काठमाडौं : बिहीबार बिहान नेकपाका दुई अध्यक्ष केपी शर्मा ओली र पुष्पकमल दाहाल प्रचण्ड बीच छलफल हुने भनिएको थियो । बुधबार साँझ बस्ने भनिएको छलफल स्थगित भएको जानकारी गराउँदै प्रधानमन्त्री ओलीकै प्रेस सल्लाहकार सूर्य थापाले बिहीबार बिहान छलफल हुने बताएका थिए । तर, बिहीबार दिनभर नै दुई अध्यक्ष ओली र प्रचण्डबीच भेटवार्ता हुन सकेन ।
दुई अध्यक्ष बीचकै भेटवार्ता अनिश्चित भएपछि स्थायी कमिटी बैठक पनि अनिश्चित बनेको छ । किनभने, साउन १३ गतेदेखि अनिश्चित बनेको स्थायी कमिटी बैठकलाई टुंगोमा पुर्याउँदै पार्टी विवाद हल गर्न भनेर साउन १८ गतेदेखि दुई अध्यक्ष बीच छलफल शुरु भएको थियो । साउन १८ गते चार घण्टा, १९ गते दुई घण्टा र २० गते एक घण्टा दुई अध्यक्ष बीच छलफल भयो । प्रचण्डले ओलीसँग एक्लै नबस्ने भनेपछि बरिष्ठ नेता झलनाथ खनाल र संसदीय दलका उपनेता सुवास नेम्वाङ समेत छलफलमा भाग लिदै आएका थिए । खनाल प्रचण्डको तर्फबाट र नेम्वाङ ओलीको तर्फबाट छलफलमा भाग लिदै आएका थिए ।
तर, बुधबार प्रचण्ड सहित बरिष्ठ नेता झलनाथ खनाल, बरिष्ठ नेता माधवकुमार नेपाल र प्रवक्ता नारायणकाजी श्रेष्ठले बानेश्वरमा एक अनौपचारिक कार्यक्रम राखेपछि त्यो छलफल समेत रोकिएको छ ।
ओली निकट एक नेताका अनुसार, चार नेताले पत्रकारहरुलाई पार्टीभित्रको विवादबारे जानकारी दिएपछि सम्वाद जटिलतातिर बढेको हो । “पार्टी विवाद हल गर्न छलफल भइरहेको छ । तर, नेताहरुले पत्रकारहरुसँग विवादबारे जानकारी गराउनुले प्रधानमन्त्री आक्रोशित बन्नुभएको छ”, ती नेताले भने । बुधबार साँझ नै प्रधानमन्त्री ओली राष्ट्रपति विद्यादेवी भण्डारीलाई भेट्न शितलनिवास पुगेका थिए । शितल निवासमा भएको छलफलबारे कुनै जानकारी गराइएको छैन । तर, त्यसको केही संकेत भने दिइसकेको छ । अब ओलीले पनि कुनै कदम चाल्ने तयारीमा रहेको एक नेताले बताए ।
कोरोनाबारे छलफल गर्न भनेर विज्ञहरुलाई बोलाएर पार्टीकै नेताहरुको विरोध जनाएको भोलिपल्ट प्रचण्ड सहितका नेताहरुले आफ्नो कुरा पत्रकारहरुलाई राखेका छन् । अर्थात्, यसले नेकपा भित्रको संकट झनै बढेर जाने संकेत देखिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies