जनकपुरधाम : जनकपुरधाम उपमहानगरपालिका भित्र संचालित निजी विद्यालय तथा कलेज सञ्चालकहरूले अनिश्चितकालीन हड्तालमा उत्रिएका छन् । उनीहरूले हड्ताल गर्दा करिब दुई सय विद्यालय तथा कलेजहरूमा पढाइ अवरुद्ध भएको छ ।
निजी विद्यालयका संगठनहरू हिसान, प्याबसन तथा एनप्याबसनले आइतवार संयुक्त विज्ञप्ति जारी गरी कक्षा ११ र १२ मा अध्ययनरत्त विद्यार्थीहरूको हकमा जनकपुरधाम उपमहानगरपालिका र नेपाल विद्यार्थी संघबीच भएको सम्झौता सच्याउन आग्रह गरिए पनि बेवास्ता गरेको भन्दै सोमवारदेखि विद्यालय तथा कलेजहरू अनिश्चितकालका लागि बन्द गरेका हुन् ।
उनीहरूको यस निर्णयमा मधेश प्याबसनले समेत समर्थन जनाएको छ । जनकपुरधाम नगर भित्र सञ्चालित संस्थागत विद्यालयहरूमा ‘छात्रवृत्ति वितरण व्यवस्थापन समिति’ को छात्रवृत्ति वितरण व्यवस्थापन कार्यविधि बमोजिम सिफारिस भएका विद्यार्थीहरूबाट भर्ना शुल्क, मासिक शुल्क र परीक्षा शुल्कबाहेक अन्य शुल्क लिन सक्ने व्यवस्था रहेको र सोही अनुसार गर्दै आए पनि दुई महिना पछि फरक किसिमको निर्णय भएको हुँदा सो शुल्कमा पढाउन नसकिने उनीहरूको भनाइ छ । उनीहरूले यो निर्णयलाई सच्याउन उपमहानगरसँग माग गरेका छन् ।
‘उपमहानगरले मागका विषयमा पहल नगरेकाले बाध्य भएर निजी विद्यालयहरू अनिश्चितकालका लागि बन्द गरेका हौं’, एनप्यावसनका अध्यक्ष दीपक कुमार ठाकुरले भने । उपमहानगरपालिले मागको सुनवाइ नगरे चरणबद्ध आन्दोलनमा जाने पनि उनले बताए ।
आन्दोलनलाई सक्रिय बनाउन प्रथम चरणमा उनीहरूले उपमहानगर विरुद्धमा शैक्षिक संस्थाहरूमा कालो झण्डा लगाउने, शिक्षकहरूले कालो पट्टी बाँधेर उपमहानगरपालिकाको कार्यालयमा धर्ना दिने योजना बनाएका छन् ।
केही दिन अघि हिसान, प्याबसन तथा एनप्याबसनले संयुक्त रूपमा पत्रकार सम्मेलन गरी उपमहानगरपालिकाले विद्यालय भर्ना शुल्क निर्धारणसम्बन्धी गरेको निर्णयप्रति आपत्ति जनाउँदै फिर्ता लिन मागसमेत गरेको थियो ।
उनीहरूले शैक्षिक आन्दोलनबाट विद्यार्थीलाई हुने क्षतिको सबै जबावदेही उपमहानगरलाई लिनुपर्ने पनि बताएका छन् ।
मोडेल मल्टिपल कलेजका संचालक वीरेन्द्र साहले उपमहानगरले एउटै विषयमा दुई मितिमा फरक फरक निर्णय गरी आन्दोलनको लागि हामीलाई बाध्य पारेको आरोप लगाए । ‘१७ वटै शैक्षिक संस्थाले शैक्षिक सत्र भर्ना पछि हिसाब र अडिट गरिसकेको अवस्थामा गत दुई आर्थिक वर्ष २०८०/०८१ र २०८१/०८२ को रमक फिर्ता गर्न पत्र काटन लगाएर हामीलाई असंतुष्ट पार्न खोजेको छ,’उनले भने ।
एनप्याबसन धनुषाका अध्यक्ष आशिष झाले फरक–फरक मितिमा फरक–फरक कलेजलाई गरिएको पत्राचारअनुसार निजी कलेजहरूले दुई वटा शत्रमा छात्रवृत्तिमा भर्ना भएका विद्यार्थीहरूलाई अतिरिक्त रकम फिर्ता गर्नुपर्ने असम्भव विषय उठाएर शैक्षिक संस्थालाई आन्दोलन गर्न उस्काएको आरोप लगाए ।
कार्यविधिमै त्रुटी
उपमहानगरले विद्यालय र कलेजलाई गरेको पत्राचारमा उल्लेखित २०७४ को विद्यालय छात्रवृत्ति वितरण कार्यविधिको अनुच्छेद २.४ मा छात्रवृत्तिलाई परिभाषित गरेको छ भने सोही कार्यविधिको अनुच्छेद ५.३ (छात्रवृत्तिमा विद्यार्थी छनोट गर्ने प्रक्रिया) को बुँदा नं. ङ मा ‘यसरी सिफारिस भएको विद्यार्थीहरूको भर्ना शुल्क मासिक शिक्षण शुल्क र परीक्षा लिन पाइने छैन’ भनेर मात्र उल्लेख छ । यसको अर्थ त्यस बाहेकका शुल्क विद्यालयले लिन पाउने दर्शाउँछ ।
