छ । यातायात समितिमा रहेर समितिको सिफरिसपछि मात्रै यातायात ब्यवस्था विभागमा दर्ता हुने प्रक्रिया चल्दै आएको थियो । यतिमात्रै होइन, देशभर सञ्जाल रहेको नेपाल यातायात व्यवसायी राष्ट्रिय महासंघ मातहतका व्यवसायीले आफू अन्तर्गत दर्ता नभएका सवारी साधनलाई सञ्चालन हुन नदिने गर्थे । सिंगो यातायात ब्यवसाय नै समितिहरूको कब्जामा थियो ।
सरकारले यातायात व्यवस्था कार्यविधि निर्देशिका–२०६० संशोधन गर्दै जिल्ला प्रशासन कार्यालयमा दर्ता भई सञ्चालन हुँदै आएका यातायात व्यवसायी समितिको नवीकरण नगर्ने र त्यस्ता समितिलाई कम्पनी रजिष्टारको कार्यालयमा कम्पनी ऐन अन्तर्गत दर्ता हुन तीन महिनाको सीमा अवधि तोकेको थियो ।
तत्कालीन सरकारले यातायात समितिहरू गैरसरकारी संस्था मोडलमा चलेको र करको दायरामा नभएको भन्दै खारेज गरेको थियो । तत्कालीन मन्त्रिपरिषद्को निर्णयको नेपाल राष्ट्रिय यातायात व्यवसायी महासंघ, कोशी बस व्यवसायी संघ र नेपाल ट्रक यातायात व्यवसायी महासंघ अदालत गएका थिए । व्यवसायीले दायर गरेका तीन वटा फरक फरक रिटलाई एकै ठाउँमा राखेर हेरिएको हो ।
सरकारले समिति खारेज गरेपछि यातायात व्यवस्था विभागमा पञ्जीकरण गर्नु पर्ने व्यवस्था गरेको थियो भने धेरै व्यवसायीहरुले कम्पनीका रूपमा दर्ता गरेर सञ्चालन गरेका थिए ।
काठमाडौं : धार्मिक, ऐतिहासिक तथा पुरातात्विक महत्व बोकेको टोखामा चैत मसान्तदेखि सुरु भएको विस्का नखः (जात्रा) सम्पन्न भएको छ । नेवार समुदायको बाहुल्य रहेको टोखामा हरेक वर्षझै यस वर्ष पनि चैत मसान्तदेखि वैशाख ४ गतेसम्म पाँच दिन चल्ने विस्का नखः (जात्रा) आज सम्पन्न भएको हो । वैशाख १ गते सपनतीर्थ मेलासँगै सिन्दूर जात्रा गरी औपचारिक विस्का जात्रा सुरु हुने गरेको नेवा गुथिः टोखाका अध्यक्ष रमेश नापितले बताए ।
वैशाख २ गते बिहान टोखा नगरपालिकाको वडा नं २ गणेशस्थान थलागटोलमा सिन्दूर जात्रा गरेर नगर परिक्रमा गरिने रथलाई सोही दिन माथिल्लो लाछिमा लगेर बिसाइन्छ । वैशाख ३ गते बिहान ६ बजे माथिल्लो लाछिमा सिन्दूर जात्रा गरेर उठाइएको रथ दिउँसो १ बजे वडा नं ३ स्थित हासलटोलमा लगेर बिसाउने चलन छ ।
बिहान ६ बजेदेखि सुरु भएको रथयात्रालाई गुठी, गुठीयारको घरमा लगेर बाली उठाउने गरिन्छ । दिउँसो १ बजेदेखि ३ बजेसम्म हासलटोलमा राखेर रथको पूजा गर्ने चलन छ । सोही दिन साँझ ३ बजे उक्त रथलाई हासलटोलबाट उठाएर सरस्वती चौरको पोखरीमा स्नान गराई इन्द्रायणी मसानकाली परिक्रमा गराई वडा नं ३ को सानो लाक्षिमा लगेर बिसाइन्छ ।
सोही दिन रातभर गुठीयार र विभिन्न खलःहरू बसेर रातभर भजनकीर्तन गर्ने तथा जाग्राम बस्ने चलन रहेको मूल नाइके हेमराज श्रेष्ठले बताए । वैशाख ४ गतेअर्थात् जात्राको अन्तिम दिन आज बिहान ६ बजे सानोलाक्षीबाट सिन्दूर जात्रा गरी दिउँसो १ बजे वडा नं २ मा रहेको गछेटोलमा लगेर रथ बिसाइन्छ । उक्त स्थानमा बिसाएको रथलाई विधिवत्रुपमा सरकारी पूजासहित सिन्दूर जात्रा गरेर विभिन्न खलःको उपस्थितिमा नगरपरिक्रमा गराई आआफ्नो देवालयमा भित्र्याउने चलन छ । टोखा नगरपालिकाको ऐतिहासिक विस्का जात्राका अवसरमा आज टोखा नगरपालिकाले सार्वजनिक बिदा दिएको थियो । हिजो सोमबार वडा नं २ र ३ लाई बिदा दिइएको थियो ।
सत्येन्द्र प्रताप सिंह/मध्यान्ह
रौतहट : जिल्ला प्रहरी कार्यालय रौतहटले एक हप्ताको अवधिमा २४ लाख भन्दा बढी मूल्य बराबरको भन्सार छलीका सामानहरू बरामद गरेको छ । जिल्लाका विभिन्न नाका भइ ल्याउँदै गरेको अवस्थामा भन्सार छली, चोरी, निकासी, पैठारी नियन्त्रण गर्ने क्रममा प्रहरीको गस्ती टोलीले बरामदमा लिएका खाद्यान्न सामग्री, पशु, किराना लगायतका सामान कारबाहीको लागि जिल्ला भन्सार कार्यालयमा पठाइएको जिल्ला प्रहरी कार्यालय रौतहटले जनाएको छ ।
प्रवक्ता प्रहरी नायव उपरीक्षक एलिजा गिरिले प्रेस विज्ञप्ति जारी गर्दै चैत २५ गतेदेखि वैशाख ३ गतेसम्म बरामद गरिएको २४ लाख ४५ हजार ५ सय ५६ रुपैयाँ बराबरको सामान आवश्यक कारबाहीको लागि भन्सार दाखिला गरिएको उल्लेख गरेकी छन् ।
विज्ञप्तिमा दुई लाख २ हजार ६७ रुपैयाँ मूल्य बराबरको लत्ता कपडा, ४ लाख ६८ हजार २८९ रुपैयाँ मूल्य बराबरको किराना सामान तथा खाद्यान्न, ३२ हजार ५ सय मुल्य बराबरको पशुपन्छी,७८ हजार मूल्य बराबरको काठ र १६ लाख ६४ हजार ७ सय स्रोत नखुलेको रकम कारबाहीको लागि भन्सारमा बुझाइएको उल्लेख गरिएको छ ।
काठमाडौं : नेपाल प्रज्ञा–प्रतिष्ठान भानुभक्त कक्षमा नेपाल प्रज्ञा–प्रतिष्ठानका कुलपति भूपाल राईले पुस्तक प्रदर्शनीको उद्घाटन गरेका छन् । नव वर्ष २०८१ सालको उपलक्ष्यमा आयोजना गरिएको पुस्तक प्रदर्शनीमा भाषा, साहित्य, संस्कृति, कला, इतिहास, दर्शन र समाजशास्त्र लगायतका पुस्तक राखिएका छन् । प्रदर्शनीको मूल उद्देश्य पठन संस्कृतिको विकासमा टेवा पुर्याउनु रहेको छ ।
‘सबै भाषा,सबै ज्ञान,सबैको प्रज्ञा–प्रतिष्ठान’भन्ने मूल नारालाई आत्मसात् गर्दै अघि बढेको प्रतिष्ठानले महत्वपूर्ण र अनुसन्धानात्मक पुस्तक प्रदर्शनीमा राखेको छ । हिमाल, पहाड, मधेश– तराइका विभिन्न संस्कार र संस्कृति, विभिन्न भाषाका कोशहरू प्रदर्शनी स्थलमा राखिएका छन् ।
प्रज्ञा नेपाली बृहत् शब्दकोश १ प्रति खरिदमा २० प्रतिशत छुट र दुई प्रतिको खरिदमा २५ प्रतिशत छुट र नयाँ तथा पुराना सबै पुस्तकहरूमा ४० प्रतिशत छुट रहेको छ । प्रदर्शनी २०८१ वैशाख ४ देखि १८ गतेसम्म रहनेछ । प्रदर्शनीमा पुनःप्रकाशन भएका अमरकोश, नेपाली साहित्यकोश, कौटिल्यको अर्थशास्त्र, जाँ ज्याक रुसको कन्फेसन्स, ईषाादि नौ उपनिषद्, ग्रीक महाकवि होमरको ओडिसी, हरेराम जोशीको प्राचिन अभिलेख, गुमानसिंह चामलिङ्को एरिस्टोटल र उनका काव्य शास्त्र ’पेरी पोइएतिकेस’, काठमाडौं उपत्यकाका नेवारी लोकगीत लगायतका पुस्तकहरू ४० प्रतिशत छुटमा पाइन्छ ।
प्रतिष्ठानका नयाँ प्रकाशन ’समाज अन्वेषण’, ’मिक’, ’लाबाङ्गी’ पत्रिका, नेवारी भाषाका कथाहरू लगायतका पत्रिका तथा कृतिहरू प्रदर्शनी स्थलमा राखिएको छ । सधैँ झैँ साझा प्रकाशनका कृतिहरू पनि प्रदर्शनीमा राखिनेछ ।
दिलमाया शाही/मध्यान्ह
जुम्ला : जुम्लाका प्रहरी नायव उपरीक्षक छेदी लाल कामतीले जिल्लामा शान्ति सुरक्षा र अपराध नियन्त्रणका लागि विशेष सुरक्षा रणनीति लागू गरिने बताएका छन् । जिल्ला प्रहरी कार्यालय जुम्लाको प्रहरी नायव उपरीक्षकको जिम्मेवारी सम्हाल्न आइपुगेका उपरीक्षक कामतीले जुम्लालाई सुरक्षित बनाउनका लागि आफ्नो कार्यकालमा रणनीति बनाउने बताए । मंगलबार आयोजित भेटघाटमा उनले अपराध नियन्त्रणका लागि कुनै कसर बाँकी नराख्ने बताए । यसको लागि यहाँका नागरिकको साथ पनि चाहिने उनले बताए ।
उनले भने,‘प्रहरीले कुनै पनि अपराधसँग सम्झौता गर्दैन । प्रहरीले जिल्लामा शान्ति सुरक्षा कायम राख्न र अपराध घटाउन यहाँका सरोकारवाला निकायसँग सहकार्य गर्छ ।’ त्यस्तै जुम्लाका क्रियाशिल पत्रकारहरुले जिल्लामा अहिले मुख्यगरी लागुऔषध कारोवार, घरेलुहिंसा, बलात्कार, हत्याहिंसा, महिला तथा बालबालिका,बालविवाह, जुवातास, गण्डागर्दी, अवैध हातहतियार ओसार–पसास र घरेलु मदिरा लगायतका विभिन्न अपराधिक क्रियाकलाप चुनौतीको विषय बनेको बताएका थिए ।
पत्रकारहरुको जिज्ञासा मेटाउँदै प्रहरी नायव उपरीक्षक कामतीले आगामी दिनमा अपराध न्यूनीकरण गर्न प्रहरीले अपराध हुने सम्भावित क्षेत्रका नागरिकसँग सहकार्यको योजना बताउने बताए । उनले अपराध समुदायमा हुने भएकाले नागरिकको सहायता आवश्यक रहेको बताए । उनले आमनागरिकको सहयोग र सहकार्य बिना समाजलाई अपराधरहित गतिविधि न्यूनीकरण गर्न कठिनाइ हुने बताए ।
उनले प्रहरीले आफ्नो कार्ययोजना बनाएर अपराधविरुद्ध आवश्यक कदम चाल्दै आएको छ । कामतीले भने,‘अपराध रोक्न हामी सशक्त बन्नेछौं । अपराधरहित समाज निर्माणमा प्रहरी केन्द्रित भएको छ । पत्रकारको सुझाव अनुसार जुम्ला प्रहरी आगामी दिनमा अझैँ सशक्त भएर लाग्छ ।’
पवन जायसवाल/मध्यान्ह
बाँके : कालपृष्ठ दैनिकका सम्पादक तथा गोरखापत्रकर्मी पत्रकार कमल खत्रीसहित चार जना सम्मानित भएका छन् । खजुरा गाउँपालिकाको वडा नं.३ मा भएको पञ्चकर्म तथा पूर्वकर्म थेरापी सेवाको उद्घाटन कार्यक्रममा पत्रकार खत्रीसहित चार जनालाई सम्मान गरिएको हो ।
आयुर्वेद सेवाको प्रचार प्रसारमा महत्वपूर्ण योगदान पु¥याएको भन्दै खजुरा गाउँपालिकाका अध्यक्ष डम्बर बहादुर विकले पत्रकार खत्री, चन्द्र बोहोरा र खगेन्द्र दाहाललाई सम्मान गरेका थिए । कार्यक्रममा नागरिक आरोग्य सेवा केन्द्र खजुरामा कार्यरत कार्यालय सहयोगी सविना केसीलाई पनि सम्मान गरिएको थियो । स्वास्थ्य सेवा आयुर्वेद समूह अन्तर्गत नागरिक आरोग्य सेवा केन्द्रको आयोजनामा सम्मान कार्यक्रम गरिएको थियो ।
बाँकेमा आयुर्वेद सेवाको बारेमा खत्रीले नियमित रुपमा समाचार लेख्दै आएका छन् । करिब डेढ दशकदेखि पत्रकारितामा सक्रिय रहेका पत्रकार खत्रीलाई आयुर्वेद सेवाको प्रचार–प्रसार तथा जनचेतनामूलक सन्देश प्रवाह गर्न भूमिका निर्वाह गरेको भन्दै सम्मान गरिएको हो ।
सरु भुसाल/मध्यान्ह
अर्घाखाँची : अर्घाखाँचीको भूमिकास्थान नगरपालिका वडा नम्बर ३ का बाख्रापालक किसानहरुलाई प्रजननयोग्य बाख्राका बोका र पाठी वितरण गरिएको छ । भेटेनरी अस्पताल तथा पशुसेवा विज्ञ केन्द्र अर्घाखाँचीको आर्थिक सहयोगमा सानीपोखरी कृषि तथा पशुपालन कृषक समूह भूमिकास्थान–३ मा आवद्ध कृषकहरुलाई प्रजननयोग्य बोका र पाठी वितरण गरिएको स्थानीय पत्रकार टेकराज भुसालले जानकारी दिए ।
भेटेनरी अस्पताल तथा पशु सेवा विज्ञ केन्द्र अर्घाखाँचीका प्रमुख विष्णुप्रसाद पौडेल, भूमिकास्थान–३ का अध्यक्ष कृष्णप्रसाद बन्जाडे, प्रगति कृषक सहकारी संस्थाका अध्यक्ष भुवानन्द भुसाल, भेटेनरी अस्पताल तथा पशुसेवा विज्ञकेन्द्र राधा पन्थी (पाण्डे) भूमिकास्थान युवा संजालका अध्यक्ष टेकराज भुसालले कृषकलाई ५८ वटा प्रजननयोग्य बाख्रा र २ वटा बोका हस्तान्तरण गरेका थिए ।
सो अवसरमा बोल्दै भेटेनरी अस्पताल तथा पशु सेवा विज्ञ केन्द्र अर्घाखाँचीका प्रमुख विष्णुप्रसाद पौडेलले अनुदानमा दिइएको प्रजननयोग्य बाख्रा तथा बोकाबाट किसानको जीवनस्तरमाथि उठाउन टेवा पुग्ने विश्वास व्यक्त गर्दै बाख्रापालन सजिलो पेशा भएको र राम्रो आयआर्जन गरी अघि बढेर उदाहरणीय बन्न किसानलाई आग्रह समेत गरे ।
भूमिकास्थान–३ का अध्यक्ष कृष्णप्रसाद बन्जाडेले ३ नम्बर वडा बाख्रापालनका लागि उपयुक्त वातावरण भएको बताउँदै बाख्रापालन व्यवसाय अघि बढाउन आग्रह गरेका थिए । प्रगति कृषक सहकारी संस्था भूमिकास्थान १ र २ का अध्यक्ष भुवानन्द भुसालले सहकारीमा आबद्ध कृषकले प्राप्त गरेका प्रजननयोग्य बोका तथा पाठीहरुलाई राम्रोसँग पालनपोषण गरी आर्थिक लाभ लिन लागि अनुरोध गर्दै कृषकहरुलाई केही समस्या परेमा साथ दिन तयार रहेको बताए ।
कार्यक्रममा भूमिकास्थान नगरपालिकाका पशु प्राविधिक हुमाकान्त बन्जाडे, भूमिकास्थान युवा संजालका संयोजक टेकराज भुसाल भेटेनरी अस्पताल तथा पशु सेवा विज्ञ केन्द्रका कर्मचारी, स्थानीय संघसंस्थाका अध्यक्ष तथा प्रतिनिधि तथा कृषकहरुको उपस्थिति रहेको थियो ।
कार्यक्रम सानीपोखरी कृषि तथा पशुपालन कृषक समूहका अध्यक्ष बसन्ता पौडेलको अध्यक्षता र भेटेनरी अस्पताल तथा पशुसेवा विज्ञकेन्द्र अर्घाखाँचीका अधिकृत छैठौं सुन्दरलाल विकको सहजीकरणमा सम्पन्न भएको थियो ।
काठमाडौं : सरोकारवालाहरुले विधेयक निर्माण गर्दा आदिवासी जनजाति महिलाका विषय प्राथमिकतामा साथ राख्न सरोकारवालाले माग गरेका छन् । प्रतिनिधि सभाको महिला तथा सामाजिक मामिला समितिले आज आयोजना गरेको छलफलमा राष्ट्रिय आदिवासी जनजाति महिला मञ्चकी उपाध्यक्ष यशो कान्ति भट्टचन (गौचन)ले आदिवासी जानजाति महिलाका विषय प्राथमिकतामा राख्न सुझाव दिइन् ।
आदिवासी महिला तथा किशोरीको अधिकार सम्बन्धमा संयुक्त राष्ट्र संघीय महिलाविरुद्ध हुने भेद्भाव उन्मुलन समिति (युएन सिड कमिटी) आधारभूत सिफारिस नं ३९ सम्बन्धमा धारणा राख्ने क्रममा उनले महिलाविरुद्धका सबै प्रकारका भेदभाव उन्मुलन गर्ने सम्बन्धी महासन्धी (सिड) सिफारिस राज्यपक्षीय विधायिका, नीति निर्माण गर्ने तह तथा सम्बन्धित सबैलाई मार्ग निर्देशनको रुपमा रहेको बताइन् ।
नयाँ विधेयक बनाउँदा वा मस्यौदा विधेयकमा संशोधन गर्दा सिडको सिफारिसँग मिल्ने गरी बनाउने आधार वा मार्गनिर्देशनको रुपमा प्रयोग गर्न उनले सुझाव दिइन् । उनले भनिन्, “आदिवासी अधिकारसम्बन्धी संयुक्त राष्ट्र सङ्घको घोषणापत्रअनुरुप आदिवासी महिलाको अधिकार, विशेषगरी उनीहरुको आत्मनिर्णयको अधिकार स्पष्ट रुपमा पहिचान गर्न संविधान संशोधन गर्ने भनी गरेको सिफारिसलाई विधायिकाहरुले प्राथमिकता दिनुपर्छ ।”
मञ्चकी अध्यक्ष सुनी लामाले आदिवासी जनजाति महिला हरेक क्षेत्रमा पहुँचभन्दा बाहिर रहेको र उनीहरुको अधिकारको सुनिश्चितता हुनुपर्ने धारणा राखिन् । उनले आदिवासी महिलाको अधिकार दाबी गर्न सिडको सिफारिस कार्यान्वयनको सम्बन्धमा सांसदहरुको दायित्व रहेको बताइन् ।
सांसद रोशन कार्कीले प्रवासमा जाने महिला कामदार बढी शोषित भइरहेका र उनीहरुको विषयमा पनि आवाज उठाउनुपर्ने बताए । उनले अन्तरजातीय विवाहले संस्कृति हराउँदै गएको हो की भन्ने चिन्ता प्रकट गरे । सांसद शान्ति विकले आदिवासी जनजाति महिला मात्र होइन सबै महिला पीडित रहेको जिकिर गरिन् । उनले भनिन्, “आदिवासी जनजाति महिला बढी एकतामा बाँधिएका हुन्छन् जुन अरु समुदायमा त्यति पाइँदैन । सीमान्तकृत महिलाहरुको हक अधिकारको सुनिश्चितता हुनु जरुरी छ ।”
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies