क्यान निर्वाचनः ११ पदका लागि चुनाव हुने, ५ प्रदेश सदस्य निर्विरोध

काठमाडौं : नेपाल क्रिकेट संघको १७ सदस्यीय निर्वाचनका लागि २९ जनाको उम्मेदवारी परेको छ । अध्यक्षको लागि विनयराज पाण्डे र चतुरबहादुर चन्दले उमेदवारी दिएका छन् । उपाध्यक्षमा मिङमा डण्डु शेर्पा र राजुबाबु श्रेष्ठबीच प्रतिस्पर्धा हुने भएको छ ।

कोषाध्यक्षमा पनि दुई जनाको उम्मेदवारी परेको छ । रोशनकुमार सिंह र उपेन्द्र भट्टाराईले कोषाध्यक्षमा उम्मेदवार दिएका हुन् । यसैगरी सचिवमा विनोद कुमार मैनाली र असोकनाथ प्याकुरेलले उम्मेदवारी दर्ता गराएका छन् ।

एक जना महिला सदस्य जयन्ती भट्ट निर्विरोध निर्वाचित भएकी छिन । सात प्रदेशबाट एक एक सदस्यको लागि हुने निर्वाचनमा पाँच सदस्य निर्विरोध निर्विरोध भएका छन् ।

प्रदेश २ बाट दाउद अन्सारी, चारबाट ऋषिराज गौतम पाँचबाट प्रशान्त विक्रम मल्ल, छबाट पदमराज खड्का र सातबाट विक्रम बिष्ट निर्विरोध निर्वाचित भएका हुन ।

३९ जिल्ला र २० प्रदेश प्रतिनिधि गरि कुल ५९ जनासँग मताधिकार रहेको छ । अध्यक्षमा निर्वाचित हुन ३० मतको आवश्यकता पर्दछ । क्यानमा सरकारी हस्तक्षेप सहित विभिन्न कारण देखाउँदै आईसीसीले २०७३ देखि निलम्बन गरेको थियो ।

त्रिकोणात्मक टी-२० सिरिज : पहिलो खेलमा आज नेपाल र जिम्बाबे भिड्दै

काठमाडौं : त्रिकोणात्मक टी-२० क्रिकेट सिरिजको पहिलो खेलमा नेपालले आज टेष्ट राष्ट्र जिम्बावेसँग प्रतिस्पर्धा गर्दैछ । नेपाल र जिम्बाबेबीचको खेल सिंगापुरको इन्डियन एसोसियसनको मैदानमा साँझ सवा पाँच बजे शुरु हुनेछ ।

पहिलो खेलमा जिम्बाबेलाई हराएर सुखद शुरुवात गर्ने प्रयत्नमा नेपाल हुनेछ । तर टेष्ट राष्ट्र जिम्बावेलाई हराउन त्यति सहज भने छैन । जिम्बावे सिंगापुरमा भने सिरिज जित्ने योजना सहित मैदान उत्र्रदै छ । नेपाली टिममा यस पटक अनुभवी खेलाडीहरु ज्ञानेन्द्र मल्ल, शरद भेषवाकर र बसन्त रेग्मी टिम बाहिर रहेका छन् ।

नेपाल र जिम्बाबेबीच टी-२० क्रिकेटमा पहिलो पटक प्रतिस्पर्धा हुन लागेको हो । सिरिज अन्तर्गत नेपालले दोस्रो खेलमा शनिबार सिंगापुरसँग प्रतिस्पर्धा गर्नेछ । डबल राउण्ड रोबिनको आधारमा हुने सिरिजको शीर्ष दुई टोलीले फाइनल खेल्नेछन् ।

क्यानको चुनावी साधारणसभा आजबाट शुरु हुँदै

काठमाडौं : नेपाल क्रिकेट संघ ‘क्यान’को चुनावी साधारणसभा आजबाट काठमाडौंमा हुँदैछ । दुई दिनसम्म चल्ने साधारण सभाले क्यानको नयाँ नेतृत्व चयन गर्नेछ । आज उदघाटन कार्यक्रम र भोली निर्वाचन हुने कार्यसूचि छ ।

नयाँ नेतृत्वका लागि चतुरबहादुर चन्द र विनयराज पाण्डे प्यानल सहित उम्मेदबारी दिने तयारी गरेका छन् । अन्तर्राष्ट्रिय क्रिकेट परिषद ‘आईसीसी’ले निलम्बन गरेको झण्डै साढे तीन वर्षपछि क्यानमा नयाँ नेतृत्व चयन हुन लागेको हो ।

अवैधानिक चुनाव र सरकारी हस्तक्षेपका कारण आईसीसीले क्यानलाई निलम्बन गरेको हो । निर्वाचनसँगै निलम्बन फुकुवाको बाटो खुल्नेछ ।

फिफा वर्ष खेलाडीको अवार्ड मेस्सीलाई

एजेन्सी : बार्सिलोनाका कप्तान लियोनल मेस्सी फिफा वर्ष खेलाडी घोषित भएका छन् । फिफाले गएराति इटालीको मिलान मेस्सीलाई अवार्ड प्रदान गरेको हो । युभेन्ट्सका क्रिस्टियानो रोनाल्डो र लिभरपुलका भान डाइकलाई पछि पार्दै मेस्सी सन २०१८ को उत्कृष्ट खेलाडी भएका हुन् ।

मेस्सीले फिफा अबार्ड छैटोपटक प्राप्त गरेका हुन । महिलातर्फको उपाधि मेगान रापिनोईले जितिन् । पुरुष प्रशिक्षकको अवार्ड लिभरपुलका जोर्गेन क्लोपले र महिलातर्फको अवार्ड जिल एलिसले जिते । वर्षको उत्कृष्ट गोलका लागि दिइने पुस्कास अवार्ड हंगेरीका अठार बर्षि खेलाडी डानियल जेसोरीले प्राप्त गरे ।

महिला गोलकिपर अवार्ड एथ्लेटिको मड्रिडकी गोलकिपर सारी भान भिनेनडलले जितिन् । फिफा फेयर प्ले अवार्ड मार्सेलो बिलसा र लिड्स युनाइटेडले जितेका छन् । लिभरपुलका गोलकिपर एलिसन बेकर फिफा वर्ष खेलाडी घोषणा भए ।

साफ यू–१८ : आज भारत र बंगलादेश भिड्दै

काठमाडौं : साफ यू-१८ च्याम्पियनसिपमा आज भारत र बंगलादेशबीच प्रतिस्पर्धा हुँदैछ । भारत र बंगलादेशबीचको खेल सशस्त्र प्रहरीको हल्चोक मैदानमा दिउँसो तीन बजेपछि हुनेछ ।

समूह बीमा रहेको दुवै टिम सेमिफाइनल प्रवेशका लागि प्रबल दावेदारका रुपमा रहेका छन् । बंगलादेशले पहिलो खेलमा श्रीलंकालाई तीन शुन्यले हराउदै सेमिफाइनल नजिकै पुगिसकेको छ । भारत भने पहिलो खेलमा प्रतिस्पर्धा गर्न लागेको हो ।

समूह बी मा बंगलादेश तनी अंक जोडेर शीर्ष स्थानमा छ । अंक विहिन भारत दोस्रो र श्रीलंका पुछारमा रहेको छ । गत सिजनको उपविजेता भारत यो पटक उपाधि भित्राउने प्रयत्नमा छ ।

यू–१८ साफ च्याम्पियनसिप : नेपाल भुटानसँग ३-०ले पराजित

काठमाडौं : घरेलु टोली नेपालले जारी यू–१८ साफ च्याम्पियनसिप फुटबलमा भुटानसँग लजास्पद हार ब्यहोरेको छ । समूह ए अन्तर्गत आज भएको अन्तिम खेलमा नेपालले भुटानसँग ३–० को हार ब्यहोरेको हो । 

आजको हारसँगै नेपालको सेमिफाइनलमा स्थान बनाउने सम्भावना न्यून भएको छ । विजयी भुटानले भने अन्तिम चारमा स्थान पक्का गरेको छ ।

हलचोक स्थित सशस्त्र प्रहरी बलको मैदानमा खेल अगाडी बर्षा भएपछि दुबै टिमका खेलाडीलाई खेल्न केहि असहज भएको थियो । २९ औं मिनेटमा नेपाल शिसिर खेलीको क्रसमा मनिश थापाले गरेको हेडलाई भुटानका गोलकिपरले बचाए । त्यसको अर्को मिनेटमा फेरी नेपालले मौका पाएको थियो तर त्यसका पनि नेपाली खेलाडी चुक्न पुगे ।

त्यसपछि ३९ औं मिनेटमा नेपालले अर्को मौका सिर्जन गरेको थियो । नितिन थापाको प्रहारलाई फेरीपनि भुटानी गोलकिपरले बचाए । तर ४०औं मिनेटमा नेपालले गोल खान पुग्यो । नेपालको डिफेन्सको लाप्सेसका कारण भुटानका यासी दोर्जीले गोल गर्न सफल भए । उनले दुई पटकको प्रयासमा गोल गरेका थिए ।

एक गोलले पछि परेको नेपालले खेलमा फर्कन दबाव दिएको थियो । तर नेपालको फ्रन्टलाई चुक्न पुग्यो । जसका कारण उसले पहिलो हाफमा एक शुन्यले पछि पर्नुपर्यो ।

पहिलो हाफको तुलनामा नेपालले दोस्रो हाफमा केहि आक्रामक फुटबल खेलेको थियो । नेपालले ५६ औं मिनेटमा राम्रा अवसर पाएको थियो । तर नितिन थापाले बललाई कनेक्ट गर्न सकेनन् ।

६६ औं मिनेटमा भुटानका केन्ली दोर्जीको प्रहार बारमा लागेर फर्किन पुग्यो । त्यसको लगत्तै नेपालले पनि गोलको मौका सिर्जना गरेको थियो । तर नेपालका कप्तान जया गुरुङको हेडको प्रयास पोष्ट नजिकैबाट बहिरीयो ।

८६ औं मिनेटमा भुटानले पेनाल्टीको अवसर पायो । जसलाई केल्जाङ जिग्मीले गोल गर्न सफल भए । त्यसपछि खेलको अन्तिममा उनले नै गोल गर्दै नेपाललाई तीन शुन्यले स्तब्ध बनायो । 

साफ यू-१८ च्याम्पियनसिपमा आज नेपाल र भुटानबीच प्रतिस्पर्धा

काठमाडौं : साफ यू–१८ फुटबल च्याम्पियनसिपमा आज आयोजक नेपाल र भुटान भिड्दै छन् । समुह एमा रहेको नेपालले समुह चरणको अन्तिम खेलमा भुटानसंग प्रतिस्पर्धा गर्न लागेको हो । खेल काठमाडौं हल्चोकस्थित सशस्त्र प्रहरीको मैदानमा दिउसो तीन बजे हुने छ ।

भुटानलाई हराउदै नेपाल सेमिफाइनलमा पुग्ने प्रयासमा छ । समुह चरणको पहिलो खेलमा नेपालले माल्दिभ्ससंग एक–एकको बराबरीमा रोकिएका थिए । समुह चरणमा माल्दिभ्स र नेपालको समान एक अंक छ । नेपाल प्रतियोगिताका अघिल्ला दुई संस्करणको विजेता हो ।

साफ यू-१८ च्याम्पियनसिप : आज बंगलादेश र श्रीलंका भिड्दै

काठमाडौं : काठमाडौंमा जारी तेस्रो संस्करणको साफ यू-१८ फुटबल च्याम्पियनसिपमा आज बंगलादेश र श्रीलंका भिड्दैछन् । समूह बी मा रहेका दुई टोलीविचको खेल दिउसो तीन बजे सशस्त्र प्रहरीको हलचोक मैदानमा हुनेछ । समूह बि मा बलियो टोली भारत समेत रहेको छ ।

प्रतियोगिताको उदघाटन खेलमा नेपाल हिजो माल्दिभ्ससँग एक–एक गोलको बराबरीमा रोकिएको थियो । नेपालले भोली भुटानसँग प्रतिस्पर्धा गर्नेछ ।

साफ यू-१८ च्याम्पियनसिप फुटबल आजदेखि काठमाडौंमा, नेपाल र माल्दिभ्स भिड्दै

काठमाडौं : साफ अण्डर एट्टिन च्याम्पियनसिप आजदेखि काठमाडौंमा सुरु हुँदैछ । उदघाटन खेलमा साविक बिजेता नेपालले माल्दिभ्ससँग प्रतिस्पर्धा गर्दैछ । दुबै टोलीविचको खेल काठमाडौको हल्चोकस्थित सशस्त्र प्रहरी बलको मैदानमा हुने खेल दिउँसो तीन बजेबाट सुरु हुनेछ ।

जय गुरुङको कप्तानीमा रहेको नेपाली टिमले माल्दिभ्सलाई हराएर प्रतियोगिताको सुखद शुरुवात गर्ने लक्ष्य राखेको छ । समूह ए मा रहेको नेपालले दोस्रो खेलमा पाँच गते भुटानसँग प्रतिस्पर्धा गर्नेछ ।

समुह बीमा रहेको भारत, श्रीलंका र बंगलादेश छन् । समुहका शीर्ष दुई टिम सेमिफाईनल प्रवेश गर्नेछन् । यसअघि नेपाल र भुटान भएको अघिल्ला दुई संस्करणको प्रतियोगिता नेपालले जितेको थियो ।

त्रिकोणात्मक सिरिजका लागि नेपाली टोलीको घोषणा

काठमाडौं : सिंगापुरमा आयोजना हुने तीन राष्ट्रबीचको त्रिकोणात्मक टी–ट्वान्टी क्रिकेट सिरिजका लागि नेपाली राष्ट्रिय क्रिकेट टोलीको घोषणा भएको छ । मातृशोकका कारण घर फर्किएका प्रशिक्षक उमेश पटवाल बुधबार नेपाल फर्किएकाले आज नेपाली टिमको घोषणा गरिएको हो ।

नेपाल क्रिकेट संघ क्यान आईसीसीको प्रतिबन्धमा परेकाले प्रशिक्षक, कप्तान र आईसीसीका प्रतिनिधिले टिम छनोट गर्दै आएका छन् । दुवै सिरिजका लागि घोषणा गरिएको १५ सदस्यीय टिममा कप्तान खड्का सहित दीपेन्द्रसिंह ऐरी, सोमपाल कामी, करण केसी, विनोद भण्डारी, ललितनारायण राजवंशी,पवन शर्राफ, सन्दीप लामिछाने, सन्दीप जोरा, अभिनास वोहरा, कुशल मल्ल, इशान पाण्डे, रोहित पौडेल, आशिफ शेख रहेका छन् ।

नियमित उप कप्तान ज्ञानेन्द्र मल्लले यो सिरिजमा सहभागिता नजनाउने भएपछि उपकप्तानको जिम्मेवारी दीपेन्द्रसिंह ऐरीले पाएका छन् । यसैगरी शरद भेषावकर र बसन्त रेग्मीलाई विश्राम दिइएको छ । १५ सदस्यी टिममा इशान भने पहिलो पटक टिममा पर्न सफल भएका छन् । नेपालले सिंगापुरमा घरेलु टिमसहित जिम्बाब्वेविरुद्ध सिरिज खेल्दै छ भने त्यसपछि आयरल्याण्ड, नेदरल्याण्ड्स, हङकङ र ओमनासँगको सिरिज खेल्ने छ ।