-सानुराज डंगोल/मध्यान्ह
काठमाडौं : न्हुज खलः टोखाको आयोजनामा देशव्यापी राष्ट्रिय कविता महोत्सव सम्पन्न गरेको छ । ‘बन्दैछ मेरो देश, सहभागीताख मेरो’ नारा दिएर आयोजना गरिएको महोत्सवमा देशभरका युवा कविहरूले राष्ट्र र राष्ट्रिय एकताबारेका कविता वाचन गरेका थिए ।
प्रतियोगितामा अर्घाखाँचीका किशोर आचार्यले प्रथम स्थान हासिल गरेका छन् । आचार्यको ‘देश बाहिरबाट देश’ शीर्षकको कविता उत्कृष्ट घोषित भएको हो । उनी ५० हजार रुपैयाँ नगद र प्रमाणपत्रसहित पुरस्कृत भएका छन् ।
झापाका केशव भट्टराई र उदयपुरका जीवन आरोहीले क्रमशः द्वितीय र तृतीय पुरस्कार जितेका छन् । द्वितीय स्थान हासिल गर्ने भट्टराईले ३० हजार र तृतीय स्थान बनाउने आरोहीले २० हजार रुपैयाँबाट पुरस्कृत भए ।
पोखराका प्रकाश आचार्य, रौतहटका मनोजकुमार विश्वकर्मा र काठमाडौँ बत्तीसपुतलीका सुनीता भेटवालले सान्त्वना स्थान हासिल गरेका छन् । शान्त्वना पुरस्कार जित्ने तीनै जनालाई प्रतिव्यक्ति रु. १० हजारका दरले परस्कृत गरिएको आयोजकले जनाएको छ ।
प्रतियोगितामा एक सय प्रतिस्पर्धीले भाग लिएका थिए । तीमध्येबाट प्रथम चरणमा ५०, द्वितीय चरणमा २५, तृतीय चरणमा १५ गर्दै चौथो चरणमा १५ जनाबाट उत्कृष्ट छ छनोट गरिएको हो ।
काठमाडौंका राष्ट्रीय सभागृहमा आयोजना गरिएको सो कविता महोत्सवको आतिथ्यता उपप्रधान तथा रक्षामन्त्री ईश्वर पोखरेलले गरेका थिए । कार्यक्रममा बोल्दै पोखरेलले कविले कवितामार्फत व्यक्त गरेको राष्ट्रभक्तिल जागरण र रूपान्तरणमा मद्दत मिल्ने बताए । ‘प्राकृतिक स्रोत र साधनको उपयोग गर्दै युवाहरु उत्पादनमूलक कार्यमा जोडिनुपर्छ,’, उपप्रधानमन्त्री पोखरेलले भने ।
प्रतियोगिता निर्णायक मण्डलका संयोजक साहित्यकार श्यामलले सहभागी लिएका ६० प्रतिशतका कविता पूर्ण रूपमा कविता रहेको भन्दै प्रतियोगीको प्रशंसा गरेका थिए ।
नेपाल प्रज्ञा–प्रतिष्ठानका सदस्य सचिव जगतप्रसाद उपाध्यायले कविताले छिट्टै मानिसलाई आकर्षित बनाउने बताउँदै अझ छन्द लयमा लेखिएका कविताले मानिसको मानसपटलमा राम्रो प्रभाव छाड्ने विचार व्यक्त गरे ।
सो अवसरमा रु ५० हजार र सम्मानपत्रका साथ न्हुज प्रगतिशील साहित्य पुरस्कार पूर्ण वैद्यलाई प्रदान गरिएको थियो । संस्थाका अध्यक्ष दीपेन्द्र श्रेष्ठले समाज सुधारमा युवा वर्गलाई आकर्षण गर्ने उद्देश्यका साथ विभिन्न रचनात्मक गतिविधि सञ्चालन गर्ने गरिएको जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies