काठमाडौं : द्वन्द्वग्रत इरानबाट २ नेपालीको उद्धार भएको छ ।
भारतको सहयोगमा इरानको मसदबाट उद्धार गरिएका दुई नेपाल मंगलबार भारतको राजधानी नयाँ दिल्ली पुगेको त्यहाँस्थित नेपाली दूतावासले बताएको छ ।
अपरेसन सिन्धुअन्तर्गत इरानस्थित भारतीय दूतावासको सहयोगमा उनीहरूको उद्धार गरेको हो ।
उद्धार हुनेमा गणेश पोखरेल र सुमन गैरे छन् । उनीहरुलाई नेपाली दूतावास र भारतीय विदेशमन्त्रालयका अधिकारीहरूले विमानस्थलमा स्वागत गरेका थिए । उनीहरू मंगलबार नै बुटवलका लागि प्रस्थान गरेका छन् ।
छिमेकी पहिलो नीति कार्यान्वयनमा ल्याउँदै नेपालीको उद्धार गरिएको नेपालस्थित भारतीय दूतावासले जनाएको छ ।
इरानबाट उद्धार गरिएका २८१ भारतीय, ३ श्रीलंकाली र २ जना नेपाली विशेष उडानमार्फत मंगलबार मशहदबाट नयाँ दिल्ली आइपुगेका हुन् ।
इरानबाट अहिलेसम्म २ हजार ५७६ जना भारतीय नागरिकलाई उद्धार गरी घर फर्काइएको छ ।
