अर्घाखाँची : पूर्वी नवलपरासीको गैंडाकोट उत्कृष्ट नगरपालिका घोषित भएको छ । नेपाल नगरपालिका संघको ३२ औँ वार्षिकोत्सवको अवसरमा काठमाडौंमा बिहीबार आयोजित एक भव्य कार्यक्रममा गैंडाकोट नगरपालिकालाई सम्मान गरिएको हो । प्रधानमन्त्री केपी शर्मा (ओली)ले काठमाडौंको सोल्टी होटलमा आयोजित विशेष समारोहमा गैंडाकोट नगरपालिकालाई सम्मान पत्रले उत्कृष्ट नगरपालिकाको रुपमा सम्मान गर ।
गैंडाकोट नगरपालिका नगरप्रमुख मदनभक्त अधिकारी, उपप्रमुख शान्ति कोइराला र प्रमुख प्रशासकीय अधिकृत झविन्द्र खनालले संयुक्त रुपमा पुरस्कार ग्रहण गरेका नगरपालिकाले जनाएको छ । स्थानीय आर्थिक विकास र सुशासनको क्षेत्रमा प्रभावकारी रुपमा कार्यसम्पादन गरेको भन्दै गैंडाकोट नगरपालिकासहित ठाकुरद्धारा नगरपालिका बर्दिया, सिद्धार्थनगर नगरपालिका रुपन्देही, कलैया उपमहानगरपालिका बारा र मध्यपुर ठिमी नगरपालिका भक्तपुरलाई सम्मान गरिएको छ ।
गैंडाकोट नगरपालिकाका नगरप्रमुख मदनभक्त अधिकारीले नगरपालिकाले पाएको अवार्ड सबै नगरवासीहरुको अवार्ड भएको बताए । स्थानीय सरकारले नागरिकको मर्मअनुसार काम गरेकोले आज नगरपालिका पुरस्कृत भएको भन्दै उनले खुसी व्यक्त गरे । नगरपालिकाका प्रमुख प्रशासकीय अधिकृत झविन्द्र खनालले नेपाल नगरपालिका संघले प्रदान गरेको उत्कृष्ट नगरपालिका पुरस्कारले आफुहरुमा उत्साह र चुनौती दुवै बढेको बताए ।
‘हामिलाई यो अवार्डले उत्साहित त बनाएको छ नै आगामी दिनमा यसलाई निरन्तरता दिनुपर्ने चुनौती समेत थपिएको छ,’ खनालले भने, ‘अब यस नगरपालिकालाई हामीले सुशासन, पारदर्शिता मुस्कानसहितको सेवा दिने नेपालको नमुना नगरपालिका बनाउँछौं ।’
