दोहा, कतार : इरानले कतारमा रहेको अमेरिकी एयर बेसमा मिसाइल आक्रमण गरेको छ । इरानी सरकारी सञ्चारमाध्यमहरूले शक्तिशाली र विजयी प्रतिक्रिया भन्दै अमेरिकाविरुद्ध आक्रमण थालिएको घोषणा गरेका छन् ।
इरानको सरकारी सञ्चालित तास्नीम समाचार एजेन्सीका अनुसार, इरानको इस्लामिक रिभोल्युशनरी गार्डले कतारस्थित अल–उदेद एयर बेसमा मिसाइल आक्रमण गरेको हो । सोमबार अबेर राति कतारमा विस्फोटको आवाज सुन्निएको रिपोर्टहरू सार्वजनिक भएका छन् ।
यसअघि बीबीसीका सुरक्षा संवाददाता फ्र्यांक गार्डनरले कतारस्थित अमेरिकी नेतृत्वमा सञ्चालित कोअलिशन एयर अपरेसन सेन्टरमा ‘खतरा’ रहेको रिपोर्ट दिएका थिए । त्यसलगत्तै, कतारस्थित अमेरिकी दूतावासले त्यहाँ रहेका आफ्ना नागरिकहरूलाई अर्को सूचना नआएसम्म सुरक्षित स्थानमा बस्न आग्रह गरेको थियो ।
यस्तै, बेलायतका विदेशमन्त्री डेभिड लाम्मीले पनि कतारमा रहेका बेलायती नागरिकलाई सतर्कता अपनाउन भनेका छन् ।
कतार सरकारले स्थिति गम्भीर भएपछि हवाई क्षेत्र अस्थायी रूपमा बन्द गरेको छ, जसले गर्दा दोहा अन्तर्राष्ट्रिय विमानस्थलतर्फ गइरहेका विमानहरूलाई अन्यत्र मोडिएको छ ।
कतारको परराष्ट्र मन्त्रालयले अमेरिकी एयर बेसमाथिको आक्रमणको कडा निन्दा गर्दै यसलाई कतारको सार्वभौमिकता, हवाई क्षेत्र, अन्तर्राष्ट्रिय कानून र संयुक्त राष्ट्रसंघको चार्टरको स्पष्ट उल्लंघन भनेको छ । मन्त्रालयका प्रवक्ता माजेद अल–अन्सारीले भनेका छन्, ‘कतारको हवाई सुरक्षातन्त्रले इरानी मिसाइलहरूलाई सफलतापूर्वक अवरुद्ध गरेको छ र बेसमा रहेका सबैको सुरक्षाका लागि आवश्यक सबै उपायहरू अपनाइएको छ ।’
उनले आक्रमणमा मानवीय क्षति नभएको जनाउँदै कतारले यस निर्लज्ज आक्रमणको प्रकृति र परिमाणअनुसार उचित जवाफ दिने अधिकार सुरक्षित राख्ने बताएका छन् ।
यसैबीच, अमेरिकी ह्वाइट हाउस र पेन्टागनले पनि अल–उदेद एयर बेसमाथि सम्भावित खतरा रहेको पुष्टि गर्दै स्थिति निगरानीमा राखिएको जानकारी दिएका छन् ।
कतार नेपालीहरूको प्रमुख रोजगार गन्तव्य राष्ट्र हो । कतारमा इरानले गरेको आक्रमणपश्चात् त्यहाँ वैदेशिक रोजगारीमा रहेका करिब साढे ३ लाख नेपाली कामदारहरूमा त्रास बढेको छ ।
कतारसँगै अन्य खाडी मुलुकमा पनि अमेरिकी एयर बेसहरू रहेका छन् । खाडी मुलुकमा रहेका अमेरिकी सैनिक अखडा र सम्पत्तिमा आक्रमण भए ती क्षेत्रमा वैदेशिक रोजगारमा रहेका लाखौं नेपाली प्रभावित हुने देखिएको छ ।
