काठमाडौं : वैदेशिक रोजगार व्यवसायीहरुले सुधारका विभिन्न २१ बुँदे माग राख्दै आइतबार काठमाडौंको बुद्धनगरस्थित वैदेशिक रोजगार विभागको कार्यालय घेराउ गरेका छन् । विभागका महानिर्देशक कुमार दाहाल व्यवसायीका समस्या समाधान गर्ने आफ्ना विगतका सार्वजनिक प्रतिवद्धता विपरीत अनुगमनका नाममा आतंक सिर्जना गर्न खोजेको भन्दै व्यवसायीहरुले विभाग घेराउ गरेका हुन् ।
समस्या समाधानका २१ सुत्रीय लिखित माग राखेको संघले महानिर्देशकविरुद्ध १७ वटा आरोप लगाएको छ । संघले महानिर्देशक दाहालले एकलौटी र स्वेच्छाचारी ढंगले निर्णय गरी व्यवसायीलाई अनावश्यक जरिवाना तिराएको, व्यवसायीलाई सूचना नदिई आधार र कारण बिना धरौटी कट्टा गर्ने गरेको, बिना कारण कम्पनीको काम कारोवार रोक्का गर्ने गरेको , अनुगमन गर्न जाँदा आफु अनुकुलका सञ्चारसंस्थालाई लिएर गई अनुगमन भन्दा प्रचारवाजी गरेको, व्यवसायीविरुद्ध अपमानजनक अभिव्यक्ति दिएको, व्यवसायीहरुले जायज तर्क राखी विभागका महानिर्देशकले भनेका विषयमा खण्डन गर्दा वा विमती जनाउँदा जेल हाल्ने देखि ईजाजत खारेज गर्ने धम्की दिएको आरोप लगाएको छ ।
त्यसैगरी संघले विभागले सञ्चालनमा ल्याएको वैदेशिक रोजगार सूचना प्रणाली (फेइम्स) को समस्या समाधान नगरेको, कोभिड–१९ को समस्याका कारण फर्केका कामदारको उजुरी गुनासो व्यव्स्थापना गर्न कार्यविधि बनाउन माग गरिएकोमा त्यसलाई बेवास्ता गरिएको, शाखा कार्यालय खोल्न अनुमति दिने प्रक्रिया अगाडि नबढाएको, विगत १ वर्षदेखि जिट्को ईजाजत माग गरिएकोमा सुनुवाइ नगरेको, कम्पनीकोविरुद्ध परेका उजुरीको प्रतिलिपि नदिएको, उजुरीको सम्बन्धमा व्यवसायीले पेश गरेको लिखित जवाफ नहर्ने गरेको, ईजाजत नवीकरणका लागि म्यादभित्रै दस्तुर तिरी कागजात संलग्न गरेपनि ईजाजत नवीकरण नगरिदिएको, व्यवसायीहरुलाई अपमानजनक व्यवहार गरिएको, आफ्नो मातहतमा गर्न सकने निर्णय पनि नगरी मन्त्रालयलाई देखाई समस्याबाट भाग्न खोजेको आरोप महानिर्देशक दाहालमाथि लगाएको छ ।
संघले आरोपसहितको ज्ञापनपत्र बुझाएपछि केहीबेर महानिर्देशकको कार्यकक्षमा आरोप प्रत्यारोपको वातावरण बनेको थियो । संघले बाध्यताबश सडकमा आउनु परेको भन्दै राखेका मागहरु तत्कालै सम्बोधन नभएको खण्डमा थप चरणवद्ध आन्दोलनका अन्य कार्यक्रमहरु गर्न बाध्य हुने भन्दै महानिर्देशक दाहालको ध्यानाकर्षण गराएको छ ।
संघका २१ सुत्रीय मागमा वैदेशिक रोजगार सूचना प्रणालीमा कमजोरी तत्काल हटाउनु पर्ने, शाखा कार्यालय खोल्न स्विकृति दिनुपर्ने, म्यादभित्रै निवेदन दर्ता गर्ने कम्पनीको ईजाजत नवीकरण गरिदिनुपर्ने, भ्रामक प्रचार–प्रसार र अनुचित मोलतोल (ब्ल्याक मेलिङ) तत्काल बन्द गर्नुपर्ने, व्यवसायीविरुद्धका अपमानजनक व्यवहार रोक्नुपर्ने, कोभिड–१९ को कारणले फर्कने कामदारको समस्या सम्बन्धमा मेलमिलाप समिति गठन गरी उजुरीको वास्तविकता पहिचान गरेर समस्या समाधान गरिनुपर्ने, जरिवाना गर्ने, धरौटी कट्टा गर्ने र कम्पनीको काम कारोवार रोक्का गर्ने कार्य सम्बन्धमा उजुरीमा पहिले ७ दिने पत्र, दोश्रो पटक ३ दिने पत्र दिने र स्पष्टिकरण नदिएमा २४ घण्टे पत्र पठाउने र संघ प्रतिनिधिको रोहवरमा मेलमिलाप गराउने विगतको व्यवस्थालाई निरन्तरता दिनुपर्ने माग गरेको छ ।
त्यसैगरी संघले हालको सेवा शुल्क दश हजारलाई परिवर्तन गरी कामदारले पाउने एक महिनाको तलब बराबरको रकम सेवा शुल्क बापत लिन पाउने र रोजगारदाता कम्पनीले हवई टिकट उपलब्ध नगराएको खण्डमा कामदार स्वयंले टिकट काटी जान पाउने व्यवस्था गर्नुपर्ने, वार्षिक सय जना कामदार नपठाए ईजाजतपत्र नवीकरण नहुने अव्यवाहारिक व्यवस्था खारेज गर्नुपर्ने, कोभिडपछिको वैदेशिक रोजगार व्यवसायलाई सुचारु गर्न व्यवसायीहरुले जम्मा गरेको नगद धरौटीको रकम सापटी स्वरुप चलाउन पाउने व्यवस्था गनुपर्ने माग गरेको छ ।
संघले राखेका अन्य मागहरुमा जिट्को जापान, घरेलु कामदारको छुट्टा छुट्टै ईजाजतपत्रको व्यवस्था हटाउनु पर्ने, विभिन्न बहानामा ल्याइएका अव्यहारिक कार्यविधिहरुको पुनरावलोकन, नेपाली दूतावास नभएको मुलुकहरुमा मागपत्र प्रमाणीकरणको वैकल्पिक उपाय गरेर मागपत्र प्रमाणीकरणलाई पारदर्शी र सहज गराउनु पर्ने, रोजगारदाता मुलुकहरुसँगको छलफल र सहमति बिना एकतर्फीरुपमा बढाइएको तलबलाई सम्बन्धित मुलुकहरुको समन्वयमा समायोजन गनुपर्ने, वैदेशिक रोजगार व्यवसायी कोष तत्काल सञ्चलानमा ल्याउनुपर्ने रहेका छन् ।
त्यस्तै अन्य मागहरुमा व्यवसाय गर्न नचाहने व्यवसायीको धरौटीलाई सहजरुपमा फिर्ता दिने व्यवस्था गरिनु पर्ने, व्यवसायीका एकाघरका परिवार वैदेशिक रोजगार सम्बन्धी अन्य संस्था सञ्चान गर्न पाउने व्यवस्था गरी कानूनी प्रवन्ध गरिनु पर्ने, रोजगारदाता कम्पनीले कामदारलाई प्रदान गरेको करारपत्रमा उल्लेख गरिएको पदलाई आधार मानी अन्तिम श्रम स्वीकृति दिनु पर्ने व्यवस्था गर्ने लगायतका माग राखेको छ ।
घेराउका क्रममा विभाग अगाडि आयोजित व्यवसायीको कोणसभालाई अध्यक्ष विष्णुप्रसाद गैरे, प्रथम उपाध्यक्ष कमल तामाङ, महासचिव सुजित कुमार श्रेष्ठ, नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र प्रसाद ढकाल, पूर्व अध्यक्ष प्रज्ञान न्यौपानेलगायतका व्यवसायीहरुले सम्बोधन गरेका थिए ।
अध्यक्ष गैरेले कोरोना भाइरस संक्रमणले सिर्जना गरेको असहज परिस्थितिले धरासायीको अवस्थामा पुगेको वैदेशिक रोजगार व्यवसायलाई अविभावकत्व दिनुपर्नेमा विभागले बिना कारण दुःख दिने काम गरेको बताए । अध्यक्ष गैरेले उजुरीको छानविन नगरी विना कारण धरौटी कट्टा गर्ने, व्यवसायीहरुलाई अनावश्यक जरिवाना तिराउने, कम्पनीको कामकारवाही रोक्का राख्ने तथा अनुगमनका नाममा व्यवसायीलाई तर्साउने र अपमानजनक व्यवहारमा उत्रने गरेपछि आन्दोलनमा उत्रिन बाध्य भएको बताए ।
प्रथम उपाध्यक्ष तामाङले देशको अर्थतन्त्रलाई धानेको वैदेशिक रोजगार क्षेत्रलाई विभागले नङ्ग्याउने काम गरेको बताए । उनले २ करोड धरौटी राखेर व्यवसाय गर्ने व्यवसायीलाई सम्मान नगर्ने शैलीप्रति आपत्ति जनाउँदै ४० लाख नेपालीले रोजगारी पाइरहेकोे पेशा र व्यवसायीलाई विभागले सम्मान गर्नुपर्ने माग राखे ।
संघका महासचिव श्रेष्ठले व्यवसायीहरुको कार्यालय अनुगमन गर्ने विभागको अधिकार भएपनि विभागले त्यसलाई दुरुपयोग गरेको आरोप लगाए । विभागका महानिर्देशकको निर्णयबाट समाधान हुन सक्ने विषयलाई पनि श्रम, रोजगार तथा सामाजिक सुरुक्षा मन्त्रालयमा पठाएर व्यवसायीलाई दुःख दिने र व्यवसायीको कार्यालय अनुगमनका नाममा सञ्चारमाध्यम पनि लिएर गई व्यवसायीको मान मर्दन र अपमान गर्ने गरिएको भन्दै त्यसविरुद्ध आन्दोलनमा उत्रिएको बताए ।
एसोसिएसन अध्यक्ष ढकालले व्यवसायी एकतामा जोड दिँदै विभागले वैदेशिक रोजगारलाई सुधार र व्यवस्थित गर्न विगतका सहमतिहरुको कार्यान्वयन गर्नुपर्ने माग गरे । एसोसिएसनका पूर्व अध्यक्ष न्यौपानेले सरकारले तोकेको हालको सेवा शुल्क अत्यन्तै अव्यहारिक रहेको भन्दै तत्काल त्यसमा परिमार्जन हुनुपर्ने बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies