प्रतिनिधिसभा विघटन संवैधानिक कू भएको निष्कर्ष सहित नागरिक समाज चरणबद्ध आन्दोलनमा छ । माइतीघर मण्डलाबाट शुरु भएको शान्तिपूर्ण आन्दोलन बालुवाटार पुगेको छ । तर, माइतीघरमा शान्तिपूर्ण चलिरहेको नागरिक आन्दोलन बालुवाटार पुग्नासाथ अशान्त बन्यो । सोमवार नागरिक मार्चपासमा प्रहरीले हस्तक्षेप गरेको छ । पञ्चायत र राजतन्त्र विरुद्ध सडकमा उत्रिएको नागरिक अगुवाहरुलाई धरपकडमा परे भने प्रहरीको बुथ, लाठी र पानीको फोहोरा हानियो । नागरिक अगुवा कृष्ण पहाडी लगायत २६ जना बढीलाई धरपकड गरियो । बरिष्ठ पत्रकार नारायण वाग्ले, पञ्चायत विरोधी आन्दोलनका अगुवा रघुजी पन्त लगायतलाई पानीको फोहोरा प्रहार गरिएको छ । उमेर निकै पाका अगुवाहरुको शान्तिपूर्ण प्रदर्शनमाथि गरिएको प्रहरी हस्तक्षेप अलोकतान्त्रिक, असंवैधानिक र निन्दनीय हो ।
मानवीय संवेदना समेत ख्याल नगरी शान्तिपूर्ण प्रदर्शनमा उत्रिएकाहरुमाथि गरिएको हस्तक्षेप यो सरकार झनै निरंकुश बन्दै गएको प्रमाण हो । हिजो तानाशाही राजतन्त्र विरुद्ध लडेका यो पुस्ता आफैमा पनि यो व्यवस्थाका लागि इज्जत र गौरवका पात्रहरु हुन् । उनीहरुको यथोचित सम्मान जरुरी थियो । तर, जनक्रान्तिबाट प्राप्त उपलब्धी खतरामा परेको निष्कर्षका साथ शान्तिपूर्ण आन्दोलनमा उत्रिएकाहरुको माग सुनुवाइ हुनुपर्ने थियो । अझ संविधान र व्यवस्था नै संकटमा पार्ने कार्य आफैमा निन्दनीय थियो । अझ त्यसको विरुद्धमा आवाज उठाउने पंक्तिलाई जस्तो तरिकाले हस्तक्षेप र आक्रमण गरियो, यसको लक्षण प्रतिगामी नै हो । त्यसै पनि असंवैधानिक कदम चालेर संसद् विघटन गर्ने र अर्कातिर त्यसका विरुद्ध बोल्नेहरुलाई अनेक आरोप लगाउने देखि धरपकड र हस्तक्षेप गरिनु एउटा राष्ट्रिय लज्जाको विषय हो ।
पञ्चायत देखि नै निरंकुश राजतन्त्रको विरोधमा संघर्ष गरेका कानून व्यवसायी, नागरिक अगुवा देखि पेशाकर्मीहरुमाथि सरकार प्रमुख आफै कटु आलोचना गर्दै आएका थिए । स्वतन्त्र न्यायालयको सम्मान गर्नुपर्ने, लोकतान्त्रिक गणतन्त्र, संघीयता, समावेशिता जस्ता अन्तर्वस्तु निहीत संविधान जोगाउनुपर्ने सरकार प्रमुखले सबैतिर एकैपटक प्रहार गर्नु दक्षिणपन्थको चरम नमूना हो । तसर्थ, सरकारले यसतर्फ बेलैमा सोच्नुपर्ने हुन्छ । नत्र, फेरि पनि मुलुक २०६२/०६३ कै अवस्थामा फर्कने खतरा ज्यादा हुन्छ । भुल्नै नहुने तथ्य हो– यो व्यवस्था र संविधान रहे मात्रै वर्तमान सरकारको आयु समेत लामो हुनेछ, मुलुकको हितमा हुनेछ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies