रौतहट : रौतहटलाई पूर्ण खोप सुनिश्चित जिल्ला घोषणा गरिएको छ । गरुडामा एक कार्यक्रमका बीच रौतहटलाई पूर्ण खोप सुनिश्चित जिल्ला घोषणा गरिएको हो ।
जिल्लामा रहेका १८ वटा स्थानीय तह पूर्ण खोप सुनिश्चितता तथा दिगोपना पालिका घोषण भएपछि रौतहटलाई पूर्ण खोप सुनिश्चितता तथा दिगोपना जिल्ला घोषणा गरिएको हो । जिल्लामा जन्मेदेखि १५ महिनासम्मका सबै बालबालिकाले पूर्ण खोप लगाएको जिल्ला स्वास्थ्य कार्यालय रौतहटका प्रमुख विपिन साहले जानकारी दिए ।
मधेश प्रदेश सरकारका स्वास्थ्य राज्यमन्त्री केशव रायको सहभागितामा बुधबार जिल्लालाई पूर्ण खोप सुनिश्चितता तथा दिगोपनाको प्रमाणपत्र प्रदान गरिएको छ ।
बालबालिकाले बिसिजी, रोटा, पिसिभी, डिपिटी, हेप– बि, एपआइपीभी, पोलियो दादरा, रुबेला, जापनिज जेइलगायत १३ प्रकारका खोप लगाएको स्वास्थ्य कार्यालय रौतहटले जनाएको छ ।
कार्यक्रममा पूर्ण खोप सुनिश्चित जिल्ला घोषण गर्न महत्वपूर्ण भूमिका निर्वाह गर्ने १८ पालिकालाई सम्मान पत्र र प्रशंसा पत्रले सम्मान गरिएको थियो भने अतिथि तथा सञ्चारकर्मीहरुलाई पनि सम्मान गरिएको थियो ।
