सन्तोश पौडेल/मध्यान्ह
खोटाङ : खोटाङमा धारिलो हतियार प्रहार गरी आफ्नै छोराले बुवाको हत्या गरेका छन् । जिल्लाको दिक्तेल रुपाकोट मझुवागढी नगरपालिका-२ सोल्माका ७५ वर्षीय कुमार राईलाई उनका आफ्नै छोरा ३७ वर्षीय सुवर्ण राईले हत्या गरेका हुन् ।
आइतबार बिहान ४ बजे बुवालाई धारिलो हतियार प्रहार गरी फरार रहेका राईलाई खोजी गरी नियन्त्रणमा लिन स्थानीयवासीले जिल्ला प्रहरी कार्यालय खोटाङमा जानकारी गराएका थिए ।
स्थानीयबासिले प्रहरीमा जानकारी गराउनसाथ तत्काल जिल्ला प्रहरी कार्यालयका सूचना अधिकारी एवं प्रहरी निरीक्षक अमरप्रसाद गजमेरको टोली घटनास्थल पुगी फरार रहेका अभियुक्त राईलाई अल्छेढुंगाबाट पक्राउ गरिएको जिल्ला प्रहरी कार्यालय खोटाङका प्रहरी प्रवक्ता एवं प्रहरी निरीक्षक सागर साहले मध्यान्हलाई बताए ।
२०७१ साल असार १७ गते राति टर्चको प्रकाशले आँखामा हानेर अलमल्याउँदै जिल्लाकै साकेला गाउँपालिका–२ रतन्छा पिनालाखाका हरिजङ राईको सुन र नगद लुटपाटमा संलग्न चार जनामध्येका एक सुवर्णले डाँका र हातहरियार मुद्दामा कैद सजाय भुक्तान गरेको केही वर्षपछि बुवामाथि नै धारिलो हतियार प्रहार गरेको प्रहरी निरीक्षक गजमेरले जानकारी दिए ।
मृतक राईको शव परिक्षण गर्न जिल्ला अस्पताल दिक्तेल पठाइएको प्रहरीले जनाएको छ । घटना के कारणले भएको भन्ने बारे प्रहरीले अभियुक्त राईलाई हिरासतमा राखी थप अनुसन्धान गरिरहेको जनाएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies