सागर भण्डारी/मध्यान्ह
गुल्मी : मुसिकोट नगरपालिकाले किशोरीहरुलाई आइरन चक्की खुवाउन शुरु गरेको छ । किशोरीहरुको स्वास्थ्यमा ध्यान दिँदै पोषणको दिगो विकास लक्ष्य हासिल गर्न किशोरीहरुलाई आइरन चक्की खुवाउन थालिएको नगरपालिकाले जनाएको छ ।
प्रजनन् उमेरका किशोरीहरुको स्वास्थ्य अवस्थालाई ध्यानमा राखेर रक्तअल्पतासहित अन्य विभिन्न रोगबाट बच्न आइतबारदेखि नगरपालिका भित्र रहेका सम्पूर्ण किशोरीहरुलाई आइरन चक्कीसँगै जुकाको औषधि खुवाउन शुरु गरिएको नगरपालिकाका स्वास्थ्य संयोजक डिबी जिसीले जानकारी दिए ।
१० देखि १९ वर्ष उमेर समुहका किशोरीहरुलाई आइरन चक्की खुवाउन विद्यालय र स्वास्थ्यकर्मीहरुलाई जिम्मा दिइएको उनले बताए । जसअन्तर्गत विद्यालयमा अध्ययनरत किशोरीहरुलाई विद्यालयबाटै र विद्यालय भन्दा बाहिर रहेका किशोरीहरुलाई स्वास्थ्य स्वयंसेविकाहरुको पहलमा आइरन चक्की खुवाउन शुरु गरिएको बताइएको छ । शुक्रबार नगरपालिका अन्तर्गत रहेका विद्यालयका प्रधानाध्यापक र स्वास्थ्य चौकीका प्रमुखहरुलाई प्रशिक्षण समेत दिइएको थियो ।
आइतबार नगरपालिकाका ९ वटै वडामा २७ वटा सामुदायिक तथा संस्थागत विद्यालयका झण्डै १ हजार ९ सय ५० जना किशोरीहरुलाई एकैसाथ आइरन चक्की र जुकाको औषधी खुवाइएको छ । केन्द्रीय सरकारको आर्थिक सहयोग र मुसिकोट नगरपालिकाको समन्वयमा आइरन चक्की खुवाउन थालिएको हो । किशोरीहरु १० देखी १९ वर्ष भित्र रजस्वला हुने र त्यस बखत बढी रगत बग्ने हुँदा रक्तअल्पता नहोस् भनेर आइरन चक्की खुवाउन लागिएको स्वास्थ्य सयोंजक जिसीले जानकारी दिए ।
उक्त आइरन चक्की पहिलो १३ हप्तामा १३ दिन १ १ वटा क्याप्सुल खुवाईने र फेरी १३ हप्ता ग्याप गरी सोही मात्रामा क्याप्सुल खुवाईने जानकारी दिए । यस कार्यक्रमले बाल मृत्युदर र नवजात शिशु मृत्युदर कम गर्न समेत महत्वपूर्ण भूमिका निर्वाह गर्ने उनले बताए । महेन्द्र आदर्श नमुना माध्यमिक विद्यालयमा अध्ययनरत किशोरीहरुलाई आइरन चक्की खुवाई नगरपालिका भर आइरन चक्की खुवाउने कार्यको सुरुवात गरिएको हो ।
उक्त कार्यक्रममा मुसिकोट नगरप्रमुख सोमनाथ सापकोटा, प्रशाशकीय अधिकृत खिमानन्द भुषाल,स्वास्थ्य शाखा प्रमुख डिबी जिसी विद्यालय व्यवस्थापन समिति अध्यक्ष सुदर्शन शाक्य, प्रधानाध्यापक देवीराम शर्मा लगायत विद्यालयका शिक्षक र विद्यार्थीहरुको उपस्थिति रहेको थियो ।
यसैबीच मालिकामा गाउँपालिकामा पनि आइतबार देखि आइरन चक्की खुवाउन शुरु गरिएको छ । सुआहारा कार्यक्रमको प्राविधिक सहयोगमा गाउँपालिका अन्तर्गत रहेका उक्त समुहका किशोरीहरुले अध्ययन गर्ने १७ वटा विद्यालयमा आइरन चक्की खुवाइएको छ ।
जनप्रतिनिधि, विद्यालयका शिक्षक र विद्यार्थीहरुको उपस्थितिमा किशोरीहरुलाई आइरन चक्की खुवाईएको एकीकृत ग्रामिण विकास समाजद्धारा सञ्चालित सुआहारा कार्यक्रमका पालिका स्तरीय पोषण सहजकर्ता भिम बहादुर विष्टले जानकारी दिए । किशोरीहरुको स्वास्थ्य अवस्था राम्रो भए जीवन चक्र पनि राम्रो हुने भएकाले सुआहाराले यस्तो कार्यक्रमको अवधारणा लिएको उनले बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies